العدد 2542
|
السبت 22 أغسطس 2009م الموافق 01 رمضان 1430هـ -
سنة الطبعة
- تعرفنا على أسمك
جعفر محمد علي عبدالله الشيخ جعفر
- من سترة طبعاً
- أيه من سترة
سعيد أحمد ربيع
جعفر محمد
- سولف لينا، عن ويش تبون أتسولفون
أبومنير عنده سوالف واجد يعني تاريخ حتى عنده قصة عن جالبوت وعن زيارات الأول سنة الطبعة على قولتهم، حوادث واجد.
- سولف لنا عن سنة الطبعة
لا عن سنة الطبعة أنا جابوني في سنة الطبعة ولكن الطبعة ألي أنا شاهدتها في 1972، جاين هم الله يسلمك من العراق ولكن الأول طبعاً كلا على لنج باخرة لنج هذي، هو صارت الطبعة بالضبط محله ألحين مريدين، هذا ألي هو يسمونه النوخذة أو ألي يسوق النج ما أدري أغلط أو أغلط أو نايبة المهم راح على هذا المكان وأهناك جبل رفيع بس مغطنه الماي فصادها وأنكسرت أنكسرت وراحوا منها أكثر شيئ من البلاد وعندنا من سفالة وطبعاً القرية ما أعتقد راح فيها أحد من القرية لكن أكثر شيئ من البلاد ومننا إلي من البلاد حتى عميان يعني فيهم، المهم من عندنا أهنا من سفالة يعني أبنية وبته أولدها والحجي دا أراد ينقذ هذه البنية لأنهي زوجة أخوه بس ما قدر يعني كلش إلى أخر أنهوا نجى زوجته.
- يعني في ناس عاشوا من السالفة؟
أيه فيه ناس عاشوا أيه فيه ناس عاشوا ألي ماتوا تقريباً أكثر من 15 بس ما عندي الأحصائية كاملة لأن من البلاد ومن سفالة ومن يعني من جميع ؟؟؟؟
؟؟؟؟؟؟؟
أيه سفالة ناس معروفين أهني بس ألي من البلاد...
- فيه أحد من الأهل؟
من أي أهل؟ أهلنا؟ لا أحنا ما نسافر مجانين، المهم عرفت لو لا هذه الشغلة صارت في 1972 وفي أيام الصيف، النتيجة ألي نجى هو الحجي ألي أقول ليك عنه عمه مرة أخوه ولد هذي وكانوا بته والبت ألي من عند مرة أخوه مزوجنها وحدة جعفر بعد هذي أنتهت هي وي ولده صغير، هذا ألي كان موجود من ديرتنا، هذا ألي كان من البلاد فسمعت طبعاً كنت أنا حاضر أهناك فسمعت عنهم يعني الأكثر ثنين فيهم عميان وهذين العميان قريب من الموت بعد لا يقدر يروح مني ولا منا.
يعني السالفة صارت وأنا عمري سنة....
جدي والله زين...
أقل من سنة بعد.... أي شهر صارت تذكرها
ألي أذكره تقريباً يحتمل أن يكون في شهر جون شهر ستة.
- يعني صارت أكثر من طبعة في البحرين؟
أيه بس طبعات تختلف عن طبعات، أم هذيك ألي يقولون عنها الطبعة الأولى أحنا بعدنا أصغار أما أنا كلش يمكن ثلاث أربع سنين هذيك في 45 44 هذيك الأولى، هذيك الطبعة يمكن جعفر ما قدر يشاهدها.
- حجي جعفر ؟؟؟؟؟
- ولا سمعت سوالف عنها؟
ولا سمعت سوالف عنها ولا شيئ
- أنزين قول لينا أيقولون تعرف أشعار.
