حبيبي يا فرح عمري علينا جارت الأقدار

ولا فادت دعاوينا ولا فادت رجاوينا

صحيح الوقت ما يرحم ولا يقبل لنا أعذار

على كف الزمن ماتت معانا كل أمانينا

يجيني طيفك الغالي تشع بعيني الأنوار

وأشوفك وافرح بشوفك وارد أعيش ماضينا

يا حلمي يا أمل عمري ربيعي أنت والأزهار

يا فرحي يا وطن عمري بوصفك وش يوفينا

أحبك لو تفرقنا وفينا انتهى المشوار

عسى الذكرى تصبرنا وعلى الفرقا تسلينا

أحبك يا أعز الناس وحبي لك أبد ما صار

أحبك كثر ما ضاقت بنا الدنيا وتبكينا

تزين أيامي بشوفك يا ساحر بالحلا الأنظار

تزين الدنيا من حسنك وصوتك هو أغانينا

من أنفاسك قطوف الورد وفي مبسمك الأسرار

تربع دارنا بخطاك ولو القيظ حادينا

رسم حسنك إله الكون تعالى ربي القهار

يا كن الليل بعيونك وخدك صبح يضوينا

عيوني ما تبي غيرك أصوتلك بكل أسرار

أناديلك تعال نعيش ثوانينا وليالينا

أجدد لك ولا حبي ولو إن انتهى المشوار

يا أول وآخر أحبابي عسى الذكرى تسلينا

صحيح الوقت ما يرحم ولا يقبل لنا أعذار

على كف الزمن ماتت معانا كل أمانينا