الزوجة لاتعرف ولا تقدر الحياة الزوجيه وتفكر ان لما تفلس الزوج عشان مايتزوج عليهاا قمت الغباء يظل يكرهاا من داخله ويسبهاا عند اهلهه وعند ربعه وفعلآ ماراح يتزوج الثانيه لكن بيتزوج مسيار او عن طريق صداقه ويبتعد عن الزوجه قدر ما استطاع مجرد تلبية احتياجات فقط انا واحد من الناس اكره زوجتي واذا شفتهاا ادلعهاا ومن داخلي اتعود من شرهاا لكن مانب متزوج ولا بالحلال ولا بالحرام لكن ما احبهاا بس كذا تقضية الحياة بالغصب

لن تنالوا البر حتى تنفقوا مما تحبون .. البذل في طبيعة وفطرة الرجل فليش تغيرون فطرة الله التي فطركم عليها وبعدين تغربلون بنات الناس

في حين إسراف الزوج وسوء تدبيره ومايعرف يجمع له بيزتين ويفسفس فلوسه في أشياء لاتنبغي تالي يجي لزوجته ماعنده! رجال يبغى ليها تتعلم حسن التدبير والميزانية

اني من انولدت لحين حتى المدينه مازرتها وصار لي وياه 14سنه ولا قطعه ذهب ولا حتى مصروف ولا يوم دش عليي بهديه ويوم فكرت اشتغل معاشي ع نفسي واولادي وعليه وبيزات التامين سحبتها والتعطل يوم قدمت نفس الشي هو ماغير لبسهم من العيد واشتا ماشفنا شي والمعاش مايكفي منه شي الا حق الاكل بس واخرتها تجي امه تقط نغزات اني مضيعه بيزاته لاني من اخد لينا سمجه ولافاكهه اتقاسمها ويها ومن اخد ليها شي ما ارضى اخد فلوسه صرت بعيونهم موزينه ومبذره ولو كنت بخيله جان صرت زينه

النساء البحرينيات بالغالب صابرت وقنوعات..ومساعدة الزوج والصبر معه على تعب الحياه من الأخلاق الحميدة ولكن إياكي اختي بإلغاء نفسك ومطالبك من أجل مراعاة زوجكي بالنهايه الزوج من يقتدر اول خطوه يسويها يبحث عن التجديد والفرفشة بحجة الشرع حلل 4 وانج قدمتي تنازلات من نفسج ما عندي مقابل لج ولتضحياتج والله كلامي من تجربه مره..

من خلال ملاحظتي عشت ايام بسيطة و ايام الله يجيب فيها الخير ايام الله كاتب لينا فيها ايام فيها ارزاق واسعة و ايام نصير فيها ناكل اكل بسيط لكن الله يخلي امي و ابويي و شكرا لله على كل النعم صدق قدام ابويي و اميي اتحلطم عليهم و جذي لكن اني من داخلي اشكر الله و انما اتحلطم او جذي عشان انفس عن داخلي يمكن صح ان الدنيا ابتلاء كبير و الاحظ ان الله مع مرور الايام يزيد العطاء يعني تتبدل احوال الناس لا الفقير يتم و لا الغناء الحمدلله

للاسف السبب الي يخلي النساء تتصرف جذي هو ان مو الكل ولكن اغلب الرجال الي تراعين ضروفهم وتقصرين على نفسش عشانهم باجر اول ما يصير عنده فلوس تزوج الثانيه والزوجه الي تخليه ع الحديده مو كفو يتزوج عليها وهالشي عن تجربه شخصيه

بين بين

هي بين بين تصرف لكن تتحلطم رغم أني لا أقصر معها مطلقا أدفع ماجلة البيت وأجار الشقة ومصروف في يدها كل شهر ... تتهمني بأني أخشش فلوس والله يعلم أنني لا أملك إلا الضروري ... القصة هي أن المرأة التي لا تشارك عليها أن تقبل بمعيشة زوجها مو لازم نوديهم مدارس خاصة بعدين تدفع وتقول خليت المدارس علي ... مو لازم ثياب من مذر كير .. بشتري .. لا تشتري وتقول خليتني أشتري وأدفع ... أتعبتني وأنا حساس أشعر أني أبذل طاقتي وهي لا ترحم (فارس)

نعم

نادرة ... ولو تدرون البعض انتهت حياته وهو في أزمة الفصل السياسي للوظائف ... لم تصبر حتى على تضحية زوجها ففلت وهربت منه ... عملة نادرة تلك التي تصبر على وضع زوجها المادي خاصة بعد أن تتعود على مستوى معين ... والله المستعان

المسالة ترجع الى تربية الاهل من الاساس اذا كان طبع يغلب التطبع اذا كانت متربية على حب المضاهر والموضة هي ماراح تكون سعيدة في حالكان زوجها غير ميسور

الحمد لله رب العالمين .. أخذته على قد حاله وراتبه ضعيف ، عمره ما قصر عليي في شي ، وعقب سنوات حصلت اني وظيفة .لكن هو استمر ما بخل عليي ، يتهيأ ليي الرجال يقدّر ويثمّن المرأة اللي تتفهم وضعه وماتلح عليه بالطلبات ، مع الأيام يحاول قدر الامكان يعوضها ويجازيها على وقفتها وياه

للاسف الزوجه تقصر على نفسها وما تضغط عليه ماديا وتراعيه بالنهايه اول ما يصير عنده فلوس يتزثج عليها فالافضل نخنقهم ماديا طبعا مو الكل بس الغالب

أني بصراحة مااطلب من زوجي لاني احترمه وهو أخذني على سنة الله ورسوله بس يوفر لي اكل وشرب واشياء ثانية اني ادبرها بروحي مااحتاجه

المرأة بطبعها حنونه ولا تستطيع ان ترى زوجها في وضع مادي ضعيف و تضغط عليه بالمصاريف ! عني انا اعطيت زوجي مهري من ثالث يوم من الخطبة وبالاساس هو لم يدفع لي الا اربع مائة دينار فقط و طقم خطبتي اعطيته له ليبيعه و قبل زواجنا اعطاني المهر الذي اعطيته له واشتريت به ذهب وبعت الذهب بعد سنوات لاجله ، عشت ايام انام بدون عشاء، و عبائتي قديمة و حذائي ايضا والحمد لله لم اعترض ولا اتكلم وصبرت مع كوني حامل ، لكن ما ان تغير وضعه المالي حتى فاجئني بالخيانه !

المفروض يكون السؤال الزوج المخلص لزوجته هل هو عملة نادرة و الاجابة نعم .. على المرأة ان تحفظ القاعدة التالية لا تثقي في الرجل لا تحبيه و تعشقيه كثيرا لا تعطي بدون حدود فهو لا يستاهل لا تحزني اذا خان لا تبخلي على نفسك و تغدقي عليه و لا تتنازلي عن المهر و الذهب لكي لا تصدمي

فعلا الزوج المخلص بهالزمن عملة نادرة ! للاسف اختي لازلت كما انا رغم خياناته لازلت اراعي ظروفه واسانده واصبر على سفراته وتحطيمي وقهري لاجل عيون فلذات كبدي الله يقدرني واربيهم احسن تربيه .