أيه أشعار، أشعار أعرف عن سترة، هذا يعني واحد ألهوا حجي قاري أيكون عزمنا أهني في سترة وأنعزم بالضبط بالضبط في مهزة، يقول سترة بلد ما كوا مثلها بالبلادين بجيوشها زادت على كل السلاطين لو توصل مهزة تشوف الجنب مقطور أرماح مشروعة وذاك البرمة شيقول. وسط النخيل مخيمة والعرش والدور حتى المساجد شحنوها يا مسلمين. ليلة العاشر يا أخواني في شهر شعبان بيها أنعزمنا عند بدر من آل عدنان هاشم ربيب المجد عالي الفخر والشأن من عترة الهادي نبي الله ؟؟؟ ، بن حجي محمد العرادي شاع ذكره ألهم علينا وصلت بينا العبرة شوفنا أوجوهم تشبه أقمار مزهرة وقلوب طيبة ترحب بكل المجبلين ما أقدر أعدد مقارهم الثاني عزوا جنابي وعضموا سدري وألساني وأنا أقل العالم وأدنى الدواني وعندهم صرت يا ناس من أعلى العظيمين شالوا حزن قلبي وزادت بها الراحة، لمن درينا صار عزمي على السباحة، وللماي رحت وأجيت أخذ الراحة وعلى الفرش دبيت جسمي يا محبين، ساعة ولن أسمع حنين وصوت عالي تاهت أبصاري وأندهش يا ناس بالي ظليت أتقلب على يميني وشمالي وأنا أنتخي وأصيح ما لي منهم معين، كل ساعة أخذ لي من محمد جيكارة وأقول يا خويا وقعدت بنا الغارة يا بلوة أبراهيم عجل وين الشطارة ثورة بحماسة وخذ ثاري من البلاعيم لا تتركوني أنت يا خويا وحجي سلمان يا أهل الشيم شيلوا بأياديكم التفقان بيبات من الفليت ثوروا على العدوان، لن صير بعد العز ذليلين قلت له نطلع قال أتوكل على الله داخل وبرة من الرباد أستخلف الله، قلت له نطلع والنصر نرجوا من الله وخارج طلعنا للحرايب مستعدين ساعة ولما الغيلم نفوا لينا السحالب، من قفوا من قدامنا حاطوا علينا قلنا ترى أحنا أضيوفكم لا تطردونا قالوا جينا أنزوركم وألكم محبين والله بلد فيها أوادم خش أوادم ولكن بهذه الآفات أبتلوا دون العوالم غارات البعوض ورزالت الغيالم ومصيبة الكبرى ألي غطت على الثنتين، ألحين شنهوا المصيبة الكبرى؟ ألي يقولوا حالة الفيران يحجي علي أبن الشيخ عن حالة الفيران طبوا وسط البلد وسووها غيران تركب بوسط الدور كأنها ذيول شيطان طمعت من دجاج البلد كلهم سلاطين، يحجي علي بن الشيخ عن فعلة فعلوها ستة عشرات دجاج من بيته كلوها هجموا عليه كلهم ثعالب هجموا عليها وفنوها ومن بيت سيد هاشم ؟؟؟؟ بديجين صاروا 18 وأما إبراهيم الشهم يحكي عن ؟؟؟ ألهم علم خيل الوقف ؟؟؟؟ أشدراه حاولوا البشرة وعيلوا للنخل صوبين صرنا نتوسل للعلي الواحد القهار للنبي الهادي المصطفى سيد الأبرار وبن عمه علي حيدر الكرار فيران سترة ما يخلي منهم أثنين، وهذا الشعر ألي أنشدته ؟؟؟ وكتبته كلها شيئ سمعته وشيئ شفته وجرب بنفسك لا تكذب عبدالحسين.
- أنت من أي منطقة في سترة؟
أنا من سفالة
- أنزين سولف لينا عن أسفالة الأول أيام شهر رمضان وين تروحون؟
رمضان أنروح نداور في الفريق من بيت إلى بيت ؟؟؟؟؟ ونروح نسمع،
- ؟؟؟ وين كنت تشتغل؟
أنا كنت أشتغل في البا
- وألحين صرت بحار؟
الحين جزاف، جزاف متنقل أبيع صافي وربيان الموجود.....
لا في السبعينات ما أشتغل
؟؟؟؟؟
- أنت عمرك بعمر الحجي؟
هو أكثر
- أي أحلى زمان الحين أو زمان الأول؟
زمان الأول أحسن من الحين، لأن الأول الناس في رمضان تفتر في البيوت...
