أعبروه مستشفى في غزة.. ورمموه..!!!

لماذا لا تكلف نفسها الحكومة باعتبار مستشفى سترة للولادة كأنه مستشفى في غزة..!! وهو بالفعل آيل للسقوط أو على أبعد تقدير ترميمه وتوفير الطاقم الطبي المتكامل والاجهزة وسيارة اسعاف..!! وشعب غزة حبايبنا.. بس الأقربون أولى بالمعروف..!!

بحرانية

ههههآآآآآآآييي
المستشفى الخاص ما يكلف هالكثر
عنبوه 2500 شنو وين ولادة الام في فندق خمس نجوم ؟؟
2500 اذا كانت صح فهذا يسمونه نصب
اول شي لانه مكان عادي ما يسوى هالكثر
وهذا شي هذا قاعدين ينصبون على الناس

والجسر؟؟؟

المسافة بين سترة وجد حفص لا تقل عن 12 كيلومتر وهذه المسافة في أحسن الحالات تتطلب ربع إلى ثلث ساعة لقطعها دون ازدحام، أمات ع ازدحام السير على الجسر فأتوقع أنها تحتاج لساعة ونصف وخصوصا في وقت الذروة على هذا تكون المرة ولدت في السيارة ومجانا ولا 2500 دينار ولا غيره.

بااااااااااااااااال 2500

ليش مستشفى ستره اللي يولدون فيه فيله عشان يكلفهم 2500 مولدين ديناصور مو مره ... ياعمي طير مناك بلا هرار

الظاهر ان ....نايم وقت ما قال الرقم

أولا مستشفى سترة للولادة اجهزتها يبي ليها تحنيط و يودونها المتحف افضل لأنها قديمة و يمكن بعد من بداية التسعينات الى الحين ما غيروها اشلون بتكلف هذا المبلغ ما ادري و ثانيا خله يروح قسم الرعاية في مركز سترة و يشوف عدد الحوامل الي تراجعه من كثرهم ما فيه مواعيد قريبة و ثالثا المفروض الواحد ما يتكلم على عمى خله يروح المستشفى بنفسه قبل لا يحكم و يوضع ارقام خيالية اصلا الناس نست ان فيه مستشفى حوامل في سترة لأن اللوحة ما تدل على المضمون و الحين هو تحول الى مستشفى للإقامة الطويلة فقط

يقولون مرممينه

لهذا السبب يوجد ضغط كبير على السلمانية لأن الناس تخاف تروح هذي المستشفيات بسبب وضعها المزري و كل العادة يقولون مرممينه؟؟!!!!

غير صحيح

موضوعي كبير وحاب اختصرة
2500 غير صحيح

اقل ما يستحقه اهالي سترة

احس انه كفاية على مال سترة التلوث والبيئة الى يعيشون فيها على الاقل يحتاجون مستشفى مثل الناس
يعني بالعقل لو المستشفى وين ليش بروحون حدحفص؟؟؟
ثانيا وحسب الي شفته بعيوني مستشفى جدحفص ماساة بعد المريضات على بعض ؟؟ رحت ازور وحده ولادة كان سريرها قريب(سنق) محل الغسيل .. بالعربي مستشفى جدحفص يختاج تعديل بعد

بلا تعليق!!

من هذا ممثل الصحة ما أعتقد انه عايش في البحرين الحين يال.... سترة قريبه من جد حفص!! ويال.... اش هالكذبه تكاليف الولادة الواحد 2500د ب حدث العاقل بما يعقل، وشلون قدروا النواب يتحملون هالقنابل والصوارخ!! ستراوي@@

شكله موعايش ويانا

الظاهر نائب وزارة الصحه راسه افتر ودار عليه وصل الى سنة الفين وثلاثين اقول هذي اي ولاده الي اتكلف هذا المبلغ 2500
خخخخ وين قاعدين قعدوني شباب ترا راسي دار

والله حرام

والله حرام عليكم يا مسئولين وزارة الصحة يعني هالفقراء من سكان منطقة سترة وضواحيها ما يستحقون من الدولة حتى مستشفى للولادة !!!! أنا بسأل كل واحد منكم لو كان يسكن في سترة وزوجته حامل ما يخاف أن زوجته تولد عليه وهو على جسر سترة اللي على الدوام مزحوم والواحد يقعد فيه بالساعات حتى يوصل للمكان اللي يريده ؟؟ فكيف إذا كانت حالة طارئة لوحدة من الحوامل ؟؟ ما أقول إلا الله يعينكم على بلاكم يا أهل سترة

مستشفى سترة

فعلا صراحة المستشفى يحتاج لترميم وتطوير واني من قبل كنت كاتبة موضوع عن تطوير وحدة الولادة في مركز سترة علشان يستفيدون منها أهالي سترة والقرى المجاورة لهم .لكن الله كريم

مستشفيات باتت ترعب الناس؟؟؟؟؟؟

الحين هالخرابه وملجئ المعاقين اتسمونه مستشفى ولو كان هالمستشفى في اماكن ثانية جان من زمان سووه بدون هالمجادلات واني وحدة افضل الولادة في البيت ولا اني اولد في هالمقبرة وبسكم تشاور في هالامور الي المفروض خالصين من حلها واتشاورون على امور عدلة وتستحق التشاور فيها لان المستشفى او بالاحرى الخرابة يبي ليه هدام وبنائه من جديد . وهذا هالممثل مال وزارة الصحة خلي ايودي زوجته .وبعدين يتحجى

