مشكلة اللي مايعرف يدبر او يدور الرخيص
طايحين حتى في اغراض المدارس فشار و فخفخة ويش تبون يصير ؟ وياريت رواتبكم عدلة على هالسالفة

حق السفرات عندكم عاملين نفسكم سندباد و حق اخر التلفونات عندك ميوين روحكم ستيف جوبز و حق عيالكم مصاريف مدرسه تصيحون و هنا مربط الفرس

واجد مكلفة بالنسبة للعوائل التي لديها دخل محدود و اذا كان احد افرادها جامعي و الباقي طلبة في مدارس . يعني انت بتلحق الجامعي لو المدرس اقلها الجامعي فس السنة يبي ليه 700 و فوق اذا كان من طلبة جامعة البحرين تحصل المادة ب 25 دينار و الكتب اغلى و غير اذا مدراس بس تفصيل عباية وحدة ب 20 دينار و الشنط 10 و رايح و وتفصيل الملابس المدرسية كم تكلف . المفترض المدرسين يخففون من طلباتهم حاطين في بالهم الاهالي قاعده على كنز و تصرفه عليهم و على طلباتهم .

الأسعار الواردة في التعليقات أغلبها غير منطقية ومبالغ فيها بعض الشئ
تتفاوت كلفة التجهيزات للمدارس حسب الوضع المادي لكل أسرة
حسن التدبير مطلوب

عاد مكلفه ولا نار وشرار محد بيساعد الفقير الا رب العالمين

و اذا فتحت المدارس كل معلمة تبغي دفتر ابو 100 صفحة و بعض المعلمات في مدرسة بنتي طلبوا أكثر من دفتر للمادة الواحدة و تالي حتى 40 ورقة ما استخدموا منهم

*يا أيها الوسط .. أغلى شي صراحة(الجنطات)يعني من دينارين.. ثلاثةدنانير قبل بس جم سنة إلى فوق 15 دينار هالسنين المتأخرة أقول سعرها مبالغ فيه واجد.
*يوم اللي يلبسونها الجهال على ظهرهم تشوف ظهورهم ظهور العجايز كلهم محندبين وهذ خطير كلة بسبب هالكتب والعلم الزايد والمضغوط هذا لو يخلون هالكتب في سي دي مضغوط أبرك لينا
*أنا كولي أمر اذا أشيل الجنطة چني شايل طابوقة أبو أربعة من زود وزنها شلون هالصغار عجل خاصة اذا صعد الدرج بعد
*دعوة إلى المعنين في الجانب التعليمي بأن يراعوا هذا الجانب ويرحمون الصغار.

طبعا
و كل يوم و الثاني طلبوا شي غير و ما يتحصل الا في مكان واحد في البحرين لو يطلبون بيضة الديك او حليب الثور اريح لينا

خلكم من التعليقات تخيل الي بقوله بنتي أول سنة بالروضة
قماش المراييل 2 والاقمصة 2 بالخياط طلع 19 دينار + فلوس الشعار والكرفتة 5.500 دينار + 2 فانيلات رياضة 5.500 + 1 بنطلوون رياضة 2.800 دينار + درزن الجواريب 4 دينار + درزن هافات 3.500 + درزن شلحات 6 دينار + خرز وريش شعر 5 دينار المجموع = 51 دينار
شنطة الكتب و الاكل وعلبة الطعام وغرشة الماي والمقلمة = 12 دينار
الجواتي 2 رياضة طوال اليوم مراكض ولعب = 12 دينار
رسوم التسجيل 10 دينار
رسوم الكتب 50 دينار
مقدم شهرين 100 دينار
235 دينار

انا عندي ولد في المدرسه وبنت في الروضه لكن اشوفها مكلفه للحين مأخذت شئ بس شفت أسعار الشنط كنت بنجلط من ١٧ دينار ورايح غير ثياب الروضه اللي بتكون من محل مخصص مافي السوق نفس الموديل لان الروضه اتفقت مع هذا المحل للنصب علينا
والله المستعان ؛(

الله يرزق الجميع الخير، ويتمم كل أموركم

اللي يكلف اكثر شي الاغراض اللي يطلبونها طول السنة ، لو على مصاريف بداية السنة تقدر تخلي ليها ميزانية لكن ينكسر الظهر

كثيراً

مكلف ،ليس في ذلك شك.

