مرحباً بكم زوار موقع الوسط أون لاين في حلقة جديدة من برنامجكم الاسبوعي الناصية، يسعدنا واياكم بهذا الاسبوع ان نلتقي الاستاذ غازي الحليبي والاستاذ محمد شكرالله،
والموضوع عن سوق المقاقصيص، فأهلاً وسهلاً بكم...
- سوق المقاقصيص من يوم أول ما سوو سوق المقاصيص في البحرين.
* في وين كانت؟
- كانت في شارع صعصعة.
- في المنامة؟
- في المنامة اي، عند فندق اليماني سوق الحدادة القديم، هناك وانت بكرامة سوق الحمير اجيبون ماء من الحنينية ايجيبون ماء هناك اهناك سوق الهراج.
* يبيعون الماي.
- نعم، أول الماء يجيبونة من الحنينية ماء حلو يوزعونة على البيوت على القهاوي، اجيبونة من الحنينية من الرفاع.
* كانت صوبها؟
- اي هناك سوق الهراج هناك في هذه المنطقة.
* تتذكر كيف كان شكلها؟
- نفس هلون بس غير، الناس غير أول، الحين مافي، في الفريج جالسين أول في سوق، الحين انقلوه إلى فريج جابو اهني هذه منطقة فريج، وهني المنطقة مو مال سوق المقاقصيص.
* ليش؟
- لا مو سوق هذه هذه فريج... سوق الهراج المفروض يخلونة في العاصمة.
* بس ضيق؟
- ما في ضيق، هم ضيقوه، سوو فنادق سوو وكنسلوه، المفروض من أول يحسبون له حساب، تعرف هذا سوق شعبي، سوق شعبي اجونه منهو اجونه الاجانب، اجون الناس.
* اجونكم اجانب؟
- ما يجون، اكثر الاجانب ما عندهم سيارات، الاجانب يعتمدون على واحد اجيبهم.
* اي رأيك ان ينقلونه إلى المنامة؟
- ما ينقلونه يا ولدي.
* اي ان رأيك هذا؟
- هي المفروض تكون في العاصمة، لان اكثر الاجانب موجودين في العاصمة يشتغلون هناك.
* بس الشراية من المواطنين مو من الاجانب؟
- لا مب اكثر شيء المواطنين اجونك اجانب من كل مكان هذا سوق شعبي تراث هذا، تراث عدموه خلاص.
* وش فيه من التراث؟
- تراث كل اشياء قديمة، وما اول وجيبون الاشياء هذه، هذا السوق الشعبي علشان هذه، الان خربطوها ما في سوق شعبي.
* الاول كان شلون، شنو كانو يبيعون من تراث؟
- كلشي اجبون اول، الأول كلشي تراث، أول الشغلات القديمة وهل الاشياء تختلف الحين ما في، ام بدال ما يسون سوق هراج سوو دكاكين، كأنك داش على محل تشتري، أول السامان منثر في الشارع والعفسة والمزاد والناس تصرخ، ناس تصوت، أول تقدر توقف في سوق الهراج ما تقدر تتكلم اصلاً، هذا يزيد وهذا يصوت وديلاك متهاوشين، وهذا الوالد طاق دي وهذا عافس دي، وهداك جايب غنمة، وذاك جايب بقرة، الحين وين راح انتهى.
* ما في الحين؟
- لا ما في، المفروض اكون سوق الهراج في وسط المدينة.
* بس ما في ناس تشتري اشياء قديمة احين؟ في؟
- اشلون ما في، إلى اليوم إلى بكرة الناس تجي تسأل عن الاشياء، الأوروبية والاجانب من ادشون اي بلد لازم أول ما يدورون الاسواق هذه، اي ادورون الاشياء القديمة، والاشياء العتيقة والاشياء هذه.
* بس اجيبون هراج؟
- اجيبون يوم الجمعة الساعة واحدة المغرب واحد اصوت اهني، أول الهراج على طول أربعة وعشرين ساعة على طول الفترة.
* ولي اهرج يحصل افلوس؟
- ياخذ عشرة بالمئة، ازيد من مال الاراضي.
