نصيحتي للبنات ,, اذا كنتين جامعيه لا تاخذين واحد مستواه التعليمي واطي وراتبه اقل من 350 دينار ابدا ابدا ابدا ابدا حتى لو كان انسان طيب و خلوق في النهاية الزواج مسئولية واستقرار انتين الي بتربين الجهال وانتين الي بتصرفين عليه و عليهم دراستش و تعبش كله راح وطي وثانيا الانسان الي يقول الفلوس وصخ دنيا نقوله غلطان غلطان غلطان ونص هذا الوصخ اطهر من بعض البشر للاسف الشديد مع فائق احترامي وتقديري .. اخوش خايف عليش ويعرف مصلحتش اكثر من غيره عموما الله يوفقش وييسر لش ..
...

نصيحة لاتاخذين شخص مستواه اعدادي ..صدقيني عن تجربة فيهم جهل كفانا الله واياكم ..علما اني ثانويه بس متعلمه وفاهمه وواعيه وربيت أبناىي مايفهم شيء حتى بالحياة غير الانجاب

ليش تعتبرين نصيحه اهلش وقوف ضدش
موقفهم لصالحش
تركي عنش بيجيش الي احسن منه
لابد يكون تكافأ ف العمر والتعليم والتربيه ووو اي فارق بيسبب عرقله ف حياتش الزوجيه

احين احنا خلنا نعكس الوضع .. هو دارس في بريطانيا وانتين مكمله اعدادي وتشتغلين ومعاشش 250 بياخذش ? اول شي بيدور وحده تليق بمستواه ثاني شي بدور ام متعلمه اتعلم اولاده .. ثالث شي اهله.. امه بتقول نفس كلام اخوش حقش احين بس الفرق هو ما بيعصب على امه ولا بيقول حكم القوي على الضعيف.. بيرضي امه وبيخلها ادور له وبيعيش مرتاح

اوعي يا حبيبتي وفكري..والله العظيم انصحش لاني منصاده من قبلش واشوه اطلقت..ابو 250 دينار احين يسوي عمره خوش واحد وبيموت ورومانسي بعدين بتفكرين بعقلش..منش المال ولعيال والتربيه وفوق ده الاهانات ويا واحد لين تكلم تصيحين من داخلش على كلامه..افنين وفلافه ونعال زنوبه واسنان محشوشه من التدخين وريحه حلقه نفس الفار الميت،وفوق ده يزفش بعد .. انتين متعلمه فكري في اولادش دوري ليهم أبو متعلم مثقف يصرف عليهم عدل وانتين متوافقه وياه احسن ..واذا في اسوء الحالات اثنينهم مو زينين اي احسن يزفش المتعلم لو الزنوبه?

تعليقج كافي....
تعليقج روعة........

هههههههه عجبتني ..

التكافؤ الثقافي مهم جدا، اللي متعلمة مستحيل تتوافق مع شخص إعدادي ما كمل، معظم البحارنة اللي مو مكملين دراسة محيطهم محدود و ضيق ، الديرة و البسطة و ال ٢٠٠ دينار اللي يحصلها، و لين حصل ليه زوجة متعلمة اشتغل عليها سي السيد ، و إهانات و معاملة غير لائقة شرط إنها هي اللي تشتري البيت و تهتم بالأولاد

ظلمتهم مو شرط
واحد من اقاربي مو مكمل دراسة بس مثقف جدا ماشاء الله
من الصبح توصله جريدة الوسط ويقراها من اول صفحة لاخر صفحة
وبعدها يروح بسطته
ولما يرجع يتابع اخبار ويقرا ورياضات ويقدر يفتح اي موضوع يفوق الجامعيين والدكاترة بعد
الدراسة والبسطة مو معيار

اذا كانت الاخت تقرى كلامي فاني بنصحها والله على ما اقول شهيد .. اني دكتوره ووافقت على ولد خالي ميكانيكي يعني عاطل عقب جم شهر بدى يعايرني ويهيني ( لايكون عبالش انتين تفهمين ولايكون عبالش ولايكون عبالش) لا تتوقعين ان الي مكمل اعدادي بيقدر انش اخذتينه ولا تتوقعين ابدا ان هو بيكون مرتاح من نظره الناس والحره بتكون فيش .. نهايتي ويا ولد خالي الطلاق .. فكري بس في شكلش وهو يمشي وراش وانتين تتكلمين انقليزي .. الرجال اذا ما قدر على غبائه وضعفه حط حرته فيش

اخوش يخاف عليش
والرجال يعتبر مرته ولاشي لأنه عنده عقدة نقص اذا هي أحسن منه تعليميا

هالزمن الناس تتزوج وظيفه وشهاده نست الاخلاق والمرأه المحترمه مايبط جبدي اله رجال يدور وحده شرط تشتغل يمكن بيتزوج معاشها

اشهالتفكير المريض!

