أعزائي مستمعي الوسط اون لاين، يسعدنا أن نرحب بكم في حلقة جديدة من برنامجكم الرياضي الأسبوعي "عالم الرياضة"، هذا البرنامج يسلط الضوء على مجمل الألعاب الرياضية المحلية وخصوصا رياضات الصالات.
حلقة اليوم سنتناول من خلالها الدورة السداسية لدوري زين البحرين لكرة السلة والتي دخلت مرحلتها الحاسمة، والصدارة في الوقت الحالي ثنائية لكل من المنامة والمحرق اللذين تمكنا من تحقيق الفوز في مبارياتهما الثلاث السابقة ليمتلكان 6 نقاط، يليهما كل من الأهلي وسترة والحالة برصيد 4 نقاط، ومدينة عيسى في المؤخرة برصيد 3 نقاط.
وللوقوف على وضعية الفرق في الدورة السداسية لدوري زين البحرين لكرة السلة يسرنا أن نستضيف مدرب نادي النجمة المدرب الوطني رؤوف حبيل.
• مرحبا كابتن.
- أهلا وسهلا بيك.
• الدورة السداسية الآن وصلت إلى مراحل حاسمة ونحن في الجولة ما قبل الأخيرة، فيبدو أن مسابقات السلة هذا الموسم على ضوء نتائج الدورة السداسية حتى الآن، تشير إلى أن المنافسة ستكون على البطولات المحلية محصورة بين المنامة والمحرق، ما رأيك كابتن؟
- مطبعا مثل ما نجوف الحين طبعا المنامة والمحرق ضمنوا التأهل، يبقى مقعدين وهاي طبعا ؟؟؟؟ إلى موضوع الفرق مازالت لحد الحين فيه عندهم فرص جميع الفرق، يعني من الأهلي والحالة والمدينة وحتى سترة, يعني لحد الحين ما نقدر نحدد من لانه مثل ما جفنا يعني في مفاجآت وايد قاعدة تصير بين الفرق وفي هفوات وايد قاعدة تصير بين الفرق مثل الأهلي سميناه من قبل اللغز المحير وعندك الحالة طبعا تغيير المدرب طبعا أعتقد أنه بتكون هفوة في الأداء الفني على أساس أن ؟؟؟؟ الانسجام بين المدرب واللاعبين.
• قبل لا ننتقل لكل فريق على حدة راح ننتقل بعد، هل تعتقد وجهة نظرك أن المنافسة على البطولة المحلية ستكون بين المنامة والمحرق، أم هناك أطراف أو فرق ثانية؟
- أنا وجهة نظري بين المنامة والمحرق لكن الأهلي هو طرف ثالث، لكن يعني إلى حد الحين الوضع اللي اعرفه بالنسبة لي الأهلي طرف ثالث، لكن بالمستوى اللي نجوفه ما نقدر نحطه طرف منافس.
• تعتقد الآن أبرز فريقين هما المحرق والمنامة؟
- أبرز فريقين مستواه ثابت وكل شي المنامة والمحرق، هذوله اللي نقدر نقول انهم لحد الحين جاهزين ومستواهم ثابت ونقدر نقول ان المنافسة ما بين الطرفين والدليل ان الكاس طبعا اتأهلوا اثنينهم ويا بعض.
• لو انتقلنا لفريق الأهلي نشوف مستواه متذبذب وأداءه غير مقنع في الدورة السداسية حتى الآن، الليلة يخوض مباراة حاسمة أمام المحرق، كيف وجدت الأهلي في المباريات الثلاث السابقة؟
- والله أداءهم محير، أداءهم أنا من قبل حتى وتقريبا القسم الأولي كان أداءهم جدا ممتاز لكن صار بعض الفترات انه يصير هبوط تدريجي لحد الحين وصل لمرحلة لا يحسد عليها الصراحة. يعني الصراحة أنا مو فاهم شنو المشكلة، فنادي الأهلي يمتلك لاعبين زينين واحتياط ومدرب زين وقاعدة وإدارة زينة بس شنو قاعد يصير في الفريق بالضبط ما أدري، يعني لابد أنه تكون دراسة على أساس الجماعة يتلاحقون الجهاز الفني والإداري على أساس يقدرون يكتشفون المشكلة اللي هم قاعدين فيها، هم يقدرون يوصلون طبعا للتنافس، لأن لاعبينهم وجهة نظري الفنية يمتلكون لاعبين مهاريا أفضل لاعبين في الدوري البحريني.
