انتشار المطاعم العراقية في البحرين سببه تقارب العادات والترابط القوي بين الشعبين

النجفي هيثم حمزة لبرنامج «الناصية» الذي يبث على «الوسط أون لاين» اليوم:

أصبحت المطاعم العراقية خلال السنوات القليلة الماضية تنتشر بصورة كبيرة في البحرين، حتى بتَّ لا تكاد تدخل منطقة إلا وتجد فيها مطعما هنا أو هناك يحمل اسما طابعه عراقي، ويحمل إيحاء إلى طبيعة جنسية القائمين عليه. برنامج «الناصية» استضاف صاحب أحد هذه المطاعم للحديث معه عن أسباب انتشار هذه المطاعم، وخصوصا بعد سقوط النظام العراقي في العام 2003، وما هو مدى إقبال البحرينيين والمقيمين على مثل هذه المطاعم... فكان هذا الحوار:

أولا عرفنا على اسمك.

- آني عراقي هيثم حمزة محمد، من - محافظة النجف بالعراق، قضاء المناذرة، حي الجمهوري.

صار لك كم بالبحرين؟

- صار لي تقريبا 6 سنوات في البحرين.

وشنو تشتغل؟

- آنا أشتغل صاحب مطعم للمشويات العراقية.

يعني متخصص في هالأكلات؟

- إيه نعم، آنا كبابچي من العراق چنت أشتغل، طبعا ما چان عندي مطعم بس چنت أشتغل كبابچي بمطعم الحسن بشارع الهاتف، ويعني تعلمت الصنعة في العراق وآنا صغير، چنا نشتغل بأيام الإجازة مال العطلة الصيفية فحبيت الشغلة وتولعت بيها وطلعت من العراق تقريبا بسنة 2000 بعمّان أيضا قعدت 3 سنوات، أيضا هم اشتغلت بنفس المجال، في مطعم مشهور باعتبار العراقيين چانوا موجودين هناك بالأردن. والله وبعدين اجينا للبحرين وعلى نفس النمط ما غيّرنا شي الحمد لله.

ممكن تعطي نبذة عن الأكلات العراقية؟

- طبعا احنا العراقيين مشهورين بالكباب، الكباب عندنا من الأكلات المشهورة بالعراق، وطبعا يجي بعد هواية أكلات متنوعة، منها مثلا اللي نشتري بالسمج المسكوف، طبعا آني ما أختص بيه ولا أسويه لأنه ما اشتغلت بيه صراحة لأنه احنا عندنا هناك بالعراق كل محل يتخصص، مثلا أنت اليوم مشتهي كباب تجي عند هيثم، مثلا إذا بنفسك مو كباب بنفسك تمن ومرق على قولتنا احنا العراقيين أو قوزي تروح مثلا لابن سمينة هذا مشهور اسمه على قولتكم انتوا تقولون العيش وصالونة، خاطرك مثلا باقلة بالدهن تروح مثلا تاكل بالمطعم الفلاني.

بالعراق كل مطعم إله تخصص، يعني عندنا مطاعم على مستويات كبيرة عمّال وموظفين ومحاسبين وعالم والدنيا قايمة على شواية دجاج. يعني تشوف شوايات دجاج يعني تشوفها بس تقعد عالطاولة تنزل لك المقبلات يقل لك تريد حبة لو نص؟ يعني وحدة عدلة لو نص طلبك، تقل له مثلا جيب لي نص أو جيب لي عدلة. بس يعني هذا ماكو مثلا كل مطعم تكون بيه أكثر من طبخة وأكثر من وجبة، لا هنه يكون كل مطعم مختص وإله اسم معيّن يكون هو مشهور بيه يعني, يكون مثلا أكو ببغداد كنا نشتغل بشارع الجمهورية منطقة الكفاح، مثلا أكو اسمه كص السيد، كص السيد طبعا أنتم تطلقوا عليها الشاورما احنا انسميه كص، فچان هذا كص السيد مشهور ببغداد تروح شارع الجمهورية تتعنى إله إلى كص السيد في سبيل تاكل شاورما يعني. وبعد أكو اسم قاسم أبو الكص يعني رجل هم اسم على علم يعني هم اسمه مشهور، وبعد عندنا مثلا البامية العراقية مشهورين بطبخها يعني، وعندنا بعد الترشانة إلا هي القيسي معروفة بالمطاعم هاي هم نوع الصالونة كلش حلوة، بالإضافة إلى اليابسة، وبالإضافة إلى التبسي.

