لعنبُو شعرٍ بليدْ شعُور من ساسهْ لراسهْ

ولعنبُو شعرٍ تحسّ انه خَدَرْ ليمنْ قريتهْ

ولعنبُو شعرٍ يحيلْ افراحْ دنياك لتعاسهْ

ولعنبُو شعرٍ يهدّ بيوتْ لاجل يشيدْ بيتهْ

وِشْ تفيد العنترهْ في وقتْ يغتالْ الحماسهْ؟؟

مرّةٍ يطفيكْ في لحظةْ شره ليمْن ضويتهْ

ومرّةٍ يرضعك بآمالٍ تجي من أمْ ياسهّ

إن فردْتْ الحلمْ في لحظةْ صفا والاّ ثنيتهّ

ذوُق مرّه... واكسرهْ يا سيدي... صَبْر وشراسهْ

إن ذكرت الياس في لحظة رضا والا نسيتهْ

لو صفعك الياسْ ضمّه غيضةٍ لك ثم باسهْ

لعنبُو شكلك رفعت اللِّي وطيتهْ ثم وطيتهْ

روحْ يالشعر العبث مالي معك هرج ووناسهْ

كل هرجْ ومسخرهْ ومزُوحْ... كل ترفٍ سليتهْ

أشهد اني بك غديت خبيل معدوْم الفراسهْ

كلما قلت انتهى المشوارْ في لمح ابتديتهْ

روح يالشعر الغبي هالكونْ باشياءه وناسهْ

كما غواك وكم حواكْ وكنتْ تتوهْم حويتهْ