والله كل المشاكل الي تصير بسبب هتلفونات وهلبرامج الخبيثه انستغرام وسناب كل واحد يشوف غيره يبي يسوي نفس الشي وحده حاطه في سناب انه زوجها ماخد ليها هديه اوكي احنا شكو!! واحد حاط صور من داخل بيتهم انه مشتري تلفزيون او شي ثمين ويش نسوي نشتري يعني؟؟!!

انخطبت وتزوجت ولا شفت فلس الا بعد عشرين سنه من الزواج وبالطراره..الله كريم..انحرمت من كل شي دراسه وكل شي بعد ما كنت امدلله فبيت اهلي..عسب صبري نهايته خير..ولا يفوتكم حتى مهري طلبت بضم الطاء به في يوم ما..الحمد لله..ولكني سعيده!!!!@لاني اعيش في الدنيا مظلومه وليس ظالمه ...شعور جميل.. وبالله المستعان.

يعتمد على نوعية الرجال اذا كان زين واجودي ينحط على الراس والعين حتى لو انعيش على خبز وتمر بس اذا طايح حظ ومو كفو ليش الوع جبدي ما اسكت عن حقوقي

طول ماهو فقير لازم زين ويتمسكن لاكن من تجيه لفلوس يكشر عن أنيابه و أسأل مجرب ولا تسأل طبيب و أني مجربه حط الثانية على راسي

هل تعلم أن ذكور النحل لا تلسع أبدا ..
بل الإناث !!
حتى وهم حشرات مشاكل "̮
ههههههههههههههههههہَ هُ ˛:????????

اني صرت مع بنات كل مفوشر بأغراضهم وحاجياتهم حتى في اسلوب كلامهم يبين انه تعالي وغرور الا تقول زوجها شرى ليها ساعة بماركة وعطر غالي والا تقول ان ثيابها من هذي الماركة ونعالها من هالماركة وسافرت مع زوجها ذيك الدولة اني بصراحة مو من النوع اللي ارمي الفلوس علشان اجاري الناس في التقليد.
بس بعد فترة صارت عندي شغلة زينة وسمعتهم يتكلمون علي بدون ما يدرون اني اسمع ان اشمعنى صار عندي وهم لا.
هذيلة اشخاص مرضى المظاهر تقريبا قطعت علاقتي فيهم.

الشخص الذي لا ينظر للمادة نادر رجلا كان أو أمرأة.

عني شخصيا تعودت من اول ما انخطبت معاشه يظل منه 180 دينار كانت عندي فلوس البعثة اصرف منها وتخرجت وقمت اصرف من فلوس مال التعطل وعقب انقطعو قام يعطيني 40 كل شهر لين وصلهم مية ومن اشتغلت خلاص ما اخد منه ولا فلس واحين كل المصاريف حق جهالس من عندي ما يرضى يصرف ولا دينار حق اعياد واعراس ولا فلس بحجة ان فلوسه ما تكفي بس دايما اساله لو كنت ما اشتغل بعد بتقول جذي والا بس انك تعودت ؟ صح الراتب يتوزع على كذا شي بس مو حلو ان الرجال،يعتمد اعتماد كلي عالزوجة في المصرف ، ويضايقني لان ما مرة سمعت كثر الله خيرش

الحمد لله على كل حال ، الله يرزق زوجي الخير الا يكفينا ويستر علينا وما نحتاج لاحد ، عشت مع زوجي فترة عصيبة جدا ، كنا نبحث فيها عن المئة فلس و الخمسين فلس لنشتري خبز لعشاء اطفالنا ، ومرت السنين و هذه الايام شبح الحاجة والفقر يطرق بابنا من جديد ولا نملك الا الدعاء والصبر ، دعواتكم لنا بان يرزقنا الله الخير فالمدارس على الابواب ولا نملك شي لنوفي حاجيات اطفالنا و لم نقم بتسجيل طفلنا في روضة لارتفاع اسعار التسجيل ، كان الله في عوننا وعون الجميع ،

اريد ان اساعدك عزيزتي و لكن بأي طريقة ؟؟ الرجاء كتابة اقتراح لكيفية توصيل المبلغ المالي .

الله يكثر من امثالكم

الله يكثر من امثالك
واتمنى ان الله يغنينا ويغنيكم ونساعد المحتاجين

إن وجد فإنها نادرة النوادو في هذا الوقت أما فيزمن الأمهان ةالجدات لهذا الجيل فإنهن موجودات وهو الشائع عكس ملهو موجود حاليا من عدم مراعاة لتلك الظرةف وغيرهر

خسرت كل اموالي مهري و ذهبي وكل ما ورثت و شاركت زوجي لبناء بيت المستقبل فتعود على اعتمادي على نفسي و على كرمي و عطائي و الحين يوم اللي ما يصير عندي فلوس اعظ على أيادي ندما ...لحد يغلط غلطتي حتى لو كان عندج الملايين الزوج ملزوم بالصرف لا تضعفين ولا تتعاطفين جوفي شيمته و كرمه واخلاقة و نبل تصرفاته معاج

ملزوم بالصرف بالحدود اللي أوجبها عليه الشرع .. إما في الحدود الكمالية مثل بيت وغيره فالشرع ما يلزمه او يوجب عليه انه يوفره لش .. مجرد مسكن وبعض الثياب اللي تكسوكِ .. أتمنى تقرئين أكثر عن حقوقك كزوجة وواجبة هو كزوج قبل لا تبثون هالسموم والأفكار الخبيثة في المجتمع .. للأسف مضطر أرد مع اني ما احب اكتب او أعلق اهني

اطلع للمجتمع وشوف البلاوي .. واجد سمعنا مثل هالقصص .. الزوجة تساعد زوجها بانها تصرف على نفسها في وقت ضيقه.. وهو يعتاد هالشي ويصير بعدين ما يصرف عليها ابدا ابدا حتى في ابسط الامور مثل مأكل ومشرب .. الزوجة حتى لو مقتدرة وعندها معاش ..زوجها بعد ملزوم يصرف عليها على قدر استطاعته

محد فكره خبيث غيرك
شكلك نفسه
السكن للمره والأولاد
مو لك ولزوجتك بروحك

الى زائر 112 ويش دخل حقوق و خرابيط و مو واجب عليه؟؟يعني الزوجه اللي واجب تساعد رجلها علشان يبني بيت له و فوق هذا يسجله باسمه فقط و تالي يذلها

لا لا من قال واجب ع الزوجه مساعده زوجها هو واجب عليه اخذها مسول عنها اللي يقول غير جذي مو رجال وكفى لاعبين ع الزوجه لعبه عشانها تشتغل وانتو شمهنتكم

وازيدش من الشعر بيت ؛في رجال من يشوفون فلس في ايد نسوانهم تجيه الحومة ؛يضغط عليها ويعاديها ويجوعها عشان تصرفهم وتظل صفر اليدين.. وين الرجولة !!!!!

