قال مشاركون في برنامج «الناصية»، الذي يبث على موقع الصحيفة «الوسط أون لاين» اليوم، إن «الغداء الجماعي» يمثل تقليدا بحرينيا قديما، حيث يتشارك الأهالي كل بوجبته في بيت أحدهم، كما يوم العيد المناسبة الأهم في ممارسة هذا التقليد الذي يعلق بذاكرة المواطنين.
وتحدث برنامج «الناصية» الأسبوعي، الذي يقدمه الزميل محمد الجدحفصي إلى بعض أهالي المالكية:
حدثنا عن عيدك أول...
- أي عيد؟
عيد الحجاج؟
- عيد الحجاج الأول إذا راحوا الحجاج الناس يستقبلونهم ويسألونهم عن أهلهم وعن الديرة وأهل البلاد. وإذا جاء من الحج يقولون له شفناكم في التلفزيون وحطوكم وتستاهلون السلامات.
تذكر أنت الأول يوم أنت صغير كيف كانت أهني المالكية؟ وين تروحون أنتون؟
- أروح البحر ونروح الزرايع ومني ومني أيام العيد، أنضيع وقت يعني، أنروح أنزور الجماعة والأهل.
والحية بية ما تسوونها؟
- أيه لازم أنسوي الضحية هذي أنوديها البحر، «الضحية» يسمونها.
وتشترونها من متى هذي؟
- نسويها في البيوت.
قبل كم من يوم من العيد؟
- قبل العيد بعشرة أيام من يهل الهلال لما أيصير العيد وبعدين أنوديها البحر، الأول يسوونها في قوطي مال عرانص أو مال خوخ، الحين يسوونها في خوص، الأول ما فيه.
ويش أتحطون فيها؟ شعير بعد...؟
- نحط فيها روث مال حياوين ونحط فيها شعير أو نحط فيها حب مال حلبة أو نحط فيها حب ماش ونوديها البحر، لين طلعت نوديها البحر.
أي يوم أتودونها؟
- نوديها يوم العيد.
... وتغنون بعد؟
- ايه لازم أنغني أنسوي لها: حجيتي حجيتي، ونقطها في البحر. ونقول، مع السلام يا حجيتي مع السلام وابري ذمتي لا تقولين أنا عطشتك ولا تقولين أنا جوعتك يعني يوميا أعطيك ذي... أنجيب يعني نشايد.
فيه نشيده غير بعد؟
- لا بس هذي النشايد.
انزين والغداء ايصير في وين أيام العيد؟
- الغداء في بيوت الجماعة، يعني كل إنسان وجماعته يسوي له غداء حق الجماعة ماله ويجون الناس ويتعايدون وياه في بيته يعايدون اياه في بيتهم يعيدون وياه في بيتهم يعيدون ويا الجماعة، وندور من بيت إلى بيت حق العيدية.
وكم العيدية الأول؟
- أربع آنات، يعطيك أربع انات تفرح ابها، لأن ما ميش، لأن أشوي فقر وتفرح ابها إذا عطاك الأربع انات، من هذا عشرة فلس من هذا نصف ربية هذولا يعطونك خمسين فلس ناس يعطونك أربع انات وناس يعطونك عشرة فلوس انجمعها، إذا جمعت لك مقدار أيجي دينارين ثلاثة تفرح ابها.
خلنا نسأل حجي محمد
- أبودياب
سولف لنا على العيد الأول؟
- لا أنا لا
عن السمك؟
- عن السمك هذي وقفتي.
على كم الصافي؟
على خمس، وهذاك على دينار ونصف، الدويلمي على دينار.
انزين والسمك هذا ملجاوي بعد؟
- لا مو ملجاوي، هذا ملجاوي
انزين ويش اللي يفرق؟
- يفرق هذا حي توه جاي مال احظور شوف طالعه حي، هذا من الصبح، هذا مال السوق وهذا فسكر وصافي وكركفان مال حظور.
وعلى كم الفسكر؟
- الفسكر دينار ونصف والكركفان دينار والصافي اثنين ونصف.
انزين الناس تأخذ في العيد سمك؟
- العيد محجوز عندنا الحين إلى الآن المحجوز يبون هامور في العيد.
الهامور ما فيه لو...
- الحين إلى الآن ما حصلنا لازم بكرة أو عقب بكرة لازم ضروري انحصل.
وعلى كم الكيلو؟
- اهني على أربعة وثلاثة ونصف غير سوق جدحفص أغلى على خمسة خاصة يغلون السعر عليهم فوق واجد يرفعون السعر، على خمسة وأربعة ونصف وستة.
