المتعايشون مع مرض الإيدز: سلوكنا الخاطئ سبب إصابتنا بالمرض

[ نرحب فيك أول شيء يوسف، نرحب فيك في الوسط اون لاين.
- أهلاً وسهلاً، والله أنا مستانس بمقابلتكم وياي وإن شاء الله باجاوب على كل الأسئلة اللي بتطرحونها بكل صراحة.
[ انزين تعطينا نبذة عن إصابتك بالمرض في البداية؟
- بداية "عسى أن تكرهوا شيئاً وهو خير لكم"، أنا طبعاً كنت سلوكي خاطئ، كإدمان واستمريت في الإدمان، والمرض جاني من الإدمان بشكل طبيعي وما يمنع عن طريق الجنس جاني بعد مع أن الجنس كان مرات قللة، بس هو على ما أعتقد الإدمان، فهو من سنوات أنا كنت يمكن سنين وبنين من 25 سنة مدمن، فعقب ما قررت أن أتوقف عن استخدام المخدر وعرفت أن كل تجاربي فشلت مع جميع أنواع المخدر، ولما قررت أن أتوقف دخلت المصحة وقالوا لي أنت حامل فايروس الإيدز، فكانت صدمة شديدة، لأنك لا أنت ولا غيرك – الله يطول في أعماركم – فالصدمة كانت شديدة طبعاً لو أنا أقول لك الصدمة مثلاً ما بتحس اللي ما في جوفي ولا الغير، إلا بعيد عنك المصاب غير واحد يقولون له هالصدمة.
فقعدت بروحي أفكر وصار لي كلش فبعدين هنيه كان عندي سلاح ذو حدين، أنا ياي أمتنع عن مادة مخدرة وأكتشف لي مرض جديد فكانت صعبة، فحنا كنا أربعة أتذكر، فقالوا لنا أنتوا متعايشين مع الفايروس، ثلاثة راحوا بره وقعوا وطلعوا من المصحة، فانتحروا. فأنا قررت مثل ما قلت لك بداية اللقاء قعدت بين نفسي وأقول "عسى أن تكرهوا شيئاً وهو خير لكم"، فزاد إيماني أنه مع هذا الشيء لازم أوقف لأنه مرض قوي ومتفاقم وقاتل. فأنا قررت أن أكون يوسف ثاني، غيّرت سلوكي إلى 180 درجة.
[ شلون تقبلوا الأهل والأصدقاء؟
- فأنا بعطيك فكرة وهي إذا المريض ما تقبل مرضه الآخرين ما يتقبلونه. أنا هالكلام أوجه للمجتمع وللمريض نفسه. إذا هذا جاني شنو أقدر أسوي؟ المفروض أتقبله وإذا تقبلته تهون عليّ أشياء واجد، ويكون عندي رد حق الآخرين، ورب العالمين يساعد. يوم أنا عرفت أني مريض صارت علاقتي برب العالمين قوية. رب العالمين سابقاً كنت أسمع عنه، اليوم لا عندي صدى فيها مع صلواتي وأدعية، الأشياء البسيطة اللي أعرفها، فالحمد لله رب العالمين الأهل تقبلوني واستقبلوني والأصدقاء بعد استانسوا أن يوسف يهد المخدرات، فيه بعضهم ما كانوا يدرون أني أنا متعايش مع الفايروس، فهذه شوي شوي كنت أعطيهم عن الفايروسات وعن أمراض أنه مرض مزمن، أقدم لهم مقدمات, فالحمد لله الأمور عادية وعندي ناس وايد مرتاحين مني ومن تغيير سلوكي، والحمد لله بالنسبة للمجتمع اللي حواليني من الأهل والجيران أشوف كل شيء ممتاز.
[ محمد؛ عرفنا أول شيء شلون أصبت بالمرض؟
- المرض تقريباً من حوالي 4 أو 5 سنوات، عرفت أنه فيني مرض بس ما أدري قبل 4 أو 5 سنوات كان فيني المرض أو لا، بس اللي أعرفه بالضبط أنه خلال 5 سنوات تقريباً أصبت بالمرض بداية، لما طلبوا مني مركز النعيم الصحي، ذهبت للدكتورة سمية جاتني وقالت لي بأسلوب مباشر من غير مقدمات إنه أنت فيك هالمرض، فأنا يعني صارت صدمة عندي يعني مو مصدق ليش صادني ذي المرض، فرجعت حق الماضي فلقيت نفسي غلطان، ما كنت أستخدم مخدرات، بس كانت عندي علاقات سيئة، سلوكيات سيئة إلا هي السهر في الفنادق وسفرات جنس والشغلات ذي.
