كلما طفيت ناري
قامت الدنيا تشب الأسئله
واقبلوني بالنوايا
يسألوني عن عذاري
يا عذاري ارفعي صوتك شظايا
جاوبـيهم... ارحميهم
من عذابات الخطايا
في عذاري شدني شيٍ غريب
ما لقيته في السنين الأوّله
من هي اللي روضت راسي العنيد؟
من هي اللي أشعلتني أسئله؟
عذاري يذكرون الما تبدل
صحيح الما تبدل يا عذاري؟
خرجت من الندى من كذبة الما
سحاب وما يغطيني إزاري
خرجت من القلوب ومن المشاعر
وأثرني ما هجرت إلا دياري
أحبك يوم تحملها الحنايا
تجي عذبه وأجي مثل البراري
عن عذاري ما بقى إلا سؤال
من هي اللي سافرت بي للبعيد
من هي اللي علمت شعري الخيال
من هي اللي أشعلت فيني القصيد
اللي شفته في عذاري
جيد رمانه وفرحه للصباح
لا عذاري تشبه الدانه ولا بنت الرياح
بس أنا شكّلتها بالطين الأبيض
وكلما تكبر عذاري أنا أغار..
العدد 827 - الجمعة 10 ديسمبر 2004م الموافق 27 شوال 1425هـ
