سلام حبيبي.

- أهلاً خوك، شخبارك؟

الحمد لله، إلا بسألك، شخبارك هالأيام انت؟

- زين، جا ويش صاير يعني؟

لا، بس أشوفك هالأيام مو على بعضك، أحس إنك كله امفهي وكأنه بالك شويه مو رايق.

- عادي، يمكن يوم تشوفني كنت أفكر في الأهل أو أي شي يعني.

جا متشابق ويه زوجتك؟

- لا مو متشابق، بس حتى لو اتشابقت وياها ما بفهي لأني متعود.

الله يساعدك، لا بس صدق خوك أحسك شويه هليام مو نفس قبل، لا يكون ...

- لا يكون شنو؟

لا يكون يعني تبغي ترشح روحك للانتخابات؟

- منهو قال ليك؟ صدق الواحد ما ينوس يفكر في حاجة إلا انتشر خبرها. شلون عرفت؟

بعد، صح أنا مو المحقق كونان، لكن صراحة انت ما تعرف تغبي عليي شي، واللي خلاني أشك فيك إنك قبل أربع سنوات كنت مصنف ترشح روحك لكن بعدين نجفت لأنك ما كنت تشتغل شغلة عدلة ومو متعود على لفياب الكشخة، لكن ألحين الحال تغير. ثاني شي أشوفك هلأيام كله تكشخ، يعني صرت أحلى من قبل، ودائماً تشتري الجرايد، وكل مناسبة أشوفك في الديرة، يوم شفتك جدي قلت أكيد ناوي على نية.

- أنا صح عندي نية لكني صراحة متردد.

ليش؟

- ما أدري شلون بس أحس روحي مو مناسب صراحة لهالسوالف، يعني ما أصلح أصير نائب.

ليش ما تصلح يعني، صراحة ثيابك كشخة عدل، وساعات إذا تستحمق أحس ليك هيبة شوية، وإذا تتكلم كلامك مفهوم وتقدر ترفع صوتك من دون ما يبح. ويش ناقصنك يعني.

- أحس ما عندي ثقة في نفسي، يعني يوم كنت في المدرسة وحتى ألحين في الديرة ما أحس روحي واجد متميز أو أهتم واجد بالسياسة وقضايا الناس، أنا من النوع إلي من الشغل للبيت ومن البيت للشغل، بس ساعات أقول يمكن أمتلك قدرات ما بتطلع إلا تحت قبة البرلمان، والله انت ويش رايك؟

صح كلامك له، انت ما تدري قبة البرلمان وكرسي البرلمان وسيارة البرلمان ومعاش البرلمان ويش يسوون في الواحد، صدقني بعدين كلشي بيصير أوكي. انت اتخيل، بس اتخيل يعني يسمونك النائب (ما بقول اسمك عشان لا يعرفونك)، تخيل بس، ما تحس روحك تستانس، شوف ترى أهم شي الوناسة، بعدين كلشي تقدر عليه.

- يعني اتشوف جدي انت.

إي صدقني. انزين انت ويش بضرك، رشح روحك وشوف، إذا فزت بتستانس، وإذا ما فزت روح ليك أسبوع العمرة غير جو وارجع الشغل مثل ما كنت.

- والله خوش فكرة خاصة أنا من زمان ما رحت العمرة، يعني أسوأ شي بروح العمرة. انزين، لكن أنا ما عندي خبرة في سالفة الانتخابات، ولا أعرف شلون أقنع الناس عشان يصوتون ليي.

أنا عندي ليك فكرة عجيبة بتخليك اتصير مشهور بسرعة. شوف ليك شخصية محترمة، أو جمعية محترمة، أو أي شي محترم وانتقده انتقاد شديد لكن بأسلوب فيه كلمات مالت مثقفين، يعني اقرا ليك كتاب واحد أو موضوع واحد في الإنترنيت وخذ ليك كم كلمة، يعني مثل حوار الحضارات، العولمة، وغيرها.

- بس شلون أنتقد شخصية أو جمعية محترمة، مو لازم أنتقد جهات غير محترمة؟ لأن المحترمة المفروض ما فيها سلبيات واجد يعني.

شوف حبيبي، إذا انتقدت ناس عندهم سلبيات واجد ما بتصير متميز ولا مشهور، لكن إذا انتقدت ناس محترمين بتصير متميز. وبتراوي الناس إنك إنسان حر وقادر على انتقاد أي إنسان، وإنك صاحب موقف وما تأخذك العواطف.

- إي بس جدي ناس واجد بيصيرون ضدي.

بس ناس واجد بيصيرون وياك بعد، لأن الشخصيات والجمعيات المحترمة مكروهة من ناس واجد، ثاني شي انت بتصير مشهور عدل، وإذا سألوك ويش تعليقك على كلام الناس ضدك، قول بأنك بتسوي نفس الرسول وبتقابل الإساءة بالإحسان، وقول إن أصحاب الرأي دائماً يتعاملون وياهم جدي.

- صراحة كلامك عدل، لكن بسألك انت ليش متحمس ليي عشان أرشح روحي يعني؟ مع إني أحسك ما اطيقني ساعات وكله تبغي تتشابق ويايي؟

- أنا بيني وبينك صار ليي خمس سنوات مقدم حق وحدة سكنية وللحين ما طلعت ليي، فقلت يعني لو عندي واسطة ما صار حالي جدي