الحمد لله زوجتي متفهمه و واعية س من تشوف البيزات سلم عليها ههههههههههه ... الله يعطيها الصحة و العافية وطولت العمر أحسها عملة نادرة في هذا الزمن من أشوف معضم زوجات أهلي وربعي

في هيك وهيك

بل عملة منقرضه ..زمن اغبر ما عندك ..محد يشفق عليك..منطحن طحان..ودبيچ ليل ونهار..على العموم أله ما يغني ربه تعبان...

انا ويه ان المرأه تحاسب لظروف الزوج وطلباتها تكون في حدود المعقول .. مد رجولك على قد لحافك ..
لمصيبه لين تعود الزوج ان الزوجه تساهم بالجزء الاكبر .. لامصروف يعطيها وبالعكس هوو الي ياخذ من عندها.. فهوو بعد لازم يحاسب لها

جدا جدا نادرة وهناك من تعل ولديها راااتبها على حساب راحة زوجها ولا تراعي!!!!

أني الحمد لله تزوجت وكان زوجي معاشه 150 دينار وكله يروح على الجمعيات وما يضل منه إلا 20 دينار بس ، بس الحمد لله صبرت وياه وكملت دراستي الجامعية واشتغلت وهو الحمد لله تغير وضعه وحصل وظيفة أحسن وما يقصر علي في أي شي اني اللي دائمًا اطلب منه ما يكلف روحه فوق طاقته ونتشارك مع بعض في أمور المعيشة وما عندنا فرق فلوسي أو فلوسه وهو يحاول يعوضني قد ما يقدر عن الفترة اللي طافت ، ترى في بنات واجد قنوعات وصبورات وترى المرأة اللي ما توقف مع زوجها وتصبر عليه ما منها فايدة . الله لا يغير علينا والله يوفقنا

لفلوس تعمي لنفوس

ليست نادرة كلهم مثل بعض ولكن الواحد مايصدق شوي ياخذ نفس احد يصخ عنه عن اريد فلوس وما اريد ولكن يخبط ويخطأ ومايعطيها حقوقها فاعقبها ما تسكت !!!

سبحان الله. ناس ما اعرف شلون طريقتهم بالتعليق. يعني بصراحة كمية احباط. قليل ما تحصل تعليق بناء يعني في ناس للحين ما تزوجوا تقراء تعليقاتكم الي تحشي عقولهم بسلبياتكم. الي يذم زوجتة و الي تذم زوجها متا بتعقلون انشاء الله؟.ارتقوا بتفكيركم انتا و ياها لا كف هههه

يجب على المرأة تعود لرشدها ولعاداتنا وتقاليدنا وان تسخر جميع طاقاتها لراحة زوجها وابنائها من طباخ وغسال وتنظيف واستقبال للزوج والصبر عليه ، واذا غضب عليها ارضائه او تجنب ازعاجه.
كما عليها عدم الخروج من المنزل بدون استأذان الزوج او ابنها الأكبر ، واما العازبه فعليها عدم الذهاب للمجمعات والمطاعم واماكن الدلع بدون محرم ولنا في أبانا واجدادنا قدوة حسنه المرة ماكانت تقدر تطل من شرخ الباب مو الحين يدفع الله البلاء

زائر 97
الله يعينك

بال هذه نظرتكم للمرأة مساكين احنا صدق كل مانسوي ونقدم مافي تقدير صدق مجتمع ذكوري مفترس!!

انا في رئيي نادره مو كل وحده تقدر

الحمد الله على كل حال زوجي مقتدر بس مايصرف عليي كنت اشتغل كل مصاريفي اتكفل ابها ويطالبني ادفع نص اغراض البيت ويوم فنشوني وقعدت بالبيت استحي اقول له ابي مصروف ويوم ضاق ابي الحال وقلت ليه قال ويش هالموضه ماسمعت انه لازم كل شهر ليش مصروف انا انسان ماعندي قلت ليه ومن وين اصرف على روحي دينار مافي بوكي قال اتصرفي حتى مره كان منقهر انه بيعطيني افلوس طلع العشرين بحمق وشقها وفلتها عليي هالعشرين الدينار ويش تسوي هي كردت لو صرف لو اجمع اذا احتجت شي لكن ماقول الا الله يرزقني بشغل وارتاح من هالضيق

وخمس يعرفن بخمس:
الشجرة تعرف من ثمارها، والمرأة عند افتقار زوجها، والصديق عند الشدة، والمؤمن عند الابتلاء، والكريم عند الحاجة
.........
البعض ينسب هذا القول للإمام علي عليه السلام لكني لم أستطيع الحصول على المصدر.

ليست عمله نادره انا اعرف شخصيا الكثير من النساء البحرينيات تتفهم وضع زوجها المادي ولا انكر وجود بعض النساء التي تتمرد على زوجها

التعاون

انا أول ما تزوجت كنت الوحيد الذي أعمل وكانت زوجتي قنوعة إلى حد كبير من المصروف المحدد لها شهريا مع ان الرلتب الشهري كان لا يتعدى 400 دينار. .. ولله الحمد احيانا كما أن يمكن القول أن الزوجة تتأثر من قول النساء ف البذل والعطاء من قبل الأزواج لذا ترى بعض الضغوطات ع الزوج قبل الزوجة وخصوصا ف المناسبات السنوية كعيد الميلاد للزوجة وعيد الحب وعيد الأم ما أقول إلا أن يساعد الله هالزوج ف تلك المناسبات التي يتنافس فيها ويتفنن فيها الزوجات ع حساب الأزواج.

هو كذلك

لا ليست نادرة..
هذه شيمة المرأة البحرينية
دائماً متفهمة
بسرعة ينكسر قلبها على هالفقيروه ولين خاشة دينار تقوم تطلعه له

انا توي خاطب راتبي 250 وعليي قرض طبعا قبل لااعقد فهمت مرتي بوضعي المادي ساعات لين بنطلع اكون مفلس استحي اقوليها ماعندي فلوس لمطعم او ثياب او...الخ اقوليها تعبان او راسي يعورني او احاول ننشغل بأي شي اخجل اقولها ماعندي خصوصا هالشهر عليي تأمين سيارتي وتوه مختربه سياره وطار نص الراتب غير شقتي الاصارت مهجوره بيت اشباح بسبب عدم قدرتي على من 2011 كنت ابني فيها اللعام خلصتها وموقاادر افرشها...الله كريم

انزين في جمعيات اتساعد حق البنيان والفرش والتأثيث حتى مساعدات ماليه واياسي
احنا ساعدونا ماقصروو كل شي عطونا اكثر من جمعيهه

مايساعدون انا من ٢٠١٣ مخطوبة وشقتي مهجورة ولحين مو عارفين نتزوج يعطون ناس وناس الله الرازق الكريم مع ان زوجي جامعي بس الحمدلله على كل حال

اذا مو مقتدر جان لا خطبت، هذا ظلم لها ولولاد المستقبل ،غلطان

إلى الزائر رقم 90 .. غلطاااان في نصيحتك ومنطقك هذا
الله يقول إن يكونوا فقراء يغنهم الله من فضله .. وانت تضد بنصيحتك القرآن يا عزيزي

يارب يغنيك وييسر امورك وامور جميع الشباب والشابات ويتم تزويجكم بالبركة ان شاء الله

الزبده نادره او لا

ليست عمله نادي فقط .. بل لا تقدر بثمن .. الله يحفظ أم أعيال .

