التقى البرنامج الأسبوعي «الناصية» الذي يبث اليوم (السبت) على «الوسط أون لاين» سيدفيصل العبار وآخرين من المواطنين الذين قالوا إنهم عملوا قديماً في مهن كثيرة وكان كل شيء رخيصاً في البحرين حينها. وتجاذب البرنامج معهم أطراف الحديث فكانت الحصيلة كالآتي:
سيدفيصل العبار نرحب فيك أول شيء في «الوسط أون لاين» في برنامج «الناصية»... خبرنا أو عطنا نبذة كبداية عنك وتفاصيل؟
- عن شنو مثلا التفاصيل؟
نبذة عنك من وين، وين ولدوك؟
- ولدوني في مدينة المنامة وبعد فترة في الثمانينيات تحولت إلى السنابس.
أنت من عائلة العبار؟
- عائلة العبار الآن، الوالد كان هو العبار الأصلي يعني.
هذا الحين وصلنا إلى سؤال مهم سبب التسمية «العبار»؟
- تسمية العبار الله يسلمك من الخمسينيات ورايح إلى السبعينيات تقريبا ما كان هناك مثل ما تقول ميناء المنامة الحين المرفأ المالي أهني البواخر ما ترسي، فترسي بعيد، فاحنا ناخذ العبارة ديلين العَبَرة على حساب اللي هم «الباسنجر» الركاب من فرضة المنامة انوديهم إلى الباخرة المركب، الناس التي بتسافر سواء يروحون على مثلا العراق أو مثلا بروحون الهند، ناخذ العبرية من اهني انوديهم إلى المركب الباخرة واللي بينزلون من هناك بينزلون المنامة انجيبهم إلى المنامة، على هذا ما كان في جسر بين البحرين والمحرق هذا بعد ما كان كنا انوديهم، عاد هذا من زمان، بالإضافة إلى هذا جسر السعودية ما كان موجود احنا نعبر فيهم انوديهم إلى المنامة.
هذه في الخمسينيات طبعا؟
- هذا الجسر الحين صار، انفتح تاريخ 10/12/1976. فأطلقوا تسمية العبار على هذا، ونفس الشي في ناس كشاتة أو عندهم ندور إلى «النبي صالح» هذلين احنا انوديهم بعد ما كان جسر اللي صار الحين في سترة فناخذهم ونوديهم إلى النبي صالح فلهذا سمونا العبار على هذا.
أنت طبعا ما مارست هذه المهنة؟
- لا أنا لحقت عليها أنا ما أمارسها بس لحقت عليها يعني كنا انودي العبرية أو «الباسنجر» في المراكب لحقت عليها أهني هذا مو بعيد عليها ولا كان نبيه صالح بعد كلها كانت لحق هذلين ودينا إليه.
بعدين شنو اشتغلت بالضبط؟
- والله يعني بدايتي بداية كل طالب في الستينيات حتى منهم التجار ناس اشتغلت في أشياء كثيرة مثلا كانت في السوق ما كان سوق المركزي كان سوق الخضرة عند فندق عذاري. أروح نشتري صبار نشتري مثلا اللوز أبيعه مثلا النامليت (مشروب غازي) نضربها إلى قريب النعيم هذا في رمضان يعني تصور إحنا نخلص من المدرسة بس انجي أنصلي ونضربها من المنامة إلى هناك حاملين صناديق أنجيبها علشان أبيعها. انزين على هذا تمينا نفتح محلات دكان في «قاري» أحنا نصنعها. أروح سوق الحدادة ونسوي لينا الصيخ وركب وإحنا بروحنا نسويها ما نعتمد على احد أسويها حتى مرة وحدة طلعت ويا اخوي وأنا اجر «القاري» من الفريق إلى شارع باب البحرين قال لي: تعال أنت محتكر القاري كله أنت أتمشي ليش أنا ما مشي؟ قلت له: مشي توه مشنا اشوي إلا بواحد مجنون ضرب اخوي كف فأخوي فكرني أنا بما انهوا اخذ القاري من عندي فكرني انا ضاربنه فقام طالعني بعد ما رفع رأسه وشاف المجنون هد «القاري» ومشى. استلمت أنا القاري وأخدت أغراضي ورجعت فيه، يعني في أشياء واجب مثل حتى البني أنا اشتغلت فيه. اشتغلت في البني. يعني طابقين وأول ما في حد طابقين أو ثلاثة.
تشتغلون طبعا عمال؟
- لا عمال كان الأستاذ مالنا الله يرحمه المرحوم سيدمحمد المرزوق، هذا هو. وفي واحد الحوري بعد من الناس الذين كانوا يشتغلون.
السلام عليكم...
- السلام ورحمة الله وبركاته.
اسمك أول
- محمد ناشر محمد.
من وين؟
- من البحرين أصلي يمني.