وين المرض في الموضوع أنا أشوف أنه عائلتها تحملت المسؤلية تجاه بنتهم وهذه الأمور ما فيه مجاملة ولا عاطفة وبكون معاش صريح أختي أخذت واحد حالته حاله بس طلع حقير واستغلالي بهدل أختي في المحاكم وطلع روحه أختي مدرسة وأهو سكيورتي شوفي الفارق أهو عنده شهادة ثانوية وأختي جامعية وشان زين يصرف عليها كان بخيل وماخذ بطاقة البنك من عند أختي بالعكس أشوف أخوش تصرف بحكمة ولا توجد في هذه الأمور مجاملة لأنه نتائجها كارثية

اني اخوي رفض وايد خطاب بحجه انهم من قرى و عقليتهم رجعيه و اغلبهم جامعيين و حالتهم الماديه زينه و اخلاقهم زينه بس الحين بناته كل وحده حبت واحد من قريه او من مدينه يعطيها عادي عنده ، الله يسامحه

اخوش هو المتخلف ، في البحرين مافي فرق بين اللي عليش في القرية واللي المدينة ، كل الشعب عقلية وحدة ونفس العادات والتقاليد وأصلا اللي عايشين في المدينة يطلعون منها ويسكنون في اطراف القرى

اكيد الاخ منامي مرووووقه دليع،، ما دري على ويش شايفين روحهم،، صادني هالموقف مع اني عندي شهادة جامعية واشتغل والوضع الاجتماعي ولله الحمد بس على حساب اني من قريه وابويي بحار ،، صدق عقول فاشله

انا مت على وحده من (...) سويت المستحيل عشان ارتبط ابها ولكن كانت تنظر لينا بنظره أنه احنا قرويين وهم ارفع منا. مره اقول ليها ليش أهل (...) يقولون عنا حلايل قرويين. ردت اني ما اقول وضد هل الكلام. يعني اهلها يقولون عادي.
للعلم فقط تري أهل القري في الطيب والكرم افضل من اهل من (...) دار الزمن فيهم وغصبن عليهم سكنو في القري اللي كانوا يعيبون عليهم. وبيوتهم سكنها الاجنبي. هم الوحيدين اللي تشتتو في كل قريه اشوي.
وافتكر ماتعلموا أهل (...) الكرم الا من سكنو مع أهل القري

انت عليك منها
وش عليك من اهلها !!!!
انت ف الحساب يحاسبونك ع اعمالك لو اعمال اهلك!!!!
وع افتراض ظنوا هم احسن منك انت مو واثق من نفسك !!! ليش تتأثر

اصلا اهل القرى هم الي يحسدون مال المنامة ومبطوطة جبدهم منهم! انتونه مال اهل القرى اول ما طلع التلفزيون قمتون تطردون واتكفرون الناس الي حطوا تلفزبونات في بيتهم عندكم!ما صارة عندنا هالسوالف التافهه احنى

كفاية انه مال اهل القرى من حسدهم يهاجمون بعض! ..

لا يكون اهل المنامة عايشين في اسبانيا او روما،، القرى والمنامة نفس شي وكلنا اهل، بس في نفسيات تعبانه وتحتاج الى علاج

أني وافقت على شخص كنت احبه بس أبغي أرتبط فيه وكان مو مكمل مدرسة ويشتغل براتب 250 دينار ويش أستفدت من هل الزواج هل في تقدير لا هل تعيشين بسعادة لا وكانت عائلتي معارضة هذا الزواج بس أني أصريت واخذته ويش أستفدت ،صديقاتي كل وحده الي ماخذه اليها مهندس والي ماخذه اليها طبيب والي ماخذه اليه مدرس والي ماخذه محاسب عايشين معززين ومكرميين ولو كان يرجع فيني الزمن ما أخذته ،تغيرت علاقتي مع عائلتي صارت ضعيفه وأستغل الضعف ويخوني ،نصيحة مني اليش عائلتش سند اليش من دونهم ما تسويين شي

الحياة تجارب وكل ينام على الجنب الي يريحه , وكل أنسان يتحمل مسؤولية قرارة وبس .

