العدد 5384 - السبت 03 يونيو 2017م الموافق 08 رمضان 1438هـ

عادل الجصاص

this will be replaced by the SWF.

الوسط: أول شي عرفنه على اسمك
- عادل عبدالله أحمد علي الجصاص.
الوسط: من أي منطقة؟
- جدحفص؟
الوسط: الحالة الاجتماعية؟
- متزوج.
الوسط: طبعاً أنت عادل تشتغل في عمل الباجة نبي نعرف شلون وصلت إلى هذه المهنة، حنا نقول إنه غريبة علينا بحريني يسوي باجة وهذا فنبي نعرف شلون وصلت إلى هذه الشغلة؟
- الشغل صار من الشغل ويا الوالد أشتغل وياه في دي الشغلة والوالد بعد كان بعد يشتغل ويا أبوه إلا هو أبوي العود في هالعمل وأبوي العود كان يشتغل قبل ويا أبوه، يعني أباً عن جد عن جد عن جد أجداد هذه الشغلة.
الوسط: زين طريقة تسوية الباجة شلون طريقتها، ومتى مثلاً تروح تشتري، شلون طريق اختيار الأدوات من اللحم والروس وغيرها، هل لها اختيار معين؟
- طريقتها، طريقة شغل الباجة لازم تطلع لها من الفجر، يعني بعد صلاة الصبح أطلع أجيب الروس أجيب الكرشة الكراعين وآخذ الأشياء اللي أحتاجها إلى الطباخ ولازم تركيبها يكون من الفجر لأنه لازم على الأقل ويا ثمان إلى تسع ساعات إلين ما تبرز، لأن تكون شغلتها على الفحم بالإضافة إلى الغاز.
الوسط: انزين إذا رحت مثلاً تشتري لازم تختار ؟؟؟ (هنا الصوت غير واضح)...
- شغلة الباجة يسمونها الحويسة يعني تاخذ الكرشة الكراعين والروس، وقبل يسوون الشاردينة ألحين ما تجي، الشاردينة الحين ما تجي، وقبل الأوليين حتى الرية يطبخونها.
الوسط: انزين خلنا نعرف المصطلحات اللي قلتها، شنو الكراعين، شنو؟؟؟؟
- الكراعين هي الرجايل مال الذبيحة، الكرشة هي بطن الذبيحة، الراس معروف، والشاردينة تجي تحت البطن بس ألحين ما ميش، والرية (الرئة) معروفة.
الوسط: انزين باجة الجصاص اشتهرت عن جد جدك أو عن الأجداد، طبعاً وصلت لأبوك ووصلت ألحين إليك، شنو اللي يميّزها عن مختلف الباجات، مثلاً هل الباجة البحرينية تختلف عن الباجة العراقية، تختلف عن الباجة الإيرانية مثلاً؟
- باجة البحرين تختلف عن أي باجة، لأن كل مكان إليه طريقة. إيران إليها طريقة، العراق إليها طريقة، تركيا إليها طريقة، مصر إليها طريقة، باقي الخليج إليه طريقة، بس الطريقة البحرينية مميزة لأن بهاراتها تختلف، البهارات اللي فيها غير الشغل الباقي كامل. هذه شغلها هي وثاني شي على الفحم نفس ما قلت لك هذا إليه دور، والشي الأزيد البهارات اللي فيها تختلف عن أي بلد من البلادين الثانية، والباجة أصلاً عالمية يعني حتى الأجانب يسوونها؛ باكستان، الهند. بس كل مكان إليه طريقة.
الوسط: انزين أنت أول ما تعلمت الباجة جم أخذت مدة عشان تعلمتها، هل حصلت صعوبة مثلاً؟
- والله هذه الشغلة على الممارسة مالتك أنت كل ما مارست أزيد صرت خبرة أزيد، نفس أي شغلة يعني. حسب خبرتك أنت جم قعدت، يعني أنا لازمت الوالد وأنا صغير، أخواني بعد، عمومي بعد، عمومي يشتغلون باجة عندنا في المنامة عمي عبدالرسول زين وعمي الله يرحمه قبل بعد كان في المنامة توفى.
