ولو بيدي إذا تبعد أقول بكل وجع لك «سَم»
ولو بيدي نَزَعت القلب لين الروح تتشافى
أيا «تم» اللي تذبحني صعب للبُعد أنطق «تم»
صعب أبعد ولو أقدر تشوف القلب يتجافى
«رنين الهاتف» جروحي و «غير اسمك» نزيف ودم
مع كل رنة مو منك يـ ستر الله وألطافه
كأن الدنيا بس انته وذكرى بالحشا تلتم
كأن العالم ابدونك فَقَد أكثر من أنصافه
تعال واقتسم روحي قسم ميت وينبض قسم
أمل لكن ألم يكبر مع كل رنّة هتافه
أنا لو صحت لك ويلاه آه وحَطَمت هالجسم
أطيح بـ عين نفسي لين ضِلوعي اتجيك رجافه
إذا تبغي شرح مني إلى معنى الألم والهم
تعال وشوفني أذبح أمل تقتلني أطرافه
تعال وشوفني أرسل وكل الحلم «تتكلم»
مثل طير انذبح يرقص على أي رد لو شافه
أيا أجمل شخص عشته وحسيته بروعة حلم
عشانك كل دموع الكون بين أهدابي نزافه
إذا تتعافى من دوني أنا من دونك أتألم
وعساني ما بريت بيوم إذا من دونك أتعافى
بنت المرخي
العدد 4998 - الجمعة 13 مايو 2016م الموافق 06 شعبان 1437هـ