• هاي صحيح كابتن، بس يعني نشوف أنه اللاعبين ما قاعدين يقدمون أداءهم المعروف، يعني نجوم الأهلي المعروفين الذين قادوا الفريق في السنوات الماضية للمنافسة في هذا الموسم مش مستواهم المعروف؟
- صح، أنا ممكن أحلل ليك من بعيد، بس في أشياء تصير ما بين داخل الفريق نجهلها يمكن كلنا، يمكن في أشياء ما قاعدين نشوفها عدل، يعني يمكن هالإصابات، هاللاعبين نفسيا، هالأشياء معنويا الله أعلم، بس لازم في شي غلط، في شي غلط، من ناحية فنية، إدارة، اللاعبين نفسيا. يعني أنا المباراة الوحيدة اللي شفتهم أن قاعدين يلعبون بروح يبون يفوزون بأي طريقة ومن غير اللاعب المحترف في مباراة الكأس مع المحرق من غير اللاعب المحترف. قاعدين يلعبون مباراة طيبة وأداءهم جدا ممتاز طيب، بس ما أدري شنو صار عقب، هل الإصابات لها دور، هل يعني الله أعلم شلون ؟؟؟؟ تكون، هل جهد زايد حمل زايد، يعني الله أعلم الصراحة. يعني بس في شي داخلي ما يعرفونه إلا الأقرباء، القريبين من الفريق هم يعرفون ده الشي، بس احنا من بعيد نقدر نحلل الأشياء اللي نجوفها، ان الأهلي مو مستواه، الأهلي ما قاعد يأدي مباريات زينة، الأهلي سيء.
• كابتن، لو انتقلنا إلى فرق سترة والحالة ومدينة عيسى، كيف وجدت أداءهم كل فريق من هالفرق الثلاثة؟
- والله جوف أنا بالنسبة لي فريق مدينة عيسى الفريق اللي قاعد يتطور من مرحلة إلى مرحلة، يعني من أول الدوري طلوعه ما جفناه أنه قاعد يتنازل، من مباراة لمباراة قاعد يقدم مباريات كبيرة، قاعد يتجانسون، المدرب قادر أنه يوصل معلومات للاعبين، اللاعبين ويا بعض كلهم، متفاهمين ويا بعض في الملعب، نفسيا مرتاحين، الإدارة قاعدة توفر للمدرب، يعني حلقة الوصل ما بين اللاعبين والإدارة والمدرب جدا جدا ممتازة، فلذلك ان أجوفهم من مباراة لمباراة مستواهم قاعد يرتفع ويرتقي شوي شوي، وقاعدين يواجهون أقوى الفرق، اللهم الهفوة آخر مباراة يعني نقدر نقول ويا المنامة انهزموا في آخر 6 ثواني يعني في لاعبين كانوا في الملعب أعمارهم ما تتجاوز الـ 20، يعني يلعبون في فريق الشباب من نفس الخبرة لا أكثر، بس اللهم هم كفريق وكمدرب يعني أنا أشيد بصراحة بجعفر راشد استلم الفريق الموسم الماضي وكان ترتيبهم التاسع في الدوري وقدر يوصل للسابع والحين ما شاء الله عليه قدر يوصل السداسي وقاعد ينافس لحد الحين على المربع، يعني الصراحة هذا الشيء أداء مو شي سهل، بالذات في الدوري البحريني نشوف فرق قاعدة تطلع كل فريق ولاعبين قاعدين يطلعون بمستويات وايد زينة.
