مرحبا بكم في حلقة جديدة من برنامجكم الأسبوعي الذي يُبث كل اثنين على الوسط اون لاين "مجهر تربوي".
حلقتنا لهذا اليوم هي حوار جريء مع الطالبة التي تعرضت لضرب واعتداء من قبل مجموعة من البويات في إحدى المدارس الحكومية الأسبوع الماضي.
معنا اليوم الطالبة عبير ووالدتها وأختها... نرحب بكم في برنامجكم، ونبدأ حوارنا:
• جميع الصحف طالعتنا قبل أسبوع بالصور عما حدث لكِ في المدرسة في مشاجرة مع بويات أو شابات، تخبرينا عن تفاصيل الموضوع شلون صار، ومتى؟
- صار في الفسحة أنه يوا تسببوا على ربعنا، عقب ما تسببوا قاموا يلاحقونهم.
• انزين ربعج هذوله بويات؟
- لا لا، بنات.
• وهم يقولون إن هم بويات!
- كلهم بنات، حتى حججاتهم تبيّن بنات. وبس، إن عقبها وحدة هجمت على رفيجتي قامت تطقها وتمجعها وما أدري حق شنو، أنا ما كنت أدري شسالفة، أنا كنت قاعدة على صوب وحاطة شنطتي منبطحة وراقدة. إلا وعيت على صراخهم، فجفتهم أنه قاعدة تطقها وتماجعها، قمت من رقادي وشلت رفيجتي، قلت لها اشفيج، إلا تسوي هاي طقتني وما أدري اشفيها، فرحت لها خذت رفيجتي من يدها، رحت لها قلت حق ذيج أبي أكلم ذيج البنية، قالت رفيجتها في ويهي، إلا تسوي لي اشتبين انتي، قلت لها ما ابي شي أبي أكلم رفيجتج ذيج طاقة رفيجتي، إلا تسوي لي انتي ما لج شغل، ما قالت جذيه وهجموا علي.
• اللي ضربوا بويات أو بعد بنات عاديات؟
- في منهم بويات وفي منهم بنات. قامت هاي البنية سيده قامت هجعتني وقامت ترفس، هنيه قاموا تجمعوا كل البنات، ولما اتجمعوا كل البنات جات وحدة بويه قامت تطق، هجعتني وقامت ترفس بعد نفس الشي، عقب هاي ما قدرت طحت في الأرض.
• هو واضح أنه ويهج كان وايد تأثر، بشنو كانوا يضربونج؟
- بيدهم.
• انزين وين الإدارة في هالوقت، المدرسات؟
- في مكاتبهم.
• انزين وشلون انتهى الموضوع، يعني شلون فكوا الهوشة؟
- أنا كنت طايحة على الأرض، رفيجتي كانت شنطتي على ظهري، كانت تسحبني من الشنطة لينما طلعت من تحتهم.
• انزين، البعض يقول إنج بويه، وربعج بويات، شلون تردين على هالكلام؟
- يعني لو آنا بويه جان ما ييت تكلمت على البويات. وثاني شكلي ما يأهلني أني أكون بويه.
• انزين هم شلون أشكالهم؟
- شعرهم قصير، وايد وايد قصير، مشيتهم مشية ريال، لبسهم مريول قصير وما أدري شسالفة، يدفشون صوتهم وهم يتكلمون، حركاتهم حركات صبيان، يمشون وهم ميودين بنات وما أدري شسالفة.
• وايد في مثلهم في المدرسة، والإدارة ما تمنع مثلا مثل هالتصرفات؟
- لا، ما أعتقد انها تقدر تمنع، يقولون إنها حرية أو خصوصية البنية. ما في حرية أو خصوصية البنية، قانون يمشي على الكل.
• شنو التصرفات الغريبة اللي يسوونها؟
- مثلا إذا تشوفينهم يمشون ويودون خصر بنية وما أدري شسالفة، انه شي غريب، ليش جذيه! والله إذا يدفشون الصوت ويقولون كلام ما يليق إنه الأسلوب أسلوب بنية، كلام قوي يقولون. فـ؟؟؟؟؟ أنه ما يصلح.
• وهم قبل تهاوشوا وسووا جذيه بعد، وايد سووا مشاكل، والإدارة شلون تتعامل وياهم؟
- الإدارة يمكن أول تصرف وياهم عليّ أنا، كان سالفة التعهد، أما آنا أول ما دشيت المدرسة يمكن أول أسبوع ما أدري من أول أسبوعين، وحدة منهم اللي طقوني تهاوشت بعد نفس الهوشة طق ومطاقق في الساحة، ما جوف صار شي في الموضوع يعني.
