دعا الشاب محمد القيدوم الذي استضافه برنامج «الناصية» الذي يبث على «الوسط أون لاين» الشباب إلى اختيار المهن القابلة للتطور مستقبلاً.

الشاب محمد القيدوم نرحب بك، أولا عرفنا أن لديك مشروعاً تقوم عليه بنفسك، هلا أعطيتنا نبذة بسيطة عنه.

- بالنسبة إلى فكرة نقل السيارات فقد ابتدأت فيها من العام 98 شهر 7، فكونت لي سيارة.

أشلون وصلت الفكرة؟.

- الفكرة كنت انا امشي في الشارع وتعطلت عليّ السيارة، فجت فكرة ان اشيلها في ونش، أخذنا واحد ممن هم في الشارع وقال لي بوصلك لناس يشتغلون في الونشات، فسألت السائق وكان سعوديّاً عن السيارة اشلون ايسوونها فقال ايسونها بنغلاديشيين، فقلت له انا اعرف اسوي فقال لا ما يصير فقلت له إذ هم ايشتغلون هل أجانب انا بعد مخي اعرف اسوي فقال لي اقنعتني، فجيت اهني ثم سألته عن الموتورات والمونشات الي هو الكيابل عن السيارة ورديت رحت اليه وأخذت من عنده ونش وجيت اشتريت سيارة قديمة وجيت اشتغلت اهني في الزراعة في طشان وأول ما رحت المرور أخذت ترخيصاً من عند المرور قال ما عندنا مشكلة ولازم... فنجحت السيارة، فالسيارة الثانية في خلال شهرين وزعت رقم التليفون الكارت موجود عندنا وأربع وعشرين ساعة وخليت الخدمة وشتغلت، فشهرين أخذت السيارة الثانية، زاد علي الشغل في خلال 8 شهور سويت 5 سيارات، اشتريت 5 سيارات في خلال 8 شهور كان انا ما عندي ولا دينار يعني أخذت من اخوي ألف دينار سلف ومن عند أختي تقريبا 500 دينار.

هل حصلت على تشجيع من أحد؟.

- أول مرة ما يشوفون الجماعة ما يدرون اني انا اشتغلت في كذا ورش انا ما اخترت ان في كل 3 شهور اشتغل عند الأجانب وأتعلم من عندهم وامشي، مثلا ورشة المنيوم، ورشة الحديد.

تتعلم المهنة وترد تطلع تكتسب المهنة.

- اروح للمهنة التي فيها تطور في المستقبل يعني ما أحب أشتغل ادريول (سائق) ما أحب اشتغل سكورتي ليش لأن كل اللي في الشارع 5 سنوات انقوله 15 سنة بمشي سيارة يعني الشيء الذي اشوف روحي ما منه فايدة، مثلا تصليح غسالات اشجع الشباب حتى لو معاشهم قليل 3 أشهر ادرسوا الخبرة وروح اشتغل ابروحك، الثلاجات نفس الشيء بعد في البايب فيتر في الكهرباء تسليك للحين عندنا طلب نشجع فيه الشباب على أن يشتغلوا فهذه 3 أشهر عند المؤسسات والمقاولين وتالي اشتغل في محل ثان، حتى الشباب الذين عندي 2 اشوي بعضهم قدامة ما يحبون يتعلمون والصغار يحبون يتعلمون اللحام والغرين... ظليت أشتغل سنة ونصف بالخمس السيارات صار علينا طلب رديت زدت عليها 2 في خلال السنتين سويت 8 سيارات ظليت على الثماني فوصلت إلى دول الخليج فصرت ما بين قطر وما بين الإمارات اشتغل.

يعني لو اتعطلت سيارة في قطر تطلع اليها؟.

- اي للحين كلا شغلنا ما بين قطر والامارات، مازال دول الخليج انجيب السيارات التصديرية وبعدين غيرنا السيارات القديمة تعلمنا عليهم مكانيكا السيارات القديمة علمونا بعدين اخذنا السيارات الجديدة من 2004 ابتدينا في «الهدروليك» جت لينا الخارطة الجديدة «الهدروليك» ما كان في «الهدروليك» ذاك الوقت كان كله حديد.

ممكن توضح معنى «الهدروليك»؟

- يعني «الهدروليك» السيارة التي تنزل تشتغل على الزيت يعني مو نفس القديمة تنزل حديد دوسات، هذه تشتغل اريح انتزل دوسات بأيدك بس السويج اسمونه كنترول وول يشتغل على الزيت في الجير وتسوي الصندوق ماله وينزل على «الهدروليك» وينزل اريح الينا يعني من الفقل، الناس الزبون الي يشوف الحديد ايخاف سيارته تحك وتتعور اجي يا خد «الهدروليك» اريح احسن من يحك البنبر.

بمعنى اوضح انكم تتطورون كل ما تطورت الشغلة؟

- هو لو حتى كان في عندي دعم مالي من البنوك في ذلك الوقت كان انا عندي سجل من سنة 2001 كان عندي دعم مالي زين كان تطورت.

هذا يوصلنا إلى شغلة مهمة، هل ما تحصل على دعم من المؤسسات أو شركات التأمين أو حتى الحكومة في هذا الجانب خصوصا للشباب البحريني مثلك؟.

- انا ما اقول ما حصلت، شركات التأمين مرت علي بس انا ما عندي الدعم حق سيارات زيادة من الوزارة أو الحكومة أو شيء يعني التأمين كلها الحين انا ما اقدر شخص واحد عندي 8 سيارات بقدر اسيطر على الزباين في الامارات في قطر وفي الكويت وفي السعودية والبحرين، فالبحرين أولى فأنا ما اقدر اخلي الزباين الي في قطر لو كان عندي الدعم حق زيادة السيارات...