تكاليف زايدة والاسعار نار اني فصلت الي بتي المريول الواحد 12 دينار للمرحلة الاعدادية والابتدائي 9 دينار والروضة بدلتين 25 دينار بدون الاقمصه

وين مفصلتهم على هالاسعار ????
اللي أخبره ان تفصيل المريول ب 4
وتفصيل القميص ب 3
والبنطلون 3 او 4
اسعارج وايد مبالغ فيهم
مخيطينهم بخيوط الذهب عفر

1 2
ديناار يعني نفس زي المدرسه الخاصه

انا فهمت قصدها الفلوس تشمل الخياطة مع القماش ..

المعاش ما عاش

كلها كم دينار ومنتف لألف جهة
العوين الله

نعم مكلفة ..
الشنط لا تقل عن 10 دينار
والاقمصة 3.5 الواحد
والبدلات الرياضية بالفميص 7.5 دينار
والجواتي لا يقل عن 7 دينار
يعني بنشتري اكثر من شنطة زقميص و جواتي
يطلع دبل ..
وغير خياط الزي المدرسي ..
خب الدفاتر والاقلام ووو حدث ولا حرج
((((( كلامي موجة للمدراسات البنات )))))
لا تطلبون اكثر من اللازم ..
المعلمين الرجال ...اهون منكم ... ويتفهمون ..
لدرجة ان الدفتر يستحدمة لفصل الثاني ..
اما انتون .. لازم دفاتر وهرار حق الفصل الثاني
واتطلبون حق الانشطة السخيفة الغالية ..

اني ادرس ثانوي
واخير البنات اقول لهم تبون دفتر طول الكورس أبو 100 أو تبون ملف
يختارون الملف لأن ال ردي طول الكورس انشطه وأوراق عمل
والثانوي كل كورس مواده غير عن الكورس الثاني

في معلمات يخيرون البنات سواء بالنسبة للأدوات او المشاريع بس الله يهديهم البنات يحبون يقلدون على بعض و لما يروحون البيت ما يقولون المعلمة خيرتنا ... يقولون الشي اللي في بالهن على أساس ان المعلمة طالبتنه ... يعني ممكن المعلمة تكون قابلة بأي مشروع ... تقوم بنت تسوي مجسم فالبنات يقولون لأمهاتهم المعلمة طالبة مجسم ... يقوم الصف كله يجيب مجسمات مع انه المعلمة ما حددت ... و عقب الأمهات يشتكون من غلاء المشاريع ... نصيحة لازم الام تسأل المعلمة شخصيا بدل ما تسمع لبنتها اللي في العادة تحب تقلد على صديقاتها

احنا نروح السعوديه كل سنه ناخذ من هناك لان واجد فرق الاسعار نفس جوده البضاعه بس السعر ارخص

اصلا السعوديه اسعارها مرتفعه مايسوى الواحد يروح مو بس القرطاسيه الدراسه الجامعات واجد ياخدون افلوس

امي ما تشتري لينه ماركات تدور وين العروض ووين الرخيص وتشتري بس كل شي غالي المعاش مثل ماهو فشي طبيعي يكون مكلف

فعلا مصاريف المدرسه مكلفه
البنات مصاريفهم اكثر من الاولاد
(مريولين+ فانيلتين+قميصين+صروال رياضي+عطر+جوتي عادي+جوتي رياضه+ جواريب+ شيلات+عبايه+ حقيبه+ملابس داخليه+واذا ابتدائي تحتاج تيجان وخرز+الخ .. هاي بس الضروريات بدون القرطاسيه)

وغير نص الفصل يطلبون اغراض لمشاريع واغراض تكلف ويلزمون الطلبة يجيبون في الاخير ينقطون هالمشاريع في الزباله

