كبيرة دمعة المقهور وأكبر. ..

دمعة اللي في القهر رابي

أنا شبيدي عليل تروح، وتتركني

أهوجس في ظلام البيت

غزاله ضيعت في طلعة الصياد

ضناها، والقمر خابي

انا شبيدي، يا جرح ما بعد يبرا،

إذا نزلت عليك جروح

تريد تروح، وتخلي الألم

وحده يتمخلى بي

تريد تروح، وتغير،

تريد الناس غير الناس، يا وليدي،

يا ضي العين

يا مشخص هل البحرين

ترى بتتعب...

ولا بتحصد ثمار الشوك إلا الشوك

كثير طيبة الطيبين...

وياما بلاد حلوه بين البلادين...

كثير دروب تاخذ خطوتك وتييب،

ولكن ما بتلقاني

الملم كل عشق لسنين

واتبرا من ثيابي،

ولا بتلقى مثل طيبة هلك في الناس

ولا يعوضك في الوطن ثاني

على كيف الهوى شرع

وروح بعيد أو كرب

أنا ياما زرعت ف مهجتي أشجار

شحيح الماي يسقيها ويرويها

وكم ربيت قبلك في العشق دانات

ما ضاع الربه فيها

على كيفك،

حليبك...

لازم ييبك،

وكل دروبك تردك إلى بابي

أنا شبيدي عليك تروح وتتركني

أجاسي حرقتي واصبر على ما بي

أنا أقدر أغالب في البعد جرحك

واخلي العين تضحك للملا، والقلب ما يدمع،

وأقول للناس: مهما غاب أو طول،

ترى بيرجع،

ولكن ما بتلقاني

ألملم كل عشق لسنين

واتبرا من ثيابي

وإذا مال الزمان وشحت الدنيا

أروح أرهن لك شغابي

أشم ريحة هلي

وابقى على ترابي