- الحين ما يفترون؟
الحين ما يفترون ما فيه أحد، كان الناس تدرس في المجالس ألحين مافيه حتى المجالس بندوها، قليل بيتنا يمكن الحين يمكن عشرة أبيوت ألي يدرسون الأول كامل يدرسون كل الديرة ألي أي واحد عنده مجلس يدرس، الحين ما ميش، يسوون ختمات.
أذكر الأول ما أدري في زمنكم موجود أو مو موجود الأول أحنا عندنا أعتقاد أن بس في رمضان ما نشوف الجن فنسهر واجد، أنتون بعد جدي؟ نفس الشيئ ها.
لأن يقولون في رمضان الجن يتغيبون ما يطلعون.
- بس في سترة
كامل
- في شهر رمضان لعبة يسمونها غييبوا،
أيه غييبوا
هذه اللعبة الغييبوة ناس تتغيب مثلاً وراء الصندقة، يوقف والبقية توقف أطالع وين أيروحون، إذا تغيبوا واحد ينادي عليهم تعالوا، تعالوا ألحين وين أيحصلهم أتغيبوا خلاص ما ميش أحد، أيطردون ورائهم ألين يشوفونهم.
أتذكر أنسوي مربع وهذا المربع أيصير مثل السجن طبعاً هم ينتشرون كل واحد ينخش في مكان يتغيب في مكان، مجموعتين يعني مجموعة تبحث عن المجموعة الثانية أدورها، وأي واحد يمسح على رأس الثاني المجموعة الأولى تمسح على رأس الثاني يجيبونه في وينا في المربع كأنه مصيود في الصيدة يسمونها الصيدة هذي، زين أيجمعونهم كامل شوف ساعات يظل واحد قوي سريع في النهاية يطلع هذيلا كامل يدش عليهم نفس البسبول كذي ويطلعهم.
- أتحجى لنا عن شهر رمضان.
رمضان بعده ما يجي الله يفجنا منه...
تذكر أيام رمضان ؟؟؟؟؟
رمضان يجيبون دعاء العبد ويجيبون هذا بس هذه رمضان أدعية منهوا يحفظ دعاء العبد.
؟؟؟؟
أنا صرت وأي الوالد هذي في تقريباً وي الخمسينات أو 48 وزايد جدي أتوفت الوالدة عن أخر أخ أليي عمره ثلاثة أشهر ألي هو حسن ألي على عكاز، أهني أنا حصلت أزمة كبيرة يعني أستغفر الله رب العظيم ما عطاني منها أي حاجة، المهمة النتيجة، فظلينا أنا والوالد الله يسلمك في الليل أنروح أنجيب ماي نستحي لا غير بغال ؟؟؟؟ وهذي في الليل نجيب ماي وفي النهار الوالد يطبخ العيش وأنا أسوي السمج يا مشوي يا مقلي غير هذي ما نعرف وساعات ننساه بلا بزار وساعات نساه بلا هذي... المهمة أحنا ذاك وبعدين جاءت عمتنا الله يرحمنا من السعودية كانت مزوجة على الشيخ علي فجأت فصارت لينا دخيل الله كمسند عدل لا، يعني أحنا بعدين علينا أعمالنا وهي أسوي ؟؟؟ شيئ، بالإضافة هي ربت أخويي حسن هذا أخويي حسن صاده ذاك الأول يصير أمراض أثنين متتابعة يعني الجدري والحصبة هذا لازم أيصيد واحد منهم، فأنا صادني الجذري وكان يؤثر عليي في وجهي إلى مدة أنا وصلت 30 40 35 سنة باقي باقي في وجهي، وبعدين راح، أما هذا حسن أخويي صاده الحصبة وهو صغير فما أحد يقدر يعرف ويش فيه فعمتي هذه الله يرحمها راحت رقدت وياه في النعيم، والنعيم الأول الدكاترة ما يحتاج عاد ما تدري عنهم هندي نايبة صومالي الله أعلم، النهاية طلع بمرضه ؟؟؟؟ يعرج، الحين يعرج وبعده ستة شهور زايد قاصر ما نعرف عنه مهو مضبوط شنهو العرجة جايتنه أخرتها كبر على هذه الأشياء، أنزين أن كنت ألي هو حسن وعبدعلي الله يرحمه متوفي 1985 عن ثلاثة أولاد وبنات ثنتين هذا الأخ الوسطي لكن ألي أصغر مني بس بسنتين موجود أسمه جواد ألي عنده بيت عندكم في القرية وبيت أهني في الجبل على قولتكم أبوالعيش اسمونه، فالنتجية فظليت أنا أربيهم وأياي عماتي هذي وبعد ذيك أتوفى عنها حجي علي بن موسى مال الخارجية وجت عندي اللهم زيده، وأبوي ففي سنة 1957 طلعت من المدرسة صف الخامس الأبتدائية حاولت من 56 قالوا ليي أنت صغير أنا ألي قصير أنا مو صغير على قولتهم حبتي قصيرة المهمة واصلت لـ 57 حطيت ليي طابوقة وهو ما يشوف أعمي ؟؟؟؟ الأول غير على تور فنس الفنر ؟؟؟؟ أما عبد الغفار لو ذاك أيسمونه حسن غيث، فجاء اللعام قال ليي قصير وألحين أنا بعد كلش وأخذت ليي بعد جبلي رفعت روحي بعد أزيادة، المهم.
- حق تشتغل في بابكو يعني؟
أيه، وأشتغلت من سنة 1957 شهر بين جون وبين جولاي واشتغلت ويش عان اشتغلت ثلاثة أيام ايخلونا في العوالي جي أي تي ونمشي من البيت إلى عوالي والرجعة مثل ما ميش سيارات وأحنا ما نقدر نركب سيارة يعني لأن بعدنا تونا مشتغلين فقضينا الثلاية أيام في العوالي على أحساب الج أي تي يعني المبتدء هذا ألي جاي، فبعدين نقلونا للفينري قالوا يا الولد بنوديك على ؟؟؟ وي الميكانيكية هذا المكاين قلت والله بس لا تقول نزل ؟؟؟؟ وانا ما يخالف موافق.
- انزين حجي جعفر سولف لينا الأول أشلون عرست أنت، أيقولون الزواج الأول مهر غير.
الأول مئتين دينار.
- مهرك مئتين دينار أنت، من هو عطاك أياهم لو أنت جمعتها؟
أنا جمعتها، أشتغل في البحر وفي الشتاء أشتغل في البنيان.
- وأشلون تروحون تتقدمون أنت رحت أي الوالد مرة وحدة.
أيه ولي أمرك هو ألي يروح أنت ماليك شغل، ما تشوف المرة ولا شوف... أنت وحضك عورة عرجة جرفة عمية أنت وجانسك.
- عجل أشلون تختاره بس أيقولون ليك أن الوالد أختارها؟
الأهل هم ألي يقررون، برروح لبت جعفر بن الشيخ
الأم أو الخوات يطرشونهم أن كان هي إلا متخبية أشدراهم ويش في ظهرها....
ما يدرون عنها عمية عرجة عوراء مو شغلتك
- وفيه خطوبة بعد الأول؟
فيه خطوبة يخطبونها ويجيبون تالي ؟؟؟؟ يجيبون الشيخ ويعقد بس....
لا متشوفها
سيدي زواج الأول بس شهرين....
- ؟؟؟؟ ذبايح ؟؟؟؟
أيه ذبايح ويحلونك، أيه لأول ويسوون ليك زفة العصر والليل....
- تذكر جيف زفتك ويش قالوا ليك؟
زفتهم طبل وتصفيق ....
- تذكر الزفة ويش أيقولون فيها؟
الزفة هم ملاعين ألي متغربل فيها ألي يزفونها ؟؟؟؟ وهو ما يقدر أيشيل أيده ولا شيئ.
صلوات ربي عليه ومودينه رايح
- أحنا نبي شعر عن الزفة عندك ويش أيقولون الأغنية تذكرها ألي يقولونها؟
لا ويش أيقولون أيقولون اللهم صلى على محمد وآل محمد هوب صلوات ربي عليه، بس صلوات ربي عليه والخضر أبو محمد أغاني من أهل البيت بس.
