شيبنا يا صويحبي والهم على الهم زاد

نشرب سواحل دجى ونبلع مع الهم زاد

وش ظل في هالحياه والدنيا سوق مزاد

بحرنا غيم الشعر بالكسره والجره

وخلينا كل من ضما بنشوته يجره

ما تم لنا في العمر قطيره في جره

أشلون يغلى الشعر وهو في سوق مزاد

رد الشاعر خليفة العيسى:

لي زاد شيب الشعر نبع الشعر لك زاد

والهم يا صويحبي مشروبنا والزاد

دنياك سوق الحراج زيد على من زاد

حنا بدعنا الشعر بالضَمَه والجَرَّه

وحنا حفظنا الزلال بالحِبْ والجَرَّه

نَسقي عطش هالنخل جَرَّه ورا جَره

طَبعْ الِشعِر يا علي كل ما بدعته زاد

مساجلة بالموال

علي الشرقاوي:

وشتبي مني أقول والدنيا ذي ماصخه

واللي يريد العدل حق العدل ما صخى

يملك نخيل الثرى وبالارطبه ما صخا

اليوم حق الوعد وبا السعد ما آصخ

وشحقه آصخ وأنا القى الحجي ماصخ

يا صويحبي لا تظل تنغزني كلما آصخ

لا تظن بتلقى عسل في بيدة ماصخه

رد خليفة العيسى:

الوجْبِه مالْها حلاه لي ذقتها ماصْخَه

اعطيك كل ما تَبى وبغزتي ماسْخَه

أسخَي لكم يا ربع ولغيركم ماسخَه

في هالزمن يا علي مَحَّدْ يقول ماصِخْ

مفقود كل من حَجه لو هالحَجي ماصِخْ

ماصِخْ كلام العدل في هالزمن ماصِخْ

البِسْرهَ في القِبهِ ترَى حلوه لو هي ماصْخَهَ