يا سلمانية.. متى يناسبكم نمرض..؟؟!!!

62 مريضاً ينتظرون أسرة السلمانية.. بصراحة هذا عدد كبير في مملكة نفطية.. ودائما وجود نقص في مستشفى السلمانية.. شعب البحرين + جميع المجنسين كلهم على هذا المستشفى..؟؟!!! يا حكومة ابنوا لشعبكم مستشفى ثاني عام وكبير جدا حتى يستوعب تزايد عدد السكان + المجنسين..!!! أو خبروا جميع المواطنين وأعطوهم مواعيد عن متى يمرضووووووون... يعني مب كل واحد يمرض على كيفه ويسوي لكم ضغط..؟؟ هههههههه

وينك يالبوعينيين !!!

شوف موارد الدولة كل ما جه لها وتنقص والناس تعاني حتى من ابسط الامور@وينك تشوف السلمانية او مدارس الحكومة شلون مضغوطة من الناس@للحين تبي تحافظ على الهوية العربية؟@اقول لو تشتغل يوم واحد في السلمانية بعدين بتقول ابي احافظ على هويتي بس لانه المواطن صار مو قاعد يحافظ على روحه هالايام

زائر 25

لا اني اقول ان الوزراء يسون لهم شغل ويقعدون عند احد الجوامع بالتناوب كل مرة وزير لين يجمعون مبلغ محترم يشترون فيه اسرة

ديره فقر !!!!

وش شايفين في هالديره مافي شي عدل كل واحد يخرخش فليساته ويروح خاص والفقير حضه ع الله يوقف قلبه والعلاج ما جاه هههههه ومن دخل صاحي السلمانية يطلع مريض وخاصه بالضغط !!!!

الله المعين

اني حابة ارد علي زائر 2 روحة مستشفي المنطقة الغربية للولادة صح قديم لكن نضيف ولمعاملة كلش طيبة وحطونش في غرفة خاصة فيها حمام وغالبن ما اتكون حالت ولادة وحدة الاهتمام ابها وبا لمولود اني وحدة ولدت مرتين عندهم اخلوني لماء امل واطلب الرخصة

الحل هو

الرجاء من المسؤلين فى الدولة اذا كانت ميزانية الدولة ما تسمح بتوفير اسرة للمرضى فتح حساب خاص بأحدى البنوك لأستلام النقود من أهل الخير و أهل الخير وايد فى البحرين و مستعدين انهم يساعدون ؟؟؟؟؟يالحكومه

بنت القطان

بس فالحين يجنسون وحق الفورمولا وتنظيمهم بس حق المواطن في مسكن وصحة صاروا اخر اواخر المهم عن المسوؤلين وبنسبة للزائر2 روحي اقرب مستشفى حكومية غير السلمانية

نداء للوزير

انشاء الله تحس بألمنا فأنا مريضة سكلر وعندما اروح الطوارئ يزيد المي تدري ليش لان السرير الي حاطينه عرض القبر واتمني يوم تنام عليه حتى تحس فينا واتحداك اذا قدرت تنام عليه ساعه مو بعد يوم او يومين .. رجاءا من المشرفين عدم الحذف لتصل كلمتنا للمسؤلين حتى يحسوا بألمنا ولو بيوم واحد

أيــــن وزير الصحـة من كل هذا ؟

أنا أدعو الوســط بعمـل زياره ميدانيـة لقســم الطوارىء لتطلع على معـاناة المرضى في هذا القســم حيث ان النظـافة في القسـم معدومـة .. والاهتمـام من قبل الممرضـات حدث ولا حرج حيث ان المريض لا يستطيع الذهاب لوحده لقسـم الطوارىء لانه سوف لـن يجد احد يهتم به او ينظر اليه من ممرضات او من دكـاتره من كثر الضغط الي عليهم .. طبعـا حمامات الطوارىء وانتو بكرامة لا يوجد بهـا صابون ولا كلينكس و لا يستطيع الشخص دخولهم من الرائحه المنبعث منهم .. وايضـا اسرة الطوارىء لا يوجد بهـا أغطيه .ولاتوجد كراسي متحرك

عبير الورد

ما اقول الا حسبي الله علىمن ظلم شعب البحرين الاصيل وحرمها من ابسط حقوقها وساوى المجنس مع البحريني الاصيل ويا ظالم لك يوم