اليابسة شنو؟

- اليابسة إلا هي الفاصوليا احنا نسميها اليابسة، طبعا هاي لغة مطعم أحجي لك يسموها يابسة، بس بالبيوت العادية يسموها فاصوليا اليوم، وبعد أكو عوائل تعرفها يابسة يعني. والتبسي بالإضافة تجي للدولما وتجي للشيخ محشي وتجي للجلفراي وهاي يعني عبارة عن أكلات عراقية فهذا يعني وأكثر من أكلة مشهورين بيها الحمد لله ونتميّز بيها.

ويش اللي تعتقد أنه يميّز الأكلات العراقية عن باقي الأكلات؟

- والله شوف آني لاحظت كل بلد إله ميزة يعني، طبعا أحجي لك حسب خبرتي نحجي عن الأردن يعني، الأردن عندهم نوعين من الأكلات، إلا هي مشهورة بكل الأردن إذا تضيف أردني راح يسوي لك هاي الأكلة يا أما منسف يا أما مقلوبة. فذني النوعين، طبعا آني بصراحة يعني هم أهلنا وإخواننا، بس هاي آني بصراحة المنسف ما عجبني، المنسف طريقته لحم كبار يعني مو مقطع بصورة مثل ما نقول صغيرة لا، يجي مثلا زند الغنم زند كامل ينمد عالتمن يعني، وينضاف وياه يجي لبن وتاكله، يعني آنا ما عجبني صراحة، بس المقلوبة لا ارتاحيت إلها، المقلوبة تقريبا نفس طريقة العراق بس احنا نسميها مطبق. احنا بالعراق نسميه مطبق دجاج، مطبق لحم، همّ يسموها مقلوبة يعني على طريقتهم، إلا يجي وياها اللوز والكشمش والبصل والآلو اللي هي البطاطا، يعني هاي السوالف بيها والدجاج يصير جوا، من يجي يصبها يديرها يعني ما يديرها بصحن، لا الجدر كامل يقلبه فيسموها مقلوبة يعني.

انزين نجي للبحرين، البحرين طبعا اللي هنا أكثر شي اللي مثلا الناس عليه إقبال إلا هو الرز (العيش) يعني على حجايتكم العامية، والصالونة إلا هي صالونة لحم. إلا هو المندي إلا هو البخاري إلا هو المجبوس إلا هو البرياني، يعني الناس تتجه لهاي الأمور كون لهذا البلد خصوصية بهذا الشي، بالإضافة إلى صالونة اللحم. طبعا صالونة اللحم يعني متميزة وأول مرة أشوفها هنا اللي هي تتكون أكثر من نوع من النباتات الخضرة، الا هي نقول الكوسة ونقول الباذنجان ونقول الجزر ويضيفون عليها شغلات هوايه تسمى صالونة خضرة، فحنا هاي كل بلد اله اسمه. طبعا أنت بعدين بالنهاية تقرر حسب زيارتكم لهالبلد اشأكلت اشعجبك، أو زيارتك لهالبلد اشعجبك، فيكون البلد مشهور بهاي الأكلة. مثلا من تلاقي مطعم مغربي قلك الكسكسي يعني هذا حنا مشهورين بيه، نجي مثلا للخليج عامة بدون ذكر اسم أي دولة خليجية يكلك احنا عندنا سمج الهامور الا هو معروف بكل دول الخليج، يعني احنا عندنا الهامور يتباهون يعني عندنا الهامور، نفس الشي نقول احنا العراق عندنا كباب.