الأهل خبرتهم، استقبلوا الحمد لله ما تضايقوا، أصدقائي عندي بعد أصدقاء معينين قلت ليهم فيني هاللون وهاللون بالعكس ما تضايقوا مني، بس فيه مجموعة من الأصدقاء ما قدرت أقول لهم، للحين أصدقائي وأحبهم ويحبوني بس ما أقدر أقول لهم. أنا أفكر أقول لو قلت لهم تتغير نظرتهم يمكن ما بيتكلمون معاي بعد خلاص, لأن المخوخ مو نفس الشيء.
[ بس مو النتيجة هذه، أنت المفروض تتحمل نتيجة اللي سويته...
- إيه، رب العالمين شيقول؟ يقول: "بسم الله الرحمن الرحيم. وما أصابكم بمصيبة فبما كسبت أيديكم ويعفو عن كثير". أنا غلطت صدق، سويت مصيبة عودة، تميت أزني، تميت أسوي أشياء موب زينة، أشرب أزني...
[ بس مو كان بإمكانك أن تصير مثل يوسف تؤدي رسالة للمجتمع، الناس كلها الناس تعرفك، تروح القنوات، تروح التلفزيونات؟
- أنا أول واحد في البحرين طالع على القنوات، يوسف والجماعة يوا بعدي. أنا أول واحد طلع عالقنوات، يعني سويت أشياء وايد زينة, بس في النهاية شفت أن المجتمع مخه كلش واطي، لدرجة أن حتى الدخاترة ما عندهم أي فكرة أو أي معلومة عن المرض.
[ هذا يوصلنا لشيء محمد؛ الصعوبات التي تواجهونها؟
- الصعوبات اللي نواجهها مع الأطباء بس اتصدق؟ المجتمع حنا مع عندنا صعوبات معه قد ما عندنا صعوبات مع الأطباء، تخيل أنك تجي الدختر مريض فيك سخونة أو فيك أي شيء، ومن يعرفون فيك الـ HIP الطبيب نفسه ما يعطيك أي اهتمام.
[ متعمد...؟
- متعمد، الطبيب متعمد أقدر أييب أسامي، أقدر أحضرهم، أقدر أسوي كل شيء فيهم. الطبيب نفسه لو يعرف أنك عندك الـ HIP يحتقرك احتقار لدرجة يعني (كتبه ذي الكلام)، يعني الكلب – كرّم الله وجه السامع – يمكن يحترمه أكثر من ما يحترمني أنا.
[ شنو تعتقد السبب يعني، هل أنه قاعد يعاقبك؟
- هم ماخذين الفكرة مع أنهم أطباء أن المرض جانه عن طريق سلوكيات خاطئة، مع أنه فيه ناس وايد صادهم بالولادة وما لهم ذنب، عندي صديق عمره 22 سنة جامعي بالولادة وفيه الـ HIP، ماله ذنب. وعندي صديق ثاني راح سوا عملية في الهند في الثمانينات في بداية التسعينات وصاده الإيدز، تعرف الدول الفقيرة انزين ما عندهم فحوصات الدم مو نفس البحرين، ويحتقرونه نفس الشيء موجود هو وماجستير عنده في العلوم السياسية، وأنا اللي تشوفني دبلوم في الزراعة، دارس زراعة في مصر دارس كنت بواصل دراستي بعد بس ما قدرت اواصل، يعني شقول لك؟
نحصل صعوبات واجد في البحرين.
[ نرجع ليوسف؛ الصعوبات اللي تشوفها؟
- الله الصعوبات وايد.