الوسط: يعني العايلة كلها تشتغل باجة؟
- إيه عبارة كل العايلة تاخذ لأنه شلون، لازم تدخل في الشغلة وقبل الكراعين احنا انظفها بعد، يعني احنا طريقتها لازم تطبخها أول بماي وبعدين اتنظفها، الكرشة بعد وكنا انظفها، احين يجي منظف، قبل لا، تشتريها أنت تصلخها أنت تنظفه، الكرشة بعد، يعني تنظيفها كان شغلة بعد قبل لا تطبخها، بس الحين قاموا ينظوفنها، والكرشة تجي منظفة، والكراعين تجي منظفة، صار أسهل إلينا. نشتري منظف ويبقى علينا الطباخ.
الوسط: انزين هذه الشغلة يعني أنا نفسي لو عن غيري شفنها غريبة على البحريني خاصة إذا كان شاب نفسك توه شباب، يعني هل تعتقد أنه من الصعوبة يشتغل واحد بحريني بهالشغلة، بهالنوعية مثلاً من الشغلات؟
- والله هو الشغل على قولتهم مو عيب، والشغل ما فيه صعوبة، الإنسان هو يصعّب على روحه، يعني شغل الحر ما فيه شي، أي واحد أصلاً يتعوّد على شغل الحر ما يقدر يشتغل تالي شغل مربوط في شركة أو حكومة، لأن شغل الحر اسمه فيه اسمك حر، والشغل نفس ما قلت ليك يعني أنت ما فيه حتى البحارنة اكو كلشي يشتغلون، يعني أشوفهم يعني أزيد من تسفيط سمج فيه، حمالية، انزين يغسلون، يشتغل في مطاعم، عندنه اهنيه في جدحفص جم واحد يشتغل في مطاعم، عندك أنا هنيه أشتغل في الباجة، عندنا عبدالحسن وعبدالجليل يشتغلون في السندويجات، عندنا عباس العاشوري وغيره يعني شغلهم حليو في شغل العيش وما عيش وهالمطاعم، وحتى هنيه اللي صوبنا بالإضافة للسندويجات عندنه كذا واحد منصور وغيره وفي المعجنات عندهم بعد. يعني أنا أجوفهم يشتغلون في كلشي، يعني ما شاء الله غير يعني باقي الخليجيين، البحريني بالذات يمكن يختلف عن باقي الخليج، يعني يحط ايده في كلشي، ها اللي أجوفه يعني.
الوسط: انزين فيه سؤال أنه الباجة تفتح المكان في الفجر شنو السبب، عادة في بعض الأوقات أنه تفتح في الفجر ويجوونك زباين، ليش يعني بالذات الفجر؟
- هيه الباجة معروفة أكلها في الفجر من أساس أيام الحمالية الأوليين اللي في المنامة، الحمالية الأوليين اللي يجرون الكواري لطوال هي شغلهم من فجر يكون، فكان الأساس هذا هم زين، والحين نفس ما تعرف الأيام تغيّرت والناس تغيّرت، الحين صار السهر عند الناس أزيد زين، يعني السهر قبل ينامون من وقت الساعة 8، الحين لا يقعدون للساعة ثنتين وثلاث ولأذان الصبح، فصار الشغل الباجة شغل في الليل أزيد من النهار، وأنت لازم تمشي ويا الوضع، يعني هي السالفة مو على الفجر أو غيره، متى ما وُجد الكستمر أنت وياه موجود جديه، وقبل نفس ما قلت لك أول الحمالية هم اللي يشتغلون الشغل كله الفجر، وهم أكاله الباجة. والزباين بعد الحين مو بس مثل قبل، أول الحمالية والشواغيل زين، أول هم اللي ياكلونها ذي، الحين لا، الحين صارت الأكلة شعبية على الكل، يعني الكل ياكلها، ياكلها الموظف، ياكلها العامل، يعني ما صار عندهم نفس ما تقول هذه الأكله مخصصة إلى فلان، ياكلها حتى الصغير، عندي جهال صغار تلاقيه صغير سن لكن إذا جا يقول لك وين الكرعون ووين الكرشة ياكل، يعني مو يدوّر اللحم، يدوّر الأشياء اللي يمكن الأوليين ما ياكلونها، فصارت الأكلة فيها شعبية أزيد أنا أجوف، يعني عرفوا الشغلة وعرفوا الأكلة وعرفوا الميزة اللي فيها، وفيه ناس يفكر أنه هذه الأكلة فيها دسومة وغيرها وهذه نظرة غلط لأنه الباجة أصلاً ما فيها إضافة أي دسومة، الدسومة اللي فيها منها وفيها وطبقة الدسومة معروفة إذا تصير ويا الماي تصير دائماً فوق فأنت مجرد تباعد الطبقة اللي فوق، تحت يجيك صفو ماي ما فيه أي دسومة.