• بالنسبة لسترة والحالة؟
- سترة، الحالة خليه في النهاية شوي, سترة فريق من قبل ندري عنه أنه يدخل المربع بس عدم استقرار الجهاز الفني أدى إلى هفوات، يعني بالذات هذا الموسم يعني الإدارة غيروا مدربين في منتصف الدوري، وهاي الشي وايد وايد يعني يأثر فنيا ونفسيا للاعبين، يعني 3 مدربين في موسم واحد مو شي سهل، بس أنا أعتقد الحين ان المدرب قادر أن هو يكسبهم من ناحية الثقة أكثر، يعني هم كأداء كمستوى اوكي، مستواهم قاعد يتصاعد، يعني نجوم موجودين، يعني من 3 لـ 4 سنوات النجوم موجودين في الفريق وداخلين مربع من قبل، لكن اللهم يمكن المدربين الاثنين ما توفقوا وياهم بغض النظر شنو الأسباب تكون، يمكن إدارية ربما حسب ما نسمعه أو فني أو أشياء بينهم وبين لاعبين، لكن هذا المدرب اللي أشوفه أنا قادر أنه يكسب ثقتهم، قادر أنه يحببهم فيه أكثر، فأنا أشوف أنهم قاعدين يلعبون بنفسية أكثر من فنية، يعني أنا مباريات سترة ما أشوف التكتيك العالي أو الفنيات العالية قد ما أشوف الروح والحماس مع بعض صايرين ويا بعض. فأنا أعتقد أن هذا المدرب قدر يجمع مجموعة معينة يخليهم ويا بعض يكونون زينين ونفسيتهم مرتاحة وعارف شنو يوصل للإدارة، وعلى هذا الأساس قاعدين يقدمون مباريات زينة، مع الأهلي كسبوا الأهلي واليوم عندهم طبعا بعد مباراة مع المدينة تحدد تقريبا المربع اليهم بنسبة كبيرة، على هالأساس نادي سترة أقدر أقول أنه فريق منافس على المربع الذهبي وبقوة.
• وبالنسبة للحالة؟
- الحالة! أنا من قبل قلتها وجهة نظري، كان القسم الأولي أفضل فريق الحالة، نادي الحالة كان أفضل فريق من جميع النواحي، فنيا، نفسيا، سرعة، يلعبون كرات سلة راقية، طبعا بقيادة الكابتن صالح الحداد، ولكن الفترة الأخيرة حسب طبعا ما سمعنا وعرفنا صار خلاف ما بين مجلس الإدارة وصالح الحداد وتم استبعاده من تدريب الفريق وتم جلب ؟؟؟؟ البرازيلي، طبعا وهاي الشي مو شي سهل يعني بالذات في هالمرحلة ذي، ولكن الشي اللي يشيل نادي الحالة ويخليهم في المرحلة يعني يخليهم يوصلون أو يتمون في الفورمة تجانسهم ولعبهم مع بعض سنين طويلة وفترات طويلة، هذه النقطة تخليهم أنهم يكونون يقدرون يواصلون، يعني لو جينا حق ياسر بونفور ومحمود وعلي عباس وأيوب والجماعة الباقي الموجودين مع بعض، يعني الجماعة المتابعين يعرفون أن هذلين اللاعبين كذا سنة قاعدين يلعبون مع بعض. على هالأساس يعني المدرب يمكن هم يجارون بس على مدى بعيد طبعا راح يبين أن ثقة المدرب، يعني مو قصدي والتر أو أي أحد لا، فالمدرب راح يبين آثاره على اللاعبين شلون, صالح الحداد قدر في 3 سنوات انه يبني فريق، وما ننكر حنا ولا أحد يقدر ينكر يبني فريق الصراحة فريق على مستوى ومع النقص اللي قاعد يصيده من ناحية أحمد ميرزا ومن ناحية أحمد علي حسين. يعني الصراحة أنا ما أتمنى أكون في موقف صالح في يوم من الأيام الصراحة، يعني خسر لاعبين اثنين أعمدة وشلون قدر يتم يحافظ على رتم ماله أنه ينافس، يعني نهاية المطاف يعني هاي شي عظيم الصراحة.