[ من ناحية المجتمع أو الأهل؟
- المجتمع فيه أمور وايد تعدلت عقب آخر مرة أنا طلعت في الجرايد في ناس وقفت وياي أنا ما كنت متوقع، بس قبل ما أطلع في الجرايد أنا كنت حاط احتمالات السلبيات والإيجابيات، احنا طبعاً قروب نحب الحياة، فيه ناس حتى في الإذاعة ما يطلعون يعني بالصوت، فأنا ومحمد قررنا أن نكسر الحاجز، نعمل شيء لأجيال ما بعدنا، قررنا أنا عن نفسي ألحين كصورة أطلع، أطلع في الصورة، فيه ناس حتى يمكن سلام ما يسلمون علي، بس ما كان يحز في نفسي، أقول هذه مشكلته للحين ما وصلت له الرسالة. أنا ناوي أقول هالشخص صديق عزيز، اللي سلّم عليّ. أنت يوم سلمت علي ما صادك الإيدز، والإيدز ما ينتقل عبر السلام، وإن شاء الله أنا بوصل له وبعطيه المعلومات الصحيحة.
[ يعني تبغي توصل للمجتمع أنه فيه أفكار خاطئة للإيدز؟
- نعم، انتقال الإيدز ما هو يعني؟ هو عبر نقل الدم والاتصال الجنسي بدون واقي، والمرأة الحامل تعطي حليب حق ولدها أو بنتها فهاي الانتقال، أما حتى اللعاب، يعني أنا أبوس واحد من حلقه وتفال ماله ينزل وهذه، هذه إحصائيات في منظمة الصحة العالمية 1 في المئة ما تأثر يعني، ما ينتقل بونت واحد.
وعندي أمور ثانية لو تعطيني جانس، يمكن خذنا الوقت، احنا فيه أشياء عندنا نتمنى أشياء وايد. يعني هاملينا بدرجة غير ما تتصور، يعني أنا مرة في السلمانية مثل ما تفضل محمد، في السلمانية أنا أول البارحة مترقد، فالبنات بره والستارة مبندة علي، اوه هذا رايح وياي. هذه فيه ايدز خلاص خله يقعد في البيت ويموت، يعني خلاص حكم علي. أو فيه مجتمع يقولون بال هذا فيه إيدز وجذيه وجذيه، يا رب العالمين! أنت أول ما تفتح القرآن، اشمكتوب فيه، في أي سورة أو آية؟ (بسم الله الرحمن الرحيم) يعني رب العالمين رب العالمين رحيم، ليش انت شديد علينا ليش؟ وبالعكس احنا القروب اللي موجودين الأشياء اللي قاعدين نسويها مجتمع عادي ما يسويها، وحنا ما عندنا أي دعم، يعني الله لا يقول نعتاز، حنا ساعات نصرف من جيبنا بعد، مع أنه راتب مالنا بسيط، ساعات يصير 100 فلس ما عندنا، أنا ومحمد صار لنا فترة في هالشمس في أغسطس، نوقف على الإشارة ونوزع كتيبات توعية، من يسوي هالشيء؟
أنا 6 أشهر دوامت على السلمانية هنيه، آيي أسلّم على المرضى كامل وأهوّن عليهم: السكلر، والسكري وجذيه. يعني كنت أحب أرفع معنوياتي. تتذكر ناخذ الشعير ونعطي الحمام، نحصل معنويات. فالمجتمع حكم علينا والوصمة طريقة انتقال الإيدز، هذا ياله إيدز عن طريق حرام جنس أو عن طريق الحرام الجنس أو المخدرات، يعني طريقته هي صعبة.
[ انزين يوسف، معاملة الناس اليكم، هل تعتقد أن هي كعقاب أو كخوف من انتقال المرض؟
- هو الاثنين، كعقاب أنا مرة كان عندي فعالية في جامعة البحرين...
[ يعني محمد الحين ناس تقول إنه هذا يستاهل، خله ليش أعامله بصورة اوكي...
- هي عقلية الناس مو نفس الشي، فيه ناس يتفهمون مثل ما قلنا قبل، وكانوا يتقبلون وعنده وعي عن ذي المرض ويقعد معاك عادي من أحسن ما يمكن، وبالعكس يمكن يحبك أكثر ويعتني فيك أكثر. هاي واحد، الشيء الثاني فيه ناس لو اعرفوا فيك المرض بيقعدون يذمون فيك وبيقولون هذه يستاهل...
[ ما يعتقد أنه من حقهم، أنت غلطت وهذا لك كعقاب؟
- هاي الشخص اللي يتكلم يقول هاي عقاب له اوكي، أنا برجع لك من شقين، الشق الأولّي أن رب العالمين احنا كلنا مو معصومين ولا ملاك...