و الحل؟؟؟؟؟

بسم الله الرحمن الرحيم..و صلي يارب على محمد و آل محمد
اختي دخلت المستشفى بحاله يرثى لها
و هي صغيره و عندها سكر,قالت لها الدكتوره ان بتنامين عندنا في الطوارئ من اليوم(الخميس) الى الاحد,احتمال يفضى سرير..
المهم انها تنازلت عن علاجها و رجعت البيت
في احد يتحمل وضع الطوارئ اكثر من كم ساعه?
وانا اقول لكم الحين
و الحــل؟؟
لان هذا الاسبوع الثاني لها,حالتها سيئه
و للحين ما حصلت علاج بسبب السرير

حسبنا الله هو نعم الوكيل

ويش نقدر نقول انا لله وانا اليه لراجيعون ولا حول ولا قوت الابالله العلي العظيم على هل الحال

طبيبة

المشكلة كبيرة وهذه أحدى تراكمات سوء التخطيط و قصر الرؤية عند صناع القرار في هذا البلد.لا توجد استراتيجية واضحة. ودائما تعالج المشاكل بشكل أني. الوزارة لازم توضع قوانين لادخال المرضى ومنها المرضى الأجانب اللي اتشكل أكثر من 70% من المرضى المتردديين على السلملنية وحتى المنوميين. ,اتسأل فكرة ازالة اسماء المرضى للدكتر وليد اللي ما سمعت فيها الا في البحرين .كل دول العالم اتحط اساء المرضى في كل جناح حتى امريكا. أقول أسال فريق ألاعتماد الكندي ا للي جاينكم بعد شهر قبل.

الله على الظالم

انا مريضة سكلر اتمنى اقعد بألمي في البيت ولا اروح المستشفى وهذا شي طبيعي مع زيادة عدد المجنسين ولله الاول الامور عاديه بس الانحين كثر الاهمال وصار ضغط على المسشفى

هموم الوطن

المشكله الاجانب علاجهم مجان واللى يدخل اجنحة المستشفى يلقى كل الاسرة بنغالية وهنود وباكسنانيه وغيرهم من الجنسات المختلفة مدام العلاج مجان والادهي بأن بعض الهنود يأتون بعوائلهم منالهند لإجراء العلميات المجانية مدام أهي سايبه سايبه في هالديره لا حسيب ولا رقيب .
ياريت يطبق قانون العلاج بفلوس مثل بقية الدول اذا ذهبا الاردن او غيرها حتى السرير يحسب عليه مبلغ والكرسي المتحرك واهني الدواء والعملية والسرير مجان حتى لو تمكث شهر عيش رجب وشوف عجب في هالديرة .
نطالب ان يكون العلاج بفلوس على الاجانب

المعانيه

حسبي الله ونعم الوكيل على كل ظالم متسبب
الحين هم مايقدرون اوفروناسرة حق المرضى يقدرون ايوفرون لكنهم لعتاء ولي ايده في الميه مومثل لي ايده بنار

البركة بالمجنسين..الله يلـ.......

المجنسين محتلين كل شئ ،،، يوم اسود يوم دخلوا هالديرة والله يجازي اللي كان السبب.... ومن المبتلش احنه الشعب الفقير...
اللهم عجل فرجك وفرجهم
ولا حياة لمن تنادي

نبي يا ملك القلوب

عيب دولة مثل البحرين ما تملك الي مستشفى واحد فقط للمواطنين دولة غنية بالنفط و الأقتصاد تمتلك أكبر الشركات و مؤسسات العالمية نتمنى تنحل هذه المشكلة في اسرع وقت ممكن

لا حياة لمن تنادي

الله يكون في عونكم ويصبركم تحركوا ياوزارة ابنو مستشفى ثانية الى متى الأنتظار تعبنا وملينا

بسبب لوحات المرضى !!

يبدوا ان السبب في نقص الاسرة عائد إلى منع وضع اسماء المرضى للخصوصية كما ذكر المبدع العبقري وليد المانع مدير المستشفى...ههههه
راح نشوف اشلون راح يتصرف هالمدير الى ما وصل لهمنصب إلا بالواسطة .. اشلون راح يغطي النقص؟؟؟

لامبالاة!

