ساعة جدار: معلقه. ..... قل: بعيده

سكنت هالغرفه... وهي جات بعدي

دولاب فخم... وكم ملابس جديده

أكشخ بها... وآقول من عاد قدي

نفس الزمن... والأكل... نفس القصيده

قالت: وش اللي فيك... ونسيت ردي!

والصفحه اثنعشر... بهذي الجريده

أشعر بها... لكن شوي وتعدي

والله... وغصة هالسرير الوحيده

انه سرير اثنين... وآنا لوحدي!

نوال... لا تسكتي... وتكلمي واجد

تكلمي: أكذب الأشيا... هو الأصدق

حزين انا... وأسألي لو صاحبي ماجد

عن وحدة الساعة خمسة الفجر... في فندق!

يعني متعكر مزاجي... وآه كم حاجة تعكر

يعني موناقص كلام الناس... موناقص قرف

قل: حزين الليل... قل: ليل الوحيد اللي يفكر

كم من الراتب يوفر... كم من الراتب: صرف

ما يجيك الا انت... تفتح باب هالغرفة... تسكر

يا وحيد تعد...... كم حذيان قدام الغرف!

وربي... واتصالات الرسبشن... وآخري... ونعاس

تذكرني نوال بشي... كنه شي يشبهني

كذا: يتحرك المعجون في وجهي... كذا: الأمواس

أتاريني كبرت... وما لقيت اللي ينبهني

تقول أمي توجهني: ولد اصحك تسب الناس

لقيت الناس لكني... فقدت أم توجهني