[ اسمح لي يوسف بوضح لك الصورة، الحين انا لو ما عاقبتك، لو ابني مثلاً غلط وما عاقبته مرة مرتين يمكن غيره بيكرر وغيره بيقول اوه انه ما فيه عقاب ليش عاد خلني أكرر هالسالفة، يمكن المجتمع أقول لك إنه حامل هالصورة هذه...
- اوكي، إذا أنا طلعت في التلفزيون أو جريدة، قاعد أتكلم شيء إيجابيات، أنت تشوفني بره تقول لي بل هذي فيه الإيدز! يعني هم تعاتبني آنا أو تعاتب ذاك؟ هي بعد خلها، أنت تتكلم كلمة أنا جاوبت عليها، السؤال الثاني أنا بقول لك المجتمع هل يتقبلونك أو شنو كانت؟
[ هل تحس أن معاملته لكم كعقاب أو لا كخوف من انتقال هذا المرض؟
- فيه ناس خوف لعدم إدراكهم هذا فكرهم، فيه ناس مع أنه دارسين مو كل من عمامة صار عالم ولا كل من درس صار دكتور ولا كل من صار دكتور فهو فاهم، هاي أنا أعطيك كتجربة أنا عشتها، ففي ناس يتفهمون. بداية ما يتفهمون، حنا عدة ورش عمل سوينا، انقعدهم ما يدرون أن حنا متعايشين انا ومحمد، فعقب ما نعطيهم الدورة آخر شيء نقول الحين، دكتورة سمية الجودر تقول – الله يطوّل في عمرها – تقول ألحين بييون لكم في شخص أو شخصين بيقدمون تجربتهم، فيوم انجي نقدم التجربة فيتعجبون حنا سريس وياهم، ذولين فيهم إيدز؟! لأنه الإيدز ما فيه علامة ولا فيه إحصائيات في البحرين، لأنه أنت لو شايفني غير هالمرة تقول فيك إيدز؟
[ لا...
- ما بتقول... لأن ما فيه شيء علامة معينة، عرفت كيف؟ فهاي المجتمع جذيه، فاللي ما يعرف المرض ما يثمن المرض، فعقب ما قعدنا مع ورش العمل، فعرف قال أنا تغير فكرته، لأنه نسوي إحصائيات، نقول شنو عرفت؟ قال لا، ألحين فهمت أنه هاي ما يعدي وجذيه وجذيه وأنا أؤيدك وأعطيكم سبورت أن تواصلون حياتكم وأنكم مو معصومين، أنتوا أحسن منا يمكن في أشياء وايد، يعني الصدق، الأمانة وعلاقتنا برب العالمين وايد أمور.
[ انزين محمد؛ هل تعتقد مثلاً أنه الناس بعد ما عرفوا أن أنت مصاب أو متعايش ويا المرض، حتى المجتمع يعني أصدقاءك، من المفترض أنهم يعاملونك معاملة خاصة؟
- معاملة خاصة شلون يعني؟
[ من كل النواحي، مثلاً من ناحية الأكل، من ناحية أنه تطلع وياهم وغيره؟
- شوف، أنا يعني الحمد لله ما فيه مجموعة كبيرة تعرف غير هلي وأصدقائي بس، فلما اعرفوا أن فيني ذي الشيء اتصدق صارت علاقتهم معاي أقوى من قبل؟ صاروا يخافون علي، يعتنون فيني من ناحية الطعام يعطوني أحسن الأطعمة، سهر ما يخلوني أسهر، أي شيء محتاج يعطوني، مع أنه قبل ما كان فيني ذي الشيء كنت لو أطلبهم 100 فلس ما يعطوني، لو أقول لهم طبخوا لي ذي الطبخة ما يطبخون لي، يعني من ناحية ربعي والأهل اللي يعرفون، كثيرين يعني، يعني حوالي 50 – 60 شخص اللي يعرفون فيني ذي الشي.
