اعزائنا زوار ومستمعي الوسط أونلاين أهلاً وسهلاً بكم من جديد ببرنامجكم الاسبوعي "الناصية" يقال بأن أبن الوز عوام ويقال أيضاً ذاك الشبل من هذا الأسد، ضيفنا لهذا الاسبوع أجاد رسم الريشة كما هو والده فأهلاً وسهلاً بكم من جديد مع الموهبة البحرينية عبدالله الحلال، أسمك وعمرك وفي أي مدرسة؟
أسمي عبدالله في مدرسة البدر عمري 11 سنة.
- شنهو موهبتك بالضبط؟
الرسم
- من متى وأنت ترسم؟
قبل ما أدش الروضة
- ترسم الأشياء وهي أمامك أو تتخيلها مثلاً؟
بعضها أتخيلها وبعضها قدامي أشوفها وارسمها
- أبوك طبعاً فنان هل علمك الرسم أم لا أتعلمت بروحك؟
علمني وأنا قمت أرسم بعد شفته هو يرسم قمت رسمت
- أنزين دخلت دورات رسم رحت مثلاً مراكز؟
نعم
- وين؟
جمعية البحرين للفنون التشكيلية
- دخلت مسابقات وحصلت على مراكز؟
نعم دخلت المركز الأول
- في أي مسابقة؟
فن الطفل
- كيف تريد تستفيد من هذه الموهبة، يعني ويش أمنيتك؟
بس ؟؟؟ فنان كبير
- أنزين وأفضل رسومات إليك أيهي، ألي رسمتهم من قبل؟
ألي توني أرسمهم أخر شيئ أحسن شيئ صاروا
- وأنزين كيف أنت في الدراسة زين مو زين؟
زين أجيب زين
- ألحين خلنا أنروح ليك حجي عبدالعزيز، طبعاً أنت فنان عبدالعزيز من زمان وأشتغلت في عدة جرائد محلية رسام مشهور ومعروف قبل، وين أنت ألحين؟
والله تقريباً شبه متوقف أو أمارس بعض الأشياء البسيطة، بس ما أشارك في معارض
- أنزين خلنا أنجيب عن عبدالله شويا، شلون أكتشفت موهبته هل بالصدفة مثلاً أو هي لا بالفطرة الفن عنده؟
والله عبدالله الصراحة عنده موهبة واستعداد أنه يصير فنان ويصير إليه مكانة لأن عبدالله عنده موهبة وعنده أحساس في العمل وحتى أيسوي العمل أغلبه ما شوفه ألا يراوينها يعني مو قدامي ما أجي ألي يقول ليي هاكو سويت عمل وأشوفه بمستوى أكبر من سنه وكان يرسم قبل ما يروح الروضة شاف بعض الرسومات وأتأثر بها وبعدين لما قام يطلع برة المدرسة شجعوه بعض المعلمات ألي هي معلمة مديحة الرحمة ما قصرت وأياه ؟؟؟؟؟؟
- وهل في بالك أن بتطور هذه الموهبة عنده أو فيه خطة في بالك ليه؟
لا والله عليه هو كان قبل حتى في المواد الدراسية متفوق بس قام ألحين أنشغل أبها المشكلة طرأت عليه ألحين هواية جديدة ألي هي أعمال السحر يسوي أشياء أعمال سحرية وهذي أخذت من وقته وربما أخذت حتى من مجال الرسم وكان يسوي مجسمات ويرسم ويخط ويسوي مجسمات يعني أليه عدة اتجاهات في العمل الفني
- هل أشوف روحك فيه وأنت صغير؟
أيه طبعاً بس أنا كنت ما فيه أحد يشجعني من الأسرة واحد يتفهمني طريقة الفن وينتقد أو يشجع وإلا يلمس الجوانب الإيجابية والسلبية فيها بينما أنا الحين لا بالنسبة ليه أفيده في هذه الناحية أقدر أقول هذا خطأ هذا صح وأوفر عليه المحاولات الصح والخطأ ألي هي ربما تأخذ منه وقت طويل.
- طبعاً هو دخل في الرسم الكريكتوري أو لا في الرسم العادي؟
رسم في حتى عندنا نماذج من هني رسم رسم كاريكتوري بس عبدالله ما أعرف أشلون ما يسمع الكلام هو إذا يبغي يرسم بيرسم أقول ليه مثلاً أدرب فيه كتب أتفيده يطلع عليه ما يأخذ بها يرسم أبروحه وأنا ما أدفعه لازم يصير رسام هو يشوف نفسه في أي مجال كيف يعني أنا ما أدفعه لازم يصير نسخة مني والله يمر بالظروف الي مريت بها أنا طبعاً ظروف مختلفة تماماً الظروف الي أوجدتني أو الظروف ألي شكلتني غير الظروف ألي شكله هو ألحين، أحنا الحين فيه مغريات ومشارب كثيرة جداً من التلفزيون من الأنترنت أحنا ما كانت كان هاي جاي عن طريق واحد قناة وحدة أحنا نمشي فيها.
- طبعاً انت دمجت الرسم الكاريكتوري بالشعر؟
محاولات للكتابة الشعبية
- تقدر أتقول لينا بعض ألي كتبته؟
مثلاً الدعايات مثل عندنا الدكاكين ألي حولنا، مثل غازي فردان جارنا، لو تدري جان تتنكز عند الفردان أحسن كز تلقى سلندر مشحون من شحنته يتفزز وأحسن منهم في الخدمة ما بتحصل لو تعجز، بالنسبة للتبريز مطعم تبريز عباس عاشور، أصبر وعطني دقيقة بس أفكر لا زكي حير وفيه أشوية تعجيز مطعم ايجيب اللحم من الأهالي لا هو استرالي ولا بايت في الفريزر بس بس عرفته ما فيه غيره ألي قصدته يا جعفر أسمه تبريز، يعني من هذا القبيل هذا.