* حتى الأول في واحد يهرج متخصص في هذه السالفة؟
- في ثلاثة أربعة معروفين حق الهراج.
* من كانو؟
- قبل، كلهم ماتو. عندنا السيد اي ايدة مقصوصة، وعندنا واحد ابراهيم اسمه الريش الله يرحمة، كلهم كاتو.......
* في ناس تقول ان المقاصيص يقصون على الناس، سموهم مقاصيص؟
- لا مو هلون الكلام، سموها سوق المقاقصيص، الاين انت اذا انقصيت ما عندك فلوس، عندك اشويت سامان وديته السوق بعته لان منقص ما عندك فلوس.
* منكسر يعني؟
- اي مو قصون عليك، اي هلون معناته، معناته واحد ما عنده فلوس ما عنده شيء أول ما ميش، اذا اشتغل يوم يشتغل يومين ما يشتغل ونقص وده ساعته وباعها، وشال الكبت على ظهره وجابه باعه.
- يعني عقب يومين حصل فلوس ارد يشتري ساعة الي باعها؟
- لا ادور غيرها لا خلاص الساعة من يشترونها راحت، انا اشتريها منك وبعد خمس دقائق ذاك يشتريها منك وعقب... مثل السيارة.
* ما تحصلها؟
- اي، السيارة إذا ما تبيعها وسجلها رأساً تتورط يشترونها عشرة عشرين... لا خلاص من تنباع راحت، احين وين، أول الناس متاربطة في سوق الهراج كلن في بقعة وحدة الحين ما ميش. الحين هذا سوق هراج ما في احد ما ميش.
* يعني انتون ما في شراية اجون اليكم؟
- قليلين، لان انت مو في منطقة ناس رايحة وناس جاية ذاك انا اقول لك سوق الهراج يكون في العاصمة يكون افضل، على اساس يكون في حركة اكثر، أول يوم خلوهم عند سوق المركزي، سوق المركزي الكل اجي في المنامة والي اجون حق سوق المركزي لازم يمر على سوق الهراج، الحين وين انت في منطقة مقطوعة مثل ما تقول، تعتمد على أهل الفريج، هذا لين تملل تهاوش ويا زوجته جاك اهني اذاك.
* أول يوم الخميس والجمعة؟
- اي الخميس والجمعة يتعتنون الناس ولا الايام العادية محد اجيك. بعد شنو تبي من سوق الهراج؟
* ما عندك سوالف بعد؟ في يقولون عن سوق الهراج؟
- لا، ما اعرف شعر عن سوق الهراج، ماتو ربعنا الي يقولون هل الاشياء هذه، عندنا واحد اسمه سلمان المعني...... الأول السوق العتيقة هذه قبل هناك اسون لحم مشوي.
* انت من الي حداك على السوق؟
- انا من الاصل كنت في المدرسة وكنت في السوق، عندنا محل ما تسجيل، تصليح رويدو، مسجلات وشغلات وعقب حولناه تسجيلات سميناه تسجيلات مها داخل السوق، اسجل اشرطة.
* إلى الحين موجودة؟
- إلى الحين موجودة في مكانها، إلى الحين موجودة.
* هذي تراث بعد؟
- اي هذه تراث، هذا يعتبر المحل بقايا من بقاياهم.
* كم سنة؟
- هذا وين من الستينات.
* اي الاول تجيبون اشرطة من اشرطة أم كلثوم؟
- اي أم كلثوم، وعبدالحليم، وايام محرم ما نبيع اغاني بعد، بعد أول من عندنا، عندنا عبدالزهرة الكعبي وعندنا وائلي.
* كم كان الشريط عبدالحليم وأم كلثوم؟
- دينار.
* أول بدينار؟
- اي بدينار أول احنا انبيعه دينار محلات ثانية ايبيعونه دينار وثلاث مئة.
* يقولون الأول على خمسة؟
- أول نشتري الشريط بخمس، أول الاشرطة غير الاشرطة الي جابوهم تالي، أول الاشرطة الاصلية ما شارب، نشرتي خالي خمس مئة فلس، ونسجله وجيك هذا يبغي اغنية هذه وغنية هذه انسجله ونبيعه بدينار.. وشريط ناجح وشريط طايح وانت وحظك... المحل إلى الحين موجود، لو تروح الحين تحصله.