• لو قلنا المنامة والمحرق شبه وصلوا للرباعين، ما الفريقين الثانين الأقرب إلى المربع الذهبي؟
- الأقرب والله التكهنات يعني صعبة الصراحة في هالنقطة ذي، بس أنا أعتقد الحالة بيكون طرف ثالث، والأهلي الصراحة يعني إلى حد الحين ما أدري، إذا ينغلبون الليلة خلاص يطلعون آوت، لكن الأهلي يقدر أنه يكون فريق منافس، لكن أنا أتوقع توقعاتي بتكون الحالة طرف ممكن الأهلي.
• دورة السداسي حتى الآن، هل ارتقى المستوى فيها إلى المستوى المطلوب للفرق المشاركة؟
- المشكلة السنة نلاقي في بعض المدربين أو بعض الأندية يتكلمون يقولون إنه إجهاد والتعب والفريق وهزايم قاعدين نحصل بسبب أن كثرة المباريات، طبعاً دائماً أنا أجوف أي مدرب أو شخص يقول ده الكلام ما قاعد يحط دراسة معينة لفريقه، لأن هاي الشي يعني عطونا الجدول يعني البرنامج الزمني من فترة طويلة والمفروض أنه أنت كمدرب تهيئ الفريق وتحط التمارين وتوزع الجهد على ده الأساس، فأنا وجهة نظري أن السنة فيه شكاوى وايد قاعدة تصير على الدوري وفي انتقادات وايد، لكن الموسم الجاي راح ده كل يصير، لأنه صار تغير 180 درجة، هو ممكن غلط ان احنا نغير، من 18 مباراة الفريق قاعد يلعب مثلاً إلى 40 مباراة وصلنا و35 مباراة، يعني وايد نقلة نوعية كبيرة بس لكن أنا أقول بعد السنة الجاية الموسم القادم اللي راح يدخل علينا راح نجوف إيجابياتها في المستوى، يعني احنا في المقام الأول أنت شلون تعرف الدوري مالك قاعد يرتقي أو ما يرتقي؟ يقدم مستويات زينة، نجوم قاعدة تطلع، المهارات الفردية تبع اللاعبين بشكل عام أنها قاعدة تتطور، وكل هاي العناصر موجودة في الدوري عندنا، لاعبين شاطرين على "قفى من يشيل" نشوف في كل فريق لاعبين أو ثلاثة، هذا يجبر المدرب، نوعية الدوري تجبر المدرب أنه يدخل اللاعبين الصغار.
• لو ننتقل فنياً الآن إلى الدوري، هل تعتقد أن اللاعبين المحترفين قدموا المستويات المطلوبة، ومن هم أبرز اللاعبين المحترفين؟
- والله بعض اللاعبين قدموا مستويات نقدر نقول لا بأس فيها، أمثال يعني لاعب المحرق. جوني لاعب الأهلي في تفاوت في مستواه بحكم يمكن الفريق ما قاعد يثبت في مستوياته، لاعب الحالة ؟؟؟؟ الا هو...
