يستضيف برنامج «الناصية» الذي يبث عبر «الوسط أون لاين» اليوم في حلقة جديدة الرسم عبدالرحمن عبداللطيف جمعة بوفلاسة يتحدث عن فيها تجربته مع فن الرسم، وكيف اكتشف أهله موهبة الرسم لديه، كما يحدثنا عن كيفية تنمية هذه الموهبة مع الإمكانات البسيطة التي تتوافر لديه.

* هل من الممكن أن تعطينا فكرة ونبذة عنك؟

- بسم الله الرحمن الرحيم، اسمي عبدالرحمن عبداللطيف جمعة بوفلاسة عمري 23 هوايتي الرسم وأحب الرسم من يوم طفولتي، لما اكتشف أهلي هذه الموهبة فيّ كانوا يحاولون أن يساعدوني بأية طريقة طبعا تلك الأيام ما فيه إمكانيات يعني مثل الحين بس لكن كانوا يساعدوني بأشياء بسيطة مثل الأقلام الخشبية وألوان الخشب.

* يعني كانوا يوفرونها لك؟

- نعم، كانوا يوفرونها مع أنها كانت بسيطة لكن كانوا يوفرونها وكانوا يوفرون الأوراق، وكنا متعلقين كثيرا بالرسوم المتحركة ونشوفها نحاول أن نأخذ منها الشخصيات ونرسمها في أوراقنا ودفاترنا نفرح لما نسوي هذا الشيء، طبعا كنت أنا مع أخواني، بس البيت لاحظوا تميزا عليّ بأني موهوب في هذا الموضوع، فيحاولون أن يوفروا الأشياء التي أتمناها وتنمي موهبتي من ألوان مائية فلما صرت في مرحلة شوي متقدمة من السن في أول أعدادي تقريبا ابتدأ المدرس بعد يعجب بأعمالي وكان يشجعني ويحاول أن يخليني أشارك في مسابقات ويحاولون يوفرون لي بعض أدوات الفن، وفي مرة من المرات فزت في المدرسة، كانت مسابقة عن رمضان شيء جدي، ففرحت يعني وعطوني هدية وللحين تميت في هذا المجال بعد أحاول أطمح، الطموح الذي عندي مو بس أن أرسم كاريكاتير وبس لا طموحي أن رسوم كاريكاتير يكون عندي أعمال تكون رسوم متحركة الناس تشوفها على التلفزيون وأشوفها في الصحف والمجالات فهذه كان أمنيتي من الرسم أصلا، إن أنت تنقل ثقافتك العربية والخليجية برسوم بسيطة معبرة الكل يفهمها والكل يحب يقرأها وأن يستفيد منها، ممكن أن تكون حتى قصة هادفة حق الأطفال وهادفة حق الكبار بس أن المشكلة التي تحسك فيه لازم عواقب مثل ما تقول حواجز، أنت هنا أشوي أشوي تتخطاها يعني البداية ما فيه إمكانيات أنت الحين عندك كمبيوتر عندك الحين فوتوشوب عندك أجهزة الانترنت تقدر تدخل على الشبكة وتشوف أعمال فنانين كبار كانوا من بداياتهم إلى نهاياتهم وإلى وين وصلوا في مستواهم، أنت تستفيد منهم، فإن استفدت من هذه الأشياء أنا تميت أحاول أمزج بين الرسم باليد وبالكمبيوتر فأحين صار عندي نوع شوي أسلوب أشوي مختلف، قبل كنت بالألوان الخشبية والألوان المائية وبعدين بالكمبيوتر والأجهزة المطورة يعني فيعني مثل ما تقول الهاوي بعد يحب أيكمل بعد مشواره وأن يواصل أن يشوف أعماله على شاشة التلفزيون.

* هل حاولت أن تنفرد بعمل، يعني عمل يخصك أنت بروحك؟

- أنا حاولت في أفكار في بالي أسوي عمل.

* مثلا كارتون للأطفال يخصك أنت بروحك؟

- أهو يصير بس الله يسلمك محتاج مثل ما تقول دعم، يعني هذه القصة التي أنا رسمتها كانت حق مؤلفين معروفين في البحرين مثل علي الشرقاوي وعادل جمعة المحميد وأنيسة الرويعي وفي منهم بعد لحد الحين ما خلصت قصصهم، لكن يعني هذي مثل ما تقول أهم يدعموني أن أهم يطبعون المادة مالتهم، فيسهلون عليّ عملية أن شغلك أيشوفونه الناس.

