- حجي حبيب سولف لينا من متى متعلم البني؟
والله تعلمت من 77
- وقف شوية بس؟
كنت في البداية وأي أخويي المرحوم فكنت....
- سنة كم؟
77، فتعلمت وياه تميت عامل وبعدين أشوي أشوي تعرفت على الشغلة وأخذت المهنة، وواصلت أبها إلى حد الآن.
- يعني اشتغلت أول شيء في البداية عامل؟
نعم، ومن بعد حوالي 3 سنوات 4 سنوات تطور الشغل عندي وصرت بناي.
- وحالياً؟
حالياً نفس الشيء
- يعني تأخذ البيت .........
على حسب الشيء راعي البيت يبي الشغل باليومية يبيه بالمقاولة نأخذه من عنده.
- وهل فيه فرق كان بين الأول وبين الحين في البنيان؟
والله طبعاً فيه فرق من الأول، الحين فيه فرق واجد
- فيه فرق من أي ناحية؟
من ناحية اليد العاملة، الأول تتوفر الحين ما تتوفر لأن كل أجانب أيجون فما تحصل إلا قليل ألي بيتشغل يعني ألي محتاج بيشتغل ألي مو محتاج ما يشتغل مستحيل يعني.
- ليش لأن متعبة مثلاً؟
أيه متعبة طبعاً متعبة هذي يبي ليها صبر إذا ما عندك صبر ما تقدر تواصل فيها، هذا العامل ألي وياي هذا عامل فني شغل حديد نجارة الطابوق يعني أي شغلة.
- الأول تشتغل طبعاً باليومية يعطونك؟
أيه، أول ما أبتدين اشتغلت يعطوني دينار ونص هذا سنة 77 وبعدين أشوي عرفت الشغلة وعطوني زيادة صرت 3 دينار إلى حد الحين 12 دينار.
- والحين تأخذ ساعات البيت من الساس ماله....
أيه لازم نبنيه من الأساس....
- تعرف يعني للخرايط؟
الخرايط طبعاً نعرف ليها من أسنين هذا العمر كله لازم ...
الشاخورة هاكوا سوينا الحصاير كل شيء ؟؟؟؟ من الحديد نسويه أبروحنا
- أنزين من المحرق أنت من متى؟
أنا من زمان والله من 77 كان أشتغل من نجار كنت أشتغل وبعدين ضميت في البلدية وعلى طول وصالتنا الشغلة هذي على طول.
- أنزين وهل هذه الشغلة صعبة على البحرينيين؟
لو بتلاحظ أيه صعبة بس أحنا تعودنا على هذه الشغلة هذي ويش أسوي بعد وين أتروح.
- يعني ما فيه مدخول صعبة لو متعبة؟
فيه مدخول، ما ميش شغلة ؟؟؟؟
- بس يبغون الراحة؟
الناس تبغي الراحة تبغي الأيسي الحين تقدر توقف في الشمس ساعة ما تقدر الحين منهوا يقدر يشيل ليك كيس تحت شباب الحين عمره 16 أو 20 سنة يقدر 50 كيس سميت فيه خمسين كيلوا ما يقدر أيشيل، لو بيقدر يعني بيتعود مرة مرتين بس ما بيصبر حق هذه الشغلة كاملة يتراوى ليي.
نعطل على تقاعد أحنا طالعين تقاعد من البلدية.
- بس ما هديتون الشغل؟
ما هدينا الشغلة بالعكس جودنا أحنا كل ما تعب جسمنا ارتحنا جان أرقد في الليل، ما شوف فيه أشكال يعني هاذوا نشتغل عادي بس مو كل واحد يتوطى يشتغل بحريني صراحتاً.
- هذا أنتون أشتغلتون؟
هذوا أحنا نشتغل يعني....
- قصدك الشباب الحين؟
أيه ما يقدر يشتغل
- ما جاك مثلاً واحد شباب قال ليك أن أنا أبغي أشتغل أتعلم هذه المهنة هذي؟
لا ما قط جاء واحد
- ما يجون؟
لا، اشتغلوا ويانا يعني مو ما اشتغلوا، يشتغل ليه يومين ثلاث أيام يقول ليك كل محل أيألمه يقول ليك يوم ثاني بس ما بجي والله يوميته نعطيه 6 دينار شغلنا بعد مو إلى الظهر من الساعة 5 إلى الساعة 11 ونصف 12 إلا ربع بس نبند بس أحنا نعطي الشغل فوق حقه يعني قعده ما فيه على طول.
- تذكر كم بيت بنيت؟
والله بيوت أيه يمكن تقريباً القرى كلها طبيت من الرفاع وأنا جاي في الرفاع في البسيتين الشاخورة مدينة حمد هو طبعاً ؟؟؟؟ بيوت واجد وهذا أحنا جينا أهني في الدير بيت علي حسن والمصلى وبني جمرة كل محل أن بالنسبة لي على قولت ؟؟؟؟ أحنا مرغوبين في الشغلة إذا اشتغلنا في البيت راعي البيت ينسى البيت أن أحد يشتغل فيه.
- السبب؟
السبب لأن أول شيء راعي البيت ما يشيل هم أجيب السميت أنا الخرسانة البكريساس أي شيئ كل أقوم بالدور أنا عنه هو عليه بس أيمولني بالمبلغ.
- فوق هذا تشتغلون شغل مضبوط؟
المضبوط أيه ؟؟؟ لكن أهني شغلة وأهني شغلة وأهناك شغلة أحنا عندنا ملايين الشغلات بس أحنا حدنا شغلتين بس حق لا أكذب على راعي البيت تعطي الصدق وياه حق أتصير مطلوب عنده.
- وكم تأخذون ليكم في بناء البيت؟
والله أهني يعتمد البيوت يعتمد فيه تأخذ ليه فيه شهر، البيت كامل لا.
- البيت كامل أن أقصد من الدنفيشين؟
ستة شهور
- وأنت تتكفل بكل شيء؟
كلشي أحنا بناي واحد والبقية فنيين والمال يعني هذي شغلتهم هذي ما نأخذ يعني أجانب ما نجيب لو بنجيب أجنبي نعطيه بحريني.
- ما توقفون في الإجازات؟
لا إلا إذا كلش، الجمعة ما ميش بند على طول بس محرم
- مشكورين
