صحيفة الوسط البحرينية

العدد : 5380 | الثلثاء 30 مايو 2017م الموافق 19 رمضان 1445هـ

رواية باللهجة الدارجة : الزوجة الرابعة

ابو معتوق وقف للولد وما في اذونه ماي : طلق ام البنات وبنعرسك على الا احسن منها ، مثل ما فلتوا بتنا نفلت عليهم بتهم وبضاعتهم ترد ليهم .

معتوق متهضم وما يقدر يظلم المرة ما شاف منها شي : يا يبه كلامك على عيني وراسي ، بس حليمة مرة اجودية ما سمعتون ليها حس ، واختي هي الا جابته لنفسها ، طويلة لسان ، حتى الضرب تضرب رجلها ، چم مرة قلنا ليها .

ابو معتوق يصارخ على ولده الا شي يصفقه : لا ترادد ، كلامي ما اثنيه ، الا اقول لك به سوه ، ما يهضمون اختك وبتهم عندنا .

مرزوقه واقفة عند الباب تتصوخ ، وتفرك في راحة ايدها من الشماتة : حرة يا حلوم ، حتى ما تتشمتين فيي ، يا رب يطلقش و تبرد حرتي .

دشت حجرتها لاولادها .

طلع معتوق من عند ابوه ودش حجرته متغبن ، حليمة في حضنها بتها تنيمها وشافته وتخرعت ، بطحت بتها وقامت له : ويشو فيك معتوق ؟ ويشو صاير ؟ وجهك مو عدل .

معتوق فلت روحه على مرقده : مو صاير شي ، خليني بروحي .

حليمة تروح صوب راسه : مرضان ؟ لو صاير شي ؟ لا تخرعني معتوق .

يرفع روحه ويفلتها على الطوفه من القهر : اقول لش ما في شي ، اطلعي برا خليني بروحي .

لبست مشمرها وطلعت تدمع ، شافتها مرزوقة ضحكت عليها وتسوي ليها بايدها حرة .

راحت حليمة للعمة في المطبخ تصيح ، شافتها عمتها وانزهقت : ويشو فيش تصيحين ؟ ويشو فيه معتوق ؟ 

حليمة تصيح صياح ، مو قادرة تاخد النفس : ما ادري يعمة ويشو فيه ، من دخل الحجرة وجهه منقلب و ما يشتهي يطالعني ولا يكلمني ، فلتني على الطوفة ، اول مرة اشوفه يسوي كذا .

طلعت عمتها بتروح حجرة ولدها ومرزوقة تفتر في الحوي ، ناداها ابو معتوق : لا تروحين له ، تعاالي ابغاش .

دشت الحجرة مستعجبة : ويشو صاير ابو معتوق ؟

ابو معتوق : ولدش ما في شي ، قايل له يرجع مرته لاهلها الا ما يبغى بتنا ما نبغاه .

ام معتوق تنصدم : تتكلم صدق ابو معتوق ؟ وهالبنية الزينة ويش ذنبها ، مو مقصرة ويانا وزينه ويا رجلها ، لا تاخذ ذنبها يا بو معتوق خفف شوي .

ابو معتوق : انا قلت كلمتي وما تنرد الا ما يبغانا ما نبغاه ،

ام معتوق طلعت من عنده ساكته وداير راسها معور افادها الولد والمرة ، راحت لحليمة المطبخ ساكته ، وحليمة تطالع فيها وزادت حيرتها : ويشو صاير عمه ؟  علموني له ، انچان اني مسوية شي او ضريتكم ، علموني .

ضلت على حيرتها يومين فلافه و معتوق يطلع ويجي على وجهه ، ما ياكل شي من البيت ، والابو يحن عليه .

طلقها غصبا عنه ، وراحت بيت ابوها بصياحها متهضمة ،

ومرزوقة شافتها طالعة باغراضها تصيح تشمتت عليها : هاذي حوبتي يا حلوم ، تستاهلين حتى تعرفين الشماته لازم نردها .

وخدت سبوعين فلافه وطرشت بناتها لابوهم .

الباب ينضرب ، طلعت سليمة الا بنات معتوق جايبتنهم خالتهم و جدتها ، دشوا داخل وعطوهم اياهم : جودوا بنات اخوكم ، ما لينا خص فيهم ، خله يربيهم .

وضل الرجال مريض من الهم والكدر ، قعد عن الشغل چم من يوم ، لكن لازم يروح يشوف شغله هذا رزقه ، انچان ينسى شوي .

وضلوا البنات عند جدتهم تربيهم .

وسليمه جاها الرجل وعرست وكبروا البنات شوي .

وضل معتوق بين البيت والورشة .