بعض الزوجات طلباتهم غير طبيعية
مثال: زوجه تطلب من الزوج دفع مبلغ مالي كل شهر لعزومة تقيمها لصديقاتها
مثال: زوجه تجبر الزوج على السفر كل صيف لمدة معينه لماذا لان جميع خواتها يسافرن الى الخارج
مثال: زوجه تشتري أشياء غير ضروريه للمنزل فقط لإشباع رغباتها بالتسوق فقط
مثال : تغيير اثاث المنزل لماذا ( فلانه مو أحسن مني )
مثال: تشترط الزوجه ان يكون لها مكان مستقل مطبخ وتشتري مطبخ متكامل وبعد الزواج جميع مطاعم المنطقه يعرفون عنواننا

اني اعرف بنات واجد اخذت قرض لزوجها وصارت مشاكل وانفصلو وما همه قسط القرض وصار عليها واني تزوجت واحد راتبي اضعافه وادفع الايجار ومصاريف بناتي ومصاريفي عليي وفتحنا حساب مشترك بس اني الا احط فيه يراكض وراي وهو يحط في السنه حسنه بعدين يوم احتجت للفلوس ما رضى يسحب ليي ومنها ما حطيت ويوم احتاج لها رحت اياه وسحب وفوق هذا شرينا بيت ب 90 الف 40 الف من الاسكان اني نص وهو نص وقرضي 35 ألف وهو 6 الاف بس الباقي من لحساب المشترك وعندي جمعية وتسلفت من اخواني وحطيت وبعد سنتين حق اثاث جددت ل 8 الاف بعد ما عجزت

انزين وبعدين
اذا انتين قابله بالمشاركه معاه وكانت فكرتش فلا داعي للمشاهره بزوجك وظلمك له ..
دام كل الي ذكرتينه اختي الكريممه كان تحت موافقتش
لاداعي للحنه والتذمر على زوحجك
وماليه داعي تقومين بدور الرجل اعططيه حقه يبين شخصيته
شكلش واجد شخصيتشش قوية عليه وهو ماله حس تحتش

اسمحي لي خيو... شغلش غلط... على الاقل اضمني حقوقش... ملكية البيت بالنسبة.... فرضاً قيمة البيت ١٠٠ الف وانتين دفعتين ٩٠ الف ليش ٩٠٪‏ من البيت وهو يملك ال١٠٪‏ اللي دفعها فقط
بطلوا تصرفون على اشباه الرجال... موافقتكم عليهم هي اللي تخليهم يتكاسلون وما يتحركون على عمرهم... الا ما رحم ربي
على العموم في ميزان حسانتش عند رب العالمين والله يعوضش في بناتش ????

بعض النساء تقول لرجل روح اسرق و هذا صحيح شوف بعض الرجال مساكين مهما يسون من تضحيات مافي فايده مثل ماسوه شيء يخلي الراتب كله في يد زوحته وبعد تتشكى انا اعرف وحده

هل الزوج يصبر على زوجتة اذا ما طبخت ما غسلت ما خدمته هو وعيااله واهله وزارتهم وسوت كل اللي يبيه عقب اذا الزوجة صبرت عادي شي غير لا ما له داعي الصبر

في ناس واجد ينتقدون الرجل بطريقى تخلي الواحد يصدق ان فعلا هشي
وناس تنتقد زوجاتهم بشكل مقزز يخلي الواحد ينفر من هشخص

البلوه لين صار فقير وحقير والبنيه ضعيفه يمال الضعفه هو ويه اهله

الصبورة على ظروف الزوج أصبحت عملة نادرة والسبب هو: وسائل التشويش بأنواعها تلك التي تلوث بعض أفكار الزوجات بسبب ما يسمعونه ويرونه - في الماضي لا توجد هذه الوسائل المدمرة مثل التفوشر في الإنستقرام والوتساب والتلفزيون وخصوصاً التفوشر في المسلسلات من اظهار المواطن او المواطنه في الفلل والسيارات الفارهة ولاخره مع أنه في الحقيقة كله كذب في كذب ولكن تاثيره قوي - وأنا شخصياً أقول والحمد لله لقد أنعم الله على بأم عيالي وهي من الطراز القديم الكلاسيكي ولا تعرف الا البساطة والبطاطا على قولة صباح وشكرا.

زوجتي ولله الحمد مساندة لي ، مريت بظروف مالية صعبة وقروض ومشاكل بالسيارة وكانت تبكي لما تحس بالضيق بعدم قدرتنا على شراء أساسيات مهمة ، لكنها تقول لي طبيعي ابكي انا مو كمالية بس ما ألومك بشيء ، وفي الاشهر القادمة قامت بعمل توزيع دقيق للمال بأول يوم ينزل راتبي ، وقسمت كل المال بشكل منتظم على كل حاجياتنا وهذا الشيء ساعدنا ونظم حياتنا وخفف من وضعنا الصعب ، في الحقيقة لا أعرف ان كان هذا النوع من الزوجات نادر أم لا لأني لم أجرب غير زوجتي ولم أسال عن الباقين .. الحمدله على كل حال.

هههه جنك تتكلم عني
يمكن انته زوجي

ههههه خليتيني اتصل لزوجتي ، بس طلعت ما تدري عن الموضوع ، الله يوفقش مع زوجش

هذا يعتمد على شخصية الزوج ،اذا كان مايرحم ولايبي الرحمة ؛مايسوي ميزانية ولاتخطيط ولايسمح لزوجته

في النهاية هذا زوجهاااااااااا المفروض ما تضغطه لو عنده بيعطيها
استغرب من البنات الي حتى مع والدينهم يتهاوشون وياهم اذا ما وفروا ليهم شي معين
وما يتفهمون الوضع المادي للاهل
محاباة لصديقاتهم لازم يكون عندهم نفس الحاجة

