«بيزة» هي العيدية سابقاً ورمضان كان له طعم آخر

مفتاح وسلطان في حديثهما لبرنامج «الناصية» الذي يبث عبر «الوسط أون لاين» اليوم «بيزة» هي العيدية سابقاً ورمضان كان له طعم آخر

الوسط - محرر الشئون المحلية * التقى الزميل محمد الجدحفصي في برنامجه «الناصية» الذي يبث على»الوسط أون لاين» اليوم (السبت) في حلقته هذا الأسبوع الحاج رجب مفتاح الذي يجلس عادة في شارع التجار بالمحرق وبرفقته الحاج بطي سلطان وآخرون يتناولون أطراف الحديث فيما بينهم... الجدحفصي جلس وتجاذب أطراف الحديث معهم عن ذكريات الماضي وكيفية وداع شهر رمضان ومقدار العيدية التي يستطيع أحدهم تحصيلها في يوم العيد... فكان هذا اللقاء: * هل نستطيع إجراء مقابلة معكم بخصوص وداع شهر رمضان؟ وكيف كان ودع شهر رمضان أيام زمان وطريقة استقبال العيد؟ - رجب مفتاح : في رمضان يقعدون في المساجد ويقرأون القرآن ويمشون في المحلات الطيبة، ويروحون العصر يجيبون لهم أكل وخضار وتمر وخبز ويجمعون لهم الأكل حق المغرب، ويودون لهم البيوت ويسوون لهم المغرب الفطور الثريد والهريس والعيش والكباب والنخي، وعفسة حق المغربية، وعقب ما يتفطرون يروحون يصلون على النبي محمد في المسجد، وعقب ما يصلون يقعدون عقب المغرب يتقهوون ويقعدون، وإذا قرب أذن العشاء دخلوا المساجد وقعدوا يصلون على النبي محمد، وعقب ما يصلون على النبي صلاة العشاء والتراويح يقعدون في مجالس القرآن، الذي يتحدث ويتكلم بكلمات حلوة، حد الله ورسوله، ما فيه مثل الحين فواحش ومنكر، الأول لا كلمة خبيثة، ما تسمع في المجلس حديث مع القرآن... والأخوة هذا ولد أخوي وهذا أخوي وهذا ولد عمي وهذا نسيبي... وقاعدين في الحجرة وفي محل يقعدون ويدرسون القرآن إلى الصبح، وقبل الصبح تقريباً بساعة وحدة يسحرون بعضهم في المحلات والمجالس يسوون سحور الصبح حق المجموعة كل يوم في مكان، يوم عندك أنت، ويوم عندي أنا، ويوم عند هذا، ويوم عند هذا، والمجالس عامرة بفضل الله، فيها كل شيء، من صغير، من كبير، وكلهم راضين، وخير الله فضيل، ولا تشوف واحد يقول أه والحين وقتنا هذا يا ولدي وقتنا هذا مو نفس وقت الأول ما فيه، لا فيه إيمان مضبوط، صحيح بعض لا مئة في المئة... الحين إيمانهم دينار، المسجد صوبه يعني زين يدخل يصلي فرض زين وإلا ما يصلي يطوف على المسجد، الحين مساجدنا كلها متروسة أجانب، وين الذي يصلي في هذه الديرة، كلهم أجانب. * إذا اقتربت أيام العيد... كيف تشترون ثياب العيد؟ ومن أين في أيام زمانكم؟ - بطي سلطان: الثياب من السوق جاهزين، إذا ما عنده يعطيني رجب، يشتري لي، أنا فقير، رجب عنده عشر ربيات يشتري لي ثوب بخمس ربيات ويلبسني أياه، مو مثل الحين عندك فلوس ما تزكيها الأول غير. - رجب مفتاح: الأول كل واحد يعين أخوه، الحين أنت ما عندك، الله لا يقوله إن شاء الله، مثلاً وأنا عندي المقسوم أشوف قبل ما أتفطر وقبل ما أتكلم أول أشوف حالتك مثلي، أخلي أم العيال، أم فلان تروح تشوف بيت فلانة شلون حالتهم، عندهم فطور، عندهم شيء، عنده الشيء الذي يرضيهم، مساكم الله بالخير شلونكم يا حجية، طيبين شلون عيالكم، ويش فيكم ما طبختون اليوم، إن شاء الله بنطبخ، عرفت أن ما عندهم شيء، قمت أخذت الذي طبخته وقسمته بالنص وياهم وعطيتهم. * قبل أن يأتي العيد... هل هناك وداع لشهر رمضان، وماذا تفعلون؟ - رجب مفتاح: تاريخ 27 الوداع. * ويش تسوون فيه؟ - بطي سلطان: يسوون الوداع... المسحر يسحر... يودع يهلل... والجهال وراءه وهو يقول والجهال يقولون وراءه، رجال ونسوان مو جهال. * هل تتذكر ما يقولونه في أيامكم؟ - بطي سلطان: يهللون: لا إله إلا الله محمد رسول الله، الوداع، ودعناك الله يا رمضان، أبوالقرع والبايذجان. * وهل مازال وداع شهر رمضان موجوداً الآن؟ - رجب مفتاح: تاريخ 27 تعال هنا المحرق، تاريخ 27 الحين لا عندنا في المحرق إلى الحين إلى باجر ما نقول لك ما فيه إلى بكرة الوداع رمضان تاريخ 27 تعال هنا شارع الشيخ حمد وقف وين مسجد الشيخ حمد تعال هناك وشوف، يجيء المسحر يجيء المودع، والعالم الشارع ممتلئ، كله ممتلئ، كله من هنا من مبنى الشرطة إلى مسجد الشيخ محمد بن عيسى، العيد عندنا يا ولدي إذا واحد فقير مسكين ما عنده بعضهم البعض يعرفون حالته، أنت تعرف حالتي وأن أعرف حالتك وهذا يعرف حالتي، هذا مسكين ما عنده أحد، ما ميش، قال فلان له مش تعال وياي بنروح السوق وياك شال الولد وياه ولد أو بنت وأخذ له قميص مثل الفوطة أو الوزار أو مثلاً فانيلة أي شيء يطيب خاطر الولد أروح البيت يقول يما يما يا أبوي شرالي عمي، دخل البيت يضحك، جاء البيت مستانس، وإذا عندهم شيء أنا بقول لك أول في العام 55 و60 سوق اللحم، سوق السمك، سوق الخضرة، كان عندنا سوق هنا والبلدية كلها هنا، كل هذه القيصرية عندنا وعندنا برة، هذا شارع الشيخ حمد توه من حوالي ست إلى سبع سنوات من عمره. - بطي سطان: هذا يسمونه شارع التجار. - رجب مفتاح: هذا الشارع وذاك الشارع فيه محسنين، فيه حجامة، فيه مساجة، فيه مخيطين، فيه كل شيء، ما ميش شيء كان الأول في البحرين خاصة في هذا الشارع في المحرق هنا مثل هذا الشارع والشارع الفوقاني مين تدبر من فريج عبدالله بن عيسى إلى أن توصل حارة أبوماهر هذا المحلات ما لها ذكر الأول. * ماذا تفعلون صبيحة يوم العيد؟ - بطي سلطان: صبيحة يوم العيد نلبس أياب جديدة ونتوجه للمساجد نصلي مع الشيخ. * من يوم أنتم صغار؟ - بطي سطان: أيه من قبل ما نستوي أحنا بعد، نروح المساجد الشيخ يخطب ويصلي، أول يصلي صلاة العيد بعدين يخطب خطبة العيد عقب نقوم تهاني أنت تحبني وأن أحب هذي. * كم يعطونكم في العيدية الأول؟ - بطي سلطان: «بيزة»، الأول «بيزة»، بعد ما فوقها فوق، الذي عنده ثلاث ربيات هذا غني في الديرة. - رجب مفتاح: العريف هذا بربية 24 ساعة من الصبح إلى ذي نشتغل بربية أو في الفناري بكم يطلع لك من المحرق مشي، يمشي من الصبح يصلي الفجر ويطلع، يشتغل بكم بربية ونصف. * الذي يحصل الربية ونص ما فوقه فوق يعني؟ - رجب مفتاح: يا ولدي الربية الأول ذاك الزمن تسوي لها خضر وعنب، الحين الربية ما تجيب له خارطة مينو. * يعني من الصبح لليل كم تحصل عيدية بالكامل؟ - بطي سلطان: تحصل 6، 7 بيزات، عندي آنتين ما فوقي فوق. * يعني 7 بيزات كثير؟ - بطي سلطان: نعم، بيزة في هذا الدكان يحط لك سكر وشاي في الكيس ويش نسوي، أكلنا تمر وخبز وفي الليل نخج ولوبة، نعل ما علينه حفي نمشي من المحرق إلى باب البحرين يأذن علينا الصبح نصلي في رأس رمان ونروح باب البحرين ونطلع من باب البحرين إلى الظهر حفي (من دون نعل). - رجب مفتاح: إطارات السيارات، أول يسوون منها نعل، هنا عزك الله مثل هذا نعال، إذا انشق الإطار قصوه وسوو مثل النعال وركب له حبل مني وحبل مني وخيط ولبسه، هذا ما فوقه فوق الي عنده ويبيعونه بعد والآن الحمد لله فضل الله كثير عليّ. * وماذا عن غداء يوم العيد. هامور نفس الحين؟ - بطي سلطان: يسوون محمر وصالونة هوامير هذا الكبار ذلين التجار الطواويش والنواخدة يسوون، احنا ما نسوي. - رجب مفتاح: احنا ويش نسوي نخج أو باقلة وإلا تمرة جان حصلت بعد... أنا اأقول الحمد لله. - بطي سلطان: أنا أبوي يروح من الصبح إلى الظهر يشتغل بربية ونص ويجي المغرب، تمر أنا وأخوي وأبوي نأكلها ونشرب ماي. * قبل لا يسوون الجسر؟ - رجب مفتاح: في أول وفي تالي، قبل هذا الجسر الشاطر الذي أول عنده سطح كله بسطية. أول كله سعف... إذا جاء المطر، الماي تحته وهو يدور فوق الماي وحاط كرفاية، وراقد فوق الماي مستانس مرتاح. - بطي سلطان: مستانس ومرتاح. - رجب مفتاح: بربيتين هاف وزنجفرة ووزار أي شيء في خاطر الجاهل، والبنية نفنوف روبيتين أجمع حق الجاهل كله بروبيتين، شوف محل حلوى المروج الذي هنا هذي كان دكاني يوبا أول نعمة فضيل وبركة من الله خير وفلوس قليلة لكن إيمان بالله قوي والخير كثير والحين فلوس كثيرة والإيمان ضعيف والبركة ما ميش والأمراض زايدة وسلام عليكم.
 

خيارات: شارك:

التعليقات (1)

الإسم	زائر ( لحجز اسمك المستعار ، اضغط هنا )	يمكنك الآن حجز اسمك المستعار للحصول على مميزات اضافية حجز اسم المشاركة والخصوصية 5000 حرف لكل تعليق اضافة التعليق بدون الحاجة لإدخال رمز الأمان
عنوان التعليق
التعليق
رمز الأمان