الوضع الخطأ

اتصور ان المكان الأفضل عو وضعها عند المساجد؟ حيث ان وضعها في الشوارع والطرقات يسيىء للمشروع ويعطي صورة غير حضارية للبلد

الحين كل جمعية من كل المناطق البحرين صار عندهم صناديق جمع الملابس .
صراحة ما أشوفهم يعيقون حركة السير و لا شي ... بالعكس شي طيب وجود هذه الصناديق .. بس يحتاجون شوية تخطيط لأماكن تواجدها .
لكن سبحان الله في هالبلد ...
العمل التطوعي و الخيري صار لازم بتصاريح و قوانين معقدة !!! ....
أنا أتوقع السالفة صايرة مزاجية من قبل بعض المسئولين .

نحن مع فكرة وجود صناديق جمع الملابس . يمكن فقط تحديد أماكن بمعايير معينة

من متى صار عمل الخير ممنوع
البلد رايح ع ورا بدال مايتطور

ومن قال لك ممنوع؟ ماتعرف تقرأ الخبر بشكل صحيح؟؟

اول شي الصناديق احجامها عملية وصغيرة وماتاخذ حيز من الشوارع هذا اولا . ثانيا اماكن وضع الصناديق في جميع شوارع البحرين حسب ما انا شفت في اماكن جانبية وبعضها معزووول تماما عن مرور السيارات وحتى القطط !! فليش هالمكابرة وتحدي عمل الخير بدل ما تروجون ثقافة التكافل . الصناديق الخاصة ببعض الجمعيات موجودة في السوبرماكتات الكبيرة ولجمعيات دينية محددة ومحد يقول عنها اي شي فهل على راسها ريشة او مرفوع عنها القلم ؟

وين البلد بتتطور واديما تتكلمون في أشياء تافههه وتخلون الاشياء المهمه

بارك الله في كل من اقدم على خدمة وفكرة وضع الصناديق الخيرية لجمع الملابس
اذا لا تحتاجها فغيرك بحاجه لها
لنا جارة ميسورة كانت تعطيني ملابس واحدية وشنط جديدة وفي اكياسها لكل زيارة للعراق فهناك من هم في امس الحاجة اليها
والان مازالت تشتري وتضعها في الصناديق بكل منطقة ودائما تقول تحفظ ماء وجه المتعففين من اعطائهم مباشرة
نرجوا عدم ازالتها

استغرب من الناس الي كل شي تتحجج عليه يا اخي احنه عندنا في قريتنا كذا صندوق مااشوف هالاشياء الي تقولون عنها حاصلة ليش تحبون الشر وتسعون اليه خلوا العباد في حالها ترى اذيتونه
ابغي افهم انتون من شنو مخلوقين يا ربي شلون ناس جدي يعني كل شي يتحججون عليه كل شي يشتكون عليه يا ربي شلون مخكم مركب شلون تفكرون احس من تقعدون لحد ما تنامون وانتون تفكرون بس شلون نشيل هذا وشلون نحط هذا وهذا مسوي جدي وهذا شلون يستفيد و انا لا ويالله يشتغل الفكر الخايب ويع ويع يمة منكم

يمكن بعد تمشي على الرصيف مخالفة

الله يستر والله شكله حتى الصيام والصلاة اليومية والاستغفار وصلاة ليلة القدر وصلاة الليل والصلاة على محمد وآل محمد بيصير بتصريح.. لاننسى التنفسس التنفسسسس يامواطنيين يمكن بعد بتصريح

السالفة صارت فوضى وبدون تنظيم ، في رايي وضع التبرعات في مقرات الجمعيات الخيرية يكفي بدل الصناديق المنتشرة في كل الشوارع

حتى المرور يبي له مخالفة

المرور نفسه يبي له مخالفة، موقف سيارته بالدوار ومضيق على السيارات شوي والسيارات فوق بعض، يا أخي طلع سيارتك على الرصيف وتعال أوقف عند الدوار ومشي السيد، كلها خطوتين و واصل لسيارتك.

هالتضيق وصل لهذا الحد ؟

المفروض تكون هناك تسهيلات للتبرع لا لوضع القيود. هذي التصرفات تشقعر منها الأبدان، حتى الي ما يعرفون الله يتبرعون للفقارى وين وصلنا .

عجيب أمر هالزمن فعل الخير لازم نستأذن ونقول لكل من ؟!

لا حول ولا قوة الا بالله العلي العظيم .

وليش امانة العاصمة تشتغل كانها بروحها في الديرة ؟؟؟ يعني باقي المناطق ما شافت اللي هالأمانة تشوفه؟؟؟

حتى عمل الخير يمنعنونه شهالحالة

عندي ارض للحين ما بنيتها انا موافق ان صندوق جمع الملابس يشغل مساحة فيها. بعد بتعترضون؟

بيعترضون حتى لو كانت في ارضك ..والسبب يبون كل شي رسمي وبتصريح علشان يشفطون فلوس اكبر قدر ممكن من التصريح ومن كم باعوا الثياب واليهم نسبة من الارباح من بيع الملابس والالكترونيات

والاشجار اللي تغطي علامات المرور في بعض الامكان واللاعلانات اللي تكون على حافة الرصيف هذالين غفور رحيم

شالحالة احنا مستفيدين منهم قريبين لينا

ماهي إلا حجج يتذرعون بها لوأد أي صورة من صور التكافل ومساعدة الفقراء، ولو كانت المشكلة في الموقع كما يتذرعون لأمكنهم الاتصال بالرقم الموجود على الحاويات لتغيير الموقع والتوافق على موقع مناسب.

