على كثر الهموم اللي تجيني من هنا وهناك

حبيبي... كل همّ يهون يوم القاك قدّامي

من اول ما نظر عيني يعانق بارق مْحيّاك

بشوفك تحتفل حتى الجروح... وتسكن آلامي

كأني في زمن غير الزمن لما أكون وْياك

وكن العمر يبدا في لقاك... وتشرق ايامي

أحبك؟... كل شي فيني يحبك... يعشقك... يهواك

ولا حْدٍ في الهوى مثلي متيم هايم هْيامي

عيوني... مهجتي... روحي... فؤادي... منزلك وحماك

حياتي كلها لاجلك غرام وعشق متنامي

بروحي والعمر أشْري هَنَاك.. وبسْمتك.. ورضاك

أموت ولا احتمل دمعه تجرّح خدّك السامي

أنا صحرا الجفاف اللي تمنّت في ظماها ماك

حرام انّك مطر عمري وانا في دنيتك ظامي

يجوز أنسى معك نفسي.. ولكن مستحيل أنساك

لحبك خافقي يمشي قبل ما تمشي اقدامي

ولكن لو حصل شيٍ لروحي... وافرقت دنياك

ومتْ... ولا قدرت انّي معاك احقق احلامي

دخيلك... بس سامحني... ولا تبكي عَلَيْ عيناك

وكثّر من دعا الرحمه... وهذا منّك اكرامي