وداك اليوم قاعد في ورشته وجته جارتهم تباه يلحم صندوق متكسرة جوانبه : شحوالك جارنا ؟

معتوق يطالعها من تحت لتحت : حياش الله صالحة ، شحوال ابوش ؟

صالحة : الحمد لله بخير ، شوف ليي هالصندوق اذا تقدر تلحمة ، تقصص عدل ، وما ليي خاطر ارميه ، ورث مال جدتي الله يرحمها .

معتوق : ولا يهمش يالجارة ، خليه باسويه لش ، تعالي له بكرة .

يوم ثاني جت خذته وخذت روحه وياها ، دخل لامه في الليوان وبسط صوبها ومرزوقة تحوس ويا اولادها تسبح وتلبس .

قعد بثيابه الشغل متروسين آيل : أماه ، ابا اعرس .

ام معتوق : يسلم راسك يا ولدي ، روح افصخ هالوصخ ارميهم في الطشت وتعال باعلمك على بنية حليوة .

معتوق : لا تدورين ليي انا ابى بت جيرانا صالحة ، ما اباها الا هيه .

ام معتوق : باشاور ابوك اول .

معتوق : وابويي ويشو دخله ، هو الا بعرس ؟

ام معتوق تزمر عليه : لا تفاول عليي يا ولدي .

لازم باقول له يمكن ما يرضى .

معتوق : رضى او ما رضى انا ابغاها .

وتشاوروا ومرزوقة تعرفها عدل و ما تشتهيها ، وراحوا خطبوا له صالحة ، وعرسوا وتحملت بالبنات ، وعزل ليهم شقة بروحهم ، لكن بناواتها ما يحبونها ، يتهاوشون وياها بسبب وبغير سبب .

 وحتى مرزوقه من تشوفها في الشارع تهاوشها وتجزز في شعرها حتى ما حد يدري من البيت .

و ام معتوق تحبها ومتحمله بها .

داك اليوم راجعة صالحة من بيت ابوها وتتلقاها بناوتها العوده مسعده ، وتتلاسن وياها في الشارع وتنفلت عليها تجز شعرها وتنتف فيها .

دشت البيت تصيح وصكت عليها حجرتها شبعت صياح وراحت الحمام تغسل وجهها لا يبين عليها ، وما تعلم رجلها ولا عمتها ، ما تبغي المشاكل ، من يشوفون ابوهم راح الورشة تولوها بالضرب .

مسعدة جمعت خواتها في حجرتهم وتحدهم عليها : لا تتعلفون بها اذا ابويي في البيت ، بسوي لينا سالفة ، اذا طلع هجموا عليها ، وهي تخاف منا وما تعلم ابويي ، اضربوها ضرب الجهد .

ختها الا اصغر منها فوزية قامت عنهم : اني لا تحسبوني منكم ، المرة طيبة ويانا ، هاكي تطبخ وتغسل وتكنس لينا ، بعد ويشو تمبون ؟ 

مو زين عليكم الله بعاقبكم ، ودعوة المظلوم ما تنرد ، لا تضربوها مو زين مو زين ، ويشو سوت ليكم هالفقيرة ؟حتى ابويي ما تقول له .

مسعدة توقف في وجهها : انتين اطلعي منها ومالش خص ، احنا كيفنا ما نحبها ، وان علمتين ابويي بنتعاون عليش .

تطلع عنهم منقهرة عليهم .

وحملت صالحة لكن ما كملت حملها ومات في بطنها وردت حملت مرتين فلاف ويموتون ليها .

في عصرية داك اليوم ، ابو معتوق في الورشة وجدتها في بيتهم بعدهي ما تجي بيت ولدها ، كانت توها طارحة ، خدت چم من يوم وطلعت من حجرتها بتدش المطبخ ويتحاولونها البنات يعايرون فيها ، مسعده راحت دزتها وتخوصرت ليها : لو فيش خير انچان جبتين ولاد يالعقيرة ، لكن ما فيش خير .

صالحة واقفة بينهم وخايفة : ويشو مسويه فيكم اني ؟ هاذي كتبة الله ، تعترضون على كتبة الله ؟

مسعدة رفعت ايدها وصفعتها : احنا ما نحبش ، ما نشتهيش ، لاويه قاعدة في البيت ويانا ؟

صالحة : لاويه تضربين ، ما سويت فيش شي .

اذا ما تبوني كلموا ابوكم ، واني ويش يهمني ، اني الا قلت له يخليني وياكم ؟

 

إلى اللقاء غداً ...


المصدر: صحيفة الوسط البحرينية

تم حفظ الصفحة من الرابط: http://alwasatnews.com/news/1245451.html