القصة ما تدخل المخ ويبين انها قصة مختلقة
فيه اهل يدخلون وهالشيء سيء احيانا

أكييد محد يرضى على أخته يعني تاخذ واحد حالته حاله وبيتهم مو مقصرين عليها اليش تستعجل في أمور الزواج في الي أحسن منه

المفروض الأخ ينصحها لا يجبرها على شيء لانها انسانة واعية ووتحمل نتيجتها بعدين .... بس نصيحة للاخت ان لا ترخص روحها لاي احد ولابد من موافقة طرف من الاهل لان اذا الكل معارض بعدين لو لا سمح الله صار شيء محد بيوقف معاها وبتصير مشاكل وحتى الزوج بيرخص من قيمتها لان محد واقف معاها ... وبعدين مو شرط يكون تكافؤ جامعي لان مو شرط الجامعي يكون واعي للحياة وعنده مسؤولية .... اني جامعية واخذت واحد مو مكمل ثانوي بس متحمل المسؤولية وواعي للحياة وهالشيء عرفته من كلام أمه لما جت ....

هذي حالة خاصة مو معناتها يوجد ظاهرة أن الأخوان يقفون عائق أمام زواج خواتهم، الغالب يكون قرار البنت هو اللي يمشي ، وفي حالتها نتصور الأخ مو غلطان ويبي مصلحة أخته ، التكافؤ غير موجود بالمرة بينها وبين الشاب ولو فكرت شوي بتشوف انها غلطانة

هذه وخده عايشه في فتره الرومانسيه ، بعد الزواج بتنصدم بالواقع و الرجال هو اللي ييبهدلها لان الرجال عقليتهم متخلفه يعتبر البنت اللي مستواها اعلى منه و عارضت اهلها علشان تتزوجه رخيصه و يلعب في حسبتها

أؤيد كلامك بشده الزواج الغير متكافئ نهايته طلاق أو انفصال نفسي وروحي والعجله الندأمه والأخ أو الأب يريدون مصلحة بتهم أو اختهم وراح تنتهي السكره وبعدين تندب حظها ليل نهار الاهل سند وعزوه ولو شنو كان الزوج ما بيكون أفضل من الأب والأخ

اي في واجد من هالاخوان وللاسف حتي الأمهات الا يمنعون الزواج من بناتهم اذا كان راتبهه زين يفكرون الرجال بياخذهه علي طمع وطبعا اهلي من هالنوع الا أتكلم عنهم دخلت الثلاثين بدون زواج والسبب معاشي الا هو اكثر من الف واصرفه علي البيت طبعا

نصيحتي للاخت ان كانت قصتها حقيقية وغير مختلقة ان تبتعد عن مثل هذا الزواج لان محكوم عليه بالفشل من البداية و ان لاتكرر الخطأ الذي وقعت انا فيه ولم اسمع نصح الاهل حتى انتهى بي المطاف بالانفصال و الفشل و الضياع .....

الفشل و الطلاق اختي ا... لايعني الضياع تستطيعين البدء من جديد و الاستفاده من التجربة السابقة كدرس لك

في البحرين الطلاق للبنية نهاية

بالعكس البحرينية قوية شخصية ولاتهزم

كلام أخاها حكيم و صائب ينم عن خبرة و دراية و تجارب فزواجها من شخص الفارق بينهما كبير و ضخم و واسع في التعليم و المكانة الاجتماعية و المادية سينتهي بالاخفاق و الفشل لامحالة ........

صدقتي أختي ..كلام سليم

قد يكون لعدم التكافؤ وهذا نصيحة لا غير،، لكن درسناش و وديناش بريطانيا والحين تشتغلين في وظيفة زينه الخ... في بشر ما يرحمون بناتهم ولا خواتهم حتى لو تزوجت يبي من عندها ضريبة ( بيزات) كأنها مشروع ويكون الهدف مادي على حساب تعاسة حياة انسان اخر.. اعرف ناس جديه وااجد

كلام عقلاني من اختنا الفاضلة ام محمود ينم عن خبرة و حنكة و تجارب و دروس مرت بها في الحياة

القصة ناقصة او مختلقة بدون باقي الجوانب لا يمكن لنا الحكم

وهنا مربط الفرس
وهذا ما يؤكد ضرورة إقرار قانون الأحوال الشخصية وبشكل عاجل جداً جداً

الظاهر هالبنية عندها عقدة! الناس تتهمها أنها فضوليه وحاشره روحها في كل صغيره وكبيره وقاعده أحين تتهم أخوها الي هو صاحب حق عليها! كثير من الناس جذي!فيهم مرض ويتهمون الاخرين به!

