- حسين أول شيئ نرحب بك في الوسط.

أهلاً وسهلاً بجريدة الوسط

- كم سنة صار ليك أتنظف سمك؟

ممكن 20 سنة الحين 20 سنة 22 سنة يعني في السوق الحين

- أول ما بديت تذكر في وين كنت تشتغل؟

في السوق العتيقة ألي برة ألي على الجبرات

- في المنامة يعني؟

لا في أهني قبل ما تصير هذي السوق الجديد هذي عام 1992 فتحوا هذي

- لو سألناك كم كان تنظيف الكيلو السمك؟

من قبل كيلو 200 فلس

- والحين؟

الحين صار الكيلو ثلاث، ثلاث بس على بعض مو متواصل ساعات جدي وساعات جدي بس أزيد شيئ بثلاث مئة فلس

- وأنت بشكل يومي أجي أهني؟

أيه بشكل يومي

- يعني ما عندك شغلة غير؟

؟؟؟؟ ما عندي

- لا بس ما عندك شغلة غير؟

لا ما عندي بس أهني

- شغلك هذي الوحيدة؟

بس هذي هي الوحيدة

- أنزين وهاني، كم سنة صار ليك تشتغل في هذه الشغلة؟

أن صار لي حوالي 15 سنة

- 15 سنة ما تشغل شغلة غير طبعاً؟

لا أشتغل بس تقاعد

- تقاعد، مزوج؟

مزوج

- ويش أسمك؟

محمد حسن

- كم سنة صار ليك تشتغل؟

29 22 سنة 23 حتى 25 سنة قديم

- حسين لو سألناك في هذي الشغلة في هذا الحر وتنظيف السمك يعني ما عندكم أحتياجات شيئ؟

أكيد نحتاج لكل شيئ أول شيئ مكيف نبي يعني يحوطون أهني ويكيفون لينا أهني واجد ما تقدر تقعد أزيد من ساعة الحر ضارب إلى وينا ما تقدر ايدور رأسك وأحنا طالبنا البلدية من قبل أن يكيفون لينا أهني كل يقولون راجعوا لصادق ربيع صادق ربيع ويش يعني ما يسوون لينا شيئ صراحة... قلنا ليه موقت بس يعني ما أحنا مستفيدين بس هذه كل على ما يرام بس كلام بدون فعل.

- يعني أنتون بشكل يومي تنظفون سمك بس ما عندكم شيئ عن الحر عن المطر؟

في وقت المطر أكيد يدش لينا أهني ساعات الماي والحر أنت تعرف ما فيه محل يجي هواء حتى هذي مغطية علينا مال حمامات ويش أنسوي أحنا نطالب يعني نبي على الأقل بس تكييف على الأقل نقدر نقاوم في تنظيف السمك ترى أهنا الجو واجد حار ما نقدر أنقاوم أزيد من جدي ممكن بس الواحد بس من يقعد نصف ساعة خلاص يدور رأسه يقول لك أنا بمشي الأول الجماعة يشتغلون حتى إلى الظهر إلى الساعة 2 الحين من يأذن الأذان قال أن بس أن في الحر ما يقدرون.

- أنزين لو سألتك حسين هل شغلت تنظيف السمك تأكل عيش؟

على حسب أن تعرف يوم ألي فيه سمك واجد نحصل لينا كم ربية وقت ساعات إذا جاء الشتاء ويجي هذا بس يمكن دينارين ثلاثة جدي يعني ساعات نحصل لينا خمسة ستة يعني الحمد لله.

- ما فكرتون ترفعون سعر ألي هو تنظيف الكيلو السمك؟

لا رفعنا ثلاث مئة فلس الحين.

أحنا سوينا ثلاث مئة الزبائن ألي يجون يقول ليش ثلاث مئة واجد كل مكان مئتين فلس قلت ليه من زمان ثلاث مئة نسوي يقول ما يصرف يمشي وما يعطونا يروح ؟؟؟ مئتين فلس تبون ما تبون كيفكم أحنا نرفض وما نسوي ليه وبعضهم يسوي ليهم ؟؟؟؟؟

- وتستخدمون شنهوا من الأدوات؟

القدوم السكين السفاطة ناس بمقص كل واحد ليه خبرته في أي شيئ يستعمله حق تنظيف السمك فيه واحد ويانا من مقابة ألحين راح المنامة يستعمل بس هو الوحيد ألي يستعمل بالمقس بس الحين الجماعة أتعلموا بعد ناس يأخذون مقص وناس ما يأخذون مقص.

- ما فكرتون حسين أن تتعاملون مثلاً وي فنادق أو شيئ أن تأخذون وياهم تنظيف الأسماك على طول؟

لا ما تعاملنا لحد الآن لا وي فنادق ما نتعامل

لأن ما يتواجد يتواج كل في المركزي أهناك يتعاملون وياهم أهني مال فنادق بيأخذون الكيلو بستة لأن أهناك يجيبون هوامير كل مال عمان

- يعني معتمدين أنتوا على المئتين فلس؟

ثلاث مئة فلس على الأهالي يعني؟

- وتنظيف الروبيان بكم الكيلو؟

نفس الشيئ ثلاث مئة فلس وبعضهم مثل ما قلت ليك بعضهم مئتين فلس يعطونا

عان مو الحين الحين ممنوع مشكلة الحين يصيدونه 300 دينار صادو ناس واجد صادوا واحد أنظف ليه أهني سعودي أخذوا ربيانه قالوا له لو ما أنت سعودي وديناك بعد بعدين عطوه ثلاث أجياس وأخذو منه جيس قالوا له لأن أنت سعودي...

- هاني لو قلنا لك كلمة أخيرة نختم بها اللقاء؟

على شنهوا

- مطالبكم مهنة تنظيف السمك؟

يطلبون بس مكيف أهني بس التكييف أهني

كل مرة أنقول لهم كل موسم أجي موسم الحر نقول ليهم الشتاء أنقول ليهم قالوا أنشاء الله أنشاء الله إلى متى كلمة إنشاء الله قالوا سوو رسالة سوينا رسالة بس ما ليه أحد يسمع صوتها.

- حسين؟

والله أتمنى من الجميع يتعاونون ويطالبون بعد هم الجماعة أطالب البلدية أن تكيف لينا هذا المحل يعني يعني هذا الشيئ ليهم هم لو أحنا ما نجي أهني حتى ألي أهني الجزازيف ما يستفيدون جيتنا أحنا أن ناس يأخذون سمك يقولون لك أحنا ما نبي ألا منظف أحنا لو ما نجي حتى ألي يبيعون ينظرون شوي بس أتمنى من الجميع أن يكلمون البلدية ويساعدون في هذا الشيئ وأشكرك وأشكر جريدة الوسط على هذه المقابلة