ليت

ليت الحكي يا ناس يصرف بالفلوس

حتى تعرف الناس مقدار الكلام

وابو لسان اعوج وابو فكٍ ضروس

تحكّه ايده قبل ينطق بالحرام

مرزوق العتيبي

سيد

راكب اللي لو يطوفك ما قدرت تطوفه

سيّد الألوان لا فضّي ولا فيراني

يوم سوّاقه على سمعي يعد وصوفه

والله انْ كنّك تدوّرني ولا تلقاني

مدغم ابو شبيبه

لابد

وش اللي يحدّك تسمع الناس حد وحد

بضاعة جلابيب لا بِيعت ولا انسامت

تبي تنسحب حاضر... تبي نتفق لابد

اعرف الطيور اللي على نيتك حامت

علي بن حمري

لا

صاحبي والعذر ما سر الخطايا

لا تقول العفو عند المقدريّه

هل بقى فينا بياضٍ للنوايا؟

لا تصدّقني ولا تكذب عليّه

محمد العيباني

شهم

والمتهم بالعشق مثل المتهم في محكمه

بريء حتى تثبت آدله تدين المتهم

من يوم شفتك تنبشين الذكريات المؤلمه

تبكي وانا احْضِنْك في صدري على بالي شهم

نواف الدبل

إعقل

يا مجْمل المعنى ويا فرق الجداد من السمول

هاك الجديده واترك الباقي وخلك معتلي

وان غررن بك غانيات الفكر يارع الذلول

إعقل ذلولك عند حاتم واذكر الرب العلي

ماضي العظيمان