أنا وانتي مع الأوهام والحيره وآهاتك

مع انغامك وشهقاتك وهمساتك... أبي أكثر

مع الأحلام اذا تنزل على نحرك ووجناتك

مع انفاسك تزيد النار في قلبي الذي يسعر

مع عجزٍ غرامه يسجن افكاري في رغباتك

يا ليت اعرف من اللي قد على الثاني يكون اخطر

يا ليت اعرف... أحبك؟ أو أنا عابر في نزواتك؟

يا ليت اعرف... تحبيني؟ أو انه قلبي لي يثأر؟

أبيك انتي؟ أو اني طالب الرمّان وجناتك؟

تبيني عقال؟ والا خبال؟ وإلا ريح اذا بك مر؟

أقول فيوم ماني ملتفت... وتردني ضحكاتك

أنا المجرور فاعرابك وانا ادري انك حروف الجر

تعبت من الوله واحلام فـ اشعاري وكتاباتك

تعبني الخوف... والأشواق في عيوني تعب تسهر

أحاول أقترب منّك وتبعدني احتمالاتك

واشوفك تقربي يمي ولكن للأسف ما اقدر

وما ادري هل خذلني الحلم وإلا هي خيالاتك

ولا ادري اللي جمعنا حب وإلا فتنة المرمر

دخيلك أو دخيل الحلم أو يمكن عذاباتك

رجيتك أو رجاني طفل في عيني يبي يكبر

وش اللي يجبرك فيني وانا المكسور في ذاتك

وش اللي يجبر الصوان في صدري انه يتغير

حبيبة عمري أو يمكن حبيبه فـ بعض حالاتك

أشوفك حلمي الوردي وابيك المسك والعنبر

واشوفك عطري الفواح اذا مرت بي نفحاتك

واشوفك صاحبه تمشي مع الأمواج وتتبخر

تعبتيني... ولكنّي أحب عدلك وزلاّتك

تعبت من التردّد فيك... ولكني... أبي أكثر