الوسط: انزين الباجة دايماً فيه ناس يقولون زباين خاصة الجصاص احنا نجي مخلص ما فيه، ويش ردك عليهم؟
- والله هو مو على ما فيه، لأن على قولتهم من سبق لبق، وأنا إذا جيت جاي وببطل فيه كوستمر قاعدين والبارسل هو اللي يشيل، إذا يجيني عبارة بارسلات بهالقد دينار أو هالقد صفاري هذا هو اللي يشيل الكمية اللي عندك زين، وأنت تخلص ويكون شغلك تخلصه أفضل مما يكون عندك بايت وتخليه وهذا وبعدين تخليه ليوم ثاني ما يصلح، لأنه هذه الأكل كل يوم بيومه، فأنت تسوي الشي اللي بحيث يغطي السوق وفي نفس الوقت أنت تمشي شغلك، يعني ما تمبي تخلي بعد كمية أزيد وأزيد وبعدين يتم عندك، لأنه هذا ما تقدر تخليه ليوم ثاني وما يصلح، وحتى لو خليته ما يصلح ليوم ثاني، فالأفضل أنك تسوي الكمية اللي أنت تعرفها تمشي في السوق وتقنع على قولتهم برزقك والله يرزقك جذيه.
الوسط: انزين هل يجونك زباين أجانب غير المواطنين مثلاً ياكلون باجة؟
- واجد أجانب، يجوني يعني فيه هنود ياكلون واجد، عندنا ويش تبي جنسيات فلبينية، باكستانية، عندك من الخليج، عندك السعوديين يجون واجد، في ناس يتعنون من السعودية ياكل هالأكلة، يقول احنا في السعودية ما عنده هالأكلة، يعني في السعودية على حجمها يجي هنيه ياكل الباجة ويروح، نفس ما حنا نروح ندوّر البخاري والمندي عندهم، هو يجينا من السعودية يدوّر الباجة عندنا، باجتنا مميزة عندهم. وعندك من دبي فيه بعد شباب يجوني وعندهم مطاعم، وعرضوا علي عرض أني أبطّل عندهم هناك فرع زين وقالوا أنت بس عليك إدارة بس احنا على قولتهم نفس السمجة اتطلعها من الماي تموت، احنا نقنع بشغلنا هنيه أفضل ما أروح وأتغرّب، يعني الإمارات مو بعيدة ولا هي غربة بس نفس ما تقول هنيه شغلك ويا ربعك وجماعتك وأنت مرتاح البال، تخلص تمشي بيتكم، جديه يعني.