- أنزين وأشلون تدمج الكتابة الشعبية بالرسم الكاريكتوري؟
تقريباً نفس العملية وأنما هذا يأخذ أتجاه الكتابة وهذا يأخذ أتجاه الخط الرسم.
- وهل تتوقع أن عبدالله يجيد هذا الشيئ بعد؟
ربما وربما غيره مو أحسن منه يعني أن بصراحة أدرس في عبدالله موهبة قوية مو علشان أنه ولدي لا فعلاً وكل من شاهد أعماله سواء في المدرسة سواء في جمعية البحرين ألي راح دورة فيها المعلمات ألي عنده ألي شاف أعماله ألي شارك في المسابقات عبدالله عنده مستوى قوي وادراك بحساس بالعمل الفني.
- ويش أطالب الجهات المعنية بالأهتمام مثلاً بالكوادر أو الناشئة؟
طبعاً وفيه أشياء متاحة مثلاً مركز رعاية الموهبين ومركز سلمان الثقافي وفيه جهات كثيرة جداً تتبنى المواهب وهذا يعتمد على قوة الموهبة على يعني أصالة الموهبة عند الشخص الشخص إذا صار عنده موهبة حتى ما أقول ضروري الحث والتشجيع والدعم هذا يشجع يحفز ولكن أهم شيئ أيكون أن موجودة عنده الموهبة إذا وجدت الموهبة يعني هو بروحه بيقعد بينتج إذا ما وجدت لو أنوفر المغريات كلها هذي ما راح تخلق واحد فنان أهم شيئ وجود الموهبة.
- كلمة أخيرة تقولها
نتمنى صراحة من عبدالله يكون أكثر أهتمام في جانب الرسم عشان يطور من نفسه هو قاعد يهمل ما قاعد يشتغل يضيع وقته أيبعثره مني مني متابعة التلفزيون والأعمال السحرية والأشياء الكهربائية يشتغل فيها بعد بس ما يعطي الرسم أهتمام والخط أهتمام، لما كنا في سنه ما خليت أجدار في المنطقة ألا رسمت فوقه ما خليت شنطة ما رحت بيوت أرسم ليهم ....
- أن أذكر سالفة سمعته أن أنت رحت خربشت على بيت وزعلوا عليك؟
أيه طبعاً أذكر حسينية بيت الطويل هني أول ما مسحوها بس أن شفت أجدار كبير قمت أرسم طبعاً ما رضوا وأنا ما كنت أدرك أن شفت مكان فيه فضاء قمت أرسم فيه وما خليت أهني فوق بيتنا فوق بيت الجيران داخل البيوت مثل ما قلت ليك أروح أدور عليهم ألي عنده موضوع رسم أرسم ليه مال رمضان مال الحج وكنت أهني في الديه بعد عند أهلي بعد أرسم ليهم، فكنا نرسم بالفحم بالطباشير المتبقية عندنا ألي نحصل عليها بالقار بقاية العلب الصبغ الفارغة المهم كنا نشتغل بالأشياء المتوفرة فوق السحاحير فوق الكوارتين المهم فيه تدفق يعني ألحين الواحد ما عنده لو يجيبون أحسن أوراق أحسن ألوان أحسن فراشة إذا ما عنده ما ممكن لكن إذا عنده لو بأيده فوق التراب بيرسم.
- وهل تعتقد أن هذا الشيئ غريب على الموهبة تطلع بحريني عمره 11 سنة؟
لا كان قبل ما يروح الروضة يرسم، لا مو غريب الصراحة البلد تزخر بالمواهب في القرى روح فتش في جميع في الشعر في الرسم في الخط الصراحة بلد ولادة شيئ غريب يعني البحرين صراحة في كل المناطق في كل القرى لو تروح تبحث بتلاقي مواهب بس تريد من يوجهها من يستفيد من الطاقات ألي قاعدة تدفق واحد يوجهها يخليها في الأماكن المناسبة.
- يعني نقدر أنقول أن المطلوب توجيه الكوادر الناشئة ورعاية...
رعاية واهتمام وتوفير الأدوات التي تشجعهم على أنهم يستفيدون منها ويتخطون ويوصلون إلى المستوى ألي يطمحون إليه، طبعاً هي تبقى حجر عثرة عدم وجود الأدوات عدم وجود المشجع الفاهم الواعي طبعاً الناس يمكن يحثونك يقولون لك روح مني روح مني ولكن هم ما يعرفون أن يمكن هذا الطريق يؤدي إلى مكان مسدود، لكن الواحد ألي يعرف الخارطة ألي يقول لك روح مني متى يوجهك فالناقد يعني دائماً بصراحة أحنا غياب الناقد المتخصص أو الفاهم أو ألي عنده ثقافة في هذا الجانب هذا وجوده أليه أهمية كبيرة جداً غيابه يخلي الطاقات تتبعثر مني مني ربما الإنسان أيضيع الموهبة ألي عنده وهو ما يدري يروح في أختصاصات ما تصلح ليه ولكن الناقد ألي يقدر أيشوف ليه مثل التشخيص في المرض والجانب الصحي.
- مشكور على كلاً يا حجي عبدالعزيز.
شاكرين لك هذا الاهتمام وإتاحة الفرصة لعبدالله ونشكركم ونشكر جريدة الوسط على اهتمامها ورعايتها.
