كله فشخرة وبس. ناس تشتكي مو لاقية تاكل وتصرف و يروحون يسوون هالخرابيط بس عشان الفشخرة جدام الناس وعقب يصيحون ماعندنا فلوس وما عندنا ندفع وماعندنا نعيش ونبي زيادة رواتب ! خافو ربكم وتركو عنكم هالعادات السيئة .

زائر 28 يا اذا تعرف من افضل الصدقات اطعام الفقراء وهي ادرى وين بتودي ليهم فلوسك وصدقاتك عندك وديها وين ما تبغي ولا عليك من غيرك جهلة ما يفقهون شي

ما أقدر على الدفاشة

أكيد مع البساطة

كل ما كان شي ناعم و بسيط كل ما كان مريح وعملي

تجهيز الطفل يعتمد على ذوق الأب وإلام على الخصوص وإمكانياتهم واحلى شي يكون بين الفخامه والنعومة

لعبة في فلوس الرجال

خسايره بيزات بس

حليوين وناعمين الفرشات الي في الصوره لكن الابيض والاخضر حدث ولاحرج... ليش مفرش عروس

اما ناس فاضية الي اتحط زركشه زايدة الجاهل ما بيرتاح في نومته بتعورون ظهره

اشتروا القوية الجاهل يتم فيها بس اربعة اشهر

انا اشتري ثنتين وحده للبيت وحده اذا بروح المستشفى او بيجيني احد او بطلع زيارة

في ناس يبالغون واجد في الدفاشة

خلوها ناعمة وبعدوا عن الاسراف

رحم الله ايام ما كانت النسوان يسوون البسطه والنشافات في البيوت... امي للحين تسوي لينا... الله يعطيها العافية وطول العمر

انا اختار الوان هادئة وتناسب النوعين يا بنت يا ولد

مع الناعم

مظاهر زائفة وإسراف مذموم , ما في أحلى من البساطة واستخدام قماش القطن الخالص لمستلزمات الطفل. عن نفسي أفضل عمل العقيقة فهي سنة نبوية أما التوزيعات والبهرجة الفارغة فلست معها. النساء أصبحن يتبارين في عمل التوزيعات وفرش الاستقبال , الحمدلله الذي عافانا. ينطبق عليهم المثل عندك تاكل قال لا عندك تغرم قال ايه.

اني الله رزقني بتوأم .. فراشاتهم اثنينهم كلفتني اقل من 60 دينار في محل عادي وكانوا حلوين في عيوني .. وتوزيعاتهم بعد ما وصلت 60 دينار .. وللأسف للحين ما عقيت عنهم .. الله يعطيني من خيره واسوي واعزم الاحباب

بدل صرف الاموال بدون فايدة يجب عمل حساب ادخار باسم الطفل منذ ولادته
والانفاق على صحته وتعليمه وهو الأهم

اذا قلت لهم سووا عقيقة قالوا ماعندنا بيزات

الناس كيفهم
بس تبون تاكلون من فلوس الناس

العقيقة سنه نبويه
السالفه من بلع و اكل
بالعكس دفع البلاء عن الجاهل و اهله

ادا تفكيرك جدي !!
لا تسوي انته
بس ماعليك من غيرك
كلامك غير موزووون ابد

فشار و زمط و كل واحد يبي يطلع فيها .. احين مو بس الامهات يبون حتى الابو يبي يسوي حق ولده كل شي و يدفع ديك المخاسير و كله تقليد على بعض و اخر شي التوزيعات ترى نفلتهم و لا نستفيد منهم شي تدفع ٥٠٠ دينار على خرطي؟و عقبها حق حفاضات ولدها تصيح ماعندها بيزات اذا معاش الرجل ٤٠٠ و كله بيروخ ع توزيعاتش و قعدتون طول الشهر منغص عليكم! وش استفدتون .. تركوا هالسوالف انجان بتسوون اشترو الاغراض و انتون سوو يطلع ارخص و احسن ما يكلفش حتى ازيد من ٦٠ دينار حق كل شي!

ان شاء الله تعالى اذا رزقني الله بطفل بسوي عنه عقيقة وبتبرع بهذه الاموال التي تصرف على (المفوشر) على مسجد أو مأتم أو مضيف حسيني أو صدقة للفقراء أو أقسم الأموال وأوزعها على جميع ما ذكرت لتحل البركة علينا وعلى الولد الصغير بفضل الله (تعالى) وأهل البيت (عليهم السلام).
انا استغرب من الناس الي تصرف هالاموال الطائلة على خرابيط وهرار ومفوشر ما ليه داعي وبعدين يتباكون ما عندنا بيزات!

بدل صرف الاموال على شي مفيد تصرفها على الاكل والمباني
كأن البلد ناقصة مساجد أو مآتم

كل عائلة وكيفها وذوقها في الاختيار وما بيختارون شي الا لان عاجبنهم فما لاحد خص بهالشي
لكن عن نفسي ما احب الاوفر والكشكشة
خصوصا للاطفال يبون شي ناعم مريح وهادئ الالوان
شفت بعض المفارش صدمتني ههههههه زري او كشاكش على البيبي او لون ازرق غامق
بس ما لي دخل اقول للام شي ! هي براحتها

والله اسرف وحرام

مدريدي وأفتخر
أكيد إذا اول مولود لي اسوي كل شي له

البساطة

هو جه بس على الفراش تعال الى بدعت التوزيعات وماتبي تطلع من المستشفى الا ماخده ليها غرفه خاص حتى لو قالو ليها رخصه ماترضى رحم الله امهاتنا ماكانو يطلبون شي يانساء ارحمو ازواجكم

اسراف و فشار و زمط
و يبذلون مبلغ كبير على هالتجهيزات و يغفلون عن العقيقة و هي اهم !!!

