سلام أستاذ، شخبارك؟
- الحمد لله زين، بس كم مرة قلت ليك لا تسميني أستاذ، كفاية عليي الطلبة في المدرسة، ومن زود غفصتي وياهم صرت ما أشتهي هالكلمة.
المهم، بغيت أستشيرك في موضوع، خبرك بعد شهر تقريباً بصير أستاذ نفسك، خوب شفت اسمي في الجريدة، مله؟
- إي شفته، المهم ويش تبغى، قول بسرعة لأني أنا بعد أبغيك في سالفة.
أنا صراحة متحير، أبغي اشتري ليي سيارة عشان أروح ابها المدرسة لكن ما أدري اشتري سيارة جديدة لو مستعملة. ساعات أقول باخد جديدة عشان يقولون عني مدرس كشخة وساعات أقول باخد مستعملة عشان يقولون إني متواضع وطيب، ولا أنا عارف ويش أسوي. ويش اتقول انت، أيهو أحسن أصير كشخة لو متواضع؟
- اسمع خوك، انت خوب ما بتروح الصف بالسيارة، صح بشوفونك بعض الطلبة الصبح والظهر خارج المدرسة لكن مو لازم يكونون طلبة وياك في الصف. ثاني شي السالفة مو سالفة كشخة وتواضع، السالفة بيصير عندك فلوس لولا؟
أكيد بيصير عندي فلوس، اسمع بقول ليك خطتي، أنا اتوقع ان راتبي أول ما اشتغل راح يوصل 350 دينار تقريباً، وصاير في بالي أشياء واجد أبغي أسويها. أول شي أبغي أجمع كم روبية عشان أتزوج، ثاني شي أبغي اشتري ليي سيارة عشان لبنية إلي أبغي أتزوجها تستانس وتوافق عليي.
- احم، احم، يبغي يتزوج بعد.
لا تكلمني جدي خوك أنا بروحي استحي من هالسوالف وأكو صرت حران أو وجهي معرق. ما أدري شلون، كله استحي إذا يتكلم ويايي واحد عن الزواج.
- المهم، كمل، كمل.
المهم، بعدين لازم أشوف ليي مكان أجار لأن بيتنا ما يصلح أعيش فيه وية خطيبتي، وخبرك أنا ما عندي حجرة بروحي في البيت والمجلس مسوية فيه الوالدة بيعة تبيع فيه جبس أو كاكو وعصير مال جهال وما يصلح أخرب عليها، وبعدين، صراحة يعني، أنا مصنف أسافر وية خطيبتي شهر العسل نروح ماليزيا.
- ليش ماليزيا يعني.
ما أدري ليش، بس جدي، أحس خاطري أروح ماليزيا. يتراوى ليي إلي يروح ماليزيا شوية غني ومو لازم مطوع واجد. لأنه الناس متعوده تروح العمرة وسورية وإيران، فأنا إذا رحت هالمكانات بيصير حالي حال الناس، وأنا الحين حالي مو حالهم، أنا بصير أستاذ، تعرف يعني ويش أستاذ، يعني واحد يقدر يروح ماليزيا عادي من دون ما تضعضع ميزانيته.
- انزين بعد ويش تبغي اتسوي، كمل حبيبي، كمل.
وصراحة بقول ليك شي بس خله بيني وبينك، لأني مصنف أسويه قربة إلى الله وما أحب أفوشر. أنا مصنف أودي أمي وأبويي الحج هالسنة، يعني كم بيكلفني ألف دينار، ألفين، عادي، خوب أنا بصير مدرس. تبغي الصراحة أنا كنت، سامحني عاد لأني ألحين بقول شي احتمال يزعلك، بس تحملني شوية، ويش عادي أقول لو لا؟
- عادي، تفضل، خذ راحتك.
أنا صراحة كنت قبل أحسدك، شوية يعني مو واجد، يعني أنا كان وضعي المادي مو داك الزود وأشوفك انت مدرس وعندك، يعني، مسامحة ها، عندك يعني فلوس واجد، خاصة انت صار ليك كم سنة في التدريس ومتزوج وعندك ولد، يعني الراتب متروس علاوات. ويش انت الحين زعلان لو شلون.
- لا عادي، أزعل لويش.
أشوه، يعني انت الحين كم راتبك، ما بتقول أكيد عشان ما أحسدك، المهم، ما أتوقع بيقل عن 450 دينار، يعني هالراتب لو عندي جان ويش سويت في روحي، جان عادي أودي خطيبتي ماليزيا وفي رجعتنا نمر لينا على لندن نتسوق شوية واحنا راجعين. ويش تقول؟ تعال صحي انت كنت تبغي تقول ليي شي مساعة، ويش عندك، مسامحة ما خليت ليك مجال. آمر.
- ما آمر عليك عدو، أبغيك جان اتسلفني عشرة دينار
العدد 1442 - الخميس 17 أغسطس 2006م الموافق 22 رجب 1427هـ
