العدد 5384 - السبت 03 يونيو 2017م الموافق 08 رمضان 1438هـ

في برنامج الناصية ... المعمر الحاج إبراهيم قمبر: عليكم بأكل الطازج بمواعيد ثابتة للوجبات

اعداد وتقديم : محمد الجدحفصي

this will be replaced by the SWF.
في برنامج الناصية ... المعمر الحاج إبراهيم قمبر: عليكم بأكل الطازج بمواعيد ثابتة للوجبات

استمل منهم يصير بس ما اللي ما استمل منه القرآن بس، يومياً أقرأه ما أستمل، بس الجرايد وغير الجرايد يعني تقرأ مرة وحدة تستمل، بس القرآن لا ما أستمل.

• انزين سنة جم متزوج أنت؟

- والله سنة الخمسينات أو الأربعينات يصير، يوم أتزوج أنا عمري 17 سنة.

• والحين جم عمرك؟

- عمري الله يعلم به، ما في شهادات.

• ما حسبته ولا شي؟

• انزين كنت أنت زراع لو بحار؟

- والله كنت بحار، واختلطنا البحار بالزراع.

• شلون؟

- يعني البداية أخذت النخيل وعمرتها وسويت فيها زراعة يعني ملفوف وغرنابيط، عاد جنوب مناك صوب السوق الجديدة.

• وصار عندكم حر الأول نفس الحين؟

- ازيد من الحر هذا، حر ما تقدر تطلع من زود قوة الشمس، بره ما تقدر إذا رأسك مكشوف يعني ما تقدر تتأخر واجد، بس الأول ماي موجود، ورانا وقدامنا ماي، هذه نعمة الله سلبها من عندنا. لو كان الماي موجود مثل الأول، اول كان داخل بيتنا ماي من مجاري مال النخيل. عبارة عن ساب يروح إلى آخر شيء في المجرى.

• انزين الأول تعرف أنواع الرطب هذا خنيزي هذا خلاص؟

- اي طبعاً، ما دام انتشينا على الرطب على النخيل احنا، نعرف الرطب المبشر، الخضيري، خلاصة، خصبة فدية اللي ما تعرفونها انتون.

• ما نعرفها هذه احنا، فيها منها الحين لو ما في؟

- يمكن فيه، لكن رطبها مو زين.

• ليش؟

- لأنه، الله يسلمك نوعاً ما يجلود شوي، يعني مو مديح. خصبة الفدية، السلمية، الحلاّوة، الحمري، بريسمي، احنا عندنا نخيل...

• هذه كلها تطلع في الصيف؟

- مو في الصيف، هالأيام...

• ايه هذه الأيام صيف لا؟

- لا، احنا ما نقول صيف، نقول قيظ، نقول صيف متى الصيف عندنا احنا، يعني على اصطلاحنا احنا في الديرة، آخر الوقت من الشتاء نسميه صيف.

• انزين وتالي تركت الا هو الزراعة؟

- ما تركزت الزراعة أنا، واصلت الزراعة والبحر، البحر أجي من الشغل واطلع اروح البحر بعد، بعدين بعت عدة البحر.

• تطلع بشنو، ببانوش؟

- ايه ببانوش، وبشراع بعد مجادف...

• من وينه لك اشتريته يعني لو؟

- ايه اشتريته من واحد من أهل سترة، وتالي بعته لأني لوحدي اروح.

• تروح لوينه لأي منطقة؟

- لصوب الجنوبي، منطقة ما تعرفها.

• بر شتية؟

- لا، بر شتية شمال، احنا نسميه معين والزغبة وأسامي مال صوبنا احنا.

• وتدش بحضور يعني؟

- لا، لا بقراقير، وأعمل أنا قراقير، أنا اللي أصنعهم.

• ويش أنواع السمك اللي تصيده؟

- هامور، جنمة، فسكرة، شحدود، شعري نصيد.

• انزين في اليوم الواحد تصيد أي قد؟

- والله عاد في اليوم الواحد ما أعلم، يوم تحصل لك 4 كيلو، 5 كيلو، على العدة، على جملة القراقير، إذا كان عدد القراقير مثلاً 30 لا، أنا الأول أروح ويا اخوي، اخوي كان نوخذة أروح وياه، عندنا 36 حيّة، حيز عاد مو قرقور. القرقور غير والحيزة غير. الحيزة تسوي لها بطن، والقرقور لا له صفقتين تشبكه بسيم أو بحبال، يعني تسوي له طوق مال سيم وتعمل على الطوق وتعمل له صفقة وحدة وبعدين تخليها وتسوي الصفقة الثانية.

• انزين وتالي هديت البحر ورحت بابكو؟

- لا، حتى أيام بابكو كنت أروح البحر بعد.

• هي سنة جم رحت بابكو؟

- في الستينات أو الخمسينات.

• يعني كان عمرك 20؟

- أول ما اشتغلت في بابكو كنت في الحفيز مال المعاشات، يعني على ما نقول فراش، انظف الطاولات وهذا، تالي جا الانكليزي بعد وعطاني مفاتيح مال حجرته، واشتغلت. تالي قلت لا ببدل، هذه الشغلة الحين ما احصل منها فايدة، قمت حاولت وحاولت وبدلت، الاول كان عندهم جم يعطون الجماعة اللي يشتغلون داخل الفينري على 10 آنات، والعشر آنات نص روبية أو 8 بيزات.

