طالب أهالي المحرق ومرتادو سوق المحرق بدعم المواد الغذائية ومراقبة التجار في شهر رمضان المبارك إذ ترتفع الأسعار في هذا الشهر بشكل يرهق المواطن.
ففي برنامج «الناصية»، الذي يبث اليوم على «الوسط أون لاين»، التقى الزميل محمد الجدحفصي بعض مرتادي سوق المحرق المركزي، وبينهم خليجيون، يتهيأون لاستقبال الشهر الكريم إذ تحدث معهم عن أهم ما يميز حياة الناس في شهر رمضان سابقا عن شهر رمضان اليوم والسمات المشتركة، وغير ذلك من الحيثيات المتعلقة بالشهر الكريم، فكان هذا الحوار:
* تعطينا اسمك ومن أي منطقة؟
- أحمد العرادي من عراد طبعا.
* تقدر تسولف لنا عن استقبال شهر رمضان سابقا؟
- والله كان شهر رمضان اول ما يجي على زماني انا اللي لحقت عليه، الناس تطلع في المجالس، فقد كانت المجالس كثيرة بكثرة، وتعرف الجهال أكل ما أكل غير متوافر مثل الحين الجهال يطلعون من مجلس إلى مجلس.
* مسامحة، انا سمعت الاول قبل ما يأتي شهر رمضان يشترون ذبيحة، أي راعي البيت يشتري ذبيحة ويخليها في اكياس كل يوم له كيس معين؟
- لا أنا اقول لك هذي الاشياء ما لحقت عليها، انا أكلمك عن الزمن اللي انا كنت فيه.
* عرفنا على اسمك؟
- اسمي حسن علي، والله انا عشت في طفولتي أحلى من الحين... أيام طفولتي احس شهر رمضان احلى من الحين.
* في وين عشت
- أنا عشت في قرية النبيه صالح.
* وش الفرق؟
- الفرق كثير، الأول تحس أن شهر رمضان أكثر من الحين، في السابق على رغم أكثر الشباب يتوجهون إلى المجالس الرمضانية والأدعية والقرآن، الحين لا بالعكس في الخيام تحصل الناس في الامكان التي هي بعيدة عن شهر رمضان يعني مو متقربة إلى الموسم الديني تلقى الناس مشغولة بعكس الزمان اللي عشنا فيه طفولتنا فهو طعمه أحسن.
* لحقت على المسحر أول؟
- احنا كان واحد يسمونه الجاسمي واحد ضرير وكان أيام الأول برد شديد، برد موالحين برد برد تقدر تقول اصل العظم، والأمطار تجي كثير فيطلع مسكين في ظلام ما في ليتات ما ليتات هل سوالف ما ميش، فيطلع مسكين يطبل على درام (بيب) عنده عصا غليظة ويطبل ويريد بس الناس تسمع.
* ماذا كان يقول؟
- ما أذكر ذلك الوقت، يا رمضان يا رمضان شهر الخير والبركات، بس الناس كانت تسمع لأن لا يوجد شيء ما كان عندهم يا عريش يا في حجرة، بس الناس تسمع صوت البيب، واحنا جهال كنا نطلع وياه... ساعات نطلع وياه.
* يجي عادة الساعة كم، هل الساعة وحدة يجي؟
- والله على حسب الأذان يا خوك قبل الأذان بساعة ونص وبساعتين الا ربع.
* في قطر في مسحر لحقت عليه؟
- المسحر لحقت عليه، بس كل سنة عن سنة اشياء تكون موجودة وتقل تدريجيا حتى الأكلات مثل الهريس والقيمات الثريد كانت أشياء تميز رمضان، الحين يتفطر من اي مكان من اي مطعم، اما المسحر احنا نسمع عنه في التلفزيون أو الاذاعة.
* الحين وين موجود؟
- عندنا في قرية عراد موجود إلى حد الآن، المسحر في البحرين موجود في كل مكان في المحرق موجود، وفي أي مكان يطلع في سيارة وهو ماشي، أول على ارجوله يفتر،
دائما ليالي الاوف (الإجازة) تحصل وراه الجهالو ولي عنده قوطي لو تنكة لحد الان موجود عندنا في قرية عراد، بس ليلة الاوف تحصل الجهال وايد، اما ليلة الدوام تحصل يا بروحه يا نفر واحد وياه يا نفرين بس.
* قطر عندهم توزيع الصحون نفسنا؟
- عادتنا الجار كل جار يعطي جاره، المؤسسات الخيرية تعمل افطار صائم وهي حاليّا منتشرة بكثرة في قطر واللي كان موجود قبل (سابقا) هو كل يوم تفطر عند واحد، اي في وناسة في لذة عبادة ولذة اجتماعية اللي ما شفته من سنة تشوفه في رمضان، اللي تسأل عنه تشوفه في رمضان، الحين صار يوم عادي اللي ايميزه اننا نصوم.
- أول حزت المغرب ما تحصل واحد ايجيب لك كأس ماء أو تحصل تمرة أو تحصل قيمات أو تحصل شيء، الحين لا من قال الله أكبر تحصل المساجد عامرة، كل مسجد تدخله حياك تفضل اي لو عابر سبيل ما يتعطل نفس الأول،
- أول في العصر قريب المغرب اتحصل جهال وايد كل واحد حامل صحن، كل واحد رايح بيت الحين ما في هل الاشياء ما ميش الحين، أول الجار ما يأكل حاجة إلا ويعطي جاره.
- في هذه العادة ولكن نسبتها اقل ولكن موجودة تلاحظ الاطفال عندهم اصحون مازالت هذه العادة موجودة ما تغير شيء علينا.
