خصص برنامج " الناصية " الذي يبث على " الوسط أون لاين "اليوم ( السبت ) في حلقته هذا الأسبوع عن هواية تربية طيور الحمام ، حيث جلس الجدحفصي وتجاذب أطراف الحديث مع عدد هواة تربية الطيور من البحرينيين ومنهم سيد هلال وعبدا لجليل وإبراهيم الدرازي وعبدا لغني فكان هذا اللقاء :
الوسط - محمد الجدحفصي
الوسط : سيد هلال من متى تربي طيور وشلون ربيت طيور
سيد هلال: التربية الصح من عشر سنوات تقريبا يعني كنت اربي هذيك الأيام قبل عشر سنوات اربي الأشياء العادية صفافيق مكاويات دوربين شغلات بسيطة بس الحين اشتغلفي الأشياء مثل أبو فوطة شماسي بخارى لونق فيس اللي الحين أحبها والسوق بعد تبغيها
الوسط : في احد من اهلك يربي طيور
سيد هلال : يربي من قبل أبوي يربي في البيت كان هاوي الشغل هذه على الحمام كانوا في البحرين، أخذناها من أبونا
الوسط : أبو خليل تشارك
الوسط : عبدا لغني من متى تربي الطيور
عبدا لغني : من الصغر من أيام الدراسة وللحين أنا اربي طيور بس وقفتهم فترة أيام اللي كنا بكرانة لأن ضيق البيت ولان انباقوا بعد ، وتركتهم لمدة لين ما حصلت بيت في مدينة حمد ورديت بدأت بالشغل من جديد
الوسط : هذا الشيء يرجعنا لشغلة وهي اللي يتركهم أرد يرجع ليه
عبد الغني : هذه الشغلة تمشي في الدم نفس المخدارت ونفس الجكاير لما أجرب مرة وتدمن عليه ما يروح من الدم
الوسط " وهل الهواية تروح لولدك مثلا
عبدا لغني : أكيد عندي أولاد متعلقين بالحمام مئة بالمائة لازم كل واحد يميل لشيء معين بس بما إن هذا الشيء ويشوف الابو وأنا بعد ورثتها من جدي وأبوي موجود بالبيت
الوسط : كم سنة صار ليك
عبد الغني : تقدر تقول من 78
الوسط : أسعار الطيور ديك الفترة
عبد العني : ديك الأسعار في أسعار نازلة وفي أسعار مرتفعة ، أنا أتكلم عن روحي أخذت طيور على 100 دينار ديك الأيام والمائة دينار أيام المدرسة تعني لي واجد ، وفي طيور على عشرة دينار وعلى دينار وعلى ثلاث ربيات الدشاتة
الوسط : عبد الجليل
عبدا لجليل : عبدا لجليل مربي جديد مو من زمان ، بس كان هاوي الطيور من الصغر هاوي الطيور ، بس ما في مجال أربيهم يمكن مشاغل الحياة
الوسط : كم صار ليك جديد
عبد الغني : صار لي أربع سنوات من بعد الأحداث 2005 ابتدأت ا فيهم لين ما حصلت بيت
الوسط :والأنواع اللي تربيهم
عبد الغني : كل الحمام هاو ينهم أي زينة جميل يعجبني أخذهم ما أتابع السوق
الوسط : لو يعجبك طير بسعر مرتفع تشتريه
عبد الغني : أول ما دخلت السوق اشتريت كريميات 450 دينار ما كان في يدفع واحد فيهم والسعر وكانت بدايتي جدي
الوسط : أبو خليل من متى تربي طيور وشلونا ربيت
إبراهيم الدرازي : أقول ليك أنا ربيت على السوق أنا جديد
الوسط : كم سنة صار ليك
إبراهيم الدرازي : 37 سنة
الوسط : متخصص بالصفافيق
إبراهيم الدرازي : لا بأنواع أطيور
الوسط : تذكر وين كانت السوق قبل 37 سنة
إبراهيم الدرازي : كانت في المحرق وتالي في سوق الحدادة وتالي جوا المنامة وبعدين جو مدينة عيسى بس الأساس هو المحرق .
