س: الحبيب بو تيله .. لمن بتصوّت في دائرتكم؟
أم فلان
ج: أخاف أقول لك ويقولون عني طائفي.
****
س: بوتيله .. يقولون أنك الفترة الاخيره صاير تلف في خيام المترشحين، ويش تبي توصل له؟
أم حسين
ج: حبيت أشوف إللي تجاوزت كذبت ابريل عندهم ووصلت الى كذبت نوفمبر .
****
س: شنو أكثر شعار خلاك تضحك من قلب ؟
بو حسام
ج: سالفة إللي بيحل مشاكل القروض والفقر والتمييز !!
****
س: في نظرك ويش الحل إللي لازم تسويه الحكومة لمشاكل إرتفاع الاسعار ؟
عبدالله
ج: ان تدعم البضائع وتسهل على التجار الاستيراد والاهم أن تراقب التجار لا ياخذون الدعم في جيوبهم !!
****
س: بوتيله ... يقولون انك تحب النسوان !!
أم لـ3 بنات وولد
ج: اذا تبين تعرفين إللي يحب النسوان صج، زوري ولدج في المدرسة وجوفي (بعض) المدرسين إشلون يحبون النسوان!
****
س: هل لك بالشعر ... أو على الاقل عندك ذوق في الشعر ؟
الولهانة
ج: المشكلة ان علاقتي بالشعر لا تتعدى أكثر من الحلاق، وذوقي فيه مع تسبيطه بالكريم وبس !
العدد 1536 - الأحد 19 نوفمبر 2006م الموافق 27 شوال 1427هـ