في الفترة الأخيرة المطاعم العراقية اكتسحت المطاعم التركية وباقي المطاعم خصوصا بالمشويات، ما تروح ديرة أو فريق إلا تشوف مطعم أو مطعمين وكله عراقيين... شنو تعتقد السبب يعني؟

- والله السبب آني لاحظت طبعا أنت من تجي طبعا قبل لا أفتح المشروع وأسوي المطعم آنا قلت بالبداية جنت خايف قلت أرد أشوف الاتجاهات القوية للناس وين، يعني الأكل، طبعا قلنا نفتر بالسيارة ردت أشوف المطعم إلا عليه إقبال قوي، يعني أشوف الكاشير واقفة عليه ناس، أشوف بصفه تلفون ياخذ اوردرات، والله بصراحة جان أول اتجاهي على مطعم (...) رحت وقفت شفت الرجال مشوياته يعني جانت جدا عادية شفت إقبال الناس عليه، قلت أجربها أخذنا صحن مشكّل، صراحة شفت شغله كلش عادي قلت هذا مستوى إذا الناس ترغب لهذا المستوى لا آني عندي أفضل من هذا الشي يعني.

هاي وحدة، وحدة الثانية مثل ما نقول تريد تنجح يعني من خصوصيات الكباب العراقي إلا هو تاكل لحم، يعني تاكل لحم طري عرفت شلون، يعني بالخلطة مالتك شلون أنت تعرف تسوي القيمة مالت الكباب، تعرف شلون ترتبها ودائما يكون اللحم خالص بيها.

الشغلة الضرورية بالمطعم إذا تريد تكسب محبة الزبون وتكسب محبة الناس أن تكون صادق وياهم، وتكون وياهم اتجاه صح، عرفت، مثلا أكو أنواع اللحم موجودة بالبحرين، أنت اشتستخدم باللحم، اشتستخدم مثلا من دجاج، فأنت بهاي العملية تكون هم أرضيت نفسك وأرضيت ضميرك قدام الناس يعني، على أساس بعد الناس تأكلها أكل حلال صح.

فآني اللي أعتبره بنفسيتي العراق بالبحرين تقريبا أقول ترابط جدا قوي، يعني العادات متقاربة الأخلاق متقاربة الطيبة متقاربة، يعني نقول أكو تقارب جدا قوي ببعضنا بعض، بنفس الوقت آنا صارت علاقتي بالمطعم مو علاقة زبون بكستمر بأنه تعال ادفع إكل في أمان الله، أصبحت علاقتنا علاقة صداقة، يعني تصور من يجي الزبون يسألني اشلونك شحوالك شخبارك شمسوي شلونكم إن شاء الله مرتاحين شلونهم العيال، الأهل بالعراق شلونهم، يعني هذا أنت شلون تقدر تغشه أو تأكله أكل مو صح، أو يعني تخليه؟ فأنت ما تقدر.

فهاي الأمور اللي صارت يعني فرق نقول الأكل العراقي أو انتشار الأكل العراقي بالبحرين وهو قوة الترابط بالبحرين عرفت، وهو أهل المطاعم اللي ماخذين المسار الصحيح، يعني المسار الصحيح اللي ماخذينه على الإنتاجية اللي عندهم.

أكو ناس مثلا تقدر تسوي لك كباب أشكال وألوان، مثلا أنا رحت لمطعم بدون ذكر اسم بالمنامة، يبيع صيخ الكباب بروبية، آني ما طلبت بس قعدت عالطاولة قلت انطيني كباب، والله الرجال انطاني كباب. احنا من عادتنا العراقيين بالكباب لازم وياه الطماطا شوي يعني شي مكمل لشي. أمانة الله الرجال جاب لي خبز حار، جاب لي كباب بصحن ستيل وخبزة ملفوفة من أربع جهات يعني مدبدبة قايمة هيجي لفوق، آنا فتحتها لقيت كباب هيجي مجوّم طماطا ماكو قلت لي جيب لي طماطا جاب لي طماطا، أطالع صيخ الكباب أخضر ليش؟ يثرم وياه نوع من الخضراوات، لمن فتحت الشسمه شفته يابس واقف صدكني لو تضربه بالحايط يرجع بوجهك، لا ستيك واقف زين آني أشوف اللهم صلِّ على محمد وآل محمد الرجال عنده زباين، يعني ما شاء الله عنده زباين، بس اكتشفت العلة بالزبون إلمن جاي، اكتشفت علة الزبون ليش داخل هالمطعم، قلي ليش؟ جاي الهذا المطعم على مود الخبز الحار، بصف المطعم مخبز تابع للمطعم الزبون قبل لا يدخل يمر عالمخبز يقله انطيني خبزة يبّس لي اياها، ويجي يطلب الكباب يقعد يمزمز بالخبزة على ما يجي طلبه والدور هم يجيه خبز حار، صدكني كن على ثقة يعني. فهذا يعني انا اتعجبت قلت الله أكبر إذا هذا هاي الناس لو اظوقها كبابي شيصير بيها يعني؟

