-
القائمة الرئيسية
-
ملاحق البحرين تنتخب 2014
-
مقابلة سمو ولي العهد الامير سلمان بن حمد ال خليفة في تلفزيون البحرين - 18 فبراير 2011
ولي العهد: انا إنسان بحريني مسلم، لله الحمد ما أفرق بين سني ولا شيعي، لكن اليوم البحرين انقسمت، ناس أصدقاء سنين ما يتكلمون مع بعضهم بعض، بسبة عيد كلنا غنيين عنه، احنا جزء من مجلس التعاون، جزء من العالم المنفتح على بعضه بعض، البحرين ما عمرها شافت نفسها كدولة بوليسية. صارت أخطاء، صارت مزايدات صلحنا أنفسنا، كلنا على مفترق طريق، لا أقبل أبداً أن أبناء الوطن يتحاربون بين بعضهم بعض.
بشمي: أنا أعتقد طويل العمر أن هذه المبادرة الذاتية التي دعت تحضر هنا أنا أعتقد أن هذه المبادرة للمواطنين جميعاً، وأعتقد أن المواطنين يتفاءلون بك خيراً من أجل إيقاف الذي يحدث في هذا الشارع الآن. هذا النداء الذي وجهته...
الشاعر: شنو الضمانات – طال عمرك – دائماً يقولون لك إن هذه وعود وما بتصير، شنو تقدر تقول لهم الحين من ضمانات؟
ولي العهد: أنا والله ما قط جذبت...
الشاعر: صدقت.
ولي العهد: وأنا عمري خدمت هالبلد وباستمر أخدم هالبلد سنة وشيعة وغيرهم.
الشاعر: طيب إذا النداء وجه الآن بسحب كل الموجودين في الشاعر والتهدئة...
ولي العهد: التهدئة... عطونا فرصة نفكر...
الشاعر: متى يعني؟
ولي العهد: الآن... الآن.
الشاعر: من الليلة، إذا في اجتماع الليلة، من الليلة إن شاء الله.
ولي العهد: إذا نقدر من الليلة، إذا نقدر من الليلة، عطونا وقت. الله سبحانه وتعالى خلق العالم في سبعة أيام، ما نقدر احنا في ساعات نحل مشكلة صار لها سنين وهي تخلق.
الشاعر: هل في سقف للتحاور؟
ولي العهد: السقف هو قبول الجميع.
الشاعر: بالضبط.
ولي العهد: السقف ليحدد باحترام آراء الآخر. احنا ليس بلد فقط سنة ونقدر نحصل ما نريد، ولا بلد بس شيعة ونقدر نحصل ما نريد، احنا بلد بحرينيين الكل لازم يحترم الثاني.
الشاعر: في وجود لأطراف عدة في هذا البلد، يعني مع احترامي وإجلالي أنا لجلالة الملك ولسموك ولسمو رئيس الوزراء ولكل العائلة، بس في أطراف وايد في هذا البلد، الوفاق قاعدة تتصرف وكأنها موجودة بروحها، والاجتماعات قاعدة تصير بهالثنائية...
ولي العهد: ما أبي ألوم أحد، أنا ما ألوم أحد، ما ألوم أحد، كما أحترم الآخرين. اليوم وقت الجلوس والحوار وليس الكفاح.
الشاعر: والطاولة متسعة للجميع.
بشمي: الطاولة متسعة للجميع.
الشاعر: هالبلد في متسع للكل، وفي خير للكل سمو ولي العهد، الناس ثائرة تبي كلمة منكم، تبي تسمع منكم...
ولي العهد: هذا أنا...
الشاعر: تبي تسمع أن في أمل حق عيالنا، حق مستقبلنا...
ولي العهد: إيه، طبعاً، طبعاً... واحنا اشنبني له؟
بشمي: احنا – طويل العمر – ما نريد نستنسخ تجارب الآخرين....
ولي العهد: لا، احنا تجربتنا لازم تكون لنا.
بشمي: لنا، وهذه الآن، يجب البحث، أنا أعتقد البحث عن الهدوء الآن، إيقاف ما يجري في الشارع، هذه أنا أعتقد...
ولي العهد: خل نرد على عاداتنا وتقاليدنا ونتزاور ونتواصل...
الشاعر: والله الناس فيها خير، فيهم أمل، احنا نناشد العقلاء الآن، نناشد العقلاء من كل الأطراف، يعني شتقول إذا في أحد يصعد من كل طرف، اللي قاعد يقول لك أنا براويك فيهم، من هاذي ولا من ذي، اشينقال لهم؟
ولي العهد: الطرفين غلطانين وأنا أعتبرها خيانة للوطن. اليوم الكل لازم يهدأ واللي ما بيأخذ موقف الآن ما عمره بيأخذ موقف، لأن هذا أصعب يوم مرّ علينا، بس هذه كلمتي، وإن شاء الله، الله يوفقنا.
الشاعر: جيتك يا سمو ولي العهد أتصور أنها أكبر ضمان، التلقائية اللي تصرفت فيها، العفوية اللي جيت فيها، إحساسك هذه مسنا كلنا، ما أظنتني إنسان في هالبلد أحين ما انمس من داخله ومن مشاعره بأن احنا في يد أمينة، وإن شاء الله ما تأخرنا يا رب، إن شاء الله في وقت.
ولي العهد: الله يوفقنا.
الشاعر: البحرين مرت ترى بأصعب من جذي.
ولي العهد: لا عاد مو في وقتها!
الشاعر: إن شاء الله آخر الأحزان يا رب.
ولي العهد: يا رب آمين.
الشاعر: واحنا تعازينا لكل ضحية راحت، لكن الحي مثل ما يقولون أبقى، واحنا نبي نورث عيالنا بلد آمن، نعطيهم عيالنا، خل نتعظ باللي صار حوالينا وفي الأدير الثانية، أنا شاكرة لك يعني مهما قلت شاكرة لك.
ولي العهد: لا، لا شكر على واجب، وهذا واجب كل مواطن مخلص، سنة وشيعة. أنا أبغي أشوف كل الإخوان هنيه الليلة، كلكم والله إذا في أحد عنده حس وطني تعالوا تكلموا، لحد يخاف، لحد يخاف.
الشاعر: احنا نبي، نبي يا طويل العمر يعني شنو التواصل الحين.
ولي العهد: أنا خلاص، الحقيقة ما بحدده اليوم، أنا أعطيت رسالتي ويتصور لي...
الشاعر: الانسحاب من الشارع ألحين؟
ولي العهد: إيه نعم.
الشاعر: من الكل رجاءً..
ولي العهد: والهدوء.
الشاعر: والهدوء، واحنا إن شاء الله كلنا بنوصل إلى نقاط مشتركة.
ولي العهد: آمين.
بشمي: إن شاء الله.. مشكور طويل العمر.
الشاعر: شكراً يا طويل العمر.
ولي العهد: شكراً.
الشاعر: حقيقة أعزائي المشاهدين يعني ما في أي تعليق أقدر أقوله أكثر من اللي سمعتوه، شاكرة لكم متابعتكم، شاكرة لك سمو ولي العهد...
ولي العهد: إن شاء الله، الله يحفظ البحرين، ويحفظ جلالة الملك وكل شعب البحرين.
الشاعر: إن شاء الله آمين، شكراً، شكراً للجميع.
بتاريخ: 18 / 2 / 2011