* يعني ما فيه مردود مادي؟

- فيه مردود مادي لا يعني لازمن أنقول فيها مردود مادي بس أنت تبي اتسوي شيء باسمك، شخصيات كارتونية تعبر عنك أنت وتنشرها بإمكانياتك أنت يكلف يعني.

* هل حاولت أن تبتكر مثلا شخصية في تصويرك في بالك أنت شخصية تنفرد أنت بها، مثلا - مثل فروحة تذكر أول اللعام في شهر رمضان فروحة في تلفزيون الكويت؟

- نعم نعم، فيه شخصيات أنا حاولت أن أرسمها كان عندي شخصية أحبها من يوم كنت في ثاني إعدادي كنت أحب شخصية اسمها رشود، أهي فيها مثل ما تقول فكاهة أو مثل ما تقول فيها من المقالب الشقية، لكن ما صار لي الفرصة.

* ما حاولت تنميها؟

- والله أرسم بس أن لحد الحين ما أحس أن قدرت أن أوصلها كفكرة تنطرح في الأسواق.

* أعتقد في الحين أجهزة الكمبيوتر نفس ما قلت وقامت يمزجونها بالأعمال فما صارت سهلة ليك؟

- أهو أن نسوي الشخصية ونبتكرها هذي يعني عندي سهل بس أن أنت تنشرها وتكون مادة الناس تشوفها في الأسواق أو في المحلات أو ذي هذا من الصعوبة، أنت تقدر ترسم تقدر تنتج أعمال تقدر تنتج أعمال تقدر أسوي شخصيات وتألف قصص بس ما تقدر أطلعها والناس يشوفونها إلا يعني بتحطها في الانترنت بس ما تقدر تحط كل شيء من أعمالك في الانترنت لأن فيه بعد ناس بيسرقون الأعمال يعني أتكون سرقة فكرية حق أعمالك أنت كشخصية أنت ألفتها وابتكرت شخصيتها وخليت أشياء مميزة فيها باجر أشوفها على التلفزيون واحد سوواها يقول ليك أنا سويتها، فأنت ألي تقدر تنشره نبذة بسيطة عنك وإذا فكرت أنك تنشر أعمالك كاملة ويشوفونها الناس هذا لا يبي لك جهة خاصة حق أن تحفظ حقوق أعمالك أنت كالإنسان أن أنت رسمت هذه الأعمال وتنحفظ ليك باسمك أنت كرسام عبدالرحمن أنت راسم هذه الشخصية.

* يعني هل تعتقد أن ما فيه دعم للمواهب الشبابية في هذا المجال؟

- والله أشوف هذه الأيام التلفزيون انتشرت واجد برامج حق الشباب وهذا الشيء واجد حلو يعني أن تلفزيون البحرين أن قاعد ينمي أشياء الشباب ويطلعهم على الساحة الفنية ساحة التمثيل المسرح، بس مجال الكارتون لحد الحين ما وصله مثل ما تقول التغطية بس نتمنى أنشاء الله نصير مثله.

* وفي حالة الرسم هل تأتيك الفكرة وطبقها أو لا مثلا واحد يطرحها عليك، يا عبدالرحمن سوى ليك كيت سو ليي كيت، مثلا صورة الملك أهني أشلون جتك الفكرة ورسمتها؟

- هذي صورة جلالة الملك لما فكرت أرسمها كان مناسبة العيد الوطني أنا طبعا رسمتها في البداية سكيش فأعجبتني فقلت خلني أدخلها على الكمبيوتر الحين وألونها بطريقة كأنها لوحة زيتية أشتغلت عليها قعدت يومين ثلاثة هالون طلعت الشغلة حلوة يعني سويت بعد كذا وحدة أعمال ثانية نفس الشيء حق جلالة الملك، بس الجهة الي كنت أتمنى أن ينشرونها لي اللوحة ما نشروها لي فما صار أن الناس تشوفها.