الإمام علي:
ذَوو العُيوبِ يُحِبّون إشاعةَ مَعايب الناس؛ لِيتَّسعَ لهمُ العَذرُ في معايبِهم.
المصدر:عيون الحكم والمواعظ

المفروض أن ينصحها مو يجبر ها و النهاية الاختيار ليها

أشك كثيراً
القصة غير صحيحة بوضوح لكل فهيم وكاتبتها ان صح انها أنثى فهي بحاجة الى تعلم فن تأليف القصص الوهمية .لكنها ذكرتني بقصص مشابهة حدثت في الواقع إبان حقبة خمسينات وستينيات الفرن الماضي واختفت دون رجعة .

صدقت! أنا بعد مستعجب للأمانة!

عزيزي لا تكذب الأخرين ... عندنا في العائلة قصة مشابها حيث البنت تريد الزواج من شخص وأهلها بالخصوص أخوتها الأكبر منها عارضوا الزواج لرؤيتهم بأنه أقل من مستواها وبالأخير تزوجت من شخص أخر

مثل رأيي اعتقد انها قصة وهمية
ويمكن يكون الكاتب ولد مو بنت

المفروض انه ينصحها فقط ومايجبرها .. وهي بالنهايه الا اختارت وتتحمل نتيجة اختيارها

أن تسكن الزوجة في منزل منفصل عن منزل والدك أ المنزل الذي تتواجد فيه والدتك هو أسلم للحياة الزوجية و درئا للمشاكل ولو فيها قسوة على الأم إلا أن أغلب الأمهات لاتراعي شعور أبنها وزوجته وتختلق المشاكل مما يضطر الولد للعقوق أو الطلاق أو الفشل بعمله أو الهروب بزوجته وهذه الحالات تتكرر يوميا وباغلب العوائل!

كثير من العوائل تشترط على المتقدم للزواج أن يسكن الزوجة في منزل منفصل عن منزل أهله! من الحكمة أن تسكن زوجتك في منزل منفصل عن منزل والدتك! ولا مانع أن تسكنها في شقة! المهم أن يكون منفصل!
الزوجة تشعر بأن المنزل الذي تتواجد فيه مثل العش الذي تمتلكة وتتحمل مسؤوليته وتريد أن تشعر بأنه تحت سيطرتها دون ضيق عليها.
حينما توجد إمرأتان (والدة الزوج والزوجة) في بيت واحد كأنك تضع قبطانان إثنين في سفينة واحدة وذلك قد يؤدي لأن يحصل بين المرأتان مشاعر ليست إيجابية لا يفهمها الرجل ولا يستطيع السيطرة عليها.

فارق التعليم اكيد له سلبيات.. لكن كل حاله ولها خصوصياتها... حتى اللي مو مخلص مذرسة, يمكن يكون خبرته الحياتية احسن من الجامعي. البنت كلامها يدل انها موافقة على الولد.. فاعتقد من حقها الارتباط به

لما كنت في بريطانيا كنت أشوف بنات واجد بريطانيات أهناك يسوون هالحركة! ياخذون ولد عقلة قليل ويتحكمون فيه!أكيد هذا إلي إمخلص إعدادي ولد فقير وهذي البنيه الي دارسه في بريطانيا وحده غنيه!ما أنصح مثل هالزيجة لأنه الظاهر هذي البنية أتدور واحد أتسويه خاتم في إيدها وتتحكم فيه وبعدين أتطلقة وأظمن ليكم أنه يمكن يوافقون على هذا الولد وبيحطون عليه مؤخر 10 آلاف دينار وبيصمونه عشان يتزوج وينحبس وما يقدر يطلق!حركات إجراميه موجوده في المجتمع!البنية أتسوي روحه طيوبه وبريئه!لو إبليس أهني إنجان أتعلم الشطانه منها

هذي دارسه في بريطانيا والي دارسين في بريطانيا مثل الي دارسين في المدارس الخاصة! إمبلتعين ويسوون روحهم بريئين! الي راح بريطانيا يعرف أنه البنات أهناك طريقتهم هي أنه ياخذون ولد بأسلوب الزواج التقليدي! يعني أتدور معرس يكون خاتم في إيدها! ما ألوم أخوها أنه يدور واحد على قدها!أنا كنت في بريطانيا وأشوف اله سواه أخوها من الحكمة!لأنه البنيه بتاخذ هذا الرجال الي طالع من إعدادي وبتبهدله وبعدين بتطلقة وبتقول عنه دولاغ ما يسوى وحتى إعدادي ما كمل!أنا أفهم الي درسوا في بريطانيا زين! وهم يفهمون هالحركات بعد!

