همى وجهي على ظل الملامح والسحاب نفود

تباكر بالحنين وقبلته للذنب تفاحه

هطل ظل المكان ولا بقى خلف الحدود حدود

تحرى صورتي واقفل مداه وضاع مفتاحه

أنا حزن الهبوب اللي تمادت في مهده لحود

أقلب فكرتي خلف الظلام وزيف مصباحه

هلا عد العيون اللي توارت والعمر مرصود

تبي رمل الحنين يلملمك في حضرته واحه

أنا ما ني غشيم ولا غشى برق الحنايا رعود

أنا صرخة غريب ما عرف ترنيمة الراحه

وأنا نار القصيد اللي تحطم قيدها بقيود

وأنا حزن المنافي بيرقي وان ملت لافراحه

أريدك وأشتهي طعنة لقاك وريقك المعقود

والى مني بطيت أوصل دفاك استعجل وشاحه

همت كل العروق ولا همى لي صبحك الموعود

والى جت سيرتك شح الكلام وفاضت جراحه