كلهم هرار
شالفايدة من ملء بطون الناس وكأن احنا في مجاعة

لماذا تهاجم العقيقة كل من قال عقيقة طلعت تقول نفس الصاروخ
العقيقة سنة لو موعاجبك للبنت ذبح شاه والولد ذبح اثنان

العقيقة والوليمة حرية شخصية اللي يبي يسويها كيفه واللي ما يبي كيفه ما يصير نجبر الناس على أشياء

محد جبرك انت حر ف نفسك
هذا مو واجب شرعي
هدا من الاستحباب
ماتفضله لا تسويه
بس لا تطرح الموضوع بإكراه

حق العقيقة ماعندهم
حق المفارش الي ب 150
و التجهيزات الي يبي ليها 200 و زود عادي
دلة و استكانتات و توزيعات و اكل للضيافة حلو و بارد

كله خسارة الفلوس على الفاضي
لا على الاكل والولايم اللي ذكرتها وعلى باقي المظاهر

العقيقه مو سرف و لا ترف
هذي فداء عن الجاهل و من سنن النبي
عن عائشة - رضي الله عنها - قالت: " عق رسول الله صلى الله عليه وسلم عن الحسن والحسين - رضي الله عنهما - يوم السابع، وسماهما، وأمر أن يماط عن رأسيهما الأذى
عن ابن عباس - رضي الله عنهما - قال: " عق رسول الله صلى الله عليه وسلم عن الحسن والحسين - رضي الله عنهما - بكبشين كبشين "

ينبغي اخذ الحيطة بعدم كتابة الاسماء المقدسة على المفارش حرصا على قدسيتها وعدم تعرضها للانتهاك بملامستها النجاسة وما شاكل لان انتشرت مؤخرا هذه الظاهرة كتابة اسم المولد والله يبلغكم فيهم ويتربونةفي عزكم البساطة زينه

ليست هناك اسماء مقدسة غير أسماء الله

ناعمة وبسيطة ومريحة ورخيصة

سوالف النسوان ماتخلص.. وعقب يقول لك بنسوي ناصفة بأسم ولدي او بنتي وتالي عيدية بأسمائهم...الخ وكل هذا من ظهر الرجال اللي ملعون والدينه من الديون.. وآخرتها تبغي تسافر بالدين .. عندك تاكل لا عندك تغرم اوكي

البساطة والنعومة
كل من جابت الارض مو شايلتنها بدل الامهات الا عانت الحمد لله رب العالمين .

احسن اختاري اله يناسب بنات و صبيان و يكون خامته زينة تستغلينه عقب عن المفوشر اله ماليه معنى , و الخساير من جيس هالرجال المسكين , ويش عليه اسم ولدي و بعدين ؟ المغزى ؟ .

اكيد خلوها ناعمة و بسيطة. موديلات و بدع هالأيام تشتري ليك فراش عليه اسم المولود ب 80 دينار. يعني حليوه الحركه بس مبالغ في سعرها واجد ، فما احس تسوى الصرف. كلها جم شهر و بيكبر الجاهل و بيتبدل المفرش ( اذا عليه اسم يعني بينفلت).

المأساة ان معظم النسوان ...تبع ما يشوفون وحدة سوت شي الا قالوا اني مو اقل منها لازم اسوي مثلها واكثر ومع السوشيل ميديا و انتشار الصور في ما يكون حوالي الدول صار السفت و المتابع بلوى تنزل على العائلة بدل ما يجمعون هالبيزتين للجاهل ودائما كلامهم هذي اول فرحتنا و هرارز الله يرحم ايام قبل

ليس كل غالي هو الأفضل.

انا مع خلوها ناعمة وبسيطة
للأسف أصبحت تكاليف الولادة ترتفع مع العادات الجديدة

ناعمة وبسيطة وعمليه

زين الواحد يستانس بجهالة على قد ميزانيته وبدون أسراف، لأنها ذكريات تمر بسرعة. شخصيا أحب البساطة.
عندي هالنصايح حق الي ما يدري عنها، الله يبعد الشر عنكم وعن عيالكم:
1. البطانات الي على جنب السرير خطيرة وتسبب الأختناق ولا تنصح فيها الأكادمية الأمريكية للأطفال الرضع.
2. الجمعية الكندية ما تنصح باللحاف (البرنوص) لحديثي الولادة خصوصا السميك.
3. كما ينصح أنك ما تخلي مخدة للطفل الحديث الولادة.
يعني لسلامة الطفل كلما قللت الشغلات الي على المرقد أحسن. وكفاية تلبسه زين وتمهده (تقمطه).

حليوين الي في الصورة... بس اكيد غالين... رحم الله ايام زمان... طربال

بنات الحين همهم بس لفشار لوعوا جبدنا

صح كلامك همهم الفشار والتنافس بين بعض على تجهيزات الولادة والمولود وما دام عقلية الام بهذا المستوى ماذا سينتج عنها من تربية لطفلها