انزين حجي محمد رحت الحج لو مارحت؟
- رحت إن شاء الله رحت الحج
ويش اتسوون يوم العيد اهناك، كيف تذبحون خرفان الأول؟
- الأول نذبح ضحايا خرفان أو غنم إلي نحصله من هذين النوعين، نذبحه ونجيبه الخيمة، نجيبه شيء نأكله وشيء نقطه حق الجماعة هناك.
كم كانت الحجة الأول؟
- الحجة الأول ببلاش، ثلاثين دينار أو أربعين دينار، الحين ألف دينار ما تكفيك، ألحين أنا ما أروح يعني من زمان ما رحت أنا أروح تبع الحملات مني ومني.
انزين الأول يوم العيد اهني ويش اتسوون وين اتروحون؟
- أول شيء نروح المسجد نصلي صلاة العيد عقب ما نصلي صلاة العيد ونطلع ونروح بيت سيد علي بن سيد جواد ونطلع من بيت سيد علي نتقهوى ونطلع ونجي بيت واحد يسمونه ملا حسن أبو حميد ونأكل الي الله يكتبه ثم بيت حجي أحمد بن مرهون بعد ونطلع ونرد انجي بيت سيد سلمان ونأكل الي الله يكتبه ونطلع ونجي المأتم العود.
هذا يوم أنت كنت صغير يعني؟
- نعم يوم كنت صغير، بس مو صغير إلى أهناك أنا ما صغر نفسي الحمد لله رب العالمين.
أريد أن تذكر لي فعالياتكم في العيد عند ما كان عمرك 12 سنة؟
- 12 سنة ما أعرف بصراحة.
يعني ما تذكر الضحية ولا شيئ؟
- لا الضحية أن أودي الضحية، الضحية أوديها نقطها في البحر ونجي وبس هذا هو وندور أنا ويا الجماعة احنا جهال.
وادورون على البيوت حق الفلوس؟
- ندور على البيوت بن بيت إلى بيت وحادث الغداء نروح نتغذى من بيت هذا اشوي ساعة نأكل من هذا أشوي ونروح شوي ونقضي الحال هذا هو.
لو رجعنا للسمك بيغلى بعد أزيد لو هذي السالفة؟
- والله هذا حكمة الله سبحانه وتعالى ما نقدر نحكم،
شكلك مو جزاف بعد أدش البحر يعني؟
- لا ما ادش البحر.
بس أتبيع؟
- أيه أبيع، أول بجي وبشق السمك، وعقب ما شقه بحط فيه ملح، وبملحه وبخليه يومين ثلاثة بيبسه في الشمس ومن عقب ما أيبسه في الشمس آخذه واحطه في أكياس وأوزنه وأبيعه، الحين ما يصرف.
أنزين خلنا نسأل كم ولد عند الحجي؟
- الحمد لله رب العالمين عندي خير من الله سبحانه وتعالى، عندي أربعة صبيان وسبع بنات
الصبيان يشتغلون يبيعون سمك؟
- لا هذا المحل ما يدلونه، أبغيهم أيجون أبغي الصغير ما يرضى.
وينتقل الحديث إلى آخر
السلام عليكم ويش أخبارك حجي؟
- مساك الله بالخير
ويش اسمك؟
- علي بن عبدالعزيز عبدالله علي.
من المالكية بعد؟
- إيه نعم من المالكية.
أين عملت سابقا؟
- كان عندي لاري، اللاري خلاص اتكنسلوا هذي لوارينا اتكنسلت، عندي لاري اتكنسل خلاص انتهى ما فيه شغل إلى اليوم وأنا الوحيد الي أكد على العائلة وعندي واحد توظف والثاني الكبير ما حصل راح إلى التدريب يا زعم حق يتدرب هو أول واحد والي معه اشتغلوا وهو ما اشتغل لأن ما عنده بالواسطة هذي صراحة ما فيه واسطة الي ما فيه واسطة ضايع.
العدد 2640 - الجمعة 27 نوفمبر 2009م الموافق 10 ذي الحجة 1430هـ
هي جات على غذاء العيد؟
الحين حتى الغذاء اليومي اللي المفترض يلم شمل العائلة ترى القليل من الأسر تجمعها وجبة واحدة، وإلا فهناك من يتغذى وحده ومن يتغذى بغرفته ومن ينغذى مع ربعه ومن يتغذى في عمله، وأصبحت صلة الرحم مقطوعة، الله ايجيرنا من هالزمن