- بس الزفة ما فيه ألحين، فيه زفة؟
ألحين ما فيه زفة، ما ميش وين عان فيه زفة ولا واحد ما ميش أصلاً ألحين...
لأن صعوبة المعيشة فمن جدي ما أحد يسوي.
لا مو صعوبة المعيشة
الحين يخلون ليك الريدو يخلون ليك المسجل وأمام المكرفون ويفضح الديرة كامل ولا أحد يقدر يتكلم، أيجيبون يعني عن الأشعار عن الإمام علي عن مولد أي إمام أو عن عرف إي إمام، بس وألحين هم ما يشيلون ويحطون هم أيجون للعيش إذا ما ميش عيش أشوف ؟؟؟؟ بروحه.
- الأول أنزين جم الذبيحة الواحد إذا بيعرس أيسوي، أنت جم ذبيحة سويت؟
على المقدرة يعني ما ميش واحد أيسوي أزيد إلا بعد نعم راقي كلش مثل الله يرحمه الشيخ منصور هذاك من جيس غيره.
- أبو منير أنا سمعت أن سترة مشهورة بصناعة المديد مهزة والخارجية.
الخارجية فقط مهزة كان فيها واحد.
- تذكره
واحد يسمونه السيد سلمان، وأما الخارجية فواجد واجد في الخارجية...
المشهورة كلش الخارجية
- من سعف النخيل يسوونها
لا مديد أسل ، أسل الأول أسل يقوم بالبر في كل مكان أسل على طول رجال أيجي اسل، وهذا الأسل يخذه وينشره ويبسه وبعدين أعزك الله يدخله في خيوط بعد سبحان الله علم الإنسان مالم يعلم ألحين وين بعدين يسوونه كان يسوونه تالي في بني جمرة، بني جمرة هذلين ثلاث أرباعهم كانوا يسوونه أبو فتيل أو فتيت الله يعلم، المهم هذولين ألي كانوا يسوون الأشياء بكثرة وحتى برانص يسوون لكن على خفيف يعني جدي، أنزين لو ما جاونا الله يسلمك الأجانب جان أحنا مشينا أمفصخين لباجر الأجانب هم ألي زينين، ألحين غير والأول غير.
- الأول ويش الحياة، أنت تعرف تتكلم أنكليزي.
يعني على قولت الهنود تورة، تورة يعني قليل.
- ويش الحياة
الأول كان أهني كل نخيل فيه نهرة ماي يمشي غيلم الرطبة أتطيح تنهشها الغيلمة وأحنا نأخذها من بوزه نغسلها بس ونأكلها.
ما نمرض شارع المجانين يحرسه رب العالمين مرض ما ميش....
فيه مرض...
لا فيه مرض الخناق، الخناق ألي يسمونه....
- الخناق ويش هذا؟
الضغط يسمونه الأول الخناق، ينادون على واحد من النويدرات معراج وتالي المعامير أيجي ويحط ليه أهين خيط ويضرب هذا ويطلع الدم الفاسد وخلاص.
- يعني نفس الحجامة
أيه نفس الحجامة
لا الحجامة غير الحجامة أهنى هذا الفصاد أهنى...
يطلع الدم الفاسد
الفاسد أيقول أشدراه هو فاسد لو مو فاسد
أيطلع ألي هس تالي المنجي الله، عجل بعد ؟؟؟؟ على قولت الهنود معلوم نية جيف يعرف عن فاسد وغير فاسد.
- أنزين والأول منهو ألي يسوي ليكم خبز فيه خباز عندكم؟
الخباز أهني كان سابقاً كلش خباز ما ميش قالوا ؟؟؟؟ أيسمونه واحد ؟؟؟ الساري لكن أنا ما شفته من سفالة ما شفناه.
- يعني ما كان عنده خباز هو لو يبيع ؟؟؟؟
ما أدري بس أيقولون أنا سمعت يقولون فلان يخبز بس.