للحين صرفنا 200 دينار ولا كملنا وننتظر بعد طلبات المدرسات

تبااااالغون
وحده اقول 12 دينار مريول بنتها صراحه ما يدش مخي
مريول بنتي بمدرسة خاصه ب 9 ونص حكومه يخيطه ب 12 دينار

تكلفة الشخص الواحد مو اقل من ٥٠ دينار،حسبوها ويايي:
قميصين:٥
بانطلونين:١٥
بدلة رياضة:٦
شنطة:١٥ لانه مافي شنط اقل صراحة،حتى دكاكين لهنود رافعين الاسعار
جوتي:٧
جواريب: ١
هذا الحسبة كله من الرخيص بعد
الله يعين

قميصين 5 الحين ناخذهم من السرور على 4 او 4 و شوي و الجوراب دينار جيف بيلبسون واحد طول السنة

و الله ما اشوفها مكلفة
شنطة اب 6 دينار ، و جوتي اب 7 دينار ، شدة دفاتر بو 50 ورقة و شدة دفاتر بو 100 ورقة
و كارتون بنسل و كارتون ناشف ازرق و اسود
كلها ما اتيي 20 دينار
بخصوص الثياب بانطلونين و قميص و فانيلة و صروال رياضة اب 20 دينار كلهم
على فكرة هذلين الاغراض اكفونه حق طول السنة ( فصلين )

هالطلبات تكفي سنتين لو حالنا مثل قبل الحين المعلمات وحدة تبي فايل أحمر ووحدةتبي أزرق ومعلمه تبي دفتر ماليه وجود أصلا أما بالنسبة للملابس كلشي غالي ابسطها الحذاء قبل بثلاثة دينار لطول السنه الحين بعشرة وفوق مايتم شهرين

الفايل بكم ؟

50 فلس
100 فلس
الملفات رخاص بلا هرير
لو هي سفره ما قلتوا خسائر بتعليم أولادكم خساره كله تتفلسفوون قعدوهم بالبيت عجل
جم تدفعون لوجبة ماك أو باستا يم يم

الفايلات إلا يطلبونها من دينارين وفوق وإلي حاط ب50 و100فلس هالمحل أيام أمي وأبو الله يلعن أبو الفقر

ههههههه واجد مبسط الامور شكله ماعندك اولاد او انك في الاساس مو انت اللي تروح السوق وتشوف الاسعار
على كل حال (( توي مفصل لبناتي مرايل ابتدائي كل وحدة 2 )) ثنتينهم ب 50 دينار شو قاعد تحجي . هذا بعدون ملابس الرياضة . لكن الحمد لله رب العالمين وعليهم بالف عافية . والكلام يطول . دمتم بخير

صح كلامك

مريول ابتداءي ب 12 ونص
لالالا لالالا
مريول بنتي وخاص ب 9 ونص
تستوعبون وش تقولون

عليهم بالف عافية والله يوفقهم يارب
من على ايامنا الاشياء غالية كنا ثلاث
وللمراييل والاقمصة والحجبة والعبايات وثياب الرياضة وثياب الداخلية والجواريب والجواتي وجواتي الرياضة والعطور والشنطات والاغراض مال كل مادة بعضهم بس دفتر لكن غيرهم يبي دفتر وفايل بشكل معين والقرطاسية
كان يضيق خلقي على حال والدتي

شنو شنطة ب 6 اذا بس 20 دينار زين وغير البقية

زائر 74
شنطة ب 20
ليششش. إش هالفسق لي انتين فيه
حرام عليييش مو زين
لو قايله 10 ببلعها

شنطة ب 6 !!! ما في و اذا في بتنقص من أول أسبوع
و شنو قميص و فانيلة يعني قميص واحد يدامون ابه طول السنة واااو

اتفق إياش أو وياك
اني عندي بنتين وبمدرسه خاصه ما اصرف 750 دينار أو حتى 200 دينار
من وين تشترون انتو مال فشااار

