لي قَلْ مالِكْ وُشِفْتْ اْلْعُمْرْ عاي إِبْكُمْ

مالَكْ نِصِيْبْ يـا فَقِيْرْ وِاْلْكِلْ عايِبْكُمْ

وِتْصِيْرْ مِثْلْ اِلْذِي بِاْلْدارْ عايِبْكُمْ

وِيْصِيْحْ بِكْ مِنْ تِحِبْ خَلِّيْكْ عِزّاْلِي

مِثْلْ اِلْمَرِيْضْ اِلْذِي يِصْرَخْ يا عِزّالِي

تِشْمَتْ بِكْ الناس مِنْ أَحْبابْ وُعِزالِي

وُلِي زادْ مالِكْ يُبَهْ مَحَّدْ يِعايِبْكُمْ

@@@

دِنْياكْ يا صاحِبِي تاخِذْ وُتَعْطِي قْصُـوْرْ

وَاهْلْ اِلعَيارَهْ إِغْتِنَوْا شادُوْا بِظُلْمْ قْصُوْرْ

وِاللي مِشى بِالعَدِلْ رَدَّتْ عَلِيْهْ قْصُوْرْ

يا ماشِي بِالكُبُرْ ناسِي أُصُوْلَهْ وُهَلِهْ

حَتى السَلامْ اِنْقِطَعْ لا مَرْحَبا وُمَسْهَلِهْ

وِيْنَهْ زِمانْ اِلعَدِلْ رَوَّحْ وُراحَتْ هَلِهْ

وُيانِّهْ زِمانْ اِلقَهَرْ صارْ اِلْعُمُرْ بِقْصُوْرْ

@@@

غَلْطانْ مِنْهُوْ سِمَعْ جِيْلٍ مِنْ أَهْلْ اِلْعِدا

سَبّاقْ راعِي اْلْفِتَنْ فايِزْ بِكاسْ اْلْعِدا

فاسِقْ وُحامِلْ مَرَضْ يَبْلِيْكْ بِهْ بِاْلعِدا

عْيُوْنْ حَمْرَهْ يُبَهْ لي ياوْ راوِيْهُمْ

جِلاسُهُـمْ مِثْلُهُـمْ خَمَّهْ وُراوِيْهُمْ

في اْلآخِرَهْ هُمْ حَطَبْ زَقُوْمْ راوِيْهُمْ

راعِي اْلْنَمِيْمِهْ اْلْخَلا وُراعِي اْلْوِشايِهْ إِبْعِدِهْ

@@@

مَظلُومْ راعى اْلْمَعاشْ مِنْ كِلْ صوبْ مَطلُوبْ

مَحْلُوبْ حَلْبْ البُقَرْ مِْن ديْنْ وُمِْن مَطلُوْبْ

يا ما شِقا فى العَمَلْ لِيْلْ وُنَهارْ مَطْلُوْبْ

حَسْرَةْ وُنَدامِهْ وُأَسَفْ ضاعْ اِلْوِفا ياصاحْ

نُوْطْ اِلْتَقاعُدْ يُبَهْ اِلْكِلْ مِنِّهْ صاحْ

حَتى الطِفِلْ فِى اْلْمَنَزْ ما يِـشْـبِعِهْ لُوْ صاحْ

مَطلُوْبْ مِنْكُمْ كَرَمْ مِنْ حَقِّنا اِلْمَطْلُوْبْ

@@@

عِمْيَتْ عِيُوْنْ اِلْحَسُوْدْ اِبْجاهْ رَبٍ عَلي

تَصْلِيْهْ نارْ اِلْحِقِدْ وُيِرْتِمِي مِنْ عَلي

إِسْمَعْنِي يا بُوْعَمُرو أَرْجُوْكْ وُافْهَمْ عَلَي

أَهْلْ اِلْضَغِيْنِهْ إِكْثِرَوْا وُجْلِيْلْ أَهْلْ اِلْقَدُرْ

وِلْسانْ يَنْطِقْ هَلا وُقْلُوْبْ تَضْمُرْ غَدُرْ

إِسْمَعْ كَلامْ اِلْمَثَلْ اِلْعَفْوْ عِنْدْ اِلْقَدُرْ

رَبْ اِلْفَلَقْ يَحْفُظُكْ دايِمْ مَقامُكْ عَلي

خليفة العيسى