صناعة الفخار

الوسط: تعرفنا على اسمك أول
مجيد عبدالرحيم عبدالعزيز.
الوسط: من أي منطقة؟
من قرية عالي نفسها.
الوسط: جم عمرك؟
33 سنة.
الوسط: أول شي عطنه فكرة عن الفخار، من وين تجيبونه، من وين تصنعونه؟
طبعاً الطين حنا نجيبه من البحرين وأكثر شي من منطقة الحنينية بالرفاع ومو كل أحد يقدر ياخذه لازم ترخيص وجديه. طبعاً كميات كبيرة من هذا الرمل الطيني وما نجيبه منيه والدرب لازم واحد يكون خبير في الطين، يحمل معا ماي ويروح يجيكه، يعني يخلطه مع الماي يشوفه يتماسك.
الوسط: يعني ليه مواصفات معينة قصدك؟
لازم مثلاً ما فيه جير وما فيه حصى واجد وما فيه شوائب واجد، يكون جديه نظيف وطبعاً كميات كبيرة نجيب هنيه تكفينا سنوات. يجيبونه من منطقة الحنينية مثل ما قلنا. طريقته أول شي ينخل يصير كلش ناعم وينحط في أحواض ثانية وينزل من حوض إلى حوض حتى يتوزع، بيكون طين كلش منقى صافي ما فيه ولا شوائب من هالنبتات الصحراوية أو الحصى وهالشغلات هذه.
طبعاً عقب ما يتوزع على الحوض الثاني كلش الكبير هذه يتعرض لأشعة الشمس فيجف ويبقى بس الطينة لينة من غير ماي. يجيبون كميات كبيرة منها عند محل الصناعة وقبل ما الصانع يصنع تنعجن يطلعون كل الهوا اللي في الطينة عشان تكون متماسكة. طبعاً بعدين نثبتها على الويل أو الدولاب (العجلة هذه) ويبتدي يشتغل، ما يستخدم ولا شي ويا الطين في وقت الصناعة بس الماي. ايه طبعاً عشان ما تكون جافة ويقعد يحرك ويشكل الشكل اللي يبيه. وبعد لو تلاحظ بتكون الأدوات مالت الفخار كلش بسيطة، خيط على قطعة قماش الشغلات هذه البسيطة.
الوسط: يعني الأشكال اللي تسوونها من إبداع اللي يسويها أو شنو، شلون طريقتها؟
هو مو إبداع، الإبداعات واجد. صناعة الفخار أنا أعتقد آلاف الأشكال اللي تصير فيها مو بس حق أواني حتى حق تشكيل ما توقف الشغلات من الفخار واجد أفكار فيه. يعتمد، هو أكثر شي أول شي نعتمد على طلبيات والشغلات حق المصنع، جديه لو واحد حاب يتفنن راح تطلع واجد أفكار وأشكال.
الوسط: انزين انت اتعلمت هذه الشغلة من وين؟
هي أصلها من الوالد لكن أنا طبعاً ما لحقنا على الوالد وبعدين توارثها اخوي الكبير واخوانا اللي اكبر منا ولين ما وصلنا وان شاء الله بس تمتد لعيال اخوانا وعيالنا، وحياكم الله.
الوسط: انزين، الزباين مالكم شنو نوعيتهم؟
الزباين والله فيه بحرينيين واجد يجوون من كل مناطق البحرين، في المناسبات والشغلات هذه واجد يجون، المدارس. عندك خليجيين بعد واجد يجون. الأجانب بعد كامل كل الجنسيات تقريباً.
الوسط: انزين لو رحنا للصنع مرة ثانية، لو مثلاً الحصالة أو شي جم تاخذ من الوقت في صنعها؟
هو يعتمد على حجم الحصالة والشغل اللي بيكون فيها، فيه شغلات صغيرة ما تاخذ ولا دقيقة بسرعة الصانع يصنعها، وفيه شغلات كلش كبيرة ما يصير نصنعها مرة وحدة يمكن تاخذ اسبوع على تسويتها، على حسب الحجم.