مكلفة جدا

البنات مايبون الا شنطات من لايف ستايل
ودفاتر على باربي وربعها
واقلام كل الالوان
غير الملابس مريولين و اقمصة وفانيلات وبانطلون الرياضة
وصحيح طلبات المعلمات ماتخلص
بس بالنسبة للصبيان اقل تكلفة
لكن ولدي كل سبوعين يجي ببانطلون مشقوق ومايرضى يروح ابه ولازم نشتري غيره
وهذا مكلف ايضا

تشجعون الجهال يشترون ليهم من هالماركات واحنا نتغربل

اني ما اخد لبناتي جدي ولا هالماركات
عااااادي

مو شرط هالماركات
اللعام شرينا بس شنطة الأكل ب 7 من مكتبات السعودية ولازم اندور شنط مريحة للظهر

يالطيبه
انا شاريه من مذكر كير شحلاوتها دورا بأربع وشوي
والانستغرام في رخااااص
كلش كلش
في حتى بدينارين

بصراحه كلش مكلفه شريت حق بنتي بس جوتين وشنطه ب50 دينار ومن سنتر بوينت يعني بعد مو ماركه ياريت يصير فيه علاوة مدارس لو بس بداية السنه الدراسيه

وهذا غير بقية الأغراض والمراييل

سنتر بوينت هذي أسعاره ما تغير
جوتيين وشنطه بس الجوتي مثلا ب 15 والشنط ب 20
غلطاااانه
غلطااااااااااانه في ارخص

تكاليف المدرسة أغلى من مهر العروس والوضع من سيء إلى أسوء الله يعين البحرينيين صراحة عن نفسي عندي خمسة جهال ما اخدت ليهم ولاشي الله يعيني على الطلبات

تكاليف المدرسة أغلى من العرووس
ضحكتيني

الموضوع يتبع
4-انتون ليش جايبين هالموضوع من ألحين خلو الناس واﻻوﻻد شوي تتأنس وتريح شوي باﻻجازة وتنسى شوي المدرسة والواجبات ما صدقوا تخلص الامتحانات تجيبون ليهم سوالف المدرسة ومصاريف بعد .. دروس كثيرة و غزيرة و مناهج مكثفة وكل الكتب والدفاتر واﻷغراض في حقيبة وزنها 50 كيلو واللي يحمله ولد أو بنت وزن كيلوين شلون تصير هذه.

1-سبق وأن تكلمنا بأن غالبية هذا الشعب مو كلهم طبعا الغالبية العظمى والساحقة في وضع اقتصادي ضعيف ومتردي ويكدر ويسوي مشاكل.
2- بالنسبة إلى المصاريف فإن المصاريف كثيرة ﻻتعد وﻻتحصى وقد ذكر شطر من الناس في تعليقات يوم أمس بالصحيفة عن قضايا القروض وأنهم ﻻ يعيشون وﻻ يدبرون شؤون حياتهم إﻻ من خلال القروض البنكية وبأنواعها!؟!(اللي يبغي بيت.اللي سيارة. زواج.سفر.علاج.تعليم.مشاريع).
3- بالنسبة ﻷسعارالقرطاسية فإنها بين المتوسطة إلى المرتفعة نوعا ما والحمل اﻷكثر يقع في الحقيبةالمدرسية فإنها أكثر سعرا وغلاء.

يعتمد على الأهل
إذا كل شي بيشترونه لازم ماركة أكيد بتصير الاستعدادات مكلفة
مو شرط كل شي تاخذونه غالي يعني زين
فيه أشياء أسعارها معقولة والجودة زينة

مكلفة جدا خصوصا انا مدرس وزوجتي مدرسة والعيال كلهم في المدرسة مصرف عدل بس الحمدلله

عجل احنا شنو انقول راتب زوجي 240 ولا يجيبه كامل وغير القرض وووو

تقهرون لين قلتون قرض ترى القرض استانستو بفلووووسه
عطوكم افلوس وانتون الحين تدفعووونها يعني مو قرض تدفعونه على ما ميش

