قربة الى الله تعالى واهل البيت
خل الكل يجي وخاصة (الضعيف ماديا) عليهم بالعالفية
هاذي شيمنا

اول شي اذا نضرنا الى الشخص على انه بيقدم الواجب سواء في تعزية او زواج ما اعتقد الشرع يحرم هذا الشي بل يحث على التواصل بين الناس وخصوصا في المناسبات الاجتماعية واما اذا الشخص بيروح حق البطين فاخلاقيا غير صحيح اما شرعا انا ما اقدر افتي من عندي .
عرسي صار في شهر 5 وشفت اشخاص واجد انا ما اعرفهم بالعكس استانست ان الحضور وصل لهذا العدد واستانست ان فرحتي صارت لناس واجد وعن الاكل ولله الحمد خير من الله موجود والمفروض المعرس او اهله ما ينضرون للناس ع انهم حضرو للاكل فقط من باب احمل اخيك المؤمن على سبعين محمل وعن الطعام /وقال (ص): " الضيف إذا جاء فنزل بالقوم، جاء برزقه معه من السماء، فإذا أكل غفر الله لهم بنزوله ". وقال: " ما من ضيف حل بقوم إلا ورزقه في حجره ". وقال: " من كان يؤمن بالله واليوم الآخر فليكرم ضيفه ". وقال (ص): " لا تزال أمتي بخير: ما تحابوا، وأدوا الأمانة، واجتنبوا الحرام، وأقرأوا الضيف، وأقاموا الصلاة، وآتوا الزكاة، فإذا لم يفعلوا ذلك ابتلوا بالقحط والسنين ". يعني مو رزة وجه .

احيانا الزواج يكون عائلي يمكن بيزاتهم على قدهم او هم ما يحبون الغرب فالي يروح بلا عزيمه هذا تطفل

العزاء ما يحتاج ليه عزيمه هاي واجب
الاعراس لازم عزيمه بالذات النساء لانهم يكونون بكامل زينتهم ويرقصون وغيرها وبعض البنات الله يحفظهم يقعدون يصورون وينشرون غير ان العدد في الصاله يكون محدود

دعوه الزواج للنساء بالعاده تكون خاصه وخصوصا احنا نعرف بصالات الاعراس البنات يكونون بكامل زينتهم فيمكن ماعزمو فلانه عشان يدرون هي تصور البنات او او فروحه العرس بدون عزيمه تطفل

من جه بلا عزيمه طلع بلا حشيمه
اذا زواج بكون تطفل لكن اذا عزاء فهذا واجب العزاء الناس تكون بحاله حزن وتحتاج من يواسيها

ابوي مايقبل يروح حتى لعرس واحد من ديرته الا اذا كان يعرفه حق المعرفة

بعض الا يروحون بدون عزيمة
هالفئة قليلة جدا بالعكس لو اكل
من طعام العرس لهم اجر ،
بالنسبة لي افوت اعراس كثيرة
ما اروح الا القريبين جدا فقط
وما احس له داعي نروح بدون عزيمة
بس الفقراء وضعهم غير وتثابون
اذا اكلوا من عندكم .

اي واحد او وحدة عندهم كرامه وعزة نفس مابروحون من غير دعوة

غير جائز شرعا اذا مافي دعوه

مرة دخلت صالة عرس بالغلط و بعدين اكتشفت اني غلطانة فبسرعة طلعت لأن آكلي هناك بكون حرام

انا نيتي ابارك لاخوتي المؤمنين افراحهم والحمد لله لست بحاجه للطعام ولكن بنية مخلصة مشاركة اهل بلدي و جلدتي ووطني افراحهم واحزانهم
ولا يجب ان نطالع الناس بسوء ظن
والاسلام يحث على ذلك
وما يدريك ببركة حضور واطعام مؤمن او فقير يتبارك الزواج !؟ ولا اشك في ذلك ابدا

اي صحيح كلامك بس احين الناس ما صارت تفكر جدي قامت تحايب وتشوف من يجي ومن يروح ومن معزوم ويش يوديني اني اذا اهلي الي شوي بعيدين ما عزموني مستحيل اروح ليهم لو سمعت بالغلط الا بعد اغراب لا بابامن راح بلا عزيمة قعد بلا حشيمة والله يهدي الجمييع يا رب

انا صاحبة التعليق الي فوق ترى انا مااغلطك بالعكس اغلط المجتمع ان يطالع للي يسوي الواجب ان متطفل وما يستحي ويجي بدون عزيمة حلو منك انك تشارك الناس افراحهاواحزانها لكن ويش نسوي الزمن جدي صار والناس يا دافع البلا تفكر بالغلط كنا نفكر جدي يوم كنا صغار يوم كبرنا فهمنا وعقلنا وناس صاروا عجايز وللحين جدي الله يجيرنا يا رب

