ما باقي إلا خمس. .. قبل أربعيني

وبالاربعين الرجل يبلغ أشده

ما باقي إلا خمس... عينك بعيني

ماني بسامحلك لو بنصف لده

يعني ليا استرسلت لا تقاطعيني

طبعي وراضي فيه لو فيه حده

ما جيت متنثر وأقول: اجمعيني

ولا جيت دكتاتوري أهل الموده

ولا جيت لك طايح وأقول: ارفعيني

عاشق متيم دمعته فوق خده

جايك بحلمي علم واستطلعيني

يقلون: حلم تفتخر فيه بده

إيه افتخر... وأنتي بعد شجعيني

تدرين ما احلم حلم ماني بقده

هذه يديني للأمام ادفعيني

من فوق ضميني إليكي بشده

وعلى الشفاة المترفات اطبعيني

ونه لمن قاسى سنين المكده

ومن بين ضحكات الصغار اسمعيني

صوت تداعى بين مزحه... وجده

وبقلوب عشاق الغرام ازرعيني

همسات يفشيها حديث المخده

ومن فوق هامات البها ولعيني

مادمت واهب لك من العمر امده

وهزيني اتساقط رطب واقدعيني

على حدود رموشك المستبده

وإليا حصل لي ما حصل بايعيني

واوعدك مجد ضاع لك لا سترده

لا تسرحين بعيد... عينك بعيني

تدرين ما احلم حلم ماني بقده