أكثر المحتاجين من طائفة معينة لذلك يجري التضييق عليهم

في شركة تشتريهم من صندوق الخيري والمبلغ يتم لحسه

هههههه ضحكني ردك الذي يدل على فضاوة عقلك ,, الي تقول محتاجين من طائفة معينه هم الي باخلين على نفسهم وقاعدين يجمعون هلفلوس على قولتهم لليوم الاسود هههههههه

يجمعون لويش قوله مرة ثانية يا حليلك مسكين وين يجمعون والمعاش ربيتين ونص ويش فيهم زايدين المرضى النفسيين قال ويش يجمعون
يالله جمعوا الملايين على قولة نهى نبيل ما تبخلوش على نفسكم
شرايك نشتري فيلا في امواج والا درة الحمد لله والشكر صدق لين قالوا اصحاب العقول في راحة وناس عقول ما عندها تتكلم اقول طير يا بابا طير احسن للعباد قال ويش يجمعون خسارة الوجوه الي تضحك مو موجودة ضيفوها يا الوسط عشان نتمسخر اكثر على سذاجة العقول
قلت ويش يجمعون ههههههههههههههههه kkkkkkkkkkkk

معقولة الصناديق كانت موجودة من غير تصريح إذا نعم معناتهة آنة ماقلط يوم قلت الديرة سايبة.

حتى حاويات القمامة بعضهم اماكنهم غلط بس على الاقل يمكن ازاحتهم باليد وتغيير مكانهم اما صناديق التجميع الخيرية فثقيلة وتقريبا مستحيل ازاحتهم الا بكرين

كان من المفروض من البلدية والجهة المختصة تحريك الحاويات ووضعها بالوضعية والمكان الصحيح والتساعد مع الجمعيات الخيرية بدل هالمخالفات والتشهير بها في الجرايد والشوارع… دائما تهديد هالبلد مافي شي اسمه تفاهم ومساعده

والله ما ينعرف ليكم يالناس تفكير كلش ما تفكرون سيده الحكومة غلط وتضيق على جمع الملابس هاذي الحاويات ما تمت بقعة بالبحرين ما خلوها فيه وبعض الاماكن تضايق الناس وبعض الاماكن مظهرها مو حضاري انا شفت بالجفير مفلته جم وحده على الشارع العام جنب محطة البترول انا اقول بلا هرار وحط على الحكومه اذا محلها غلط محلها غلط لا تقول تضيق ما تضيق وانا اقول لانه مصختها هاذي الشركة ( التجاريه القائمة على الموضوع ) وتبرز روحها عاجلاً ام أجلاً بشيلان الصناديق من البحرين كلها لانها مصخة السالفه

ويش فيك معصب ليكون حاطينها عند باب بيتكم

اي مظهر حضاري اله تتكلم عنه قصدك دعاره وخمر وبنات الليل على الاقل لثياب تروح لناس محتاجتنهم فعلا اقطع

حسستني الجفير ولاية تكساس

ههههه شوي شوي لا ينط ليك عرق احين تركتوك كل بلاوي الديرة من تجنيس ودعارة وفساد وسرقات الاراضي والسواحل وما عورت قلبك الا الحاويات الي يجمعون فيها للفقراء ما قعد ضميرك الا للصناديق يا ترى شنو رايك في باقي القضايا الاخرى اتحفنا بردودك الفتاكة والجبارة
صدق شر البلية ما يضحك

هل فعل الخير يجيز لك حجز الطريق بدون ترخيص

زائر 3
مو بس الصناديق الي تحجب الرؤية تعال كرم الله السامع حق حاويات القمامة مرات الي يشيلون القمام بسرعة
ويفلتونها في أي مكان وبعد بازيدك من الشعر بيت حتى المرور بعد لازم يركزون على بعض السيارات خصوصا الي
عندهم لندكروز أو أي سيارة ويوقف سيارته على الرصيف ويحجب الرؤية وأنت لما تبغي تظهر تتورط ما تقدر
تكشف الشارع إلا لازم تظهر بوز السيارة أكثر ومن تظهر أكثر ما جوف إلا واحد طالع عليك إلا شي دعم سياراتك
والسبب الي واقف على الرصيف فيا ليت المرور يشددون على الي يوقف على الرصيف

فريقنا .. بين متر ومتر صندوق .... الوضع لا يطاق .. صندوق واحد لكل فريق يكفي ليش لمبالغة ولا سالفة تقليد وبس !!!!!

كلموهم ادا ماسوو لكم شيلوهم وحطوهم مكان مناسب والله زين بين كل متر صندوق

ان لم تستحي ف افعل ما شئت

والله هالجمعية اهي اللي ماتستحي ، حاطين صندوقهم بشكل مخالف ، المفروض دامهم جمعية خيرية يكونون منضبطين

المفروض اي واحد عليه نذر أو بيتبرع أو بيتصدق أو بيطلع كفارة أو بيسوي حلال المشاكل يخبر الجهات المختصة قبل البدء

يخلونهم في أماكن غلط الواحد بيطلع من شارع فرعي مايقدر يشوف السيارات الجاية من الشارع الرئيسي ونفس الشي حاويات القمامة ممايشكل خطورة ويسبب حوادث

يعني لو تم التواصل مع الجمعية المعنية (ارقامهم موجودة على صناديق جمع الملابس) و تم تغيير المكان ما في مشكلة؟

صراحة بعضهم موقعهم غلط ويغطون الرؤية خاصه اللي عند اللفات اذا بحطونهم في موقع مايغطي الرؤية افضل

هذه المخالفات حتى لا تجميعون ملابس وغيرها للفقراء

هرار محد قال لا تجمعون ملابس بس مو يحطونهم في اماكن تحجب الرؤية

باعدوهم مسوين سالفه