اللي اعرفه ان شرعا ما يجوز ان الواحد يروح عرس الدعوة خاصة الا اذا كان معزوم و اذا كانت الدعوة عامة ما يجوز اني اروح غير في منطقتي لأنها بتكون عامة لأهل المنطقة و بس ... و بالنسبة لأهل المعرس و العروس المفروض ما يدققون واجد على الحضور لأن ما يسوى احد يطلع من عندك زعلان لأنك جارحنه بكلمة حتى لو تدري انه جاي بدون عزيمة

سﻻمي وتحياتي

إلى يروح ويأكل وهو مومعزوم فالذي أكلة حرام .. هذا مفروغ منه..وغير اخلاقي وبعضهم مايستحي بعد يروح يعزم ربعه مايعرف الحﻻل من الحرام.

عادةً الدعوات الرجالية تكون عامة , أما النسائية تكون خاصة ومقتصرة على عدد معين
لان الفلوس اللي دافعينها المعاريس لعدد معين للكراسي وللاكل
واذا جو ناس بلا عزيمة يعني زيادة ع عدد المدعوين وبياخذون حق غيرهم
غير عن الاحراج اللي بحطون فيه اهل المعاريس
اما اعرس الرجال عادي لان عادةً تكون عامة ومفتوحة
الفواتح ما تكون خاصة ابداً وتكون عامة للطرفين

الفواتح هادي شي ما يحتاج عزيمه ..والاعراس مال ديرتنا كله الدعوه عامه يعني عمري ماجربت أروح عرس واحد ماعرفه ...بس من وجهة نظري عيب الواحد يطالع الثاني ويقول فلان معزوم وفلان لا يعني ف اغلب الاعراس بعدين يقطون الاكل يمكن الي حضر بلا عزيمه انسان فقي وعلى باب الله تكسب فيه اجر وثواب احسن ... ( مجرد رأي)

من راح بلا عزيمه قعد بلا حشيمه ..مثل معروف والمعاريس بعضهم الدعوه عامه يحق للكل يجي اما اذا خاصه احس تطفل

عادي اذا لم تكن الحفلة عائلية او صغيرة ، بالعكس ثواب ان تطعم غيرك من رزقك . الله يرزق كل محتاج وفقير يا رب .

يسوون حفلة العرس ويسوون روحهم اغنياء وبعدين لما الفقارى يجوون ! يقعدون يحسدون الفقارى على هاللقمة اله ياكلونها! ..

اذا انتونه مو قد حفلات عرس عجل ليش اتسوون روحكم أغنياء؟
قولوا احنى مو قد حفلات العرس واتواضعوا بدل ما تتهاوشون ويا خلق الله واتفشلونهم واتذمونهم!
استروا على روحكم واستروا على الناس! سووا شي خاص وانتهى الامر!
ليش قاعدين تتهاوشون مع الاف الناس؟ الاف الناس في المجتمع جذي طبيعتهم يحظرون بلا عزيمة وانتون تعرفون انه هذا الشي ما بيتغير!
عجل العبوا حسب قواعد المجتمع!
اكو اهلي يوزعون شربت وعيوش على المواتم كل مناسبه وما انريد جزاء ولا شكور! ما كان لله ينموا وما كان لغير الله يخبوا! الدعوه عامه!

السلام عليكم جميعا
المجتمع البحريني ابتلش بعصابات ومافيا الأعراس مثلا تلاقي 5 إلى 6 أشخاص يتخابرون بينهم إذا كان هناك زواج فيذهبون من غير دعوة وعلى طول يتوجهون للبوفيه من غير حتى تقديم التهنئة للعريس ووالده ووالد العروس وبدأون بألتهام كل ما يستطيعون التهامه والمحزن إنهم يملؤن الأطباق فوق حاجتهم وتراهم يملؤون جيوبهم بمعلبات المشروبات والعصير وتهريب الأكل يعني أكل بلوشي وسرقة وبذلك يحرمون بعض المدعويين الشرعيين من الحصول على الطعام
وهكذا كل ليلة في قاعة زواج أو في فندق به زواج ناس ما شافت خير

كل من يرى الناس بعين طبعه
كثير من الاحيان في وقت فراغي لذهب للمباركة بنية صادقة وحتى وان لم اعرف الشاب
فقط لاني احب مشاركت مؤمن افراحه والحمد لله لست بحاجة لعشاءه ولا بوفيهه
والسؤوال لماذا تضج مكبرات السماعات بالاناشيد ؟ اليس للاعلام ودعوة المؤمنين للمشاركة ؟!