تالي صرنا أنعيش على المنامة
- في جدحفص عندنا فيه سراديب الأول، عندكم أنتون سراديب تحت البيوت؟
أبيوت ما ميش أنجيب سراديب من وينا
أهي ألي عنده حجرة مال الأول عرفت لو لا هذا يقولون ليك هذا بيت شيخ منصور لأن ما ميش جل كل كبر يعني تحت مثل من طين وحصى وفوقه سقفه من جرير هذا يسمونه كبر هذا يسمونه كبر أما البرستج غير جمعه كل من سعف هذك أيسمونه برستج.
- أنزين خلنا نسألك عن الباربورة في النويدرات تعرفها؟
أيه البربورة هذه غرب النويدرات...
هذه البربورة محمد على فكرة مشهورة
- أنزين تذكرها أنت البربورة شفتونها بعيونكم
- أبو منير شفت البربورة أنت.
البربورة هذهي نفس ألي في النويدرات هذه البربورة، البربورة هذي أيقولون كانت نخيل بس.
- أنزين البربورة تبع سند أو تبع النويدرات؟
تبع النويدرات
هذي كانت على الشارع ألحين
والله أنا سمعت من أبويي أنا مو تبع النويدرات أبروحه قرية بروحها كانت فيه بساتين...
لي الآن فيها مقبرة النويدرات إلى بكرة...
- كانت الأول ويش؟
الأول نخيل دولاب حتى بعد هذا أتأجرها كم سنة ألي هو حجي أحمد ألي خده جدي مال العكر أيسمونه أحمد حبيب ألي كان يشتغل في البا خشمه جدي منفشخ يسمونه أحمد حبيب زوجته بعد ألي هي تمرخ وتجوي.
- أنزين هي مو تبع هورة سند؟
لا سند وين عنها سند بعيد سند في الشمال كلش، سند ألحين....
- أنزين ليش مسمينها البربورة هي؟
هي البقعة من أول أيسمونها البربورة هي كلها نخيل وفيها مقبرة وفيه يعني أرض يعني فالتة حتى أحنا لينا فيها.
- الأرض مالتكم كانت صوب بربورة؟
أيوه في بربورة
- أيقولون الأول هي كل نفس البساتين والزراعة وكلشي ينزرع فيها أحنا ؟؟؟ بأرض ؟؟؟ وأبتاعت لكن نص البيعة على واحد سيد من البلاد، فجاء ذيك السنة.... هذه البربورة ألي أقول ليك عنها هذي أصير بالضبط غرب النويدرات وجاية على الجنوب أشوي عدل مضبوط وجاي على الجنوب قليل يعني ألي ألحين الشارع أو بالضبط الحين ألي فيها هذا ؟؟؟؟ سبر فير جواد وهو رايح على الشمال هذي البربورة، كانت فيها.....
- هي يعني الديرة يسمونها بربورة؟
لا مثل أبوالعيش أرض....
- أرض يعني تبع سترة بس أيسمونها أبوالعيش؟
أبوالعيش هذيك بعد أرض وفيها نخيل سابقاً حتى أن أقول ليك لينا أحنا فيها، بس ما أدري 75 أو 74 جاني سيد، ألي يقول ليي أنت جعفر محمد علي ؟؟؟؟ قلت ليه أي نعم، قال ما أقدر أن أكلمك، قلت شوف ما فيه واحد يتكلم مع واحد مخبي لا أشوف وجهك ولا تشوف وجهي ما يصير عرفت لو لا أنت عندك بيت وأنا عندي بيت يا أجيني أو أجي تعطيني الكيشن العنوان عدل لو لا، قال ليي مع لا جاء والله عنده سيارة بعد أميركي وأربعة أرقام قلنا أو نعم، طلع سيد قال أنا عندي خارجة بأسمكم، أيه ويش تقصد يعني ألي في بربورة يعني قال أيه...