((رب أشرح لي صدري ويسر لي أمري واحلل عقدة من لساني يفقهوا قولي))
أحد مرضى السكلر أُدخل يوم السبت الموافق 7-11-2009 إلى قسم الطوارئ والحوادث بمجمع السلمانية الطبي غرفة المعالجة D التي تكاد تخلوا حتى من ممرضة لمتابعة الحالات! ولايزال قابع هناك حتى الساعة رغم قرار الأطباء بأدخاله المجمع لأن حالته تستدعي ذلك!!
الشكر الجزيل للوسط أون لاين على هذه المساحة كما نتمنى منهم أيصال هذه الأصوات إلى الجهات المعنية في الوزارة.

يامهدي

اني حصل لي هذا الموقف كنت في الطواري الولادة عكب ساعة كالو لي مافي اسرة منتصتل الي مستشفي جدحفص للولادة نفس الشي مافي اسرة وكنت في حجرة فيها سريران في الطواري عكب فتره كالو خلاص ماحصلنا ليش سرير وما اصير تولدين في الطواري عكب كمت من السرير كان علي السرير الثاني وحدة مجنسة كالت لي وين راحة كلت اليها مافي سرير بروح الخاص كالت متي كاعده علي سرير كالت لي انشاء الله اني اولد اهني وما اطلع لو شنهو اصير اني علي سرير

التجنيــــــــــــــــــــــــس

صاير ظغط على الخدمات بسبب التجنيس الله لا يبارك في الظالم دمرتوا البلد

ازالة لوحات الاسماء

قبل كم يوم اعلنوا ازالة لوحات الاسباب واليوم يعلنون عن التكدس .... عرفنا قصة وسيناريو المسلسل المتكرره وشبعنا

yusuf245

ألم يحن الوقت تكون فيه أدارة الطوارىء من قبل أطباء الطوارىء فهم أدرى بمشاكلهم اليومية بدل أن يدار من قبل أطباء لا يعملون بالقسم وليسوا على تواصل بالقسم ولا أطباءه!!!!!!!!!!!!!!!!

بحرانيه

كنا في قسم الكسو ننتظر الدكتور والطفله تتئلم من الكسر وهم يقولون الدكتور غير موجود وبعد5ساعات دخلنا الغرفه والدكتور يشاهد مسلسل في الكمبيوتر وقال هم غلطانين بكل برود انا موجود اين الرقابه حاميها حراميها اين الرقابه

أصبحنا وأصبح المللك لله

اللهم اشرح لي صدري ويسر لي امري يفقهو قولي
صدق الله العلي العظيم
المفروض وزير الصحة يبني قسم جديد غير هذا للطورائ ..
اللهم شافي كل مريض بحق الامام الحجة ..
مع السلامة

مستشفى خرطيـ

واللهـ حآلهـ ..
شدعوهـ يكلفون على روحهمـ بعد
مآدري ليش مسمين القسم(( قسمـ الطوآرئ)) !!
وين قآعدين آحنآ ولا كآنهآ مستشفى .. هذيـ ولا سوق سمج عآفآنآ اللهـ .. ^^
وين النآس مآ تمووت يآآربيـ ..
واللهـ مرضى السكلر واللهـ نعآنيـ على مآ يدورون لنآ سرير :(

و لذلك بسبب التجنيس

و في الايام المقبلة سيزيد العدد عن 62 مريضاً و من بين هؤلاء "62 مريضاً" والدتي التي تعاني من القلب نزورها في الممر والله حالة تشوفي رجال كبير بثوبه و هو يتالم من السكلر او صغير يتالم من السكلر يعوروا القلب صرنا أكثر من العراق و الله يبارك في التجنيس يكسروا القلب وين الملك عنهم و الله على كل ظالم

ياجماعة الحل

ياجماعة الحل سهل وبسيط يكنكم مراجعة النائب بوعننين

جماعة افيدوني

والله مستشفى السلمانية يخوف كثير
المعذرة بس ما ادري شسوي ولادتي قربت واريد اروح مستشفى خاص بس خايفة من انهم يسوون لي عملية لانهم راعين فلوس وخايفة اروح السلمانية وما الاقي سرير هذا عدا اهمالهم
انصحوني اخواني القراء جزاكم الله خير

مستشفى واحد ؟

هل من المعقول ان دولة خليجية نفطيه ما فيها مستشفى لعامة الشعب الا مستشفى واحد طبعا ااذا استثنينا العسكري لأن يقدم خدماته للعسكريين فقط ؟؟ ..