الوسط: انزين بغيت أعرف الوالد طبعاً كان يمارس هالمهنة...
الجد والوالد والاخوان الكبار للحين، طبعاً الوالد متوفي وظلوا الاخوان الكبار، فيه مصنع ثاني؛ مصنع عالي ومصنع هنيه مصنع دلمون حنا، اخوي الثاني اللي اصغر من الاخ الكبير.
الوسط: انزين فيه سؤال دايما يطرح نفسه؛ ليش بالذات عالي اشتهرت بالصناعة هذه، ليش مو قرية ثانية؟
طبعاً لو تلاحظ أنه عالي فيها أكبر مقبرة أثرية في العالم أعتقد، يوم نقبوا في الآثار لاحظوا فيه جرات فمن القدم كانت هذه المنطقة ما بنقول عالي فقط كل هالمنطقة تشتهر بالفخار وظلت ليومك هذا وإن شاء الله تستمر إلى المستقبل.
الوسط: انزين ليش لاحظنا احنا هالأجانب اللي يشتغلون، ما راح تقتصر مثلاً على البحرينيين؟
احنا نتمنى والله بحرينيين يكونون في هالشغلة، يعني احنا نحمد ربنا أنه الى الحين ظالين أصحاب المصانع وما صار هذا الشي، لأنه إن شاء الله تظل هذه الحرفة، وهي مهما كان يعني تراث وطني. ومثل ما تشوف لكن ما أعتقد لازم في أي محل بيكون محل تجارة لازم تستعين بالأجانب اللي يسوون لك الشغلات هذه. هو واجد فيه بحرينيين في كل مصنع يمكن أكثر من 3 والحمد لله على هذه النسبة، أنه ثلاثة بحرينيين على الأقل يشتغلون والبقايا كله عمال، هذول اللي يسوون كميات كبيرة من هالشغلات، وأكيد البحرينيين بتكون هذه حرفة بالنسبة له وشغلته الثانية، هذا طبع البحريني.
الوسط: انزين فيه سؤال ثاني، هو طبعاً حسب المدخول المادي لهالشغلة مقارنة بالتعب اللي فيها، هل تسوى لو فقط لإحياء التراث؟
هو مو إحياء التراث فقط، هذا خله على جنب هو أهم شي أنه هالشغلة موجودة في دمنا على ما يقولون وما أعتقد أحد يقدر يهد هالشغلات، فيه أعرف اخوان وشباب تركوا ومردهم رجعوا لأنهم حابين هالشغلة، وأنا أعتقد واحد منهم. بالعكس هي كلش حرفة جميلة وناس واجد اتجهوا ليها وطوّروها.
الوسط: انزين أنت طبعاً تعرف تنحت على الفخار، تقدر تشرح لينا هالمهنة؟
هي طبعاً أنا الشغلة اللي اسويها انسوي آنية تكون جفافها لا هي يابسة كثير ولا هي لينة معتدلة حق تفريغ نفرغها، طبعاً نسوي كميات كبيرة نخليها طبعاً في أكياس عشان ما يجفون لأنه طبعاً إذا جفت راح يصعب الشغل وواجد المعاملة مع الطين راح تكون يابسة فتكون معتدلة لا هي لينة ولا هاي. ونستخدم حق القطع سكين طبعاً نحيفة وبعض الشغلات اللي اتزين مثل الدائرة وباقي الشغلات هذه، ونبتدي نشتغل عليها، أكثر شي يصير تشكيلات هندسية أو شغلات بحرينية، شغلة بحرينية من العمارة البحرينية ناخذ اكثر شي هالتشكيلات.
الوسط: زين أكثر شي كانت سابقاً صناعة الفخار مقتصرة على الحصالات والآنيات وغيرها بس الحين تطورت أعتقد هذه الصناعة؟
صح كلامك لأنه قبل ليش، لو ترجع نقول إلى 30 سنة أو أكثر، من اللي راح يشتغل شغلات حق إنارة، من اللي بيشتري شغلات هاي؟ كانوا اكثر يشترون الشغلات اللي يستخدمونها مثل الشربة مالت الماي أو بنقول المبخر والقدو وهالشغلات هذه. الحين طبعاً كثير كثير دخلت صناعة الفخار في الديكور وفي شغلات فنية وفي التحف وفي شغلات واجد دخلت.