[ طبعاً هذا من ناحية الأهل، من ناحية المجتمع والكوادر الطبية، مثلاً يعني ألحين يوسف مرقد بس بجناح مخلوط الظاهر سكلر، ما المفروض تكونون في جناح بروحكم، الأطباء عندهم توعية أكثر بهالمرض... هذه إحدى الصعوبات الظاهر؟
- باقول لك، باوضح لك صورة، فيه مجتمع إذا مثلاً ليش ما يسلّم على المتعايش؟ يخاف يعديه أو فيه زكان الشخص ذاك فيه زكام، المفروض احنا ما عندنا مناعة، مثلاً انت عندك زكام أنا شوي أبتعد عنك، فأي فايروس يدخل جسمي، مو ذاك يسد خشمه على أساس ما أعديه يعني. فيه ناس جذيه، وحنا سوينا اشتغلنا على ذي السالفة مدة 6 شهور، وتقريباً سوينا إحصائية 80 في المئة نجحنا في ذي السالفة، أن مو بس حنا متعايشين وقاعدين نشرب ناكل، لا... احنا نقوم بدور فعال، حنا تقريباً 3 محمد وأنا مع الدكتورة سمية والدكتورة فاطمة. كثيرين المتعايشين في البحرين...
[ بس مو كاسرين الحاجز؟
- المسجلين عندنا 350 شخص، منهم 150 توفوا. توفوا جرعات زايدة، اللي سكران ودعم في سيارته، مو من الإيدز توفوا. 170 شخص توفوا نفس ما قلت لك وفاة عادية. بقوا المسجلين حوالي من 150 ما يتعدون الـ 200, فيه ناس مو مسجلين. عندنا بالألوف، في البحرين أنا مستعد يعني مستعد وأنا من ذي المنبر قاعد أقول لك أكثر من 20 – 30 ألف متعايشين، وفيه منهم أطباء متعايشين، أطباء ونعرفهم شخصياً وخافيين روحهم، ليش؟ نظرة المجتمع!
نظرة المجتمع، نعم، لو أحد يشك في كلامنا، أن الحكومة تصدر قانون فحص إجباري مو بس للزواج، للجميع، وبيكون وين؟ مو على كيفهم في أي مستشفى، لا، يكون في مستشفى النعيم، أو مستشفى السلمانية نسوي هاي، صدقني شرط من كل عشرة ثلاثة يطلعون، وأنا فيه أشخاص...
[ اسمح لي، يوم قلتون هاي النقطة، ليش متأكدين من كل عشرة يطلع ثلاثة، أبغي أعرف السبب ليش، يعني احنا هالقد عندنا مرضى بالبحرين، بسبب شنو؟
- باقول لك السبب، في الجيلين اللي راحوا، إلا هو في التسعينات، خل نقول من الثمانينات والتسعينات والألفين، شنو صارت الديرة البحرين ذي، ما صارت مركز للدعارة وللفساد وللشغلات ذي؟ انتشرت المخدرات، انتشرت الفنادق، عرفت شلون، الشباب الحين اللي عندنا اللي على 20 و25 سنة، أنت لما تشوفهم في الشارع، شنو سوالفهم، فنادق، ديسكوات، بنات، مخدرات مادري شنو، حشيش ما حشيش، إبر.
انزين، يعني هاذي ما صادهم شي؟ أنا كنت أمارس الجنس، صديقي يمارس الجنس، صديقي الثاني يمارس الجنس، مارسنا الجنس متى، في التسعينات، من التسعينات صادنا.
[ يعني يوم صارت الديرة (البحرين) خصبة لانتشار الدعارة...
- ومن السوالف ذي فانتشر المرض، المرض ترى منتشر بصورة كبيرة بس الإعلام ساكت...
[ انزين أنت يعني كنت تروح بشكل علني ويا ربعك وتشوف الناس البقايا؟
- بشكل علني، لأن الحكومة فاتحة الملاهي والمراقص وكل شيء، يعتبرونها سياحة... وبنات الدعارة، بنات الليل لما ييوون ما يفحصونهم، ييبونهم عن 15 يوم يقعدون 6 شهور، وكلهم متعايشين. بره لهم لياسن، شهرياً يروحون دورة فحص، هاي شغلهم يعني مو ديانة إسلامية ولا شيء، يعطونهم بطايق، هالبطاقة أنه أي وحدة تبي تشتغل مع الريال لازم الواقي أو بدون واقي، ذاك يدفع زيادة بدون واقي يكون انزين، فكل شهر تجدد إذا صادها يسحبون الليسن، فشنو اللي يسحبون ليسنهم يجون البحرين زيارة، فهني أنا أقول لك باختصار شديد، أنا أعطيك وأنا إذا عايش قول يوسف تكلم عن هاي، أنا أعطيك بالخمس سنوات لسبع سنوات قنبلة موقوتة بتنفجر في البحرين، وذيلن الجهلة ساعات حنا نطلع فعاليات نقول هاي مال مرض الإيدز فيه والوقاية فيه وهالأمور، أعوذ بالله، حتى الكتيب ما ايوده، يا أخي أنت عندك بنات، عندك صبيان، حنا مو معصومين، يعني في أي لحظة الإنسان ينكص عليه.