يعني الدعم من المؤسسات موجود لكن دعم الحكومة وضخ الاموال في المؤسسات غير موجود؟.

- غير موجودة هذه، يعني اخر نتيجة ادريوليا (سواق) ماشاء الله البحرينيين يعني بالتدريج كل يوم 3 ايام يتصل لي واحد يبغي يشتغل عندنا، يعني لو انا اسوي تليفون لأي واحد يوم ثاني يجبون اثنين، يعني انا ما اقصر على العامل اشوف بعضهم يشتغل «هاور تايم» يعني ما عندي قصور على العامل اهم شي عندي دريول السيارة اي وقت تقدر تجيبها، الدريول أول شيء نعلمه 3 شهور راتبه 150 ديناراً يقلب بطاقته حتى لو في نفس الشهر قلب بطاقته امشي اليه 200 إلى الساعة 2، نقول له روح شيل السيارة بعشرة ونعطيك فيها 3 دنانير، وإذا جديد ما نخليه يطلع خارج لازم انا أكون معاه اشلون التدريب ما له اندربه بالخارج البحرين مني إلى السعودية في بعض السيارات إذا انمر نطلع من البحرين اروح انشيل السيارة من قطر إلى الامارات وجي لينا اوردر من الامارات إلى الكويت واجي لك من الكويت إلى الامارات وترد ترجع السيارة من قطر إلى البحرين.

يعني لو سألناك محمد، هل هذه الأعمال أو المشاريع صعبة على البحرينيين صعبة على الشاب البحريني؟.

- شوف، اهني يا خدونه فرصة هم من عند الاجانب... ما يقولون ان لما يرحون مؤسسة بدات الي عمره مثلا 16 أو 17 إلى حدود 22 ما يقول انا بروح مؤسسة «قنطراز» في بعض يجي يقول انا الين مثلا جبت شباب انا اشتغل في «قنطراز» اخلونه يخم، إذا تخم وتغسل انا ما اقول لك عيب بس إذ انت لم تستفد من الدراسة خذ شيء من عند الاجانب بوق مثل ما يقول اسرق من عندهم مهنة وخلها في بالك، نفس ما ذكرت بعض المهن إلي موجودة في كلشي في البحرين هذا الي انا اشجعهم.

يعني ان من اهم العراقيل الي تواجهونها الدعم الحكومي، المشاريع الشباب وتشجيعهم؟.

- الشباب الحكومة تدعمهم في التشجيع، هذا الي يشتغل عندنا سنتين أو ثلاث ذا يوصلون يعني بس المشكلة هذيلين الشباب لو كان عندهم دعم حق تطليع السجل بس ما يبغون شي تطليع السجل كان يشتغلون لأن في واحد يقول لك عندي صعوبة في السجل ليش قلت له السجل 40 دينار المشكلة البارك من وين اجيب اجار والايجارات غالية يمكن تقريبا شباب وايد.

يحتاج إلى دعم مالي بداية وتالي يوقف على رجوله؟.

- هذه كانت سنة 2004... فانا الحين انا وصلت إلى هذا التطور إلى 2008 جاء الي احد من الشباب قال لي سياراتك بعدهي قديمة لازم تروح بنك، انا بشوف لك بنك وانا عندي سجل ودخل احسابي وفي نفس الوقت البنك عطاني 5 سيارات ما عطل، قال انا احب اشتري كش ما كنت احب اقساط، فقلت له ميزانية ما عندي مثلا يجمع المبلغ مال المدخول ويوزع الرواتب والباقي يخلي حق سيارة جديدة نفس ما تقول، دعمني 4 خمس سيارات إلى 5 سيارات دعموني من 2007 وبعدين ما قدرت اروح في الخمس سيارات صار عليها مبلغ قوي فرحت اضطريت اروح إلى تمكين من قبل 4 شهور وديت اليهم صور وديت اليهم السيارات قلت اليهم انا اعرف اشتغل قلت اليهم انا ما بغاكم تدفعون النص تدفعون الثلث بس ما بغى اشتري لان السيارات والحديد اجيبه من وين من الخارج ما عدا كم حديدة من البحرين لأن السيارة في البحرين هناك برة تفترق سعرها عن الونش بعطيك سعر الونش الذي يسحب السيارة اهني بألف وبمئتين دينار أوردر في الامارات 400 دينار تروح لمنهو اتروح لتمكين وتقول لهم ادفعو لهذا الالف والمئتين يطلع لي رادي صح ولا، فاضطريت أراويهم الصور قلت لهم دعموني انا احتاج إلى 3 سيارات الخارطة الجديدة وانا عندي شغل بس ما اقصر على الدريول البحريني يعني شارط عليه إذا ما يطلع 300 دينار في الشهر بالأوفرتايم واشوف معاشه لمدة شهر 200 دينار افنشه ما عليه غياب ما عليه شي انا افنشه لأن هذا تشجيع له، يعني إذا يغيب بدون اعذار ما يوصل مئتين وخمسين أو 300 يظل شهر ما عندنا شغل و3 شهور عندنا شغل والشباب الباقي كلهم مستوى مالهم وصل إلى 300 و400 أوفررتايم والطلعات حتى اعطيهم حق السكن بعد وأكله وشربه إذا يطلع برة علينا على المؤسسة نفسها.