محد يبي يعيش بسيط .. المظاهر و الفخفخة ذبحونا ، محد يرحم احد لا ازواج يرحمون بعض ولا عيال يرحمون ابوهم و لا اهل ولا اصدقاء يرحمون من النظرات الدونية و الاستهزاء في اللبس البسيط و الماركات المتواضعة. المرأة اقل تحمل لهذي النظرات والكلام السم الي يتفلت وقت مجالس النفاق والفشار ولا مافي احد يحب يخسر فلوس عشان يخسر فلوس .. لكن العاقلة تقاطع هالاشكال و ماتهتم بكلامهم وتسوي الي يريحها وتعيش قانعة. والله و بالله يوم قاطعت هالاشكال شفت ان مو ناقصني شي كل شي عندي بس مو ماركة فلان ! محد بيموت بدونها تره

اني كنت عايشه ومعيشة نفسي برفاهيه يعني اي شي خاطري فيه اخذه ..
تزوجت واحد على قد حاله وبعد الزواج حسيت بضيق ببالبداية بس بعدين حمدت ربي وشكرته كنا ساكنين في غرفه في بيت ابوه وبعدين اشوي اشوي اتوسعنا لشقه صغيره ورزقنا الله باجمل عطاياه وصارت مصاريف واجد حفاضات دبل وحليب دبل وضغط بس ماعمري اشتكيت ولا اتطلبت اتغيرت الزواج غيرني واكيد الحين زوجي يقرأ الحجي ????
وان شاء الله اشتغل ونتساعد ونتكاتف مو غلط الزوجهه تساعد زوجها

الاقتراض لقطاء الحاجات هو واحد ون اسوء القيود الاقتصادية التي تؤدي الى الفقر. للأسف مفهوم السلقة و الاقتراض اليوم اصبح مفهوم خطاء . حيث نسى الناس مبدء العيش الكريم على الإمكانيات المتوفرة و المثابرة والقناعة والصبر و الادخار و اخذو الطريق الاسهل و الاسوء وهو ينتج الأسر الاقتصادي للآباء و الفساد الذهني و القيم الخاطئه عند الأبناء. فالزوجة التي تصنع كل هذا لطلباتها و عدم مساندتها لزوجها مجرمة بحقه و حق ابناءها و حق المجتمع. للأسف حتي الدين الاسلامي الكريم لا يحبذ و يشجع هذا المنهج ????

مافي على الملجاويات .. قناعة وبساطة وطيبة قلب وتواضع وتقدر ظروف الزوج ، وتعطي الحب بكل صدق، واذا حبت ترفه عن روحها تروح الساحل تشم هواء والاولاد على المراجحين و لا تتدلع وتتشرط ولا تدمن مجمعات ومطاعم ولا هم يحزنون

اعرف وحده ملجاوية من الجيران يعنني
مسوية روحها هاي هاي ماتبغى اله في مرمريز الكبيره و مهرها كان ٢٥٠٠ وغير الذهب والفخفخه ومسوية لها جلوتين في صاله وفي بيت عمها
وغير هذا اكي عمتها تطخن عليها اتقول فلست ولدي ماخلت شي اله تبيه

اني بعد اخوي تقدم اليوحدة مثل ما يقول ....واخوي يشتغل في بنك وراهي الحمد لله وجاهز عنده شقة وكل شي بس يوم شافها تتفلسف عليه وتتامر خلاها وراح لوحدة غير وسوا للبنت الي راح ليها اكثر من ....لان ديك متفلسفة ومو شايفة خير اصلا ديك بنت خير لكن ماطلبت مثل البنت الكحيانة

سلامون عليكوم✌????
موضوع اليوم جداً ممتاز شركراً جزيلاً على الطرح????????
الحمدالله وشكرالله على نعمة اللي انا فيها وغافل عنها بعض الشيئ نعمة الزوجة القنوعة الطيبة الصابرة انا ادري ومتأكد زوجتي ماراح تدري عن الكلام ده اللي اكتبة بس بختصار زوجتي فعلاً من العمل النادرة في الوجود مو بس في ده الموضوع المطروح بس بختصار هي قطعة من الجنة ربي وهبها لي على طبق من ذهب شكراً لله عليكي يامملكة الصبر❤️
مع خالص حبي لكم اخواني واخواتي ⚜الفش⚜

اني قبل لااتزوج كنت عايشه حياتي برفاهيه تامه جدا والحمدلله
وبعد ماتززوجت اكتشفت ان زوجي حالته المادية ضعيفه بسبب القرض للبناي مايقدر يعطيني مصروف وثياب وطلعات ومطاعم .. مثل ماكنت متعوده اسوي
بس راعيته وتغيرت وعودت نفسي على حياة جديدده
الزواج غيرني قبل ماكنت افتكر ولا احس للفلوس
الحين بعد مارزقنا بطفلنا بعد حالتنا صارت جدا صعبه وقمننا نحاسب واجد وان شاء الله الله يقدررني واشتغل وانتساعد

وين الحين مافي قنوعات ماعندك ودتك محاكم . والبركة في امها وابوها يلي يحدونها وبعدين تطلق وتتوهق

مو نادره

لو المرأه البحرينه المتفهمة لظروف زوجها الماديه الصعبه نادره جان محد من الرجال البحرينين تروج بحرينية المرأه البحرينيه مثال للصبر والإيمان والاحتساب الحمدلله

اني صابره على زوجي لان احبه كل مكان ديون بس الله كريم اللي يساعدون وااجد فيهم الخير ومحد يموت جوع حتى لو ماعندنه ولاروبيه

أني من أشتغلت زوجي قام يحافلني على كل شي مصروفي ومصروف بناتي واحتياجاتهم كلها من عندي . . اي شي يخترب في البيت اشتريه غساله ثلاجه مكيف .. رغم راتبي ضعيف بس اني مو مسرفه أهم شي عندي بناتي ما يقصرهم شي .. وزوجي يعمل عمل حر كل شي يطلعه لنفسه يبدل سياراته ياخد كل شي بخاطره.. قلت ليه بالعيد عطني فلوس اشتري ثياب للبنات اتخيلوا عطاني عشرة دينار .. قلت ليه خلها عندك الله لا يحوجنا لك ومنها اخدت عهد ما اطلب شي منه وخله فلوسه له .. واني الله بيآجرني على كل شي سبحانه ربي ما يضيع شي عنده ... آه يا قلبي

حقوي عايشه وياه بعد ?
انتين تشترين وتصرفين وكل شي
وبعد تبينن اولاد منه
ماقولش انفصلس بس صراحه هذا غير مؤهل للمسؤوليه

الرجل الا ماله دور في حياتش ولا يضيف لش مو مضطرة تقعدين وياه، في كل الاحوال شايلة نفسش بنفسش

نفس الحال

أني عايشة نفس الظروف بس المشكلة لما أهله يتعاملون ويايي على أساس ان كل الخير اللي أني فيه من عند ولدهم

زائر 89
اييي
نفس وضعش
يمشي بسياره اني مطلعتنها
وداك اليوم قدامهم يقول بعرس
قالت ليه أخته عندك فلوس
قاليها ناس واجد يرضون ببلاش يبغون بس رجل
لكن غلطتي اخدته ماكلفت عليه بشي
حتى مهر ما اخذت