والله وشقلك يعني هذا باب من أبواب اللي خلت شغلنا يشتهر يعني، فالناس كامت تقارن تشوف هذا كباب طري يعني يموع بالحلك، يعني اليطلع يقلك رحم الله والديك، يعني يترحم على أهلك، بارك الله بيك هذا الأكل الصح. احنا بعد اختصرنا الأمور كامل وضبطنا إنتاجنا الحمد لله وحتى الخبز الحار سويناه بالمطعم في سبيل الزبون يجي ويرتاح وياكل أكل صح.

فآنا أشوف الفرق اللي خلا الكباب العراقي بالبحرين يعني من هالأبواب اللي عددتها إلك آني.

شلون لقيت الزبون البحريني؟

- والله الزبون البحريني بصراحة يعني ما بيه فرق عن العراقي يعني، احنا هناك أيام جنا بالعراق طبعا عليمن جنا نفتح الصبح، طبعا جنا نفتح بس في الفترة الصباحية يعني، الا هو ريوق، من 3 الصبح ونعزّل 12 الظهر، هذا جان شغلنا إلا هو بالعراق.

يجيك الخضار، يجيك السماج، يجيك أبو البيت، يجيك الموظف، طبعا من يجي الموظف الإنسان يجي خالي يوكف بسيارته، أو جان ويا جماعتهم، نزلوا سلام عليكم السلام، هذا يكلك سوي لي نفر وهذا يكلك سوي لي نص كباب وداريه. شنو داريه؟ يعني ريحان زيادة طماط زيادة خبزات جيب له يتدلل، سماك تخلي عالكباب زايد، زين. الخضار من يجي لا، ما يجي خالي، يجيب وياه طمامتين بيها ماي، هيثم اشوي لنا ذني الطمامتين الله يخليك ويا الصيخين كباب مالتي. عرفت شلون؟

الزبون البحريني نفس الشي يعني، اليجيك مثل أبو عمل أو أبو مهنة أو أبو حرفة أو موظف، زين. يكلك أريد هالشكل هالشكل، يرحم والديك زيّد لي الريحان، زين. طبعا أول ما يكعد يكلك يا نبعة الريحان يا... يعني يشتاقون لو يمزحون زين. فيغنون عالريحان، يكلك والله أرتاح من آكل ريحان ويا الكباب رحم الله والديك، والبصل هم وياك يعني ما أشوف كل فرق بين الزبون البحريني والزبون العراقي اللي جنا أيام العراق واللي جنا أيام البحرين، بالعكس آنا أشوف هنا زادت يعني زاد الإقبال علينا، يعني إذا جان شخص واحد يجي أو شخصين يابه والله احنا سمعنا بيكم وجايين أول مرة، يابه أهلا وسهلا حياكم الله شنو تامروني، يسألك شنو عندك أطيب شي، أنت طبعا من راح تكله أطيب شي عن ميزة وحدة الباقي شنو، يعني اهدرتهن، احنا انكله كل شغلنا صح ومضبوط الحمد لله والأكل طيب وإله طعم، بس انكله الناس إقبالها أكثر شي عالكباب. فيقول بس انطيني كباب، لما يجي ويستطعم بالكباب ويذوقه لا يعني إذا جانوا اثنين راح يصيرون أربعة والأربعة راح يصيرون ثمانية، فهالشكل راح يزيد العدد. فالحمد لله ما لقينا تفرقة، يعني انجان بالعراق ولا جان هنانه.

طبعا فتحت لك فرع آخر بالبحرين؟

- فتحت فرع إلا هو بسترة، فتحنا فرع بسترة. طبعا اهنا فرعنا بجدحفص شوية نكول المنطقة مفتوحة، المنطقة صايرة على عدة مناطق يعني مثل ما نكول صايرة ممر على شارع البديع وعالمنامة, اللي يباوع المنامة ورايح عالبديع أنت مار عليك أو يضرب براسه يجي عندك ياكل. واللي جاي من البديع متجه للمنامة هم، واللي أكو ناس مثلا كاعدين بمجلس أو ديوانية من يخلصون جلستهم أو يخلصون موضوعهم، اتصل هيثم جهز لنا كذا كذا كذا احنا جايين احجز لنا طاولة، فإحنا نسوي على رغبتهم هاي الشغلة.