• وألحين موضوعج لوين تحوّل... وزارة التربية تقول إنه هوشة بسيطة وعادية بين كل البنات في مدارس، وحنا تهاوشنا قبل وغيرنا واللي بعدنا بعد بيتهاوشون بس عادي، وأنه وسائل الإعلام ضخمتها، وفعلا جذيه... يعني حنا شفنا الصور، شفنا شلون انتين متعورة، وناس يقولون إنه فعلا هاي المدرسة فيها بويات وايد يعني، فانتين اشرايج يعني أنه الوزارة فعلا صح أنها هوشة عادية؟
- لا، يعني هي مو سالفة هوشة عادية. لو بيحطون في بالهم هوشة عادية جان آنا ألحين انطقيت وتأثرت، في غيري بيوون بينطقون بيموتون، من بيأخذ حقهم بعدين؟ ما تعتبر مشكلة عادية، احنا رايحين ندرس، رايحين نتعلم مو رايحين نتهاوش.
• انزين والمدرسة رفعت الموضوع للوزارة، صحيح... وشنو قالوا لج، عطوهم تعهد، عطوكم كلكم تعهد... شلون صار الموضوع؟
- آنا عطوني المستشفى إجازة، بس أنه كانوا يقولون لي، ما كنت يعني أروح المدرسة عشان أشوف شسالفة، بس قالوا لي انه يات وحدة منهم ويا ولي أمرها وعطوهم تعهد، الثنتين منهم. أما الباقي اللي كانوا في السالفة طلعوهم من السالفة، عطوهم بس تعهد، مع أن المديرة قالت بلسانها إنه آنا أقدر أفصلهم أقل شي 5 أيام، هي لا فصلتهم ولا شي، كتبتهم تعهد.
• الوالدة؛ شنو تحبين تقولين؟
- آنا أحب أقول: أناشد الملك، أناشد رئيس الوزراء، وأناشد الشيخ سلمان، وأناشد الشيخ ناصر، هاي البنية اللي انطقت يتيمة وآنا أبغي آخذ حقها، وهي انطقت في مدرسة، وهي ما كانت في المدرسة، هي ياية من مدرسة تربيتهم صح، والمدرسة ما شاء الله عليها من مديرة لمشرفة أشكر فيهم وايد وايد (مدرسة الإيمان)، أنا قضيت على بنتي لما يبتها هالمدرسة، وبنتي من يات هالمدرسة هنيه رافضة انها تيي هالمدرسة.
• ليش نقلتونها من هالمدرسة؟
- نقلتها على سبب ظروف غير، ما أبغي أذكرها، مب على أساس أنه مادة أو شيء. دشيت آنا المدرسة، أنا جفت المدارس وجفت المدرسة بنفسها، مدارس البحرين كلهم أصلا محد يدري شنو المدرسة، حتى الوزير ما يعرف شنو داخل المدرسة. حتى آنا بقولج يوم الهوشة جفت بنتي طايحة هناك ودشيت، آنا صج دشيت، دشيت ما أعرف شلون أتصرف، حتى إلا عند الباب ما قدروا يودوني، قلت لهم تقدرون تودوني، آنا أبي أجوف بنتي. تصوري أن المديرة طلعت على صراخي، المديرة ما كانت تدري بالهوشة، طلعت على صراخي وعلى الهذه، يوم رحت الإدارة جفت أنه البنية طايحة، المشرفة تعطيها ماي، يعني هي اللي راحت الإدارة محد شالها. رحت لها قاعدة إلا أقول لها اشصاير في بنتي، إلا تسوي لي شجار بسيط، قلت لها: لا هاللون؟ قمت أنا أصيح بعد ما قدرت أتملك أعصابي.
• التقرير الطبي شنو قالوا؟
- عندي التقرير الطبي ألحين باعطيج إياه. انزين، فقلت لها شلون هاللون، وينج انتي، وين المديرة، وينكم انتوا عن البنت انطقت بغت تموت البنت وانتون قاعدين. آنا صراحة قلت لها، مثل ما انطقت بنتي في المدرسة، آنا فعلا قلت هالكلام، ايود البنات هنيه قدام عينج انتي يا مديرة وباطقهم في مدرستج، لأنج انتي ما خذتيني حق بنتي. جدام المديرة قلت لها، قلت لها مثل ما طقوا بنتي يبيهم لي هنيه باطقهم آنا، مثل ما شوّهوا بنتي باشوههم، قلت لها هالكلام.