انا أم عاملة ومن جذي ما آخذ ولافلس من زوجي وهو مرتاح من هذا الشي وعاجبنه
اشتري لي ولاولادي كل الاحتياجات واحياناً لما اشوف البيت يصفر آخذ ماجلة
مابيه يصرف ولا ابيه يعطيني الحمدلله ماني محتاجة وادري احياناً مو قادر بس يحسسني انه يبي يعطيني محتاجة احس ان وده يصرف علينا بس مايقدر ومحتاجة انه يراويني ان فلوسه ماتروح على القهاوي والهرار احنا اولي فيهم
فوق هذا كل ما صار ضيق قالوا له مرتك تشتغل وانته تشتغل مالت عليكم معاشنا اثنينا مايجي حتى 500 وعلينا قروض واجار وغيره
لك الحمد والشكر ياربي

تسوي روحها صبورة.. وعند اي مشكلة تصير تصيح عند أهلها ما يطلعني مقصر علي وهي ما تخلي محل ما تروحه مع ربعها وأهلها وانا المحروم.. وانا احاول اغطي المصاريف على قد معاشي وما ابخل عليها

والله احس قليل كلش
انا زوجتي مصروف جيبها بروحها بدون اغراض العيد و المناسبات تصرف ٢٠٠ دينار
و تجي تتحلطم نبي و مايكفي و مادري شنو و على فكرة مصاريف سيارتها انا ادفعهم كامل و تلفون و فساتين و هداية ربعها و اخرتها تجي تتحلطم مايكفي ٢٠٠ دينار حقها بس
و مصاريف البيت بروحهم من اكل و شرب و مطاعم و اي شي في البيت من عندي مادري ويش تسوي فيهم ؟؟!

ياعلي صدمتني تدري ان زوجي عمري ماطلبت منه مصروف يمشي ليي بشكل شهري لان اعرف ظروفه
بس اكبر مبلغ خذيته في حياتي من عنده حقي هو ٢٠ دينار
اما ثياب ماثياب نطلع مع بعض نتشرى بس مستحيل اطلب منه مبلغ اكث، من ٢٠
زوجتك واااااجد متفلسفه الله يرزق زوجي ويوسع علينا على صبرنا

شوي شوي عليه لاتحرضينه على مرته ..

اني ماجبت طاري مرته وش الي احرض مااحرض
بس انصدمت ان في ناس جذي
الحمدلله الحمدلله على كل النعم

الصراحة زوجتك واجد مسرفة أو لازم تشوف لك حل للموضوع مع اني اقول الين عندك بيزات حاول تدلع زوجتك بس كل شي لية حدود

تزوجت شخص طيب محترم كان مستواه المادي جيد والحمد لله خلال أشهر من الزواج ارتفع مستوانا المادي إلى أضعاف أضعاف وعشنا في هناء ورخاء وسخاء لنا ولمن حولنا كنا نساعد الكثيرين إلى درجة بعض الأشخاص من الأسر المحتاجة يهاتفوننا بشكل شهري للحصول على مساعدات شهرية ثابتة ، وفجأة وبعد عشر سنوات مرض زوجي فجأة وبارت تجارته وأغلق شركته لعدم قدرته على متابعتها وتراكمت ديونه بشكل كبير حتى الآن، ومنذ حوالي 3 سنوات ونحن نعاني من قلة الرزق والمرض وللأسف من كانوا حولنا اختفوا جميعا والله المستعان

الله كريم

ونعم بالله ، شكرا لكم

يرزق من يشاء بغير حساب
رزقكم خلص احمدو ربكم على ماكنتم فيه من نعم وعلى مااصبححتم به

ان هذا لرزقنا ماله من نفاذ
شلون رزقهم خلص ويش قصدك
رزق الله ما يخلص ابدا
الله يوسع علينا وعليهم يارب

الله يعطي كل شخص رزق محدد في شي
يمكن خلص رزقهم من هذا المشرروع
والله بيرزقهم اكيد ونعم بالله
بس لكل شيئ سبب

من قال بأن رزق الله ينتهي!! رزق الله ليس له حدود لا في الأرض ولا في السماء، وما حدث هو عين والعين حق ومذكورة في القرآن

من واقع المجتمع البحريني من عندهم وضع مالي سيء حياتهم افضل من المقتدرين ماليا تشوفهم كل يوم مطعم و كل يوم في السعودية على الجسر من اجل التسوق و كل يوم رحلة دينية ما هو السر لا ادري يمكن مشتركين في جمعيات او عندهم دخل اضافي .. (ام محمود)

حتى الفقراء لم يسلمو من شرك و حسدك و عينك التي تشبه في حدتها عين الصقر .. حرام يا امرأه ما تقوليه .. هناك اناس معوزين يضغطون على انفسهم حتى يرفهوا عن اطفالهم و لو مرة واحده في الشهر ليتناولو فيها وجبه بمطعم…

عااااد وش يفهمها
عندها فلل وخشم وسيارات وماتتنول تركب في صالون تبي كله جييب
وفوق هذا حاسدة لفقيرو ان يسافر السعودية عبالها امريكا رايح
وماتبغاه يدش مطعم بس حقها هي

يمكن لأنهم يحسبون ألف حساب للبيزات عجل تبينهم ينحبسون في لبيوت لان وضعهم سيئ هذا يسمونه التدبير السليم للراتب
السعودية مو رايحين فرنسا ولا امريكا حق فللهم وسياراتهم الفخمه

عندهم حسن التدبير .. على مطاعم بروحون بطلبون ب ١٠ دينار مو مطاعم ب ٣٠ دينار ع نتفه دياجه و هرار
يشترون ثياب القطعه ب ١٠ ريال ب ٢٠ ريال و لا يروحون لستي سنتر او سيف ياخدون القطعه ب ٣٠ دينار
اما بنسبه لرححلات الدينيه يشوفون متى مناسب و يروحون مو وقت الذروه السعر يكون النص
هي الناس الا تفهم و لا تخلي التسويق الاعلامي و الفشخره تسيطر عليهم .. يمدون رجولهم ع قد لحافهم بابسط الاشياء
مو لازم الواحد يستانس بالشي الغالي .. ساعات رخيص يكون سر سعاده

جفت جيفه صدق لين قال المثل محسود الميت على موتت الجمعة

لوما الحسد مامات احد عندش فلل في جميع انحاء العالم وسيارات وخدم و وصيفات وتطالعين الفقراء في لقمتهم

خرفتين عفر حبيبتي السعودية الي حاسدتنهم عليها يروحونها لان الاسعار هناك ارخص من هني فهمتين حجية والمطاعم الي تتكلمين عنها ابو جم مثلا احنه على قدنا حدنا ندفع لمطعم لمرة وحدة بالكثير 20 وبعض الاشخاص كلش بعد ما يقدرون انجي للزيارات الدينية تفكيرش مثل الي ويايي بالشغل حسد وحقد يسافرون تركيا ومصر وغيرها واروبا في السنة مرة واني اسافر يمكن ثلاث او اربع مرات في السنة للمدينة المنورة بس زيارة مااشتري شي بس اكلي وهدايا بسيطة جدا في نظرش من الي يدفع اكثر ناس مرضى نفسيا وحسودة ادعوا الله يرزق المؤمنيين