• هذا طبعاً ؟؟؟؟؟ باتريك؟
- أي صح، أنا وجهة نظري أن هاي باتريك عند الحلق، يعني تحت الحلق ارتكاز اللاعب أفضل من اونيل. اونيل كلاعب استعراضي ويقدر يشيل الكرة من فوق من أعلى ارتفاع ويقدر أنه اوكي صح الكلام، بس كلاعب تحت الحلق أنه مفيد للفريق هاي ممكن أشوفه وايد زين، هاي اللاعب وايد زين. لاعب المنامة بعد طبعاً قادر أنه يتجانس ويا المنامة أكثر، أنه قاعد ياخذ بس، في طبعاً لاعبين، جمال ؟؟؟؟ تبع نويدرات ما قاعد نشوفه في المستوى المعروف، لاعب المدينة هداف من الطراز الأول، وعندنا لاعب المحرق طبعاً ما نتكلم عليه، لاعب قادر أنه يخلي يشكل لاعبينه الصغار بالذات يعطيهم الثقة وفي الملعب، شوف أنا أقول لك في نقطة يعني يمكن غافلين عنها الجماعة، شوف إبراز اللاعبين الصغار في نادي المحرق، أحمد حسن وعلي عباس وسالم والشباب الصغار اللي طالعين، هذلين كله يترتب على اللاعب المحترف، هو اللي قاعد يبرزهم، يعني هو اللي قاعد يطلعهم، يعني ما يبي يسجل وهو قاعد، يعطيهم الجانس أنهم يسجلون، قاعد يعطيهم فرصة أكثر، يعطيهم الثقة، يشجعهم، يعني صحيح بالفعل قاعد يلعب بخبرته، يعني إن شاء الله نشوف لاعبين مثل هاللاعب، وايد إن شاء الله مثل أشكاله أنه يكونون اللاعبين، حتى المدربين نستفيد منه شخصياً احنا، إن شاء الله نشوف اللاعبين هالأشكال وايد نشوف منهم إن شاء الله.
• كابتن؛ السؤال الأخير، نخرج عن أجواء الدوري وننتقل إلى مشاركة فريق الأهلي الأول لكرة السلة في بطولة مجلس التعاون الأسبوع المقبل في دبي. في ظل الأوضاع الحالية للفريق، هل تعتقد أن المشاركة ستكون مثمرة وجيدة؟
- والله المستوى اللي قاعدين نشوفه من النادي الأهلي الصراحة ما يسر وجداً صعب مستواه، طبعاً تختلف الأجواء ما بين الدوري المحلي وما بين مجلس التعاون، يعني ربما هم طالعين على معسكر الكويت طبعاً بيروحون، يمكن ربما المعسكر الأمور الإيجابية أكثر من السلبية، احنا ما ننظر هالنظرة السلبية ليش؟ لأنه النجوم موجودين، الفريق ما قاعد يتغير، الفريق هذا هو يمتلك نجوم ويمتلك خامات زينة، مهارات زينة، الملعب خبرة كفاية، المدرب زين، اللهم الشيء نفسي قاعد يسيطر على أدائهم، فأنا ما أقدر أنظر لك نظرة سلبية، لا بحكم نتائجهم في الدوري ما راح يقدمون أداء زين في دوري التعاون، لا، ممكن يروحون المعسكر وينعكس السالفة إلى شكل إيجابي ويقدمون أداء زين، لكن أنا من وجهة نظري من إدارة الأهلي، آخذ المعسكر والبطولة إعداد للدوري لكن قبل ده الشي لازم أضمن المربع، يعني مباراة اليوم هي تحدد هل يقدر الأهلي أنه يروح المربع أو ما يروح، إذا راح المدرب حلو، أبدأ أعد لمجلس التعاون على أساس أنه راجع الدوري وأن أقدم أفضل أداء عندي، لكن إذا الهزيمة هني مشكلة، لازم أطلع بأقل شيء، لازم أطلع بمجلس التعاون لأنه الأهلي خسر الكأس وإذا انهزموا اليوم بيخسرون الدوري، فلازم على الأقل مجلس التعاون شوي يعني تعوض عن الأشياء اللي خسرناها.
• أعزائي المستمعين وصلنا إلى ختام حلقتنا لهذا الأسبوع، متمنين الالتقاء بكم مجدداً الأسبوع المقبل في برنامجكم الرياضي "عالم الرياضة".