• ألحين المفروض ترجع المدرسة متى، ولا رجعت؟
- هي المفروض يوم الأحد ترجع المدرسة، لكن آنا نفسيتي جدا تعبان صراحة باقولج, من هاللي في المدرسة نفسيتي تعبانة وخوفي على بنتي، خوفي انه يعني يصير أكبر من جذيه، لأنه الإدارة ما في إدارة.
• انتي خايفة منهم الحين، خايفة ترجعين (الطالبة)؟
- مو على خايفة، بس أني خايفة على أمي إذا صادني شي هي اللي بتتأثر أكثر.
(الأم): تصوري يوم المديرة يات سمعت الصراخ وياتني داخل، اللي تقول صلوا على النبي، صلوا على النبي، بناخذ حقج إن شاء الله، اكو الوزارة عندنا اتصال ما بين الوزارة، لكن هي من قبل المديرة قبل ما اييب بنتي المدرسة تصوري والله العظيم لو كانت المديرة تنكر هالشي رب العالمين يشهد عليها، أنه قالت لي روحي يبي عبير وكانت عبير بعدها راقدة كانت غايبة قالت روحي يبي عبير، قبل ما أنا أحوّل الفايل وتروح بنتي المدرسة، كلهم قالوا لي لا تيبين بنتج هاي المدرسة. قالت لي لأن المدرسة فيها شي وشوي، المديرة بنفسها، كلهم المشرفات، هاي بنتج مب مكانها ذي المدرسة. أنا ما كنت أتوقع، قلت لها خلها تجرب هالسنة في الحكومة باجوف يعني، فبعدين يوم انطقت، تصوري اشقالت لي، إذا هي تنكر هالشي رب العالمين شاهد عليها، تقول لي: أنا ما قلت لج من قبل؛ لا تيبيين بنتج في ذي المدرسة؟ هذه كلمتها لي المديرة.
حتى كانت تقول لي في بنات تضاربوا بسجاجين، بنات يكتبون في الحمامات آروح أمسح الحمامات تقول من الأشياء اللي أجوفها، ما توقعين شتقولي، جكاير على كل شي قلت لها.
وين الوزير؟ الوزير ما يدش المدرسة، عالأقل الوزير ما يقول مثلا. هم يقولون ألحين عندنا ناس يايين من الوزارة، طبعا ما بيسوون شي، بيسوون شي بترتيب صح والله لا. لو الوزير بس يروح على غفلة يجوف المدارس فجأة يعرف شنو داخل في المدرسة. يعرف الإدارة، وين الإدارة. إدارة صراحة ما في، أنا يبت بنتي هنيه وتحسفت قد شعر راسي، وندمت وايد ندمت على بنتي.
• هو النائب محمد خالد تكلم وايد عن موضوع البويات وعن المسترجلات، وقال إنه فيه مدارس وسمّاها للوزارة، بس الوزارة مصرّة إنه هو ما في...
- لا، في، لأنه هو ما يجوف، احنا اللي نروح يستدعونا حق عيالنا نجوف أشكال وألوان، وثاني شي المدرسة اللي يات منها صج أنها مدرسة الإيمان، لكن آنا أقول لج تربية الإيمان أحسن من أي مدرسة. آنا أقول لج عن الإيمان، تربت بنتي في مدرسة الإيمان من الصف الأول للحين هي في الثانوية. شلتها ويبتها هني رايحة ثانوي يبتها هني. يعني حتى تصوري لو كان عندهم احتفال في المدرسة (مدرسة الإيمان)، احتفال في المدرسة شرطة نسائية داخل، عشان ليش؟ خوفهم أنه ييون مدارس مال الحكومة من بره البويات ما بويات، خايفين يأثرون على البنات اللي داخل.
انزين، ودائما رقابة، في الفرصة رقابة، يقعدون عالأكل رقابة، يجوفن مشاكل البنية، يعني مراقبة شديدة. زين، وأنا أشكرهم صراحة يعني ربوها التربية الصح، وآنا الحمد لله ربيتها، ولا هي بنتي بويه، البويات اهم، اهم اللي ما تربوا، اهم اللي مب عارفين شنو شكل من وين يايين. أنا يعني صراحة، واهم يدعون أني طقيتهم، آنا ما طقيتهم ولا جستهم ولا حركتهم، لو يابتهم المديرة باطقهم، بس ما يابتهم.
• ألحين شنو اللي يرضيكم، شنو الإجراء اللي يرضيكم؟
- آنا وصلت ألحين لمجلس الشورى بعد، خلهم يعرفون. البارحة آنا وديت أوراق بنتي، والجرايد وديتهم يتحجون المجلس عنها.