من راحة بلا عزيمة حصل الذم والشتيمة
وبعد من راح بلا عزيمة جلس بلا حشيمة

أبي عبد الله (ع):
التواضع...أن تترك المراء وإن كنت محقا.
ملاحظة: الرواية مقتطعة والمراء يعني الجدال

بعض الرجال يروحون حق العيوش كأنه محسر و مو شايف خير و بعض النسوان يروحون حق يشوفون العروس ويش لابسة و هذليك لابسة فستان قصير و هذيك محنية عصاقيلها عشان يصير عندها موضوع تهدر فيه طول الاسبوع

ما شفنا هالظاهرة
والحين إذا الحفلة في الديرة تكون غالبًا الدعوة عااامة
اللي لفت انتباهي في الموضوع ( اللي تكلموا عن العزاء )
احنا متعودين الأفراح يعزمون
ما سمعنا بعد يعزمون في الأحزان !!!
الفواتح الكل يواسي أهل الفقيد

ياما قعدنا مع ناس ماهو بقصد الاختبار بصالات و نسألهم ك تعارف احنا من طرف أهل العروس أو المعرس و الي معانه قاعدين مايدرون عن اسامي العرسان ولا حتى يعرفون أهل العرسان يقولون وحده عازمتنا جارتنا وماجات!

ما ليهم دخل المعزومين عادي الشي الي تقولينه اكو احنه جاراتنا يعزمونا لعرس اولاد اختهم او اولاد خواتهم ونروح واحنه ما نعرف اسامي العروسين احنه مو غلطانيين بالنهاية تلقينا عزيمة من اهل العروسين الغلط في اهل المعاريس المفروض اذا ما يبغون احد ما يعزمون مو شرط اذا ما عرفنا اسامي احد العروسين يعني مو معزومين او جايين بس جدي

طبعا اذا كانت الحفلة خاصة قد يكون تتطفل، أما اذا كانت عامة وهي غالبا ما تكون مفتوحة في مجتمعنا للكل فلم يعلم أنها ﻻناس دون آخرين..
وفي الحفلة العامة والخاصة منهم مدعو ومنهم على أساس الواجب ومنهم ومنهم.... لمآرب ...ومنهم تغيير جو...

اذا كانت الدعوة عامة اروح للناس اللي اعرفهم بس، اما اذا كانت خاصة حتى لو اعرفه ما اروح.

انا واحد فقيروا صراحه! ساعات أكون جوعان وخاطري اكل شي زين! من جذي ساعات اروح عشان الأكل! وسامحوني! من تواضع لله رفعة! واستحي أقول اني فقيروا وخاطري اكل اكل اشويه زين مثل مال العرس! رحم الله والديكم وبارك الله فيكم وادام الله عليكم الافراح والمسرات! صراحه كلمة راز الوجه احسها مو لبقة! لو زين اشويه اخترتون كلمة احلى! جزاكم الله خير الجزاء!

عيب وحرام

يقولك فقيير .. اتقوله عيب ؟؟ والله العيب عليك وعلينا لان بيننا ناس ماتقدر تاكل واحنا ماندري عنهم

اي والله يقولك فقير يعني ويش يسوي يموت جوع انزين انتون اصحاب المعاريس وغيرهم حللوا اي احد يجي بدون عزيمة واحسبوها صدقة تكون لحفظ العروسين وتوفيقهم بالحياة انا احين جذي حتى لو اشوف احد ياخذ شي من عرس او شي اقول الله يفرج عنه ما ت دري ويش ظروفهم انا احلل وابري ذمة اي احد يجي معاريس عندي او عزيمة بدون دعوة وما يهمني اي شي والله يغني كل فقير يا رب ويفرج عن كل مهموم

عليك بالعافية
بالنسبة ليي اتمنى الكل يجيني حتى لو مو عازمنة وهذا من شيمنا
اما عن الشرع ما ادري خذها بالفحوى يا اخي وخاصة اذا فقير اما اذا محتال ونذل هذاك شي ثاني
ارحموا من في الارض يرحمكم من في السماء ودائما انوي التقرب الى الله تعالى و اهل البيت في عزايمكم وافراحكم واتراحكم

في ناس من أهالي المعرس أو العروس يعزمون اللي يعرفونهم بدون ما يخبرون العروسين ، شتقولون عنهم ؟

على قولتنا وجهه مقشر ..يا وجه استح عاد جيفه ترضى على نفسك تروح عرس بدون ما يعزمونك والله قوويه انا احيانا يكون صديقي معزوم على عرس ويقول ليي تعال ويايي عادي انته من صوبي وما اشتهي اروح جيفه تبغيني اروح جديه بدون عزيمه ..احراااج