أنا أشوف أنه هذا العرف مو موجود في هذا الزمن!أنا أخو كبير في البيت ومن غير ما أتكلم ويا أختي الصغيره أشوفها تتجنى عليي!مثلا أتجي تطلب مني أوصلها مني ومناك!ولو أفتح لساني أبكلمة أنجان أتسوي ليي مشاكل وأتقول عني قليل أدب وأتسفه أبي!وأظن كثيرين يواجهون مثل هذي المشكلة هالزمن!أصلا أخاف أقول لأختي شي عشان لا أجرحها!أتوطى وأسكت وأقول إن شاء الله!هي تغلط عليي وتتهمني بقلة الأدب رغم أني ساكت والي يبغونه مني أسويه!بعد ويش بسوي؟أخواني !ما ليي بال أعور قلبي!يغلطون عليي ويتهموني أني غلطت عليهم!

الكاذبين يبرعون في تقليب الأمور! يخطؤون عليك وبعدها يمدوا كل كذبة بكذبة أطول منها ليجعلونك تبدوا بأنك أنت المخطئ عليهم بينما هم الضحية.

البعض جعل الأخلاق سنفونيه، يعزف عليها متى ما أراد تسقيط الآخر بإتهامة أنه قليل الأدب وما شابه حتى وإن كان ذلك الشخص كثير الصمت ومتواضعا وسائرا في دربه.
بينما ترى شخصية هؤلاء الذين يتهمون غيرهم يعيشون الإغتراب الواقعي مع أدنى المستويات الأخلاقية، حتى مع من لهم حق عليه.

البحرين رجعت لأيام الجاهلية..
الرجال بدينه وأخلاقة.. لكن للأسف ينظرون لفلوسه وراتبه قبل كل شي.. ياما شباب جامعيين لكن ثقافتهم وتفكيرهم تبن. والعكس البعض ثانوي أو أقلولكن عقله يوزن ديرة.
مجتمعنا للأسف يسأل عن ماركة الحذاء قبل العقلية والدين.
البنت دراستها أقل من الرجال ماعليه! لكن العكس لأ! شنو هالمجتمع!
لكن الواقع أحيانا يفرض التدخل.. ومثل ما الكل يشوف.. برامج التواصل تظهر العصفور في مظهر أسد والعكس.. والبنت يمكن تعجب في واحد من الانستقرام وغيره.. وهذا ما يعكس شخصيته بتاتا..

سؤال ويش يخليها تتعلق الة تصر تاخذه؟؟!؟! رغم الفارق الثقافي

كل واحد حر، شخص متعلم ماخذ جاهل، أو غني ماخذ فقير أو حلو ماخذ جيكر محد له شغل يتكلم إلا اذا واحد ملتزم بياخذ شخص فاسق.

ما تعرف/ين البنات؟! لين عاندت وشي داخل راسها تسويه تسويه

ما في واحد الحين خريج ثانوي وعقله يوزن ديرة إلا لو المعيار عندك مختلف.. على الأقل لو خريج معهد! التعليم ينعكس على الأخلاق والتعامل (طبعا مو دائما) بس التعليم ليه دور في زراعة الثقة وبالتالي التنشئة السليمة وغرس الطموح للمستقبل..

اتمنا نقاش قضية الارث

انا لا اعتقد ان هذا العرف موجود الان

ما له شغل يتدخل اذا هي وولي أمرها موافقين. أهم شي الخلق والدين.
أنا الوالدة أمية والأب ما كمل إعدادي والحمدلله كلنا جامعيين وغالبيتنا دراسات عليا.

تتحجى عن العصر اللي كانو فيه الناس يصيرون مدرسين وهم خريجين إبتدائي .. وما في أحد ما راح الكتاب تعلم .. يعني في النهاية تعلمو .. لا تخلظ بين زمانهم وزمانا .. الحين خريج الإعدادي غالبا يمشي تيلر ويشرب جقارة...

معقولة ان لازال يوجد عوائل بهذي العقليات ...!!!؟؟؟

رغم ان الحكم على مثل هذه الحالات ليس بالامر الهين.. الا ان احد اهم عوامل نجاح الزواح هو التكافؤ بين الطرفين... والتكافؤ المادي والعلمي والاجتماعي عناصر مهمة جدا... وبدونها يبقى الزواج في مهب الريح مع ابسط الخلافات.

تزوجت لو بعدك ياحرام ؟