* إلى الحين ليكم؟
- إلى الحين تسجيلات مهما ولد عمي هناك موجود.
* بس الان اطورت الاغاني؟
- بس هو للحين موجود الاغاني القديمة كلش، عندنا اشرطة قديمة كلش موجودة إلى الحين الناس يأتون من السعودية حق الاغاني القديمة، في الاحسائي والشغلات هذه واوادم كلهم ماتو.
* ... بعو عزيز؟
- ... بوعزيز، أول ما فتحنا العالم تركض، الي يبغي خضير والي يبغي زهور حسين، ولي يبي ويبي وناضم الغزالي وبعد جاهم الياس خضر وينت العالم، ما ميش الا سجل ما تلحق، عالم تأتي أول ما ميش محلات اشوي مال تسجيلات، محل عندنا فيه صوت وصورة وفي يعني صوت الفن ثلاث اربع محلات، ذلك الوقت ما في محلات بعد ذلك قامو حتى في المواتم اسجلون، أول احنا اسجل لهم ونعطيهم الاشرطة وعقب اختربت الشغلة خلاص، طلع؟؟؟ وخرب على الكاست وقب طلع السي دي وعدم الأولي والتالي، الحين يبيعون الشريط بربيتين.
* مشكورين حجي محمد
- مرة وحدة بعدنا رديو، جابو لنا رديو شريناه وحنا نسمع الريديو هناك وحنا ما شغلناه ولا شي لا اشوف ميو ميو ايه اشلون ريديو مبند على بطارية كبار أول ما شغلناه ولا شي اشلون يتكلم الريديو ما لتفتنا إلا غشنا ما نقدر نسبه الحين شال المكينة وحاط قطوة ومتيت عليه من وره، قبل مربعين حاط قطو داخل.
* قطو صغير؟
- اي قطو داخل صايد القطو حاطة في الريديو وجابه باعه بسوق المقاصيص. اسوي ميو ميو.... امسو مقلب.
* مشكورين حجي محمد ما قصرت.
* حجي غازي سولف لينا عن سوق المقاصيص، في وين كانت؟
- أول سوق المقاصيص اول ما ابتدت في سوق المنامة عند سوق الأول الحدادة عند شارع الشيخ عبدالله عند سوق الحدادة اهني كانت وراها سوق المقاصيص عند سوق الحنينية القديمة اي اسمونها سوق الحينينة وبعدين انتقلت إلى سوق نفس المنطقة الثانية إلى هي عند سوق اللحم القديمة الي في المنامة وبعدين انتقلت عند نقل العام.
* من الي سواها؟
- من خلقنا احنا انشوفها موجودة هذه.
* موجودة؟
- اي نعم.
* وليس سموها المقاقصيص؟
- هذه مثل ما تقول اللقب امسمينه، اي واحد محتاج إلى فلوس منقص اسمونه، عند سامان ابيعه اجي، أو واحد اقصون عليه مثل ما يقولون على قولت الهنود اسمونها (جوربا) سوق الحرامية في الهند عاد مو في البحرين.
* وش الاغراض التي كانت الأول؟
- أول اشياء مستعملة، اي ما تحصل اشياء جديدة إلا قليل، بس الان في موجود القديم والجديد في السوق الحالية أول ما تحصل اشياء قديمة اشياء مستعملة الحين موجود المستعمل والجديد تطورت السوق اي واجد صارت أول ما كان عالم هقد اي كلهم معدودين على الاصابع الايد، الحين وايد.
* وش رايك في إلي يقول الأول حتى بوايقة إذا ابقون....
- اجبونة ابيعونه اهني - الحين إلى باكرة، بس الحين في امن، اي واحد اجيب شيء في شرطة اهني موجودين 24 ساعة يسألونه من وينه عندك له رصيد مو مثل أول، أول يشترونه الناس ما يدرون، الحين اي واحد اجيب شي اجيب سلندرات أو اجيب ثمينة من وين لك، عنك اثبات عليه انه مالتك، في شرطة موجودين على طول اهني.