[ انزين، لو قلت الحين شنو تبغون توصلون رسالة للمجتمع؟
- أنا أبغي أوصل رسالة للمجتمع، هي: عندنا مشاكل نبي نحلها الله يسلمك...
[ ... وهي؟
- عندنا مشاكل مع وزارة الصحة، أطباء ما عندنا، عندنا طبيبة وحدة، تخيل طبيبة وحدة تعالج مرضى الـ HIP في البحرين كلهم، طبيبة وحدة، أطباء ما عندنا، أدوية ما عندنا، احنا دولة متقدمة، حنا دولة بترولية...
[ انزين الأدوية من وين تاخذونها؟
- ييبون لنا أدوية قيمتها ألف دولار، من يقدر يشتريها في الشهر، يدفع 400 دينار، من يقدر يشتري؟ إذا واحد زوجته أجنبية نفسي ما أقدر أروح أشتري، أنا وصلت لرئيس الوزراء، وصلت لولد الملك، قلت لهم هاللون هاللون، ما أقدر أشتري الدواء، كل شهر أدفع 400 دينار، باشتريه مرة مرتين بعدين ما أقدر أشتريه، انزين طلع الدواء ذي نوعية رخيصة، مو رخيصة من ناحية السعر، نوعية "كجره" اتفاقية مسويتها البحرين مع شركة أمريكية انزين، سويت اتفاقية معاهم 20 أو 15 سنة أنهم يستوردون الدواء من عندهم والدواء ما منه فايدة، مع أنه فيه 12 من الأدوية، اليمن عندهم 4 أنواع من الأدوية، البحرين أول دولة في الوطن العربي كافحت الإيدز وودت دورات شباب بره حق توعية، صارت البحرين ألحين الله يعزك أخس من الجوتي مالي.
[ يعني اللي تبغونه هو توفير الأدوية المناسبة؟
- ما عندنا أدوية، أنا ما عندي علاج، أنا أحتاج حق علاج ما عندي، أنا بعد أسبوعين ثلاثة باروح الهند باشتري دواء من الهند تكلفته 150 دينار بس لازم أروح الهند أقعد شهر، تكلفني السفرة ألف دينار، فلوس ما فيه، علاج ما فيه، محد يهتم فيك، دخاترة ما فيه، تيي الطوارئ طبيب الطوارئ يضربك حقنة، الحقنة ذي مب زينة حق المتعايش، أقول حق الدكتور، دكتور تعطيني هالابرة موب زين لي، يقول لي انا دكتور والله أنت دكتور، قلت له أنت دكتور بس أفهم في ذي المرض أكثر منك، أنا بعد لو مواصل دراستي بعد أنا دكتور، يقول لي انت تفهمني، أقول له انا ما افهمك، يقول لي انا بضربك الدواء، اقول له ما تضربني الدواء، اتصلت حق الدكتورة مالتي إلا ما عندنا غيرها إلا هي دكتورة سمية، قلت لها دكتورة ترى كيت وكيت السالفة، قالت لي لا، موب على كيفه يضرب هالدواء، من ذي الدكتور؟ تخيل أنت مريض لا سمح الله فيك السرطان يضربك مخدرات هيروين تخيل؟ هذه نفس الطريقة، أنا عندي الـ HIP بيضربني مخدر، ما يصير، أنت قاعد تذبحني، مناعة ما عندي أنا.
[ ... وغيرها؟
- غير هذه الأمور فيه أمور وايد تحصل مع الأطباء، يعني شوف التزامات ما عندهم في المواعيد، أطباء مو متوفرين، أدوية مو متوفرة...
