جدالحاج - محمد الجدحفصي

التقى برنامج «الناصية» الذي يبث على «الوسط أون لاين» اليوم (السبت) في حلقته هذا الأسبوع الحاج عبدالله إسماعيل الذي يجلس عادة أمام مدخل قرية «جدالحاج» وبرفقته الحاج طاهر الجنوساني وآخرين يتناولون أطراف الحديث فيما بينهم... جلسنا مع الحاج تجاذبنا أطراف الحديث عن ذكريات الماضي، فكان هذا اللقاء:

* نبغي نسولف وياك ونصورك حق برنامج عدنا في «الوسط» اسمه «الناصية»...

الحاج: ويش احجي ويش اسولف؟ تشوفني هذا أنا قاعد هني صوب هالمسجد.

* انزين ممكن تشرح لينا سبب تسمية «جدالحاج» بهذا الاسم؟

الحاج: هذا الله يسلمك جدالحاج كانت مقصد الحجاج اول، يعني اللي يبغي يروح الحج يجي هني، وعشان چدي سموهّا جد الحاج.

* يعني كانت الفرضة هني؟

الحاج: اي، وكانت الرقعة في كرانة.

* حجي عبدالله اسمح لي بهذا السؤال... أنا أشوف الكل من بحرينيين، أجانب، نسوان، رجال، جهال... كلهم يسلمون عليك، وهذا الشي أثار استغرابي وخلاني أسألك عن السبب؟

(يتحدث هنا السيد الذي يجلس بجواره): شوف المنهج اللي يمشي عليه الحين حجي عبدالله مثل المنهج اللي مشى عليه ابوه بالضبط، انا تقريبا قبل 20 سنة أو اقل أكثر شفت ابوه نفس المواصفات التي تشوفها في هذا شفتها في ابوه، نسخة ثانية من ابوه بالضبط، عنده كل الناس زينين. اي ما عنده هذا طاف ما سلم أو هذا حقود.

الحاج: هو يقول لي انت ليش چدي كلمن يطوف تسلم عليه، هذي سنة رسول الله.... الامام الحسن سلام الله عليه وش قال؟

* سولف لينا عن شهر رمضان؟

الحاج: الأول كهرباء ما فيه، وماي ما فيه، وتنام على حصير مو نفس الحين، والاول التمر ما يجيبونه في نايلون من السعودية، اجيبونه بقروف من العراق وصوب البصرة، تمر اول، يجيبونه في لنجات الفرضه العتيقه.

الجنوساني: الأول في رمضان يدور المسحر عنده طبل قبل الاذان يدور حق الناس علشان تسحر، وبعد ما يدور المسحر يسحرون العالم يتسحرون باللي الله يكتبه وبعدين ينامون، يفطرون المغرب على الاذان هالشكل، بس حياة الاول احسن من الحين، أول الناس ما في اجانب بكثرة ألحين، الاجانب وايد زايدة، الشوارع ما تقدر تمشي فيها، الحين يعني صار ضغط على العالم ضغط مو نفس الاول، الأول الحياة كل إنسان على قد حاله بس الحياة أحسن من الحين، في الأول فقر شوي بس يتراوى لي الحياة احسن اول ليس نفس الحين، الحين كلشي غلى وكلشي غالي أول چيس العيش بكم إذا 4 دينار هندية أول عملتنا هندية اهني ربية هندية، چيس الشكر رخيص، ربعة الصافي 4 ربيات، أول ربعة كل ربية هندية، أول الحياة احسن، عدنا الأول احسن، لا في ضغط نفس الحين لا في جور نفس الحين أول احسن، أول عايشين الناس اكثرهم على الزرايع والبحر.

الحاج: (الشاعر) حجي سلمان الله يرحمه يقول:

أحمد بن عبدالغفار خلى الخلق محتاره

لول يدور بسيكل والحين بسياره

شوف اراويك انا وافيت يم البيبان

قالي اسكت يا سلمان باچر اتروح الشدان

قاله الشدان توديني وزيادة ما تعطيني

(ويشرح الحاج): افصل عليك، قاله لا لا تقص علي بالله، قاله وش تبه حجي سلمان، قال اتسوي لي مثلات لا تظلمني الناس الكفار وحنا اوادم مثلك، أول اتدور بسيكل والحين عطوك السيارة اتسوي فينا چدي.

* قول لنا شعر غير حجي... شكلك تعرف اشعار؟

الحاج: يقول:

جيت من الجبل وسمعت انا الصوله انا الجوله

وتعرفوني شديدة الباس واسوي القهوة اللي اطيب الانفاس

انا الجولة انا الصوله كل الناس اعرفوني

شنو السبب شبت الجولة.

الجنوساني: واسمع هذي، «شفر ليت» السيارة أول يسمونها «شفر ليت» يقول واحد:

شفر ليت اخذتك وابتليت

بعت البقر والغنم كله على شانك يا شفر ليت.

* أول في الناصفة وين تروحون في ايامكم؟ واذا في شعر عليها واجد زين؟

الحاج: لا ما فيها شعر، الناصفة الأول يا ولدي يحملون قفة، الحين يحملون اكياس، قفة ويحطون فيها حلاوة، سكسبال وينهبونه، واتم بدون قرقشون، هذا الأول.

* نزين علمنا سالفة الانجليزي اللي صارت وياك هذيك السنة؟

الحاج: اللعام انا واقف ويا واحد انجليزي اشرت عليه ووقفت اسولف وياه، واللا ويايي جه سيده سب لنجليزي، فكر لنجليزي ما يعرف عربي، لا يعرف عربي، لا تشبق وتهبق وبس، أول ثمّن وتالي تكلم لان الكلام الغلط ممنوع لا تغلط وبس، الا يقول الانجليزي لو ما عشانك هذا ما دلى طريق، هذا سيده ايجودونه وهو مكانه، لكن علشانك انت شايب خليته، ويقول كنت اعرف وش قال لي، اياك تغلط ولا في مكان، صير عاقل، الوزنه هذه لازم توزنها، وين تروح الكلمة الميزان يصير شريف، ما يصير تغلط على الانسان.

الجنوساني: لأن اخلاقك زينة وطيبك زين لا زم چدي.