زوجش اخد قرض وصرررفه لازم يرجعه جيفه بعد

طبعاً مكلفة و ارتفاع الاسعار ملحوظ في جميع السلع سواء كانت مدرسية او غيرها فبعد الانتهاء من مصاريف رمضان دخلنا العيد و الان المدارس و بعدها عيد الأضحى و عن نفسي بدأت فعلاً بشراء مستلزمات المدرسة تفادياً للأزدحام لاحقاً و الله يعين الذي لديه الكثير من الأبناء

مكلفة و نص
الله يعين اللي عنده اكثر من ٢

نعم والدليل بان القرطاسيات ومحلات بيع الملابس يبالغون بالاسعار فبعض المواطنين يضطرون لسراء أغراضهم من المملكة العربيه السعوديه .. فهاذا يسمى إستغلال موسم

مصاريف المدرسه هم ما يخلص اول شي بالثياب والخياط اللي ما يرحم وبعدين بالاغراض والشنط اللي اسعارها كل سنه تزيد واذا ابتدت المدرسه طلبات المدرسه اللي ما تخلص كل يوم شي وكل ماده متطلبات وتعال انت يالمواطن الكحيان ادفع هذا غير المشاريع اللي ما فيها فايده غير ان ولي الامر اللي يسويها ويدفع عليها دم قلبه واخر شي مكانها الزباله تكرمون .................الله يساعد اللي عنده جهال واجد .

اي والله مكلفة،،
اني عندي بنتين مدرسة وروضة
وتكاليفهم وااجد خصوصا البنات تصرف على حتى شعهم واكسسوارات الشعر صايرة غالية ومن مرايل واقمصة وشنط وجواتي كل اسعارهم ضاربة التوب
الله يعين ويسهل
غير طلبات المدارس الي ماتخلص وتخلي الواحد يعلن افلاسه
الله كريم ويوفق اليهم

وش فيها الشريط
والخرز
لازم تتفلسفوون

أكيد مكلفة واجد

يعتمد على الدخل الشهري للاسره اذا كان بالكاد يكفي الاحتياجات الاساسيه من المؤكد ان يكون مرهق بالنسبه لي استعد لهذا الوقت باستقطاع مبلغ بسيط طوال السنه علشان ما اكون في ضائقه ماليه وبعد ما يكفي

اكيد مكلفة وخصوصا ان وقتها مع شهر رمضان والأعياد

بالنسبة لي :

أنا لا أجد أنها مكلفة البتة .

نعم
تقص الظهر
الله يعين اللي عندهم عيال وايد

مد الحافك على قد ارجولك ولاتصيح اذا صرفت اكثر من طاقتك عقب لتورطت! ناس عندهم الاستعداد للمدارس جنه استعداد لحفلة زواج كلشي جديد ولازم من الماركة الفلانية والبعض حتى ادخل تابلت جديد ولابتوب جديد ضمن القرطاسية المطلوبة

دام هذه رواتب البحرينين اكيد بتكون استعدادات المدارس مكلفة ..

هي مكلفة حق الي يجيب أولاد واااجد ويفلتهم في الشارع ولا يدري عنهم ليس المهم في التكلفة حتى ولا كسرت الظهر إذا نهاية العام الدراسي ودخل عليك أولادك وجميعهم ناجحين ساعتها الفلوس الي صرفتها قطفت ثمارها

زائر 24 لم تنصف إخوانك في الوطن
عندي بنتين فقط ما شاء الله عليهم الكبيرة نسبتها 98.2 و الصغيرة نسبتها 99.1 و تكاليف المدارس ما لها علاقة بالنجاح او الرسوب. ما اشتري لهم ماركات و لا من محلات غالية و لكن تظل تكاليف المدارس مرتفعة و مرهقة جدا لميزانية اسرتي. الله يفرجها و يوسع على الجميع

لا طال عمرك مو مكلفة
الا تفطس وتسبب مشاكل أسرية
الله يلعن الفقر ابسط الأمور ما نقدر عليها
حسبي الله ونعم الوكيل

مكلفة كثيراً

لدي اربعة أبناء ولحد اليوم ماصرفته ع التجهيز للمدارس كلفني 750 دينار!
كل عام والأسعار تزداد اكثر من العام السابق
ياوزارة التربية والتعليم ارحمينا من الطلبات والمشاريع التي هي اسوأ طوال عامنا مع ابنائنا وفي النهاية مردها للزبالة كرمكم الله
انظري في هذه النقطة وتحنني علينا
فما صرفناه في اعدادهم وتجهيزهم للمدارس كفى ووفى
وديونه لآخر العام نحن ندفعها!!