• تقصدين النواب...
- النواب. آنا كنت أتصل حق محمد خالد ما كان يرد علي، لكن وديت آنا أوراقها عند السعيدي وبيتكلم عنها. اهو قال لي السعيدي إنه فعلا كنا متكلمين عن هالموضوع، السعيدي بنفسه قال لي تكلم عن هالموضوع وقايل لهم، إنه يعني البنات لازم تكون يعني مثلاً. مدرسة بنات تصوري أنه حاطين لهم شرطة رجال داخل، أمن داخل (سيكورتيه)! المفروض أنه يحطون لهم كابينه بره، وبدل المكتب اللي قاعدين فيه يحطون شرطة نسائية.
• كل المدارس جذيه، السكيورتي رجال...
- بس لا، هاي أكبر غلط. المفروض أنه يحطون مكتب، ألحين من هالبويات خلي البويات اللي قاعدة تدش المدارس، لو كان الشرطة النسائية داخل تفتيش، تصوري لو أي بنية يجوفون سلوكها ويجوفونها مب عدلة يطلعونها من المدرسة، ما يخلونها تدش المدرسة أصلاً. صح والله لا. الحين البنات هناك في مدرستها، كل البنات يايبين تلفونات بالخش، وين الإدارة.
• ما في تشديد، ما في رقابة؟
- آنا أقولج، بنتي عندها تلفون واتصلوا من تلفونها بنتي، آنا ما أقول لج إنه ما عندها تلفون، لأن بنتي من يات من "الإيمان" ما كانت تسوي هالسلوك، لكن ما يات مدرستهم، جافت البنات خراطة وجافت اللي ماشي وقامت هي حطت تلفون حالها حال الناس. المديرة تطبق، الوزارة تطبق على الكل ما تطبق على وحدة، تيود الكل من أول الباب شرطة نسائية داخل في المدرسة تفتيش يجوفون البنت الصح والله الغلط، إلا تمشي صح وإلا بويه وإلا ما أدري شنو يطلعونها، عشان ما تأثر على اللي داخل. ألحين في هالمدرسة هذه كل يوم أجوف بنتي تيي تشتكي، بنات يسوون لي جذيه، بنات الله يعزج يتكلمون كلام وسخ، بنتي ما عندها ذي الأسلوب، هي تعجب أصلاً من ذي الأشياء. تعجبت، تقول يمه لو تجوفين، وشكثر غابت عن المدرسة يوم راحت، كله ما أدري نفسيتها تعبانة، تجوف أشياء غير طبيعية.
• تحبين عبير تقولين شي؟
- لا، شكراً.
(الأم): وأمس ناس تحجوا وقالوا إنه آنا مب والدتها، في الراديو قالوا إنه آنا مب والدتها. انتي تصوري لو آنا مب والدتها باكون أنا هاللون؟!
• بغض النظر، ذي أمور شخصية ما لها علاقة بذي الموضوع...
- ما لها علاقة بالموضوع، بس آنا رديت وبارد عليهم، لو قالوا يبون شهادة ميلاد، يبون أي شي باطلع لهم عشان أثبت لهم أنه آنا أمها، على من قال هالكلام ذي.
• أنا سمعته البرنامج، هم قالوا إنه في إضافة للبويات فيه منحرفات أو نقول شاذات، يعني هو فيه فعلاً جذيه في المدرسة؟
- كل شي فيه في المدرسة، احنا اللي نروح المدرسة، وبنتي قاعدة تجوف المدرسة.
• اوكي، تحبون تضيفون شي في ختام برنامجنا؟
- مشكورة وما قصرتي وعساج عالقوة، وآنا بس أناشد صراحة الوزير أنه يلتفت حق المدارس، لأنه هو ما يعرف داخل شنو في المدارس، ولا يقول أنه ما في أو يخفي عن المدارس داخل، فيه أعظم وأعظم في المدارس الحكومية، فرجاء يروح يتفضل ويجوف شنو في المدرسة، مب يقول مثلاً آنا اليوم بايي المدرسة، لا، يطرش ناس تجوف سلوك البنات في المدرسة، ويجوف شنو يسوون.
• مع ختام حوارنا، نصل لخلاصة مفادها، بأن مدارس مملكة البحرين، تخفي بين جدرانها الكثير، وأن التطرق لما يدور فيها عبر وسائل الإعلام، إنما يأتي بهدف النقد البناء، وعلى الوزارة تلمس واقع تلك المدارس عن كثب، وعدم الإصرار على غض الطرف عن كل ما يدور فيها... كانت معكم زينب التاجر من برنامج "مجهر تربوي".