إن كنت تعلم فهي مصيبة وإن كنت لا تعلم فالمصيبة أكبر

يا سعادة الوزير .. كفاكم ضحك على الذقون .. متى ستسلمون بإن شعب البحرين الأصيل واعي ومثقف وعلى بينة مما يدور فى مجتمعه وحواليه .. وهو أدرى منكم بأنفسكم ..
القدرة الإستيعابية لمستشفى جدحفص ضعيفة .. والسلمانية كالعادة محجوزة من قبل الهنود والسوريين واليمانية .. يتمتعون بالخدمات المجانية التى نوفرها وزارة الصحة الكريمة ..
والسيدة البحرينية أمام خيارين إما تنتظر ملك الموت على الأسرة الملقاة فى أزقة الطوارىء دون رقابة او متابعة وإما تلجأ الى الخاص .. وهذا ما تريدونه كما يبدو ..

تكلمون من؟

أظن المثل اللي يقول (بن عمك أصمخ) حقيقة واضحة من جهة المسؤليين والوزراء كل يوم نسمع بمطالبات لكنها تواجه آذان صماء واذا إنتبهت إشوي بدت الألسن تنطق بالكذب شنو يعني مركز جدحفص أو السلمانية وميزانية الحكومة خل يروح ويشوف أن اللي وضعوا مواليدهم يتمون في غرف الولادة لأن مافي أسرة فاضية ومو مشتشفى سترة للولادة بس روحوا شوفوا مستشفى الرفاع للولادة روايح البلاعات لاتحتمل وليش يطورون المستشفيات ماتدرون إن الميزانية اللي تدخل جيوبهم تتأثر، لو يفكرون إشوي في الآية هذي(إن ربك لبالمرصاد)كان الديرة بخير

جناج الولادة في مستشفى سترة فايف ستار

غرفة الولادة في مستشفى سترة فايف ستار،،، وطاقم طبي كامل مجهز لإستقبال أي حالة،،، والغرف في جناح الولادة سفن ستار،،، غرف خاصة جديدة ونظيفة تلفزيون 42 بوصة وباقات اشتراكية أفلام ورياضية والذي منه،،، وحمامات مزخرفة وبمجرد ضغط الزر تلاقي 3 ممرضات تحت الخدمة لكل والد،،، الوجبات بوفيه والعصائر طبيعية،،، والكوجات للزوار ووساعة الغرفة وحلاوة الخصوصية اللي فيها،،، يعني بصراحة 2500 دينار لكل ولادة وقعدة يوم في مستشفى سترة للولادة مو واجد،،، أتوقع تكلفة الولادة الوحدة ما تقل عن 4500 دينار

هٌزِلَت

حشا ولا المستشفيات الخاصة الحين الولادة القيصرية في الخاص تكلف 1500 دينار بالكثير وفي مركز سترة تكلف 2500 عشتوااااااا !!!! يمكن يستخدمون مقصات وباقي الأدوات ذهب وألماس !!! شهالاستخفاف بعقول الناس والله طرطرة

مهزله

يا وزارة على علمي ان كل عائلة فيها حوالي اكثر من 5 الى 10 اشخاص حمل وما شاء الله كم عائلة في سترة تبارك الرحمن واذ تبيي تغطي الموضوع او بتكذب فكر عدل اول ثم اعطي الارقام الخيالية التب تقولها وفي عدد الولادة

عجبي

الحين الولادات ما توصل 30 ، لا وسنويا بعد وفوق هذا كلهم لأجانب يعني غير البحرينيين.
ويقول جدحفص ما يشغل 60 % ، ما ادري حلات الولاده اللي ما يلقون سرير هناك ولا غرف خاصه وين يروحون !!

ستراوية

تعالوا شوفوا المستشفى يا وزارة كأنها مقبرة شبه مهجورة لانها ما تصلح للولادة ولو الأم تبي توضع هناك اخاف الطفل يرجع الى بطن امه من الخوف وغير المعاقين الموجودين فية خافوا ربكم فينا وسوا مستشفى عدل

درب الزلق

الله أكبر وصلت الولادة بهذا المبلغ الصراحة صدقت وايد

الرقم الخيالي

يا عمي
احسب التكاليف من معاشات وكهرباء وماء واجهزه ومصروفات واقسمها على عدد الوللادات شوف جم تطلع
ما يبي لها ذكاء

بحرانية

اشكره ما يدري عن شي هالممثل ولا عن عدد الولادات في مستشفى ستره للولادة
وصح كلام النواب عن هالموضوع
ليش ما يرممونه ويستفيدون منه!! ازيد من سكن العزاب صاير
شي غريب انه يتكلم عن ارقام ما يعرف اذا كانت صحيحة او لا
لان من سابع المستحيلات اللي يولدون في مستشفى ستره عددهم هالكثر
الحمدلله والشكر

وزارة الصحه

تكاليف الولاده فى المستشفيات الخاصه كانت 300 دينار والان لنقل 500دينار فمن اتيت بهذا الرقم الخيالي2500دينار ردو عليه يابتاع البرلمان والله انتو ولاتدرو عن شيء