مطعم سترة الحمد لله طبعا بعد سنتين بالضبط يا الله حصلنا الزبون وحصلنا نكدر نقاوم بالشغل يعني. صدكني بذاك الأيام دفعنا إجارات من جيبنا يعني. ليش؟ منطقة سترة منطقة حلوة منطقة شعبية ناسها طيبين يعني بعضهم ما بعض أهل، يعني المطعم جان محصور إلا صاير مباشرة ورا السوك، سوك السمج مال سترة، هذا المكان أكثر الناس إذا تجيه من بره سترة يجونه الصباح مثلا اللي ياخذ سمج، يكلك سمج سترة اوه أو ياخذون مخضر، باعتباره سوك المركزي مال ذيج المنطقة، فجان اعتمادنا فقط على أهل سترة إلا همّ الخارجية وإلا همّ مناك منطقة السيحة ومنطقة أبوالعيش طبعا حسب العشرة عرفت الأسماء يعني ومهزة، يعني هالمناطق هذه، فجان الإقبال جدا قليل، يعني ما جان مثل ما نقول، بس مع ذلك بقينا قاومنا الحمد لله كسبنا زبون ثبتنا رجل، عرفنا شلون نكسب الناس، والله وفعلا يعني الحمد لله الأمور مشت بكل طيب ورحابة صدر يعني الحمد لله رب العالمين. وكل الناس هسه كاعدة تحفزني تعال المحرق تعال المحرق، فما كاعد، أشوف نفسي وحدي ما عندي أحد، فإن شاء الله مستقبلا نفكر بالموضوع بعد.

شلون لقيت البحرين وشعبها خلال مكوثك 6 سنوات؟

- والله يا بوجاسم آنا طبعا، ما أدري تدري والله ما تدري، آني زوجتي بحرينية، وزوجتي من سترة يعني، وعندي اثنين أطفال الحمد لله، يعني مثل ما نكول صار لي أهل بهالديرة، بالإضافة إلى همّ أهلي من أوّل، والحمد لله العلاقة أصبحت جدا قوية، يعني صدكني من أدخل لبيت عمي أنا أعتبر واحد من العائلة، ويعني يكون اهتمام بيّ اهتمام مو طبيعي مو كودن أنا عراقي، مثل ما كلت لك بداية كلامي التقارب والثقافة البين البحرين والعراق يعني كثقافة شعوب قوية جدا قوية، فالحمد لله رب العالمين البحرين ناس طيبين وناس أهل، يعني صدكني أروح أدك باب أي واحد من الأشخاص يهلّل ويرحّب أهلا وسهلا واتفضل زارتنا البركة حياك الله يا أهلا مرحبا، ها متعشي نسوّي لك عشا، ما متغذي نسوي لك إذا، أهلا وسهلا بيك مكانك هذا بيتك، يعني والله بصراحة يخجلوك بأخلاقهم، إن غبت يومين ثلاثة اتصال ها وينك، شخبارك شوية تعرضت إلى وعكة صحية شوية يعني عافيتي صارت مو تمام انزين والله العظيم التلفونات والاتصالات واليجي مثلا ما يلكاني بالمطعم، وينه خير مسافر سألوه يدعي لنا موجود اهنانا اشبيه كلونا خاف محتاجين مساعدة، فيعني أنت وين تحصل هالطيبة وهالمحنة عليك، يعني شكلك، يعني الواحد بأهله يجوز ما يحصل هالكرم هاي. فالحمد لله رب العالمين وكعنا بأهلنا وكعنا بديرتنا ما شفنا إلا كل خير يعني، الحمد لله رب العالمين.

مشكورين على كلّ يا هيثم.

- الله يحفظك يا بوجاسم.

العدد 2605 - السبت 24 أكتوبر 2009م الموافق 06 ذي القعدة 1430هـ

التعليقات (1)
التعليقات لا تعبر عن رأي الصحيفة

  • أنت تعلق الآن كزائر .. يمكنك التعليق بـ3000 حرف عندالتسجيل من هنا

اقرأ ايضاً