* اشلون طريقة إذا تشترون شيء، مزاد اسون يعني؟
- في مزادات اصير، في واحد اجيب بضاعة عنه ابيعها اهرج عليها حطها للمزاد اهني وزيدون عليها الي يبغون يشترونها ن إذا وصل السعر... ابيعها والدلال له نسبة هي 10 في المئة من قيمة البضاعة الدلال ادله عليه.
* وإذا تراجع؟
- منهو يتراجع الي ابيعه؟ الي بشتري كيفه إذا تراجع إذا ما ستلم افلوس اليه حق، ينجف عنها ما يبغاها مو مجبور فيها، لا لا ما في شيء يلزم، ما شتريت انت حر، بيع ومشتري يفتح الله.
* اسعار سوق المقاقيص يختلف عن إلي برة؟
- واجد، فرقية، عندنا بعض الاشياء رمزية نبيعها اهني، اي فيها فايدة رمزي، علشان شدي اتشوف عندنا زباين، ايام العطل واجد عندنا ناس، هم اجي يتفرج وهم اشوف اشياء تحف في اشياء قديمة في اشياء جديدة في تحف في صحف حتى ما تحصلها حتى في المتاحف الي برة اجي ساعات اهني، اي وجودة اشياء قديمة بعض الاحيان اجي اهني.
* وانت كنت متخصص في ماذا؟
- انا كلشي ابيع واشتري وهذه الفرشة حاطنهاعبارة كمكتب وكبيع وشراء، اشتري اشياء مستعملة اشياء جديدة اشياء قديمة.
* الي يريد يدخل سوق المقاصيص لازم سجل تجارة، لو عادي؟
- إذا بستورد اشياء أما بيفتح له محل أو يبيع ويشتري لا ما يحتاج سجل.
* بس اجيب بضاعة وبيع؟
- اي.
* والماراكات الموجودة نفس الي برة؟
- نفس الشيء الي برة.
* ليش الفرق بين السعر؟
- التجار برة يقول لك انا قاعد في محل واجاره، اجارات رمزية من البلدية، اي مو ديك الاجارات الزود كلش واجد، بس الحين في حركة انو يريدون ازيدون الاجارات علينا، اذا زيدو الايجارات علينا الي بينظر فيها الزبون إذا زيدو انا بعد بزيد البضاعة ملتي على الزبون.
* الفرشات ليش ما يفتحون يموين نفسكم؟
- ما في حركة الايام العادية الناس كلها مشتغلة، مثل يوم الجمعة والسبت ناس عطلة اجي يتفرج اجي يطالع احصله اشياء.
* انزين صادك سالفة ويا زبون رجعلك اغراض؟
- واجد، بس سالفة مرة مرتين، قبل يومين واحد اخد مني خلاط وراح جاب لهندي مادري بنقالي اركبه وقوم كسره ورد رجعه قال بس ركبته انكسر، قلت له كيف انكسر لو ما هو هوس عليه اكو مكسور من تحت... هذه وحدة من القضايا.
* عطيته فلوسه؟
- لا ما اعطيه كسره وانا اتحمله، اتحمله إذا قبل انا مشيكنه قدامه صاحي هو اعترف، بعدين هوس عليه ونكسر يعني هوس عليه اكثر من الازم.
* كم سنة صار لك انت؟
- انا اهني صارلي 15 في هذه السوق.
* والسوق الي قبل؟
- السوق الي قبل 3 سنوات فقط.
- انت من الي حداك على هذه السوق؟
- انا الله اسلمك جيت، كنت انا من هوات الخيل من ملاك الخيل الكبار في البحرين انا جيت اهني بعد ما هديت الخيل ما عندي محل اروح عندي وقد فراغ وايد، ويوم هديت الخيل اتفرج الصراحة اي السوق القديمة كنت ؟؟؟؟ في سوق اللحم عندي محلات لحم ابيع، عجبتني الشغلة وشتغلت اهني والحمدالله مشيت وستانست، هم رفهت عن نفسي وضيعت وقتي بالتجارة.
* مشكورين ياحاج غازي ما قصرت.