- هذي سنة كم؟
- يوم أيجيني هو تقريباً 82 فقلت ليه هذي في بربورة عدل حسب ما أذكر أن أليها زاوية قال صح وعطاني الخارطة، نعم ويش تبغي قال أنا أبي أشتريها ومن الألف إلى الياء على حسابي بمعنى شهود ما شهود كل شيئ، فهو قال ليي من الألف إلى الياء عليي أنا يعني شهود ما شهود أنت عليك أدبرهم بس عليي أنا، قلت ليه أنا كيف أبيعك أياه وأنا وي أخوتي مو عدل وعندنا أخو متوفي، فغير معقول ألي يقول لا أنت عجل إنسان خواف، قلت وألي ما يخاف ما يأمن، ويش هس أنا خواف، قال أنا مشيت إلى كذا نفر في بوري وفي عالي بدون أهله، قلت هذاك نفسك يا سيد، قال شنهو مثلي، قلت حرامي.
المهم أن تالي الأرض راحت
أنزين حرامي ما يصير، قال أنت جيب ليي شاهد، النتيجة تالي يوم أصالحنا وي جميع الأخوان هذي كان حاضر عليها ؟؟؟ والملعون ؟؟؟؟؟ أسمعت لأخرتها يوم هذي أتصلت ليه تعال ألحين حمد الله صلح وعندنا فريضة على الأخو المتوفي وأنا بتوكل عن أولاده وعن بناته من بيعطيني عشرة الآف إلى تنازل إلى خمسة الآف، قال الأراضي رخصت ومدري ويشوا قلت ياسيد فيك بعض السوء لكن أحنا محتاجينك معا لا، السوء سوء فيه عدل، جمعته وي الأخوان ها ترى الشخص سابقاً ما أغبي كلام عليهم سابقاً بغى يعطيني 10 الآف الحين يقول جدي الأرض بقول ليكم كبيرة لكن فيه بس زاوية وحدة من صوب الشمال صايرة جدي تنص ولكن الكبيرة المجاورة إلى مصنع أحمد محفوظ العالي، في البربورة نفسها أنزين في الأخير عرفت لو لا قال ليي أحنا الأحين إذا هو بيتكفل بكل شيئ موافقين، شوف هذا السيد أكبر حيال، قال أنا بعطيكم الحين نصف الثمن يعني 2500 ويش أنتون ما أحد وافق نبغيك تكتب ورقة بينا وبينك يا سيد أن عطينا الحين نصف الثمن وبعدين، قال لمن أحصل على الوثيقة أكمل ليكم الثمن بس عليك أن جيب ليي شهودين ألحين كل شيئ متكفل به ؟؟؟؟؟ ذولاك ما يدرون عنها، قلت ليه حاضر أجيب ليك شهودين وشرط بينجحون أكبار وأكبر مني في السن، وديت ليه أشهودين ونجحوا ظلين أحنا نحاتيه وأواصله بالتلفون قال ها أيه صحيح الحين في التسجيل العقاري ومدري ويش وبعدين أنفلت هو في الأمر ويش النتيجة الحين ألي يقول النتيجة طلع ليي شيخ أيقول أليه، قلت ليه سيد أنت وجهك شري من أصل عرفت لو لا، ولكن أنا ما أقول شيئ إلا مع الجماعة، إلا يقول لا أنا أبغي بعد 2500 ألي عطيتكم أياها قلت الورقة إلي بينا وبينك شنهوا ما ليك حق ؟؟؟؟ بس الباقية هي أحنا جاوبنا على الباقية ألي ألينا وأنت أدعيت أخذه شيخ أي شيخ قال واحد أسم شيخ عبدالله ومدري ويش المهمة الشخص طلع عيار، ؟؟؟؟ ما يفيد قلت ليه سيد سيد أنت بعد لكن ما يخالف أن راحت قلت ليه يا الله ؟؟؟؟ ويش أنسوي بعد أحنا.
- أنزين أتقول لينا شعر قبل ما ...
