- في المنامة.
* من يوم انت صغير في المنامة؟
- اي.
* وش اتبيع اهناك؟
- ... فانيلات، ملابس.
* عجل من يوم انت صغير ما تعلمت شغلة غير؟
-... ما رحت مكان انا، ما خدوني حتى الشركة بعد رحت يوم بـ اربع انات اشتغل.
* تالي اشتغلت في بيع الملابس؟
- اي هناك سوق العتيقة الحين الي اهني بنوها، هناك، تالي جيت اهني.
* كنت من وين تشتريهم انت الفانيلات؟
- من عند التجار، بعد من وين بعد.
* ولحين تركت المنامة وجيت اهني؟
- اي.
* من كم سنة انت اهني؟
- اجي 7 سنين 8 سنين.
* والاول الشراية غير عن الحين؟
- الشراية... اربع خمسة دينار، عشرة دينار ساعات، بسيطة.
* وانت الأول اتروح المنامة في ويش، في نقل الاول ما في نقل؟
- لا الاول على حمير اروح، وبعدين اروح تالي شدي بسيارات اصغار اروح انجي عند السباحية المحطة ونرك.
* استمونها السباحية اهني.
- اي هذه السباحية.
* لش سموها السباحية؟
- هذه الاول نسبح فيها، عذاري اهني له، هذه الي اشوفها البراحة هذه ساب عذاري اهني الماي الى اهني اطمي علينا انجي نسبح يوم احنا جهال.
* ما شتغلت في الزراعة ولا شي؟
- اشتغلت في الزراعة بعد كرفوني في الزراعة ما خلوني، انا تالي رحت المنامة تالي، احنا توفى ابونا بعدنا جهال.
* وعتمتم على نفسكم؟
- قام خالي الله يرحمة "حجي عبدالله الرفاعي" وتالي يوم صرنا ودانا الزرايع نشتغل انحش، انجد، انسقي، بعدين تمكنا، بعدين طرنا مني مني رحنا المنامة حصلنا بعد بناية العتيقة التي بنوها الحين 6 طابق.
* والتجار الي وياك تذكرهم الي كانو ابيعون؟
- اي واحد اسمه عبدالرحيم واحد اسمه عبدالرحمن تجار الاول زينيين.
* الحين كلهم نفرو؟
- ما ضل احد ما ضل احد، كلهم اتنفرقو لا اله الا الله بعد الله كريم ما ضليت الا انا، انا ادنات ساعة ما شي من هذه الدنيا، اقاسي الريح والغبرة، لول انا تحت الدرج اهناك وين مكان الدعيسي دكاني مقابل الجنوب وساعات اجي الفية اهني عند الدعيسي مني عند الشربت رعات الشربت عند عبدالرسول خمدن نسيبنا ما خد رضيعتي هذا عبدالرسول خمدن الله يرحمه.
* بس ما تروح المنامة؟
- لين احتجت اروح له.
* قصدي تبيع؟
- لا ما بيع اهناك ابيع ويش، الحين ما ضل رزق الا الناس، خدو دولين هلهنود ما نقدر انبيع اهناك شي، السوق كله ليهم للهنود الحين، انت شوف الحين ما ميش قليل بحريني الا هناك، ما ميش الا الحلواجية الا اهني الا عند الحلواجي الي عند عبدالجليل الي اهني في صوب مقابل الشمال هذا اخذ من عنده اعطيه العتيق واخد الجديد.
* والسهلة الاول بس الجنوبية ولا وياه الشمالية بعد.
- هديك الشمالية وهذه الجنوبية.
* جديدة ولا من زمان بعد؟
- لا هدهم في شارع، يعني الاول اهني هصوب مني ... لبسيتين.... كله نخيل، النخلة قلعة الاول السلوق اسلقون.
* السلوق يعني ويش؟
- اسلقون لخنيزي