- في النبيه صالح موجودة، في المغرب تحصل الاطفال من بيت إلى بيت يقدمون الصحون اي مازالت موجودة ولي اختلف الاشياء التي دخلت علينا الجديدة بس.
* من قطر بعد تعرفنا على اسمك؟
- خالد محمد.
* عندكم نفسنا شراخيات في شهر رمضان؟
- قليل.
- بالنسبة لنا ازيد هل الاشياء، تزعج الفريق كله.
* انت ما سولفت لينا... انت من وين؟
- انا من الماحوز.
* وش اسمك؟
- أحمد العسبول، على الايام التي انا لحقت عليها كنا قريب المغرب عند الاذان كنا اصغار فننتظر المؤذن لين ما يؤذن تحصلنا قبل عشر ربع ساعة واقفين كلنا جهال عند المسجد اتشوف غولة بس من يقول الله أكبر المحل تحول إلى هدوء محد الكل يركض إلى بيته وكانت هذه الحركة حلوة، الحين ما نشوفها حتى في الاطفال، احنا كنا انسويها يمكن الكبار يرتاحون منها الحين غير موجودة اندثرت اشياء واجد تغيرت في شهر رمضان اللي احنا كنا قبل انشوفها...المجالس القرآن يتهيأ لي الأول أكثر من الحين.
* يعني قلت المجالس الحين؟
- المجالس يتهيأ لي قلت لأن في بعض العوائل طلعت من منطقتها، القرى فيها مازالت بس ليست المجالس الأولية؟
* سولف لنا في قطر ليلة القرقاعون شنو تسوون الاطفال ايروحون البيوت نفس هني؟
- في لبس معين لهم في قطر، فالبخنق للبنات والبشت للجهال ويدورون في البيوت نفس المنطقة نفس الفريج يدورون على البيت كلهم مع بعض. هذا الموجود من زمان وللحين موجود بس الحين الاعلام يسوي دعاية في التلفزيون.
تصور الحين مع وجود السياراة إلا أن الواحد يخاف على اعياله، الأطفال يطلعون لكن قبل (سابقا) الكل يطلع حتى الكبار يتمون واقفين في الرصيف يشوفون الجهال رايحين رادين الحين مع الخدم والدريول (السائق) رايح معاهم ومحد يدري عنهم.
* وتتذكر على ايام القرقاعون الأول؟
- احنا في الناصفة في قرى البحرين تشوف يحتفلون في الشوارع يحتفلون وايد عندنا لان يصادف عندنا المولد، مولد الحجة (ع) فحنا نحتفل وايد، الجهال صدق خفايف بس العالم وايد في الشارع وتشوف الزينة والليتات والاعلام.
* الاكلة المعروفة في قطر شنو؟
- الثريد والقيمات، ما في فرق بين البحرين وقطر.
* والأسعار مرتفعة؟
- وايد عن البحرين.
* اشلون مثلا كيلو اللحم ازيد؟
- لا اللحم ثابت لكن الخضراوات والمواد الغدائية ترتفع بشكل ما تتصور.
* اي في رمضان يرتفع السعر؟
- نعم كليو التفاح تاخده في الأيام هذه 7 ربيات عندنا في قطر بـ 14، في رمضان كلشي يرتفع بصراحة، فرصة التجار. خصوصا بداية شهر رمضان المبارك ارى الاشياء التي دائما يستخدمها الناس مثلا الخضراوات بشكل جنوني ترتفع، مثلا البوبر والكوسا والأشياء التي يحتاجها الناس تراها بشكل خيالي اسعارها ومن اروح اسبوعين تتراجع هذا بالنسبة لشهر رمضان بالنسبة إلى الخضراوات، ولا توجد رقابة محد يراقب ما ادري ليش ترتفع وبعد أسبوع ترجع.
* وعندكم في قطر المدفع بعد؟
- موجود بس في مناطق معينة، صارت شيء رمزي، المدفع موجود عندنا في التلفزيون اذا تشوف قناة قطر يطلعون حتى الجهال يجتمعون عليه لايزال موجودا الواحد يتفاجأ كل شيء غالي.
- خصوصا هذه السنة يصادف رمضان والعيد وعقبها المدارس، يعني السنة هذه راح يكون عبء كبير على المواطنين البحرينيين وعلى المقيمين كامل.
* كلمة اخيرة كل واحد يتكلم؟
- والله اللي أتمناه وخصوصا من التجار يراعون الفقراء المساكين على أساس أن يكون في فرحة للجميع، تلاحظ في ناس ميسورين تقدر تشتري يعني تقدر توفر ليها، لكن هناك أناس لا تستطيع توفر فليراعو هذي الاشياء يعني يخففون العبء عليهم، كما نقترح لجانا علشان يساعدون العوائل، لا نقول رفاهية، قوت يومها، بس.
* عرادي، كلمة أخيرة.
والله انا اتمنى ان الحكومة تدعم المواد الغدائية وتراقب التجار.
* للناس؟
- والله نبارك لهم هل سنة وكل سنة برمضان وهم بصحة وعافية وعلى المسلمين.
- أنا أدعو الناس إلى التخفيف من الاستهلاك في شهر رمضان وليس لأنهم صيام، لان الصايم يشتهي كلشي ولكن لين فطر ما يشتهي شي، لكن علشان التجار يشوفون الاستهلاك قل، فيضطر التجار ان يخفضوا البضاعة لانهم ما يقدرون يكدسونها للسنة المقبلة.
العدد 2535 - الجمعة 14 أغسطس 2009م الموافق 22 شعبان 1430هـ