ودي اصدق
بس قووية قووية

وش مشتري ب 750
هرااااار

وليش قوية

احط وياك حسبة حتى تشوف!!
ذكرتني بالبخيل الا عاطي زوجته عشرين دينار تستعد ابهم للمدارس قبل كم سنة متأكد هذا مو انت؟!

نفس المعلق عفر

كم تكلفون انتون ع المدارس؟
5 دينار؟
لا لا اتوقع نص دينار

اتكلفني
ياسيد انا عندي ثنتين الله يحفظهم وبمدرسه خاصه ما دفع 750 وبرسومهم الشهريه ما يوصلون هالمبلغ
تتفلسفوون على العرس يالله

شكلها من الناس الا ما تشتري الا الغالي
اللعام سمعت عن وحدة ماخذة الى بناتها الثلاث كل وحدة حقيبتها مع باقي القطع مقلنة و غيره ب 150 دينار
و في ناس تاخذ شنط ب 50 دينار
حتى ال 30 واجد صراحه مو كثر معاشاتنا

مد رجولك ع قد لحافك

الا عنده كحل يتكحل والا ماعنده ويش يسوي؟
اهم شي الواحد مايبوق ولا يتسلف ولا يطالع حلال غيره
الحمدلله
الله يوفق للجميع

بل سبعمئة وخمسين دينار أشتري بها ٢٥ خيشة گازو وأكلهم سنة كاملة أحب الگازو

أعتقد بأن طلبات المدرسات والمدرسين هي المكلفة وخصوصا المدرسات فطلباتهن لا تنتهي وجداً مكلفة بالنسبة الى مصاريف الاستعدادات والتهيئة للمدرسة .

مرحبا

طبيعي مكلفة ويعتمد على عدد أفراد الأسرة
يعني الأدوات المدرسية والالبسة ببلاش
الصراحة الموضوع اليوم مو فى محلة

زوجتي مسرفة ولاتفهم شي تبغي تاخد مستلزمات المدرسة من أفخر وأغلى الماركات أمس مشتري جوتيين كلفوني خمسين دينار وجنطتين بعد خمسين دينار يعني ربع معاشي كامل راح على جوتيين وجنطتين اقول لها ياحرمة مايصير جديه هدا اسراف وامكانياتي المادية ماتسمح تقول أني مايخصني أولاد فلانه صديقتها مو أحسن من أولادي اقول ليها لكن صديقتش بعد معاش زوجها أكفر مني أربع مرات ويش تسوي وياهم هالحريم مايفيد فيهم راس يابس ومخ كوطي فاصوليا الله يسامحش ياأمي قايل لش مابتزوج الحريم كلهم ...خليتيني غصب أتزوج وأبتلش ويا ...

مو كل النسوان نفس الشي
واللي ما تتطلب تدوسونها هاي المشكلة

اكسر راسها و نزل عليها الثانية
و شوفها اشلون تصير

عشان يصرف على أولاد الثانيه وبدل اربعه يصيرون 8

ههههههه هذا اللي فالحين فيه البحارنه

مو انته وياها بالسوق تقدر ترفض تدفع و لو شافتك جاد و مصر على رايك غصبا عليها بتتنازل
جواتي شو مارت قواي على 10 او 11 يدومون طول السنة بس ناس تحب الفشار الزايد

اكفر

هههه اكثر عدلو لهجتكم فشلتونا

يعني الحين نفنوف العروس لي تروحوون فيها مو مكلفه
أو مصاريف العرس والحفله مو مكلفه
جت على هالمريول والشنطه وهالدفاتر والآقلام والمسطرة واعتبرتوهم مكلفين صراحه قمة العجب
في أشياء تصرفون فيها وتقترضون حق خرابيط وجتةعلى المدرسه