[ جناح خاص؟
- احنا ما نبي جناح خاص، لأن المرض اللي فينا ما يحتاج حق جناح خاص، يحتاج حق أطباء خاصين، حق عيادة خاصة موب عيادة يخطون لنا دكتور واحد عمره 26 سنة ما يفهم شيء للحين ما خلص دخاتره، توه ماجستير ما خذها للحين، ما يفهم. يعني عندنا مشاكل وايد.
[ ... وأنت يوسف؟
- والله شوف أخوي محمد، أنت جيتك يمكن في ساعة أو 20 دقيقة أو 25 دقيقة، بس أتمنى تكون متواصل ويانا، حنا نبي واحد من قلب، احنا وايد قابلونا جرايد بس ما حصلنا يعني اللي حنا نبغيه. فأنا الكلام اللي باقول إن أنا واحد أتمنى مع القروب (مجموعة نحب الحياة) نتمنى والله ناشدنا وايد ناس، أنا أناشد ثلاثة، أناشد جلالة الملك، ورئيس الوزراء، وولي العهد، احنا شباب، احنا عيالك في الأول والأخير، واحنا لا ملاك ولا معصومين، احنا غلطنا، بس اليوم شنو دورنا في المجتمع، اليوم قاعدين احنا في مجتمع نقوم بدور وحنا رافعين اسم الدولة خارج البحرين مع الدورات خارج البحرين أنا أتكلم في أشياء دولتي ما عطتني بس أقول سوت لي هالشي، رحنا المغرب، نعطيهم توعيات ما يعرفون احنا اللي نوعيهم، نروح تونس، المغرب، الجزائر كل مكان، ألحين أنا ذاك الأسبوع كنت في دبي، قاعد أتكلم عن البحرين وعن الأشياء اللي يسوون لنا، بصراحة ما يسوون بس أنا كديرتي قلبي ترابي هنيه، فأتمنى إن شاء الله صوتي يوصل لهم، حق الملك ورئيس الوزراء وولي العهد، لأن آخر الباب ثلاث الأبواب هذه، أما الوزير ما وزير، مجلس نواب عقب شوي باقول لك بعد يبون يحبسونها، يحطونه في جزيرة، قاعدين يطبخون مجلس النواب من ورانا، فهاي احنا بعد لنا جواب ثاني عليهم، بس احنا خلنا نتأكد لأنه ما أدري في أي جريدة وإن شاء الله بيي لهم الرد، وحنا نقول لك من ذي المنبر أتكلم، أنا أناشد الملك، حنا عيالك يا ملك، ورئيس وزراء يا بوعلي، أنت يدك سخي، وولي العهد أنت يعني ولي العهد شاب نفسنا، وأبو الشباب أنت، احنا مالنا نطك باب أي واحد إلا هالثلاثة، فاحنا لنا أمور رجاءً أنه تاخذون مطالب إلا حنا نبغي وإن شاء الله تقرون الجريدة هذه وتنسقون مع دكتورة سمية ونقعد وياكم أنا ومحمد وتشوفون شنو متطلباتنا، أنا عمري 43 للحين مو متزوج، الشغل على الله قاعد أشتغل، ومحمد قاعد يكرف، مو من حقنا نتزوج؟ مو من حقنا نشتغل، أي شغلة نتقدم لها قالوا يبغون فحص طبي، احنا ما ياخذونه من الفحص الطبي لأنا مرضى، انزين مشوا لنا راتب، أنا سنين منين قاعد أراض على بيزات تقاعد مالي مو قادر احصل، يعني كل مرة يطلعون لنا واحنا لنا دور فعال إن شاء الله، والكل عارف هالشيء إن شاء الله، والله يوفقكم ويوفقنا، وأنا أدري هالكبارية ما بينسونا وإن شاء الله نتمنى منهم كل خير واحنا معاكم عيشوا وخلونا نعيش وياكم، مشكورين.
[ مشكورين.

مقابلة مع مصاب بمرض الايدز

خيارات: شارك:

التعليقات (3)

الإسم	زائر ( لحجز اسمك المستعار ، اضغط هنا )	يمكنك الآن حجز اسمك المستعار للحصول على مميزات اضافية حجز اسم المشاركة والخصوصية 5000 حرف لكل تعليق اضافة التعليق بدون الحاجة لإدخال رمز الأمان
عنوان التعليق
التعليق
رمز الأمان