وعلى فكرمن واقع خبرة واختلاط مع المقتدرين هم اكثر ناس يتحلطمون على اوضاعهم المادية كل ما عندهم وهم ساكنيين في بيوت واولادهم في مدارس داخلية يدفعون ليهم مبالغ وقدرها بعدين يطلع لك ما يسمى بالمقتدر ماديا ويقول ما عندي وانه وانه وديون وديون حبيبي ديونك اشتريت فيها بيت العمر غيرك غرفة ما عنده وينطر الاسكان عشرين سنة يالله يحصل بعد زرنوق والمدارس الداخلية الي كاسر ظهرك فيها بدل التفشخر والتفلسف اتركخا وتصير امورك احسن ما يكون اتكلم من واقع تجربة وشايفة بعيوني وايي بالشغل الله يرزق المؤمنيين يا رب

أي والله في هاذا الزمن و الوقت عملة نادرة.

أني وحده راتبي عند زوجي
وهالشي غلط بغلط
ولا اصرف ولا شي
هو لي يصرف وهو لي أيده فرطه
يرفع ضغطي
ولو ما أخش بيزتين من وراه
حتى مصاريف مدارس الجهال اتروح
وش اقول وش اخلي

اذا كنتين تتكلمين جد فانتين انسانه غلطانه
وماعندش شخصيه
ليش اتسلمينه الخيط والمخيط
ماصدق الحجي صراحه

الا صدق
وناس وااااجد مثلها اا
اي غلطانه ومليون غلطاااانه

انا شخصيآ مريت بضروف صعبه جدآ كنت عاطل عن العمل لمدة 7 شهور وزوجتي صبرت معي ولم تطلب مني دينار واحد وكنت اخجل واتقزم واستصغر نفسي امام رقيها ،، من سعادة الرجل في حياته " الدار الوسيعه والزوجه المطيعه " التي تطيع زوجها وتصبر عليه في اصعب الضروف حتى يوسع الله في رزقهم

با التاكيد
اعتاد بعلي ان يناديني با الديناصور لا لضخامة جسمي الذي من خلاله اشبه الديناصور و انما لان النساء القنوعات الصابرات على ازواجهن امثالي انقرضن و لم يعد لهن وجود,لم اذكر يوما اني ضغطت عليه في امر او جعلته يقترض من بنك بل انا اعطيه جل راتبي.. ام محمود

ههههه والله حددي موقفش
مرة اتقولين اله تساعد رجلها يعرس عليها
ومرة تهرين وش سالفتش ياام محمود ?

هذه ام محمود المزيفة متى ستعرفون الفرق بيني و بينها هل يوجد عاقل يستخدم كلمة ديناصورات هههه (ام محمود)

عندش انفصام بالشخصيه اقول اكتبي باسم صباح الفردان عشان الكل يعرف انش انتين هذي وخلي ام محمود المزيفه بروحها على قولتش

بالضبط تعاني من انفصام و مشاكل نفسية و تتخيل يكتبون باسمها و بانها محور الكون من فاضي يضيع وقته ويقعد يهر غيرها ام العريف عشان تلفت الانتباه

البساطة
نحن في زمن الماديات والمطالع ! أحيانا ترتبط بفتاة من نفسها قنوعه فتراعي حالتك المادية، وأحيانا العكس تريد كل شي لذا من المهم إخبار الفتاة بالمستوى المادي الحقيقي للشاب في المقابلة ويجب تنظيم دورات ماقبل الخطوبة التي تطلعهن على مراعاة الحالة المادية للزوج .

الاقتراض من الاهل و الاصدقاء من اجل تدليع الزوجة و شراء لها تلفون اخر موديل او فستان غالي لحضور حفل زواج او حفل عيد ميلاد او من اجل السفر و الشو والاستعراض في مواقع المتواصل الاجتماعي و تحمل الزوج فوق طاقته من اجل ملكة الجمال انا اجده من السخف و النفاق .. (ام محمود)

الحمد لله اذا كان عنده يعطي بسخاء واني مو من النساء اللي يدهم مشخوله احتفظ بالفلوس ووقت العوزه اطلعها واحاول اشتري اغراض اللي نحتاجها فى وقت التخفيضات وخصوصا اغراض تجهيزات المدارس والعيد وهو يعرف اني اخش الفلوس وادخل جمعيات صغيره للعوزه الوحده لازم تتعلم الادخار ولو خمسة دينار والله يرحمش يايمة دائما تقول المال من خريط مجمع

الصراحة مريت كزوج بفترة ضيق مادي .. زوجتي بدل ما تتفهم قامت تكثر من طلباتها و وتصر ان تروح المطعم الفلاني الغالي و تشتري كل ما يحلو لها .. و فوق هذا بعد تقول انك مقصر و لا تصرف .. و شوف الناس شلون يصرفون ع زوجاتهم .. لو يرجع بي الزمن ما اتزوج الا قروية حياوية .. مو مال هالزمن من وقت المقابلة تشوفها حاطة رجول ع رجول ولا حيا ولا انوثة .. راح زمن القناعة راااااح

زائر 6
فعلا ما تستحي
أحد يقول عن مرته جدي
على أساس ماخده لك متمدنه
كلكم تاخذون من قرى
وش هالهرير

الاخ بالعكس يمدح القرويات

اني مواليدد ٩١
ماتطلبت على زوجي مهر ديك الحسبه ولا صالة ....وفندق .....ولا سفر ولا حتى ذهب
هو منع ومن نفسه عطاني مهر ١٠٠٠ دينار فقط ألف دينار
مو الكل جذي لاتجمع للحين الديرة فيها بنات طيبين

اولآ اذا كنت لهدرجه مقاسي من زوجتك حطها بالأمر لواقع وصارحها يمكن تتغير
ثانيا يمكن انت ماترد لها طلب وععشان جذي اتعودت
وثالثا عيب يعني كل الاخلاق السيئه بزوجتك تذكرها لنا و قدامها ماتخبرها بشي اذا مو عاجيتنك رجعها بيت اهلها بكرامتها

اضحكون ناس اذا يكتبون عيب ووو ترى احنه ما نعرفها وعادي لو كتب شنو يبغي هو مجرد يقول عن حياته وشلون ماشية وبالنهاية كل واحد بيروح لحال سبيله لا تندمجون في الدور واجد ههههه

زوجتي دائماً تطبق هذا المثل : أقوله تيس يقول احلبه !!
أقول ليها مفلس تقول أدري .. بس هذي حاجات ضرورية روح جيبها !!!! هذا وهي (تدري) اني مفلس ؛ هذا لو شايفة عندي دينار ويش بتسوي ؟؟ ويا ليت الحاجات اللي تبيها فعلاً ضرورية ، كماليات مثل اللي عند اختها وصديقتها وتبي تقلدهم ، أنا ويش اسوي ؟ أروح ابوق يعني ؟؟؟؟