الوسط: هل تعتقد أن هذه الشغلة صعبة على البحرينيين، خصوصاً على شباب كونك أنت شاب وقاعد تشتغل في النحت على الفخار؟
والله فيه كثير من المراكز الحرفية في البحرين بحرينيين واجد يشتغلون في هالحرفة، طبعاً يجيبون فيهم اخصائيين في الطين وفنانين في هالشغلات ويدرسونهم، بالعكس شغلة جميلة.
الوسط: هل تعتقد أنه أنت بتروح وتواصل في هالشغلة بعد؟
أنا أتمنى أواصل لكن أكيد راح أتجه لحرفة ثانية لكن مردي لازم أرجع لها.
الوسط: انزين مجيد قول لينا كلمة أخيرة...
كلمتي الأخيرة والله أنا حاب عني وعن جميع أصحاب مصانع الفخار في قرية عالي ولأننا نمارس هذه المهنة التي ورثناها عن آباءنا وأجدادنا، من المفترض على الجهات المعنية الاهتمام والعمل الجاد لرعاية هذه المهنة لإحيائها حتى لا تندثر. طبعاً عن نفسي أنا مارست هذه الحرفة مو علشان دخلها المادي أو...
الوسط: يعني أنت مارست المهنة من يوم أنت صغير وحاب أنه تكمل فيها وتواصل فيها بس تبغي اهتمام أكثر من الجانب الرسمي؟
نعم، أنا ما أخذتها علشان عوائدها المادية أو هالشغلات، ولكن أعتقد أنها في دمنا مثل ما تقول وحباً فيها من يوم حنا اصغار لهاي الوقت وحاب إن شاء الله اخواننا وأهلنا وكل بحريني يهتم بهذه المهنة.
الوسط: هل تعتقد أن هذه المهنة إذا بغيت تتعرف على حضارة الشعب البحريني، أنه هي بتكون من أوائل الأشياء المفروض يتعرف عليها؟
هي طبعاً لكل شعب من الشعوب إذا حاب تتعرف على حضارة من الحضارات، حضارة شعب أو حضارة أمة لازم تغوص في تاريخ هذا الشعب عشان تعرف أكثر عن هذه الحضارات.
الوسط: طبعاً في قبور عالي الظاهر شافوا مثل هالشغلات؟
طبعاً لو تلاحظ في التلال الأثرية في عالي واللي هي أكبر مقبرة أثرية في العالم، طبعاً توجد في عالي، عقب ما نقبوا الآثار لاحظوا أن جرار، وهذه الجرار مع واجد شغلات كانت توضع مع صاحب القبر وكانت أعتقد يوضع فيها أغراضه.
الوسط: ولهذا تحتاجون إلى رعاية أكثر من الجانب الرسمي والاهتمام؟
أنا أتمنى ويكون بجدية أوضح، أنا أتمنى هاي الشي. طبعاً عندي رسالة ثانية إلى الشباب البحرينيين أو الشابات، طبعاً أتمنى يعملون على إحياء هذه الحرفة مو بس حرفة الفخار طبعاً الحرف التقليدية البحرينية أو الحرف اليدوية كلها. أتمنى تظل هذه الحرف هي ختم باقي في هذه الدولة.
الوسط: تعتقد أن الشعب البحريني يقدر يثبت نفسه في كثير من الأعمال؟
ما شاء الله أنا لاحظت كثير من الشباب كانوا صغار أو كانوا شوي كبار واجد اتجهوا في الآونة الأخيرة إلى حرف الواحد ما يتوقعها. ما شاء الله أنا أحس أنه الشاب البحريني طموح ويقدر يواصل. إن شاء الله يحييون هالشغلات بس.
وشكراً طبعاً لكم وما قصرتون...