العزاء في القرية نروح عادي وكذالك الزواج لأنه دعوة عامةفي البلد ما تحتاج لدعوة خاصة إلا إذا كنت من الأهل أو الأصدقاء توجه لك الدعوة الخاصة

محد يروح بلا عزيمة دعوات الزواج عامة تنشر في كل مكان على وسائل التواصل الحديثة ومكتوب الدعوة عامة الا ما يبقي الناس لا يطرش اعلانات حق احد في القروبات ايطرش واحد يدور البيوات يعطيه لستت الاسماء الا يبقيها

زوجتي أم كرش ماتخلي عزيمة فيها زحير وحفلات الصالات مال الحريم الا تروحها معزومة وغير معزومة يعني رازه الوجه قي كل حفلة يازعم عشان تهني المعاريس وهي في الحقيقة رايحة عشان الزحير والتصوير وسخافات الحريم الا تصير في الصالات واذا قلت ليها لاتروحين انتين مومعزومة تعصب وتغضب وتقول ليي انت ماتفهم في شغلات الحريم ولا يخصك منيأني باروح في سيارتي وانت خلك في البيت ويا الجهال في المقابل اذا صارت فاتحة لأحد الأقرباء ماترضى تروح وتقول ماتحب النكد يعني بس للحفلات استادة بس ادا شي فيه فواب ماتمبه تروح مخ كوطي

اصبر و صابر فالجنة موعدك

الله يساعد مرتك عليك

من ردك يبين أصلك

كلامك يدل على ضعف شخصيتك واختلال في الرجولة .. كلمتك ماتمشي ولا ليك شلطة يبو الشباب ؟؟ نصيحة روحوا موت أحسن

شكله كلامك كله جدب وتأليف

يقول المثل العزا بالعزا والعرس بالمادة
تقديم العزا مايحتاج عزيمه هدا واجب علينه سوا نعرف الشخص أو مانعرفه لكن الزواج أو اي مناسبة فرح فدعوا واجبه للحضور بدون الدعوا يكون تطفل وقلت أدب وفي ناس تعزم شخص يجيب وياه ربعه وجيرانه هدا النوع يازعم يعزم روحه بروحه

العرس بالمنادى مو المادة

خطأ مطبعي النون ماطلعت في الكتابه واعرف الامثال عدل بسك تدقيق

لا احضر اي حفلات الا بدعوى شخصية من اصحابها

البساطة
قرأت حديث لايستحضرني كتابته لايأمن المهانة من ذهب بلا دعوة .

من راح بلا عزيمة قعد بلا حشيمة

اعتبرها نوع من الغباء ..

العزاء واجب حتى لو ما اعرفهم وهم في الديرة اروح، لكن الزفاف .. لو ما يدعوني بالاسم يا فلان معزوم ما احب اروح ...

تطفل.
شخص ينعزم بروحه لحفلة زفاف يأخذ وياه الفريج .
لازم الشخص يتعلم الاتيكيت.

اني اذا عزموني اقول ليهم مااروح بروحي لازم على الاقل ويايي اختي اتملل عطوني الاذن اوديها اهلا وسهلا ما عطوني اعتذر عن الروحة ويش ليي اروح اقعد بروحي واوية هههههه

اني يعزموني و لا اروح ماليي بارض حفلات الأعراس و السخافات اللي تصير فيها

صباح الخير وياكم ربابو امي تقول ليكم ..الي راح بدون عزيمة راح وقعد بدون حشيمة ايووو عيب اني استحي

هذا يسمي ابو الواجب احسن من الجالس في بيت مثل المراه المعتده

يا خوك اذا رجال اوكي العزيمة شاملة وعامة بس للنسوان ما يصير تروح لان النسوان بلش ومن يشوفون وجه مو معزوم بتنفضح فليش الانسان يحط روحه في مواقف بايخة القعدة بالبيت ابرك واحسن

من راح بلا عزيمة طلع بلا حشيمة

هذا ماتعلمناه من الآباء والأجداد وسيتوارثه الأبناء والاحفاد .

من راح بلا عزيمه قعد بلا حشيمه يستاهل كل اسائه اللي يروح بلا عزيمه ويروح بس حق البلع وشحان الكرش والعقره واما العزاء واجب تقديمه لاهل المصاب وفيه الثواب

بصراحة ما اعتبر ان من الاخلاق ان تسيئ لشخص ياي يشاركك افراحك !؟ هل يجب الاستئذان قبل التهنئة؟؟ وان دل كلامك على شيء فقد دل على الشح .. لأن الطعام داااائمًا يفضِّل!!! شخصيا ما عمري رحت عرس بدون عزيمة ولو صار عرس عندنا ويت وحدة بدون عزيمة ما راح احرجها .. خلها مسكينة تاكل وش ورانا