السبت: هذا الأسبوع شكله ما يبشر بخير... والمكتوب يبين من عنوانه (فاتورة كهرباء حمراء)!!

الاحد: تجنب النقاشات الحادة مع من حولك... وتذكر المجلس اللي تقعدون فيه، فيه أشياء وايد يمكن أن تنفلع بها، بما فيها المزهرية اللي على الطاولة!!

الاثنين: مو كل شيء تسمعه تصدقه... ترى نصف اللي تقعد وياهم عندهم طول السنه (كذبة ابريل)... ولين طلعت من عندهم ما قصروا فيك، ناس تفصل وناس تخيط!!

الثلثاء: حاسب ولا تخربط في الحجي... ترى اللي كانوا يترزقون على نقل الحجي ردوا رجعوا على شغلتهم القديمة!! وقد أعذر من أنذر!!

الأربعاء: تذكر أن الحب فنون... والفن جنون... ومن جدي تجوف تصرفات غالبية المحيطين... خريش!!

الخميس: مو كل رقم يوصلك بلوتوث على تلفونك ومكتوب عليه اسم بنت تتصل له... ترى نصهم مقالب يا الفالح!!

الجمعة: جدد الروابط والعلاقات اللي كنت تعيشها من قبل... بس لا تطبق هذه القاعدة على صاحبك ذاك اللي كله يبغي يتسلف!!