لو انك يا زماني قدر ما تسلب تكون أعطيت

رضيت وقلت كأنه شر خيري في مقابيلي

لكن السالفه متخالفه والهم سوّى بيت

يمرجحني على كيفه وانا في معمعة ويلي

ما دام العاقبه جتني كذا يا ليتني ما جيت

لذاك الدرب لي بعده تبهذل حالي وحيلي

ألا يا وقتي المغرور وش خليت وش بقيت

تركت الناي يبكي عازفه، يا ما اطوله ليلي

وعيّشت الشقي عيشة لعل ويا عسى ويا ليت

يا ليت الوقت يصفى له ولعل الوقت يصفي لي

وأنا الأوضاع دارسها على كل البحوث أجريت

ولكن ما نفع بحثي ولا فادت تحاليلي

ولو أزريت من باكر لأجل باكر ما أقول أزريت

ما أقول إلا عسى صوعي يفكّه بنيّ وهيلي

لو انك يا زماني قدرما تأخذ تكون أعطيت

قنعت وقلت لو ضاقت فرجها في مقابيلي