عقول الصائمين في شهر رمضان عادة ما تكون مشغولة بأمور مختلفة، وذلك بلاشك يعتمد على مستويات تفكير تلك العقول وميولها الشخصية… وفي أول مقال لي في هذا الشهر الفضيل أحببت أن أستعرض معكم عددا من الرسائل التي وصلتني من عدة أشخاص سواء المكتوبة أو الشفهية التي تعبر بطرق مختلفة عن مدى فرحتهم بهذا الضيف الكريم، فاخترت لكم أجمل تلك التعليقات:

- أبو عبدالله (موظف قطاع خاص): كل إللي يعرفني يعرف هوسي بالتلفزيونات... أنا هذي السنة بالذات دخلت جمعية مخصوص علشان «تلفزيون رمضان» واشتريت «بلازما» 42 بوصة من العروض إللي بواحد من محلات الإلكترونيات، كل هذا علشان إذا قعدوا عيالي عند التلفزيون ما تفوتني ولا لقطة من المسابقات، وهم علشان كل إللي بالبيت يقدر يشوف الصورة بدون ما يغطي عليه رأس أي واحد من العيال.

- جعفر: أنا أحب شهر رمضان واجد، وبصراحة المسلسلات ما تحلى إلا في هذا الشهر... بس المشكلة هذي السنة 115 مسلسلا خليجيا، هذا غير السوري والمصري، احنا نطالع شنو ونخلي شنو، بس الله يخلي القنوات إللي تحط إعادات.

- أم محمد: كل سنة أحب قبل رمضان أنظف مطبخي، وأجهز «المواعين» إللي أحتاجها أكثر شيء في رمضان مثل قدر الهريس، و «المضرب»، وإذا ناقص شيء أحدد لي يوم وأروح أشتري الناقص... بيني وبينكم إذا رحت أشتري الناقص أشتري أشياء ما أحتاجها ولكن عجبتني... الناس تقول ليش تشترين صحون جدد... ما عندكم؟!، أقول: لا عندنا بس الجديد حلو والأكل فيه أحلى... أحب أشتري خضار مثل القرع، الكوسة، البامية وأقصصها وأخزنها في الثلاجة علشان تكون جاهزة للثريد.

- عباس: طول السنة ما تحس بأن لك أهل إلا في رمضان، والله على ليالي رمضان، شخصيا أفضل زيارة أهلي والسوالف في المجالس، ودورات كرة القدم اللي تصير في رمضان... بيتنا يصير عامر من الناس ومن الأكل بعد ما شاء الله، كل هذا بفضل رب العالمين.

- أم ندى: صوت «الدرس» (قراءة القرآن) أحلى شيء أحب أسمعه في رمضان، ما أفضل أن الواحد يضيع شهر الله في التلفزيون والتنقل من مسلسل لمسسل، حتى ما يعجبني أقعد مع ناس ما عندهم كلام إلا في المسلسل الفلاني ويش صار، أفضل أقعد في المطبخ وأقابل «القدور» أحسن من القعدة وياهم.

- كوثر: صراحة أحب رمضان، وأحب أطبخ، بس الواحد يضجر من غسال «المواعين»... يا بخت من كان في بيتهم خدامة.

- مريم (9 سنوات): رمضان السنة أحلى شي، أولا لأن ما في مدرسة، وثانيا أني أول سنة أصوم، معنى هذا بقضي اليوم في النوم علشان ما أحس بالجوع.

- زين الدين (عامل آسيوي في محل بيع أواني): رمضان هذا واجد زين، السنة احنا نبيع واجد... أكثر شي ماما وبابا يشتري صحون ومضرب هريس وقدور.

هذه آراء مجموعة مختلقة من العقول التي تعيش بيننا، ترى كيف تعبرون أنتم عن فرحتكم وأنسكم بهذا الشهر الكريم... وكل عام والجميع بخير.