توفير احتياجات المدارس مكلفه اكثر من اغراض بيت والشي الثانيه جميع اصحاب المكتبات في الاسعار والشى الثالث طلب المدرسين والمدرسات كل يوم شي وفي اخر السنه تجد كل شي في القمامه من مجسمات وبحوث واعمال والخ انا واحد لحين ماشريت شي لني مفلس وعندي 3 والرتب كله يروح ديون

مصاريف دبل
مدرسة وعيد
والراتب البحراني ما يكفي
فلذلك نطلب المدارس تأخير طلباتها ومستلزمات الدراسة إلى نهاية سبتمبر

الراتب البحريني
كلنا بحرينيين

راتبي 234 دينار
بحراني لو بحريني اختار عاد
جيب لي واحد من الا على رأسهم ريشه
راتبه اقل من 750 دينار

لا لا ليست مكلغة بس تكسر الظهر

طبعاً وحالتنه حاله المفروض الوزارة توفر المستلزمات القرطاسية من عندها وتفكنا العباله

الوزاره اتوفر كرينها

نعم تكون مكلفة في حال هناك عدد من الأولاد والبنات حيث كمية المصاريف من لباس وقرطاسية ومتطلبات أخرى قد يحتاجونها ولعل راتب ولي الأمر لايسمح بالتغطية الكافيه وهناك متطلبات البنت أكثر بكثير من الولد مما يجعل كاهن ولي الأمر مثقل ولاسيما أن أصحاب المحلات تستغل الظرف لعودة الطلبه و تبيع بأسعار بأهضه وهمها التحصيل المادي باي شكل ولاتراعي ظروف أولياء الأمور

او في شئ مو مكلف عندنة كل مستلزمات الحياة ولحين زادو الطين بلة ...

عااديه بس تختلف من عدد الابناء

مكلفة جدا

طلبات المدرسات الغريبه الي تكسر الظهر وبطلبات ماتفيد الطلبه فقط للتبذير ومصير جميع الابحاث الخمام دون احترام وتقديس لما تحمله من ايات قرانيه واسم الجلاله. هالمدرسات اذا ما احترموا الايات القرانيه طبعا مابيهمهم احد ولا بيحترمون احد

كل بحسب مقدرته المادية وطلبات الأبناء وسعي الآباء والأمهات لتوفير أفضل ما يمكن لأبنائهم يساهم في رفع الكلفة.

مصاريف المدارس اكيد بتكون مكلفه كل مازاد عدد الابناء ازدادت تكلفتها اذا كان الدخل محدود شنو بيبقى منه اذا تم توزيعه بين الزي وملابس الرياضه والقرطاسيه والاحذيه كرمكم الله .. بدانا بتفصيل الزي الله يقدرنا ع شراء الباقي ان شاء الله والحمدلله ع كل حال

نعم مكلفة جداً ، القرطاسية ، والملابس ، والشنط ، وأمور لم تكن في الحسبان ، بالإضافة إلى متطلبات بعض المعلمات الله يهديهم .

بدأت بتجهيز الملابس و راح ابدأ الاستعدادات الأسبوع القادم للقرطاسية ... مع ارتفاع الأسعار أصبح الاستعداد للمدرسة مكلف ... الأدوات صارت غالية ... الشنط الأحدية و غيرها .. الله يساعد اللي عدهم عدد كبير من الأولاد

مرهقه جدا جدا

خصوصا للمتقاعدين وذوي الدخل المحدود كل شي غالي

مكلف وفشار البنات يحتاج ميزانيه بروحه

ماتروح الا بشنطه ومقلمه ودفاتر ماركه من المحل الفلاني علشان لاتصير مطنزه لباقي البنات والله حاالتنا حاله وياهم

مكلفه جدا ولكن الله كرييم

وخصوصا للاهالي الذين يزيد عدد الابناء الطلبه على اثنين وتخيل لو كانو بنات بعد ويحتاجون بالطو او عباءة لا تقل عن عشرين دينار .. الله يساعد هالشعب المعتر على قولت اللبنانيين وين يصك براسه