* وباقي الصور مثلا الكاريكاتير تأتيك الفكرة في بالك وتطبقها؟

- هذي الله يسلمك على الوضع ألي أنا مثلا أفكر فيه، مثلا ساعات أنا جاي في بالي قصة كوميدية فأنا أبثدي أرسم شيء فيه من الكوميدية، قصة مثلا عن الإسراف أو عن التبذير أو عن الدراسة أو التعلم، فتأتيك الفكرة فأنت تهيئة الشخصية بالشيء ألي أنت تبيه أو ولد مهمل أو بنت مهملة في دراستها فأنت تتخيلها بشكل شلون كارتوني أتكون وتبتدي ترسمها أما مثلا الأفكار الثانية مثلا يعني أشلون أن أنا أجيب الموضوع وأن أفكر فيه فهذا يعني مثل ما تقول ساعات يصير بورقة بسيطة أسجل فيها أن أنا أبي أسوي الحركة هالون أو الشخصية بهذا الشكل شيء كروكي يعني في ورقة بسيطة كروكي، سيدي من أسويها جدي لما ما كان عندي ورقة لما أوصل البيت أحاول أن أرسم اللقطة هذه أو الشخصية هذه بالمواصفات ألي كتبتها أنا، وساعات مثلا أحد المؤلفين لما يقول لي ارسم قصة يعطيني نبذة عن الشخصية شلون شكلها وشلون يتخيلها وشنهوا أسوي من حركات فأنا أتصور الشيء ألي قاعد يعطيني أياه، وأحاول أطبقه له في ورقة أيشوفه طبعا بنسل وممكن بعد ساعات أسوي ليه ملون مطبوع وجاهز وهو يعدل أشوف بعد عنده أفكار يضيفها وأنا بعد أضيف ألي عندي وتطلع الشخصيات يعني هذا ألي قاعد أسويه حق أن أنشر الشيء أو أسوي كشخصية أو كاريكاتير.

* هل تحاول أن تمزج مثلا الكلام الشعبي أو الكاريكاتير في الرسومات أو لا؟

- طبعا هذا أول شيء سويته لما شوي فهمت في الرسم شوي فهمت في ابتكار الشخصيات صار عندي أن لازم أسوي شيء مغاير ما يصير أن قاعد أشوف شخصية مثلا في التلفزيون أو على شاشات الفضائية وأقوم أقلد عليها، فأنا ما استفدت شيء فهني صار عندي أن أحاول أن أجسد شخصيات بحرينية، بحرينية بحت، يعني شلون قاعدين نشوف الناس في الشارع في الأسواق صوب البحر نحاول أن نأخذ الملامح البسيطة والتعابير اللطيفة في الناس هذي ونجسدها بشكل كارتوني الناس لما تشوفها تتقبله تقول أو والله هذا كأنه بحار بحريني أو كأنه صياد أو مزارع فأنت تفرح لما أشوف عملك يلقى إعجاب الناس بهذا الشكل وبهذا الصور.

* فيه رسومات يعني تعزها أفضل من رسمة ثانية أو لا كل الرسومات عندك متساوية في المعزة، فيه مثلا أول رسمة ليك تتذكرها؟

- أول رسم ألي كانت الله يسلمك أذكر قارب وعليه شراع مثل ما تقول مثل ألي نشوفهم في الشارع، وكنت يعني أحب هذه السوالف البحر والسفن أنا هذي مثل ما تقول شيء من البحرين يعني تحب أنت هذه الأشياء أتشوفها، ثاني شيء من هذه الأشياء ألي أعزها يعني أن أنا أحب الكارتون مهما كنت أحب أرسم بورتريه وأحب أرسم يعني شيء واقعي الكارتون هو ألي أنا أحبه أصلا وأحب أن أواصل فيه لمشوار أكثر مهما كان من أعمال، يعني فيه ناس يقولون لي اترك عنك هذا الرسم اقعد تعلق باللوحات الشخصية أو لوحات كبار الشخصيات وفيه ناس بعد يقولون لي خلك مثلا في الرسم التشكيلي مجرد مجسمات أو أشكال، لكن أنت يعني تبي ذاتك فأنت تبي شنهو أنت تبي الكارتون هذا أنت تحبه من قبل وتحس أن ما فيه أحد سواه أو فيه ناس سووه فيه فنانين سووى هذا العمل لكن مو بشكل ألي يحبونه الأطفال مجرد أنه أشياء معبرة أو شيء كاريكاتير سياسي أو كاريكاتير... لكن كاريكاتير أطفال يعني هذا ألي أنت تحبه وتبي توصل له.

* رسوماتك هل حصلت إشادات بها من قبل أحد، من قبل أحد الفنانين؟

- والله فيه عندي أخ عزيز اعتبره صراحة الفنان شاهين معراج فنان تشكيلي، يعني لما شاف موهبتي يعني مثل ما تقول ما قصر علي بأي شيء من نصائح من تجاربه السابقة.