• ما تجيب ليها شي يعني؟

- لا، لا الحين لا، بس اول تجيب. الأول الروبية تجزي ليها عايلة. الاول جيس العيش بسبع روبيات. لكن مو البستمي مال باكستان عيش على ما نقول حلوايوه، عيش عادي عبارة. الجيس بست وسبع اول، تالي جا بستمي وما ادري ويشو وغلّوه، والعنبر وغلّوه.

• جم سنة اشتغلت في بابكو؟

- 23 سنة.

• وهديتهم أو طلعت تقاعد؟

- لا، لا طلعت تقاعد. إلى الحين يعطوني راتب.

• بس يقولون جوا ليك جم مرة يجيكون إذا كنت موجود أو مو موجود؟

- ايه، لا لا، يجيبون ليك ورقة، أنا من زمان طالع، وكله معاشات يعطونا معاشات، ويقولون هذا مو ميت ولا شي حتى نفتك منه!

• انزين، يبغون يتأكدون هذا موجود أو لا؟

- ايه، يتأكدون يعطونا ورقة، كل سنة يجيبون لينا ورقة، اكتب رقم مال التقاعد، واكتب اسمك، واكتب غريت ما ادري ويشو، اعطي هذا الولد عبدالأمير يمليها ويوديها المكتب.

• ها، يعني مو مصدقين ان انت عايش؟

- لا، عندنا بعد واحد من الديرة يشتغل في بابكو في الحفيز يشتغل، يسألونه بعد، هذا باقي لو مو باقي. بعدي باقي أنا، ولو يبغوني اروح ليهم هناك، لو يخلوني ادش دشيت ليهم بعد.

- ويش تأكل من أكل متى تتغذى متى تتعشى؟

ها الغذاء الساعة 11 وربع إذا زاد عن 11 وربع صار وصل إلى النص ثاني من الساعة إلا ربع يعني أحنا عن ؟؟؟ قضاء قضاء لله قربة لله.

- عن الأكل؟

أيه على الأكل لأن طاف تايمه هو 11 وربع يعني هذا هو يومية 11 وربع 11 وثلث إذا صار وصل النص أو زاد عن النص أنويه قضاء.

- أنزين ويش تأكل من أكل؟

الأكل لا سيدي أكل لحم سمك مطبوخ أي شيئ مكتوب في البيت أكله.

- بس أهم شيئ طازج يعني توه طالع؟

أيه الطازج السمك خب طازج اللحم إذا جابوه لا طازج.

- أنزين والعشاء؟

العشاء ما ليه تيم لا هذا العشاء أن ما أعتني به يعني مثل الغذاء أهم شيئ الغذاء 11 وربع 11 وثلث إذا زايد عن النص خلاص.

- وتنام من وقت، أتنام متى؟

بالليل ما ليي تيم بالنوم لا يعني الساعة 11 أروح على المنام ما يجيني نوم مثلاً، يعني العشاء ما ليه تيم أي ساعة أشتهيت أكل أكل.

- الريوق؟

الريوق ليه تيم بعد الصبح الساعة تقريباً عقب الساعة ست الساعة ست ونصف إلى الساعة 7 أهم شيئ الغذاء أهم شيئ 11 وربع 11 وثلث إذا صار 11 ونصف أن خلاص قضاءً قربة إلى الله.

- أنزين ورحت المستشفى من قبل لو ما رحت؟

رحت المستشفى المستشفيات بعد 11 وربع يجيبونه

- تأخذ أدويتهم لو ما تأخذها؟

أخذها أستعمل مال القلب عندي بعض العضلات أيقولون ضعيفة أستعمل مال القلب.

- أنزين تذكر متى جابوا الكهرباء في النويدارت؟

الكهرباء الله يسلمك يمكن في الخمسينات أو الستينات.

- أول بيت جابوه تذكره أو لا؟

لا أول بيت لا أول بيت كلنا حاربنا على الكهرباء كل واحد يقول بدني أن سلكت بيتي قبل ما يحطون كهرباء ألي سلكه واحد من الحايجة أحمد بن علي الحايجة أوعبدالرحمن الحايجي ما أعرفه.

- أنزين السنة ألي كنت أتزوجت فيها منهوا حاكم البحرين تذكره؟

أيه أذكره كان الشيخ حمد

- كم حاكم لحقت عليه أنت الحين؟

الشيخ حمد والشيخ عيسى والشيخ سلمان هذا مو على الحين ألي هو شيخ...

- لو قلنا لك يا حجي إبراهيم نصايحك للناس للشباب ويش تأكلون أشلون تشربون؟

أقول ليهم ما ياكلون أكلي أنا ما يتغذون على تيمي أنا أولادي ما يتغذون على تيمي.

- لا بس أحنا قصدنا الناس ويش أتقول لهم كلوا ويش حق أتصيرون زينين؟

الأكل أن ما أقول ؟؟؟ لا أنا أكل أنا إذا فيه أنت قبل ما تجي من أشوية أنا توي قايم من الغذاء على قولت النسوان ؟؟؟؟؟

- نبي أحنا نصايحك إلى الناس ما نبي هذا؟

نصايحي إلى الناس إذا قلت ليهم أكلوا سمك لأن الله ما ذكر سمك ذكره لحم ومن البحر تستخرجون لحماً طرياً تقول ليهم أكلوا لحم ؟؟؟ السمك ؟؟؟ كل واحد يشتري سمك أيه هذو أكل المتداول عندنا أحنا السمك واللحمة والدال مثلاً أيه هذي الاشياء هذي.

- مشكورين يا حجي إبراهيم.

الشكر لله

صحيفة الوسط البحرينية - العدد 5384