الوسط : عبدا لجليل أغلى طير اشتريت كم
عبدا لجليل : 450 دينار
الوسط : وأغلى طير بعته بكم
عبد الجليل : 300 دينار
الوسط : تقعد ويا الطيور أي كثر من الوقت ؟
عبد الجليل : والله طول وقتي بالشغل احي 5 أربع ساعات اقعد وياهم أيام الإجازات
الوسط :وشي تسوي في الأربع ساعات
عبد الجليل : تنظيف نقل سوالف مال الحمام
الوسط : عبدا لغني وشي رأيك اللي يقول إن في ناس ينامون ويا الحمام من زود حبهم إليهم
عبد الغني : والله يصير كلشي جايز
الوسط : ما جربت أنت
عبد الغني : نوم ويا الحمام ما جربت بس قعده ويا الحمام اقعد ويهام أكثر من أولادي
لأني اشتغل شفت تقعد تحت ما تقدر تسوي شي
الوسط : يعني الواحد يخسر على الحمام أكثر مما يخسر على أولاده
عبد الغني : لا ما اعتقد نجيك فتر معينة شي ثمين جوهرة تشوفها لا زم تدفع فيها ، نفس العملية
الوسط : أغلى طير اشتريته بكم
عبد الغني : 1200 دينار
الوسط : وشي نوعه
عبد الغني : أبو فوطه
الوسط : وللحين عندك
عبد الغني : سنة وحدة ومرض وذبحته وقطتيه
الوسط : أغلى طير بعته بكم
عبد الغني : ما يتعدى 300 دينار
الوسط : يعني السالفة كأنها ما فيها مدخول
عبد الغني : هي هواية أزيد مما هي مدخول الهواية دائما مخسرة ما تربح فيها شيء
الوسط : وشهريا كم تخسر عليهم .
عبد الغني : شهريا بين أدوية أربعين وخمسين دينار ليهم ، شيل وقتك وجهدك مجرد آكل وهواء
الوسط : وأنت هاوي هل أنتجت طيور
عبد الغني : أنتجت طيور واشتغلت على طيور من جديد واشتغلت على النفاخ لون الرديوس سحبته من المدينة طورت على نفاخ واشتغلت على الدرابيل وسحبته من اللنوق
الوسط : تالي شنو تسوي بهم
عبد الغني : هو كانجاز للواحد
الوسط :سيد هلال دخلت في معارض للطيور
سيد هلال : أي قبل ثلاث سنوات
الوسط : معارض محلية طبعا
سيد هلال : وحصلت مراكز بس مو مراكز اللي اطمح إليها ويرجع لمشكلة من الطيور أو ساعات مشكلة من الحكم أو ساعات يكون الطير وقت التحكيم ما يبرز وساعات تخسر جدي بس هذه الـمرة عندي 12 طير أبو فوطة ندخل بهم
الوسط :وجربت تشارك معارض برى
سيد هلال : للحين
الوسط :ورحت معارض برى
سيد هلال :للحين مار حت بس في البحرين
الوسط : تعتقد إن طيور البحرين مقارنة بطيور الخليج والعالم
سيد هلال :مئة في المائة فالبحرين منبع للخليج تقدر تقول هي نفس اللؤلؤة تورد للخليج كامل من الطيور والسبب إن عندنا استيراد ولهذا إحنا نستورد أفضل الطيور من أفضل المربين من برى أمريكا واستراليا وهولندا وعدنا استيراد و يمكن على دول الخليج صعب أو غير مسموح ليهم ، وثانيا تحصل جميع الألوان في البحرين ، لأن المربي عدنا فقير ويحاول يطور من الطيور اللي عدنا ومستوياتهم هي عبارة يحاول يصنع ويطوره ويحاول قد ما يقدر يحك روحه بالفلوس يسوي يشي يسوى ، وبالمقابل الخليجيين عدهم فلوس يدفعون وإحنا نتعب وهم يدفعون علشان يحصلون طيور زينة .