الوسط: ويش اللي يميّز باجة الجصاص عن باقي الباجة اللي في البحرين مو عن اللي بره، يعني الناس كلها من الدير، من سماهيج، من الرفاع، كلهم دائماً يجون هنيه، فشنو اللي يميّزها من أيام الوالد، من أيام جدك، ويش تعتقد يعني؟
- والله هو أنا أقول لك شي واحد: الطّبْاخ؛ الطَبْاخ في أي شي يعني هو نَفَس، نفس الطَبّاخ نفسه، يعني أنت ما تقدر تقول أنا باجتي أحسن وحدة، لازم اللي يجيك هو يميّزك، يعني هو يقول لك أنت شغلك غير الباقي، يعني إذا جيت أنا قلت لك أنا شغلي أحسن من فلان وأحسن واحد ما يصير، لأنه كل واحد بيقول شغلي أحسن، فلازم اللي جاي الكستمر هو اللي يضوّق الأكل، فهو يحس بالفرق من مكان لمكان وهو اللي يحكم، يعني هو يقول لك والله شغل فلان أفضل من فلان، أو ليه مذاق أو فيه تست أزيد بسبّة أنه الشغل يبيّن عنده، والبهارات نفس ما قلت ليك والشغل هذا هو اللي يبيّن.
الوسط: انزين نقدر نسأل واحد من هنيه من الشباب... عرّفنا على نفسك.
- مالك أحمد عبدالرضا درويش.
الوسط: ويش رايك في باجة الجصاص؟
- الصراحة ممتازة.
الوسط: أنت زبون دايم هنيه؟
- أكيد بشكل يومي.
الوسط: ويش تعتقد اللي يميّزها مثلاً عن غيرها؟
- بهاراتها، البهارات البحرينية تميّزها، ويميّزها إلا هو اللحم وفير فيها ونفس السعر يعني 500 فلس.
الوسط: انزين هذا طبعاً يرجعنا لسؤال ثاني بعد عادل؛ هل ارتفعت الأسعار بالنسبة إليك؟
- هي ارتفعت ؟؟؟؟؟؟ (هنا وشوشة) مثل والصحون والأجياس اللي نستخدمها حق البارسل وهالأشياء والكركم والفلفل، بس احنا هنيه بما أنه نشتغل في منطقة عبارة احنا في حي ويا جماعتنا فما حبينا نرفع السعر زين، خليناه مثل ما هو 500 فلس، يعني نفس ما تقول إلى الجماعة علشان ما بغيناه نغيّر عليهم شي ونزيد، لأنه احنا لا عندنا أجانب ياكلون قليل يعني إذا بجي، وأنت قد ما تراعي الناس، الناس تراعيك. وأنت هنيه يعني الوضع كله نفس بعضه يعني، الكل مزيد فأنت تقوم تزيد بعد، فخلينا الوضع نفس ما هو والحمد لله الرزاق الله.
الوسط: انزين كلمة أخيرة؛ ويش نصيحتك للشباب البحريني خصوصاً بهالأشغال مثلاً صنع الباجة، مثلاً واحد يسوي كباب أو شي، هل تحس أنه هي مثلاُ شغلة زينة للبحرينيين، تثبت وجودهم أو شنو؟
- والله أنا أشجع البحرينيين على أنهم يشتغلون هالأشغال، يعني هم ما شاء الله يعني ويش أقول لك في كلشي يحوطنا يدهم يعني يبرعون فيه، إن جيت في مكنكة إن جيت في أي شي يفهمون، وهم مو مقصرين وأتمنى يحطون ايدهم ازيد، يعني أشجعهم أنه يشتغلون أي شغلة زين الرزق في كل مكان، بس عليه يتخصص في شي والله بيوفقه، يعني بس يتخصص في شغلة من الشغلات الله يوفقه لأنه هو بيبدع فيها، مجرد تخصص ماله في شغلة بيبدع فيها، وحنا نفس ما قلت فينا اللي يدش البحر وفينا اللي يشتغل جزاف وفي اللي يشتغل كلشي زين، وأشجعهم أنهم يستمرون على هذا الشي يعني، وإذا يزيد الشغل مالهم أفضل، يعني أشجعهم أنه الولد ياخذ مهنة الأبو جديه، لا يخليها تروح.
الوسط: مشكورين على كلّ يا حجي عادل.

 

صحيفة الوسط البحرينية - العدد 5384