بالنسبة لي تزوجت رجل لا يملك شيئا إلا غرفة في بيت أهله
وشيئا فشيئا زاده الله من فضله وكفانا مؤنة الناس
الحمد لله على كل نعمة
"خذوهم فقراء يغنيهم الله من فضله "

لا ليس عملة نادرة موجودات هناك زوجات كافحن من اجل ازواجهن و تحملن المصاعب المادية و عملن في وظائف او اعمال لا تناسبهن مثل الخدمة في المنازل و الطبخ وعمل حساب في الانستغرام و نجحن في المشروع و لكن المشكلة الزوج عندما يشتد ساعده و يكون عنده مبلغ مالي كبير قد يخون .. (ام محمود)

يوم امس ظلمتيني و افتريتي علي بأني من يكتب عنك تعليقات مثيره للسخريه و انا بريئ منها برأة الذئب من دم يوسف .. فقد كان دوامي نوبة اخر الليل و عدت للبيت متعب و لم اشارك بأي تعليق,تقولين انك ملتزمه و تعرفين الحلال من الحرام كيف جزمتي اني انا من يهاجمك و يستهزئ فيك ?? ابن النبيه صالح

يقال من كان بيته من زجاج فحذاري ان يحذف الناس با الحجاره .. ابن النبيه صالح

اسفة اقبل اعتذاري يا ابن النبيه صالح .. الذي حدث كثرة المداخلات و التعليقات السلبية و الهمجية و ناس قليلة ادب و لا تعرف الاحترام هل يرضون هذا الكلام الجارح الذي يوجهونه لي لامهاتهم و لزوجاتهم اللي يقول افعى سامة و اللي يقول ام العريف اخجلوا شوي وانا المربية الفاضلة (ام محمود)

اقبل اعتذارك يا ام محمود .. ثقي بأني سأكون لك اخا و سند مدافعا عنك في كل الاوقات و في احلك الظروف .. ولد النبيه صالح

انا الان في طريقي الى فراشي بعد ليلة عصيبه ذقت من خلالها الامربن بعد ان كابدت فيها السهر و التعب في عملي فما اقول لك الا اكتبي ما تشائي .. و لكن لنا لقاء

الحياة الزوجية أخذ و عطاء و تعاون و تكاتف و احساس باالاخر الزوجة الموظفة تمر عليها ظروف صعبة ماليا ونفسيا و قد يساعدها الغريب و الزوج لا يتفاعل و لا يحس ب الازمة .. اعرف نساء ساعدوا ازواجهم بقرض من البنك لبناء بيت العمر و بعد ذلك رماها و تزوج بالزوجة الجديدة .. (ام محمود)

بلا هرار يا ام محمود
انا بعد اعرف رب اسره يشتري ماچلت البيت وتروح مرته المطبخ وتشيل الماچله وتوديها بيت ابوها ! بدون علم رجل !!!

ام محمود شكلش حدش اموصلة من رجلش ومعاملتة الزفته
لاتكتبين رجاء ترى مو كل النساء والرجال مثل تفكيرش او حياتكم

ليكووووووون ماخذ الثانيه ابووو ........

اليوم التعليقات ضدي بها الكثير من الحقد و المرض النفسي و المغالطات و فاهمين غلط اقول لكم ان زوجي مثالي مع الاولاد و معي و هو نادر الوجود و عصامي و يملك اكثر من مهنة و ماهر فيها و كل انسان عندما يغضب تحدث هفوات و هذا موجود في كل الزيجات و في كل العالم .. (ام محمود)

لا ادري ما هذا الذكاء و العبقرية اذا اكتب ان هناك زوجات ساعدن ازواجهن ب الاف الدنانير و كانت المكافأة انه تزوج عليها .. هل يعني ان زوجي تزوج علي و اذا اكتب عن حياة الفقراء في البحرين و انها افضل احيانا من الاغنياء يقولون اني احسدهم !! روحوا تعالجوا مللتونا بالتعليقات .. (ام محمود

صحيح كلام الاخت وعندنا عينات واجد المراة تساعده وتصرف عليه بعد وبعدين اذا وقف على رجوله يتركها ويروح لغيرها اشوة نظام وزارة الاسكان هالسنيين حفظ حق من حقوق المراة والا الاول المراة تدفع في بيت العمر وينكتب باسم الزوج وهي يمكن دافعة ثلاثة ارباعه بعدين الزوج يتزوج عليها ويطردها هي واولادها في حالات لنساء يسوون جذي بس قليل جدا مقارنة للرجال لا تدشون وتقولون حياتي والهرار وزوجي مغربلني ترى انا مو متزوجة بس اقول واقع بعض الاشخاص الي اعرفهم بس طبعا ما نعمم الفكرة لان في نساء ورجال ينحطون على جرح يطيب

مافي على بحرينيات
صبورة على كل شي اهم شي ظل زوجها على رأسها
الله يحفظ زوجي اهم شي صحتة المال مو كل شي صحة زوجي اهم يكفي كل يوم لقمة عيش يأكلنا الحمدالله على كل حال والله يخلي لينا

تشتكي لي إحداهن ،أعيش مع خطيبي كل يوم بيومه في النقود ،لولا علاقتها بي رسمية لقلت لها : خطيبك للتو خرج من السجن مع هذا طلبتي مهر مرتفع ،و ملجة وحفل لم تتنازلي عن شي وكل ماصرف من نقود عليك من قرض والده ، والآن تشتكين الحال !

أني زوجي كان فقير يشتغل ب200 دينار،راح لأربع بنات قبلي ما وافقو عليه بحجة أنه ما يقدر يفتح بيت والحمد لله استمريت وياه هو يشتغل ويدرس صبرت وياه في حجرة وكان عنده قرض والحين صار مهندس عقب ماكمل دراسته وطلعنا بشقة والحين يبني بيت وكل سنة نسافر.. وفتح ليي حساب كل شهر يحط فيه 300 دينار وغير الي يعطيني اياهالله يخليه ليي دخر
خله يفيدهم تكبرهم وعوايلهم..

الله
الله يسعدكم ويزيدكم

انا اقول ليكم وبكل فخر اني عمله نادره تزوجت رجل عقيم وصبرت عليه ١٧ سنه وقصتي تعور القلب خديته علي قد حاله لانه الماده ما تهمني وصبرت علي ظروف صعبه وياه لحد ما الله وسع علينا وشتغلت وشاركته في بناء بيت الكل يحسدنا عليه عمري ما ثقلت عليه با الطلبات كل اللي في خاطري اشتري من راتبي وبعد صبر سنين وحرمان من الذريه راح تزوج علي ،عشان جذي انا أوافق مع كل الي تقول عيشي معه زوجه فقط ولا تعطون اكثر من المطلوب