الوسط : أغلى طير بعته بكم ؟
سيد هلال : دينار 3700
الوسط : شو نوعه
سيد هلال : نثية بخارى كاكية
على واحد اسمه مساعد الغريافي من السعودية
الوسط :وأغلى طير اشتريته ؟
سيد هلال : هي نفسها ومع طير 4000 دينار
الوسط : ويش رأيك باللي يقول إن أخذ طيور بالسعر نفس ما يقولون للواحد ليش ما تتزوج ؟؟فيقول أتزوجها يمكن تموت ؟
سيد هلال : أنا ما اضمن نفسي شلون أقدر أضمن طير إذا ضمنت نفسك اللي اعز شيء إليك ، الواحد يدخل يتوكل على الله
الوسط : يعني يتوكل على الله ويبغي ليه يجازف ؟
سيد هلال : كلشي يبغي ليه مجازفة ما تقدر تتحرك وحتى إنت عند باب البيت اذا ما تجازف ما تتحرك من أمام البيت
الوسط : طبعا أبو خليل متخصص في نوع الصفافيق ، فهل شاركت في معارض وحصلت مركز زين بطيورك ؟
إبراهيم الدرازي : أي نعم في السنابس وحصلت مركز الأول
الوسط : والطير وين راح
إبراهيم الدرازي : الله يرحمه ؛ عندي عياله
الوسط : للحين عندك
إبراهيم الدرازي : فرخين بس طلعتهم والباقي منهم ما طلعتهم
الوسط : وكم بعتهم ؟
إبراهيم الدرازي : سعر حليو مو غالي أحنا رامز
الوسط : وبس ما دخلت بطيور غير في معارض
إبراهيم الدرازي : لا أبدا
الوسط : وبجي يوم تترك الطيور ؟
إبراهيم الدرازي : ما يندرى عدنا حسين هو يستلم الشيء يوم أنا بقيت بالعملية هو كان مكاني ؛ وأنا بالعملية وأنا احاتي حلالي ما أهدهم
الوسط :حتى لو تركتهم ولدك موجود
الوسط :عبد الجليل ويش رأيك باللي يقول إن مربين الحمام ما هم في دنيا قعدات و بسطات ، ما يعرفون شو صاير بالديرة ؟؟
عبد الجليل : الهاوي اسعد واحد يكون ويمارس هوايته يكون اسعد إنسان فيها ومو كل الوقت يبقى مع الحمام ، وما أعتقد إن كل الناس جدي
عبدالغني : طيور البحرين من أحسن الطيور
نفس ما قال سيد هلال أن البحرينيين ناس فقاري يأخذون الزين مو التوب ويطلعون أحسن مستويات بعدين يجون الخليجين يشترونهم
الوسط : أسعار الطيور طاحت
عبد الجليل : في فرق إنك تودي طيورك السوق أو يجي الشاري عندك بالبيت ويأخذ الطبة خمسين دينار
في فصل تلاقيه بالسوق بخمس دينار بس في طيور تجي ليها بالبيت ما يبعه لو بأي سعر
الوسط : وهل بجي اليوم اللي ترك فيه الطيور ؟
عبدالجليل : كل واحد يرجع لهوايته ويش اللي يحب بوما إن هو طير هو هاوي يدفع فيه ويرجع ليه مهما كان
عبد الغني : مادامت الصحة موجودة ما اعتقد إن الإنسان يتركها إلا بعجز أو شيء
سيد هلال :إن الله بواصل والواحد ما يضمن نفسه وأي شيء على الإنسان ظروف وان شاء الله أتمنى إن ولدي
هو يتعلمها ؛ ولدي يطالعني ويش أسوي أقول أحنا قاعد تساعدني حياتنا مثلا بيع وشراء يقدر يقيم الطيور