* نقدر نقول إنه له الفضل الأكبر في تنمية موهبتك؟

- أهو له نسبة من الفضل بس أن بعد لك أنت الناس ألي حواليك من أسرتك بعد ساعدوك لو بلفتات بسيطة بلمحات بسيطة من الوالدة والوالد وأخواني وأهو كذلك يعني وزوجتي بعد الكل يعني يساعد مثل ما تقول أنا ما قلت ليك ان صرت كرسام إلا لما عدة من الناس، كل واحد يعطيك رأيه غير الناس بعد ألي حواليك في المجتمع بعد لما أيشوفون أعمالي يعني يعطوني لفتات بسيطة عليها، افتخر بهذا الشيء لما أحد يعطيك نصيحة ويعطيك يعني مثل ما تقول إيجابيات ألي في أعمالك والسلبيات بالعكس هذا لازم أنت يقوي الفن عندك ويقوي عندك السعي في هذا الطريق أكثر.

* وهل تعتقد أن موهبة الشاب البحريني بالذات شيء غريب عليه على الشعب البحريني هذا الشيء، كنموذج أنت موهبة بحرينية؟

- لا والله ما أشوف أن غريبة هذي كلش الشباب البحريني كلهم موهوبون يعني، لكن فيه مثل ما تقول ثغرات أن مو قادرين يطلعون على الساحة أن أنشوفهم يعني لأن ما فيه برنامج مثلا معين حق رسامي الكارتون أو ذي حق تطلع المواهب هذي أو حتى في الشغلات الثانية، ولكن على الساحة الثانية بالعكس.

* بس أعتقد ما فيه مشاركة لك عالمية مثلا مسابقات دولية أيسوون هذه الأشياء، ما حاولت؟

- فيه مسابقات بس دائما يكون سنها حق الأطفال، أما حق ألي في عمري الشباب من عشرين لفوق ما شفت لحد الآن لو فيه شاركت فيها.

* في شهر رمضان، ويش الأكلات ألي تحبها؟

- والله يا خوك ألي أحبه يعني الوجبة المفضلة المجبوس والهريس والثريد هذي الأشياء ألي كنت أحبها واجد يعني.

* الأماكن ألي تحب تروحها؟

- أنا في الليل ما أطلع واجد وإذا كنت أحب أروح مكان أحب أروح البحر جلسة عند البحر واجد حلوة بس أن طلعاتي قليلة وذلك لآن كرست دائما وقتي وقت فراغي في تنمية موهبتي بشتى أنواعها.

* يعني أنت مصر على تنمية الموهبة؟

- أي نعم مصر أن أنميها وتطلع بشكل الناس كلها تفرح بهذا الشيء أن فيه ناس بحرينيون يسوون كاركاتير بهذا الشكل وبهذا الاتقان، لأن هذي ألي أنا أتمناه لما أنت أتسوي فكرة لما تسوي عمل تتمنى أن مثل ما أنت تستمتع فيه باقي الناس ألي حواليك يستمتعون فيه مثل ما أنت قاعد أشوفها بشكل حلو وجميل.

* بهذي الصورة تأمل من الجهات المعنية شيئا معينا تجاه الموهبة البحرينية؟

- أتمنى لو يعني يكون فيه برنامج حلو يستضيفون فيه الشباب ألي عندهم مواهب ومخفية مو قادرين الناس يشوفونها يعني لو يكون على شاشة تلفزيون البحرين مثل ما نشوف البرامج الحلوة ألي حق الشباب بعد نشوف برنامج حلو بعد هلون يطلع المواهب ألي مو أنه مشهورة لا المواهب ألي إلى الحين ما نشهرت تتمنى أن تنشهر فهذا ألي أتمناه أنشاء الله، وما شاء الله يعني في البحرين لاحظت مو بس أنا أرسم كارتون أو كاركاتير بهذا الشكل فيه مواهب واجد شفته ولمحتها بس ما قدرت أتواصل وياه لأنها كانت عابرا مثلا في مجلة أو في جريدة أو في معرض يعني كنت أتمنى لو يكون فيه بعد كونتكت معهم كلهم لأن أشوي حلو كنتكت مع الفنانين في البحرين.

* عبدالرحمن كلمة أخيرة للجريدة للقراء؟

- أشكر جريدة «الوسط» على إتاحة لي الفرصة هذي ألي يعني جاءتني كأنها مفاجأة صراحة جريدة «الوسط» معروفة ما شاء الله عليها في الساحة بكتابها وأقلامها ألي يعني ترفع الوطن وتعين المواطنين في كل مكان بالعكس هذا شيء جميل أن الجريدة تستضيفني وتأخذ المواهب البحرينية وتسأل عن المواهب تبحث عنهم لأن هذا الشيء ألي نتمناه حق أيكون تواصل بين الصحيفة والشعب يعني في البحرين وشكرا.