من متى في البحرين؟
- من سنة 1959.
من سنة 1959، لو سألناك أول ما جيت البحرين اشلون طريقة جيتك؟ من عطاك الفكرة؟
- والله محد عطاني الفكرة أنا جيت من المملكة العربية السعودية في عبرة في لنج انجي على الفرضة في المنامة فدخلت البحرين بس.
أول ما جيت البحرين شنو اشتغلت؟
- اشتغلت يعني ما كان في أشغال تلك السنين كان شنوه أقول ليك يعني شغل كان بـ 15 دينار اشتغلت تقريبا 150 روبية الشهر.
شنو كانت مهنتك؟
- ما عندي أي مهنة.
عامل؟
- عامل، اشوي تعلمت بعدين الصبغ والأشياء هذه. هذا في السبعينيات تقريبا تعلمت.
استمريت إلى متى وتالي بعدين.
- ظليت مدة طويلة اشتغلت في مطاعم اشتغلت غسلت صحون اشتغلت في الكهرباء مساعد اشتغلت مساعد نجار اشتغلت مساعد في «الجراج» ما خليت شغله ما اشتغلتها.
لو سألناك أول ما جيت البحرين شنهو كان شكلها؟
- شكلها كانت البحرين... كان الجسر مال الشيخ حمد أهني يتبطل ويتبند، وكانت إذاعة البحرين كلها ساعتين تشتغل في أيام عبدالرحمن كانو، كان المدير أنت ما تذكره تسمع فيه ما تسمع فيه، كانت البلدية أهني عند فندق عذاري الأول وين فندق صحارى أهني. وهذه دائرة النواطير اللي يسمونها أحين دائرة النواطير كانت أهني وسوق الحراج أهني فندق عبيد اليماني كان أكبر فندق في البحرين.
عبيد اليماني اسمه في وين؟
- هذا أهني عند سوق القديم في شارع الشيخ عبدالله فندق اليماني كان في فندق صغير فندق السعودي اسمونه روبية ونص الليلة.
أول ما جيت في مطاعم للأكلات اليمانية بالبحرين؟
- لا ما كان في مطاعم.
موجود.
- ألحين موجود.
كان في المنامة فريق القلعة الظاهر؟
- أي ألحين موجودين هذه كلها مطاعم يمنية. الأول ما كان فيه احد.
الأول كان العدد قليل؟
- ما في احد من الأجانب إلا يمني وعماني بس، بعدين اجيك الله يسلمك كانت البيوت والإيجارات والأشياء هذه رخيصة 30 روبية 20 روبية بيت كامل.
ألحين شنوه تشتغل؟
- ألحين متقاعد ما اشتغل.
اتبيع شنوه؟
- أشياء قديمة ساعات، إلكترونيات قديمة شوي.
من وين اتحصلهم، تشتريهم؟
- إي اشتريهم.
عبدالله الصايغ من وين؟
- من المحرق.
عندك خبرة في الخواتيم؟
- اي.
أنا اقصد الأحجار؟
- في الأحجار في الهندي وفي اليماني.
وشلون تعرفهم أن هذا حجر اوكي؟
- اعرفه من الممارسة من سنين أب عن جد.
كم أسعار الخواتيم؟
- خواتيم على خمسة وعلى أربعة وعلى عشرة و15 بس.
هل في خاتم اجيب الحظ؟
- لا ما في.
مجرد كلام جدي، وش رايك.
- صح كلامه عدل.
مجرد كلام؟
- مجرد وسواس في الناس.
مشكور على كل حجي محمد.
العدد 2794 - الجمعة 30 أبريل 2010م الموافق 15 جمادى الأولى 1431هـ
ستــ نور العين ــرة
الله يعطيك العافية يا الجدحفصي وتسلم على هذة المواضيع الجذابة
الله يعطيك طولة العمر يا ولد العبار والله يرحم ذيك الأيام الحلوة من أنواع الأشغال المرهقة اللي نسمع عنها من الوالد الله يطول في عمره وأنت يا اليماني الله يرحم ايام اللي جيت فيها البحرين الحين صارت دمار من المجنسين وصدقت يا ولد الصائغ مجرد كلام بالنسبة للخواتيم تجيب الحظ وفي النهاية مجرد حظ لا راحت ولا جت
حبيت اشكر الأخت سارة في موضوع أمس في الوسط اون لاين في موضوع صور المسافرين والنور بوجودش يا الغالية وأن شاء الله تقرئين ردي
هذا تاريخنا
هذا تاريخنا هذي اجذونا هذي اصالتنا هذا احنا البحارنة ولجلف شنو تاريخ هم لى اهد ابلادة مالة تاريخ اسمونة مرتزق الحين صارت عندكم عروبة يوم طلع البترول وجفتون خير الخليج وصار الولاء البترولي