شعر لو لغز
- وحدة من ثنتين لا شعر
شعر اتوكل على الله، الشعر بنجيبه ليك بعد عن الديانة بعد، أن الصلاة فهي أفضل القرب، وأكمل الطاعات قراً وأحب، عمود هذا الدين والعنواني، لسائر الأعمال والميزاني فأن قبلت فغيرها بها قبل وأن تردوا رد كل ما عمل، في العقل بأن فضلها والنقل من الكتاب يقصد القران ووصايا الرسلي وفي النصوص عن ائمة الهدى في فضلها ما ليس يحصى عدد، عبادة اللسان والجناني وطاعة تحيطوا بالأركاني، ما جمعت عبادة ماجمعت من كل جنس طاعة تنوعت، فيها مثول العبد للمعبودي، بين الركوع منهوا والسجودي يجعل أعلى موضعاً وأشرفا، رجاء عفوا ربه على العفى، بها إلى الله العباد تقترب، وذاك قول الله وأسجد وأقترب، يدعون فيها ربهم تضرعا، وما بهم يعبهوا لو لا ذا الدعاء، معراج كل مؤمناً مستيقني حافض سر ربهي المهيمني، فريضة خير من ألف حجة، ما يقصد الحجة يعني الواجبة العمرة، فريضة خير من ألف حجة، وحجة خير من الدنيا وما فيها روي شيخ العلماء.
- أنزين قول لينا اللغز؟
اللغز الله يسلمك اللغز، فيه بحريني راح مصر يبغي يزوج مصرية......
أنزين، مهفهفة الأذيال عذباً مذاقها تحاكي القنا لا شك بغير لساني، ويرجى لكل الناس فيها منافعاً وتأكل قبل العصر في رمضاني.
- ويش هذي حلها أنتا؟
أحنا نعرف حلها شيئ نقول عنه مهفهفة الأذيال عذب مذاقها شيئ حلو يعني، تحاكي القنا لا شك بغير لساني يعني ما عنده لساني، ويرجى لكل الناس يعني ما تضر أحد ويرجى لكل الناس فيها منافعاً وتأكل في العصر في رمضاني، هذي أن عطيتها شركة ثلاثة أشهر ما حلوها.
بعد تبي لغز غيره.
- أول شيئ عطنا الإجابة
قصب سكر
إذا تعصره خلاص
يؤكل قبل العصر
قبل العصر يعني قبل ما تعصره عارف لو لا هذي معناه
وهو مهفهف الأذيال يعني هو قميم الشجرة
- أنزين هذا اللغز منهو مسونه أنت؟
لا أنا حافظنه من كتاب أيسمونه زهر الربيع، لكن من زمان أكثر من 35 سنة.
- أنزين اللغز الثاني شنهوا؟
أيقول ليك هذا طائر طائر ومر على أطيور جف مثلنا أحنا، أنقول السلام عليكم أيتها المئة هذا الطائر بروحه يسلم على ذولاك قالوا ما حنا مئة أنت غلطان بالحساب، قال جيب قدرنا ونص قدرنا وربع قدرنا وأنت ويانا وأنصير مئة كم هم.
ألغاز واجد يعني تبغي غيره، أنزين أنغيره، وطائرتاً تحوي لأربع أحرفاً وعظماً ولحماً والدماء وريشوا كل طائر يحمل هذه الأشياء، فيؤكل منهوا البعض والبعض ضده ما يؤكل ويحرق منه البعض وهو على قيد الحياة وهو يعيشوا.
- ويش هذا
الحين ما تعب روحك، أربع أحرف يعني، أنزين لكن في شيئ يؤكل وفي شيئ مايؤكل وفي شيئ يحرق ولكن هو على قيد الحياة ما فيه شيئ هذا النحل، النحلة العسل يؤكل لكن ألي أيجي من ورائه العسل هذا يسمونه ؟؟؟؟ شمع، الشمع يحترك يحطون فتيلة ويحترق وهو على قيد الحياة ما يخالف، وكل طير فيه هذه الأشياء لحم وعظم وذاك كل واحد حتى بني أدم، ألغاز واجد.
- مشكور
صحيفة الوسط البحرينية - العدد 2542 - السبت 22 أغسطس 2009م الموافق 01 رمضان 1430هـ
خيارات:
شارك: 
التعليقات (0)تنويه : التعليقات لا تعبر عن رأي الصحيفة
-
ارشيف الانتخابات النيابية والبلدية
-
اقرأ ايضاً من (الناصية) لهذا العدد
-
ملاحق الوسط
-
دخول الأعضاء